.jpg)
មន្ត្រីជំនាញក្នុងពេលពិនិត្យគ្រាប់បែកថ្មីៗនេះ។ CMAC
កំពង់ស្ពឺ/ព្រៃវែង: គ្រាប់បែកទម្លាក់ពីយន្តហោះប្រភេទ MK82 ចំនួន ២ គ្រាប់ ត្រូវបានពលរដ្ឋប្រទះឃើញនៅទីតាំង ២ ផ្សេងគ្នាក្នុងដីរបស់ខ្លួន ខណៈកំពុងយកគ្រឿងចក្រកាយដី ដោយ ១ គ្រាប់ ឃើញនៅឃុំអូរ ស្រុកភ្នំស្រួច ខេត្តកំពង់ស្ពឺ និង ១ គ្រាប់ទៀតនៅឃុំកំពង់សឹង ស្រុកព្រះស្តេច ខេត្តព្រៃវែង។
លោក ហេង រតនា អគ្គនាយកមជ្ឈមណ្ឌលសកម្មភាពកំចាត់មីនកម្ពុជា (CMAC) បានថ្លែងកាលពីម្សិលមិញថា នៅថ្ងៃទី ២៧ ខែ ឧសភា មន្ត្រីជំនាញជាតិផ្ទុះបានបោសសម្អាតគ្រាប់បែកទម្លាក់ពីយន្តហោះប្រភេទ MK82 ចំនួន ២ គ្រាប់នៅទីតាំង ២ ផ្សេងគ្នាគឺ ១ គ្រាប់នៅឃុំអូរ ស្រុកភ្នំស្រួច ខេត្តកំពង់ស្ពឺ កប់ដីជម្រៅជិត ៨ ម៉ែត្រ និង ១ គ្រាប់ទៀតស្ថិតនៅឃុំកំពង់សឹង ស្រុកព្រះស្តេច ខេត្តព្រៃវែង ដោយកប់ក្នុងដីជម្រៅជាង ៤ ម៉ែត្រ បន្ទាប់ពីពលរដ្ឋរាយការណ៍ពីការប្រទះឃើញ។
លោកបញ្ជាក់ថា៖ «ឥឡូវនេះ មន្ត្រីជំនាញយើងបានដោះ និងបន្សាបជាតិផ្ទុះរួចរាល់ ព្រមទាំងបានយករក្សាទុកនៅទីតាំងមានសុវត្ថិភាព ហើយមិនមានគ្រោះថ្នាក់អ្វីដល់ពលរដ្ឋយើងទេ។ យើងនៅតែជំរុញឲ្យពួកគាត់ចូលរួមជាមួយយើង បើបានប្រទះឃើញហើយ សូមរាយការណ៍មកសមត្ថកិច្ចជំនាញ ចៀសវាងបង្កហានិភ័យ»។
លោក កៅ ប៊ុនថន អធិការនគរបាលស្រុកភ្នំស្រួច ខេត្តកំពង់ស្ពឺបានឲ្យដឹងថា ពលរដ្ឋម្នាក់ឈ្មោះ អ៊ួង សុភ័ណ្ឌ ភេទប្រុស អាយុ ៣៨ ឆ្នាំ កាលពីថ្ងៃ ២៧ ឧសភា បានយកគ្រឿងចក្រកាយដីធ្វើស្រះក៏ប្រទះឃើញគ្រាប់ MK82 មិនទាន់ផ្ទុះ ១ គ្រាប់ទម្ងន់ ២៤១ គីឡូក្រាម ប្រវែង ១៦៨ សង់ទីម៉ែត្រ ទំហំ ២៧៥ មិល្លីម៉ែត្រដែលទម្លាក់ពីយន្តហោះក្នុងសម័យសង្គ្រាម នៅភូមិកូនត្រុំ ឃុំអូរ ស្រុកភ្នំស្រួច ខេត្តកំពង់ស្ពឺ។
លោកបន្តថា បន្ទាប់ពីប្រទះឃើញគ្រាប់មិនទាន់ផ្ទុះដ៏ធំនេះកម្លាំងអធិការដ្ឋាននគរបាលស្រុកភ្នំស្រួចបានសហការជាមួយអង្គភាពកំចាត់មីនកម្ពុជា (CMAC) ចុះមកយកគ្រាប់នោះទៅបន្សាប និងទុកកន្លែងសុវត្ថិភាព។
លោកបានបញ្ជាក់ថា៖ «នៅស្រុកភ្នំស្រួចខ្ញុំនេះ ធ្លាប់ប្រទះឃើញតែគ្រាប់បែកតូចៗមិនដែលឃើញធំបែបនេះទេ ហើយក៏មិនដែលបង្កគ្រោះថ្នាក់ដល់ពលរដ្ឋដែរ ព្រោះយើងបានផ្សព្វផ្សាយតាមមូលដ្ឋានកុំឲ្យពលរដ្ឋគាត់ប៉ះពាល់ បើបានឃើញ ត្រូវរាយការណ៍មកសមត្ថកិច្ចជំនាញ ដោះបន្សាបវា ចៀសវាងបង្កគ្រោះថ្នាក់»។
លោក សួន ធឿន ប្រធានសេនាធិការនៃអធិការដ្ឋាននគរបាលស្រុកព្រះស្តេចបានថ្លែងកាលពីម្សិលមិញថា គ្រាប់បែកប្រភេទ MK82 មួយគ្រាប់ ដែលគេទម្លាក់ពីលើយន្តហោះចម្បាំងត្រូវបានពលរដ្ឋប្រទះឃើញកាលពីថ្ងៃទី ២៧ ឧសភា ក្នុងដីជម្រៅប្រហែល ៤ ម៉ែត្រ ខណៈពលរដ្ឋបានយកត្រាក់ទ័រកាយដី ១ កន្លែងក្នុងភូមិព្រៃខ្លា ឃុំកំពង់សឹង ស្រុកព្រះស្តេច ខេត្តព្រៃវែង។
លោកបន្តថា ក្រោយពីឃើញស្ថានភាពគ្រាប់នោះ មន្ត្រីជំនាញប្រាប់ថាវាមានក្បាលផ្ទុះខាងមុខ និងខាងក្រោយ ប៉ុន្ដែត្រូវបានមន្ត្រីជំនាញស៊ីម៉ាកដោះបន្សាបរួចរាល់ហើយដោយមិនមានបង្កគ្រោះថ្នាក់អ្វីដល់ប្រជាពលរដ្ឋទេ «កន្លងមកនៅស្រុកខ្ញុំនេះ អត់ដែលប្រទះឃើញគ្រាប់អ៊ីចឹងទេ ហើយអាជ្ញាធរយើងក៏ធ្លាប់បានផ្សព្វផ្សាយពីផលប៉ះពាល់គ្រាប់មិនទាន់ផ្ទុះដែរ ដូចករណីនេះអីចឹង គឺពលរដ្ឋគាត់ឃើញគឺគាត់រាយការណ៍មកសមត្ថកិច្ចភ្លាម»។
ចាប់តាំងពីឆ្នាំ ១៩៩២ អាជ្ញាធរមីន និងប្រតិបត្តិករជាង ១០ ផ្សេងទៀតបានរួមគា្នរំដោះដីដែលមានមីន និងគ្រាប់យុទ្ធភណ្ឌមិនទាន់ផ្ទុះចំនួន ១ ៨២៣ គីឡូម៉ែត្រការ៉េ និងជួយរំដោះមីនលើដីរបស់ពលរដ្ឋចំនួន ៤ ៣២០ គ្រួសារ ដោយមានប្រទេសម្ចាស់ជំនួយ ដូចជា ជប៉ុន សហរដ្ឋអាមេរិក អង់គ្លេស អូស្ត្រាលី កាណាដា ស្វ៊ីស ន័រវែស សហគមន៍អឺរ៉ុប អាល្លឺម៉ង់ ចិន បារាំង ដាណឺម៉ាក នូវែលសេឡង់ និងប្រទេស ១ ចំនួន ទៀត។
តាមសេចក្ដីប្រកាសព័ត៌មានរបស់អាជ្ញាធរមីនចុះថ្ងៃ ១៥ មីនាឆ្នាំនេះបានឲ្យដឹងថា ថ្មីៗនេះអត្រាគ្រោះថ្នាក់ដែលបណ្ដាលមកពីការផ្ទុះមីន និងគ្រាប់ មានការកើនឡើងគួរឲ្យកត់សម្គាល់។
ចាប់ពីខែមករាដល់ថ្ងៃទី ៤ ខែ មេសា ឆ្នាំ ២០១៩ មានជនរងគ្រោះស្លាប់ ពិការ និងរបួសដោយសារគ្រាប់មីន និងគ្រាប់មិនទាន់ផ្ទុះសរុបចំនួន ៤៤ នាក់ ក្នុងនោះមានជនរងគ្រោះនៅខេត្តឧត្តរមានជ័យ បាត់ដំបង រតនគិរី ត្បូងឃ្មុំ និងខេត្តមួយចំនួនទៀត៕
