ភ្នំពេញៈ ប្រធានគណៈកម្មាធិការជាតិរៀបចំការបោះឆ្នោត (គជប) បានបង្ហាញការមិនសប្បាយចិត្តជាមួយនឹងទីតាំងថ្មីរបស់ស្ថាប័នរៀបចំការបោះឆ្នោតមួយនេះដែលនៅជាប់ជាមួយអគារកាស៊ីណូ Naga World ហើយថាលោកនឹងជួបពិភាក្សាជាមួយក្រុមហ៊ុនកាស៊ីណូដ៏ធំនេះ ដើម្បីដោះស្រាយបញ្ហាមួយចំនួន។
ប្រាប់អ្នកកាសែតក្នុងកិច្ចប្រជុំជាមួយភាគីពាក់ព័ន្ធក្នុងការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ ២០១៨ ពីម្សិលមិញលោក ស៊ិក ប៊ុនហុក ប្រធានគណៈកម្មាធិការជាតិរៀបចំការបោះឆ្នោតថ្លែងថាលោកមិនពេញចិត្តអគារ គ.ជ.ប. ថ្មីដែលសាងសង់ជើងសសរជាប់នឹងក្រុមហ៊ុនកាស៊ីណូ ណាហ្គានោះទេ។ លោកថាអគារថ្មីនេះមិនមែនជាជម្រើសរបស់លោកទេ ហើយថាច្រកចេញចូលក្នុងអគារ គ.ជ.ប. មិនទាន់រៀបចំឲ្យបានរៀបរយនៅឡើយទេ។
លោកបញ្ជាក់ថា៖ «កន្លែងល្បែងមិនមែនកន្លែងស្រួលចិត្តទេ។ វាជាកន្លែងដែលគេឈ្នះចាញ់...វាមិនស្រួលទេវាមានសម្ពាធ។ អារម្មណ៍យើងមិនស្រួលទេ។ វាគួរតែនៅកន្លែងណាដែលវាស្រឡះមានតែឯងរឿងនេះគឺជារឿងទៅមុខទៀត តែឥឡូវនេះរំដោះពីកន្លែងខ្ចីគេមកសិន (កន្លែងចាស់ក្រសួងមហាផ្ទៃ)»។
លោកបន្ថែមថា៖ «ស្មានតែដោះងាយចេញ ទម្រាំបានអគារថ្មី តើប៉ុន្មានឆ្នាំ? វាមិនងាយស្រួលទេដូច្នេះហើយវាត្រូវតែដំណើរការសិន។ យើងមានប៉ុនណា យើងប្រើប៉ុណ្ណឹងឲ្យអស់លទ្ធភាពហើយយើងរៀបចំគ្រប់គ្រងឲ្យបានល្អប្រសើរដែលយើងអាចធ្វើទៅបាន»។
លោកបន្តថាកន្លងមកនេះកន្លែងផ្លូវច្រកចេញចូលនេះជាកម្មសិទិ្ធរបស់ គ.ជ.ប. ទេ ប៉ុន្តែខាង ណាហ្គា ស្នើជួលដីដើម្បីឆ្លងចូល។
លោកសង្កត់ធ្ងន់ថា៖ «ធម្មតាដីត្រូវមានច្រកចេញចូលហើយគេសុំការប្រើប្រាស់រួមដូច្នេះហើយបានជាមានការប្រើប្រាស់រួមគ្នាទៅ...ហើយពេលដែលយើងមកបោះទីតាំងដែលយើងទើសភ្នែកខ្លាំងហ្នឹងអាបឹសមួយគូ (ឡាន) មកចតនៅចំពីមុខអគារ គ.ជ.ប. ហើយខ្ញុំថាងាប់កន្លែង គ.ជ.ប. នេះគឺកន្លែងណាហ្គាសុទ្ធ»។
លោកសង្កត់ធ្ងន់ថា៖ «អ៊ំថា អ៊ំមិនអាចទទួលយកបានទេពីព្រោះនៅពីមុខតាមធម្មតាកាលណាផ្ទះយើងនៅទីណា អាដីនៅលើចិញ្ចើមថ្នល់វាគឺជារបស់យើង។ ឥឡូវឃើញគេបានដាក់ចេញទៅហើយចាំជជែកគ្នាជាមួយនឹងម្ចាស់ណាហ្គានៅពេលដែលគាត់ត្រឡប់មកពីប្រទេសរុស្ស៊ីវិញ»។
លោក សន ជ័យ ប្រធានអង្គការសម្ព័ន្ធគណនេយ្យភាពសង្គមកម្ពុជាថ្លែងថា៖ «ជាទស្សនសង្គមវិញអគារស្ថាប័ន គ.ជ.ប. ដែលច្បាប់ថាជាស្ថាប័នឯករាជ្យ ហើយទៅនៅក្បែរកន្លែងលេងល្បែងស៊ីសង វាជាកន្លែងមួយមិនល្អ។ មិនស្រួលពេលគេដើរកាត់ហើយឃើញបុគ្គលិក គ.ជ.ប. គេស្មានតែអ្នកទៅលេងល្បែងស៊ីសងថាបានពីព្រោះវាកៀកគ្នាពេក ដូច្នេះវាមិនល្អទេពេលដែលស្ថាប័ននេះនៅក្បែរកន្លែងលេងល្បែងស៊ីសង»។
អគាររបស់ គ.ជ.ប ថ្មីកម្ពស់ ១៤ ជាន់នេះចំណាយទឹកប្រាក់ ១២ លានដុល្លារសហរដ្ឋអាមេរិកគឺសាងសង់នៅលើដីរបស់ក្រសួងវប្បធម៌។ ថវិកាសាងសង់អគារនេះបានមកពីថ្លៃជួលដីរដ្ឋឲ្យម្ចាស់សណ្ឋាគារ និងកាស៊ីណូរយៈ ៩៩ ឆ្នាំតម្លៃជាង ១៣ លានដុល្លារ។ ប្រាក់នៅសល់ជាង ១ លានដុល្លារបង្វិលឲ្យរដ្ឋាភិបាលវិញ៕