.jpg)
ប្រតិភូរបស់សហភាពអឺរ៉ុប ចុះបេសកម្មមកប្រទេស កម្ពុជា កាលពីខែមីនា។ ហុង មិនា
ភ្នំពេញៈ បេសកកម្មស្វែងរកការពិតរបស់សហភាពអឺរ៉ុប ត្រូវបានស្វាគមន៍ដោយក្រសួងការបរទេសនិងសហប្រតិបត្តិការអន្តរជាតិ កាលពីថ្ងៃចន្ទ ហើយបានបើកកិច្ចប្រជុំត្រៀមមួយ ជាមួយតំណាងមកពីក្រសួងនានាកាលពីថ្ងៃអង្គារម្សិលមិញនៅក្រសួងការបរទេស។
ប្រភពមួយដែលដឹងអំពីដំណើរទស្សនកិច្ចនេះថ្លែងថា ភាគីទាំង ២ បានជួបប្រជុំគ្នា កាលពីព្រឹកថ្ងៃអង្គារ ដើម្បីបញ្ជាក់អំពីកាលវិភាគនៃកិច្ចប្រជុំផ្សេងៗ ជាមួយក្រសួងផ្សេងៗ។ លោកបានថ្លែងថា ដំណើរទស្សនកិច្ចសំខាន់បែបនេះតម្រូវឲ្យមានការរៀបចំល្អបំផុត។ លោកថ្លែងថា ឆន្ទៈរបស់រដ្ឋាភិបាល គឺដើម្បីបង្ហាញអំពីការខិតខំរបស់ខ្លួនក្នុងការបំពេញតាមលក្ខខណ្ឌតម្រូវរបស់សហភាពអឺរ៉ុប។
អ្នកនាំពាក្យក្រសួងពាក់ព័ន្ធ និងអង្គការក្រៅរដ្ឋាភិបាលពាក់ព័ន្ធ បានបញ្ជាក់កាលបរិច្ឆេទដែលពួកគេនឹងជួបជាមួយគណៈប្រតិភូសហភាពអឺរ៉ុប។ បើយោងតាមពួកគេបានឲ្យដឹងថា គណៈប្រតិភូសហភាពអឺរ៉ុប នឹងជួបជាមួយអង្គការក្រៅរដ្ឋាភិបាលនៅថ្ងៃពុធនេះ ជួបជាមួយលោក ប្រាក់ សុខុន រដ្ឋមន្រ្តីក្រសួងការបរទេស និងក្រសួងរៀបចំដែនដី នៅថ្ងៃព្រហស្បតិ៍ ជួបជាមួយក្រសួងមហាផ្ទៃ និងក្រសួងការងារ និងបណ្តុះបណ្តាលវិជ្ជាជីវៈនៅថ្ងៃសុក្រ។ គណៈប្រតិភូនឹងធ្វើដំណើរទៅខេត្តកំពង់ស្ពឺ នៅថ្ងៃសៅរ៍ ហើយពួកគេនឹងមាន កិច្ចប្រជុំបូកសរុបនៅថ្ងៃអាទិត្យនិងថ្ងៃចន្ទ។
លោក George Edgar ឯកអគ្គរដ្ឋទូតសហភាពអឺរ៉ុបប្រចាំកម្ពុជា បានបដិសេធធ្វើអត្ថាធិប្បាយលម្អិតអំពីដំណើរទស្សនកិច្ចរបស់គណៈប្រតិភូនេះដោយថ្លែងថា លោកនឹងបូកសរុបនូវអ្វីដែលបានពិភាក្សានៅពេលបញ្ចប់ដំណើរទស្សនកិច្ច។
សហភាពអឺរ៉ុប បានចាប់ផ្តើមនីតិវិធីដកគម្រោងអនុគ្រោះពន្ធ សម្រាប់ការនាំចូលទំនិញគ្រប់យ៉ាងលើកលែងតែសព្វាវុធ (EBA) ជាផ្លូវការ កាលពីថ្ងៃទី ១២ ខែ កុម្ភៈ ដោយលើកហេតុផលពីការ «រំលោភបំពានធ្ងន់ធ្ងរលើសិទ្ធិមនុស្ស សិទ្ធិការងារ សេរីភាពនៃការប្រមូលផ្តុំ និងដំណើរប្រជាធិបតេយ្យដើរថយក្រោយ» ក្នុងប្រទេស កម្ពុជា។
លោក សុឹង សែនករុណា អ្នកនាំពាក្យអង្គការសិទ្ធិមនុស្សអាដហុក បានថ្លែងថា លោកមិនមានសុទិដ្ឋិនិយមខ្លាំងថា សហភាពអឺរ៉ុប នឹងរក្សា EBA សម្រាប់កម្ពុជាទេ នៅពេលអ្វីដ៏តិចតួចត្រូវបានធ្វើដោយបំពានតាមការតម្រូវរបស់សហភាពអឺរ៉ុប។
លោកបានថ្លែងថា៖ «រដ្ឋាភិបាលឥឡូវនេះ និងជាថ្មីម្តងទៀត បានច្រានចោលការអះអាងរបស់សហភាពអឺរ៉ុប អំពីការរំលោភបំពានសិទ្ធិមនុស្សក្នុងប្រទេសកម្ពុជា។ ការបដិសេធនេះ មិននាំមកនូវភាពវិជ្ជមានសម្រាប់កម្ពុជាទេ ហើយប្រសិនបើពួកគេមិនទទួលយកការពិត យើងបារម្ភថា កម្ពុជានឹងបាត់បង់ EBA»។
លោកបានថ្លែងបន្តថា៖ «ប្រសិនបើរដ្ឋាភិបាល មិនដោះស្រាយបញ្ហាដូចដែលសហភាពអឺរ៉ុបបាននិយាយផលវិបាកគឺថា កម្ពុជានឹងប្រឈមនឹងវិធានការពីសហភាពអឺរ៉ុប ហើយកម្ពុជានឹងបាត់បង់ពាក់ព័ន្ធនឹងពាណិជ្ជកម្មជាមួយសហភាពអឺរ៉ុប»។
ទោះយ៉ាងណា លោកសង្ឃឹមថា សហភាពអឺរ៉ុប នឹងខិតខំឲ្យអស់ពីសមត្ថភាពដើម្បីធ្វើឲ្យរដ្ឋាភិបាលកម្ពុជាទទួលយកលក្ខខណ្ឌតម្រូវនិងដោះស្រាយបញ្ហា៕
