.jpg)
លោក សុខសុវណ្ណ វឌ្ឍនាសាប៊ុង ប្រធានគណបក្សខ្មែរក្រោក។ រូបថត ហ្វេសប៊ុក
កំពង់ឆ្នាំងៈ លោក សុខសុវណ្ណ វឌ្ឍនាសាប៊ុង ប្រធានគណបក្សខ្មែរក្រោក ដែលជាសមាជិកឧត្តមក្រុមប្រឹក្សាពិគ្រោះ និងផ្តល់យោបល់ដែលបង្កើតឡើងដោយរាជរដ្ឋាភិបាលក្រោយការបោះឆ្នោតឆ្នាំ ២០១៨ ពេលថ្មីៗកន្លងមកនេះបានស៊ើបអង្កេតរកឃើញភាពមិនប្រក្រតីរបស់លោក ឈួរ ច័ន្ធឌឿន អភិបាលខេត្តកំពង់ឆ្នាំងលើករណីរំលោភយកដីរដ្ឋមកធ្វើជាកម្មសិទ្ធិដែលបញ្ហានេះគ្រោងនឹងដាក់ជូនដល់លោកនាយករដ្ឋមន្ត្រី ហ៊ុន សែន ដើម្បីពិភាក្សានៅចុងសប្ដាហ៍ក្រោយ។
កាលពីខែសីហា ឆ្នាំ ២០១៨ លោកនាយករដ្ឋមន្ត្រីបានសម្រេចបង្កើតឧត្តមក្រុមប្រឹក្សាពិគ្រោះ និងផ្ដល់យោបល់ដែលមានសមាជិកមកពីគណបក្សដែលបានចូលរួមបោះឆ្នោតចំនួន ១៦ បក្សដើម្បីជាយន្តការមួយឆ្លើយតបជាមួយប្រជាពលរដ្ឋហើយពួកគេទាំងនោះមានតួនាទីក្នុងការត្រួតពិនិត្យការអនុវត្តច្បាប់។
ជាងនេះទៅទៀត ឧត្តមក្រុមប្រឹក្សានេះក៏មានតួនាទីចូលរួមផ្តល់យោបល់ដល់នាយករដ្ឋមន្ត្រីរាល់ភាពអសកម្មក៏ដូចជាការបំពានអំណាចពីសំណាក់ ចៅហ្វាយខេត្ត អាជ្ញាធរជាបុគ្គលរហូតដល់ថ្នាក់ជាតិជារដ្ឋមន្ត្រីក្រសួងដោយមានភ័ស្តុតាង ឬក៏មានតម្រុយដែលអាចឈានទៅរកការពិតបាន។
លោក សុខសុវណ្ណ វឌ្ឍនាសាប៊ុង បានប្រាប់ភ្នំពេញប៉ុស្តិ៍ឲ្យដឹងកាលពីម្សិលមិញថា លោក ឈួរ ច័ន្ធឌឿន បានរំលោភយកដីរដ្ឋចំនួន ៨ កន្លែងមានទំហំជាង ៥ ហិកតាធ្វើជាកម្មសិទិ្ធផ្ទាល់ខ្លួន ខណៈការរកឃើញនេះត្រូវបានអះអាងថា នឹងដាក់ជូនលោកនាយករដ្ឋមន្ត្រី ហ៊ុន សែន នៅចុងសប្តាហ៍ក្រោយ។
លោក វឌ្ឍនាសាប៊ុង បានអះអាងថា ដីរដ្ឋជាច្រើនកន្លែងដែលលោក ឈួរ ច័ន្ទឌឿន បានយកមកធ្វើជាកម្មសិទិ្ធផ្ទាល់ខ្លួនក្នុងនោះមានដី ៨ ទីតាំងជាដីអតីតតារាងបាល់ ដីបន្ទាយទាហានដែលស្ថិតក្នុងស្រុកទឹកផុស ខណៈដីទាំងអស់សុទ្ធសឹងជាដីរបស់រដ្ឋ ហើយក្នុងចំណោមដី ៨ ទីតាំងមាន ៧ ទីតាំងបានឃុបឃិតធ្វើប្លង់រឹង និងបានលក់មួយទីតាំងទៅឲ្យឈ្មោះ អ៊ុក រស់ ប្រធានមន្ទីររ៉ែ និងថាមពល ខេត្តកំពង់ឆ្នាំង។
លោកថ្លែងថា៖ «សរុបដីចំនួន ៨ ប័ណ្ ណរបស់លោកចៅហ្វាយខេត្ត គឺមានទំហំ ៥៦ ៩៦៦ ម៉ែត្រការ៉េ ឬជាង ៥ ហិកតា ដោយមិនទាន់គិតមួយប្លង់ជិតធនាគារអេស៊ីលីដា។ (ខ្ញុំ) កំពុងរៀបចំជារបាយការណ៍ដោយគ្រោងដាក់ជូនលោកនាយករដ្ឋមន្ត្រី ហ៊ុន សែន នៅចុងសប្ដាហ៍ក្រោយ»។
លោក សាប៊ុង បានថ្លែងថា៖ «យើងខ្ញុំមានឯកសារ ភ័ស្តុតាង គតិយុត្ត គ្រប់គ្រាន់សម្រាប់រៀបចំជារបាយការណ៍បញ្ជូនទៅប្រមុខរាជរដ្ឋាភិបាលដោយមិនបានបូកបញ្ចូលជាមួយដី ២០ ទីតាំងផ្សេងទៀតនៅតំបន់ព្រៃលិចទឹក តំបន់ត្រីពង និងក្នុងទីរួមខេត្តដែលជាដីរដ្ឋនោះទេ ព្រោះខណៈនេះយើងខ្ញុំកំពុងបន្តស្រាវជ្រាវស៊ើបអង្កេតបន្ថែមទៀត»។
យ៉ាងណាក៏ដោយ រដ្ឋបាលខេត្តកំពង់ឆ្នាំងបានចេញសេចក្តីបញ្ជាក់មួយដោយបានច្រានចោលនូវការចោទប្រកាន់នេះ និងបានចាត់ទុកថាការផ្សព្វផ្សាយព័ត៌មានរបស់ប្រធានគណបក្សនេះគឺមានចេតនាមួលបង្កាច់ ភូតកុហក ធ្វើឱ្យសាធារណជនមានការភាន់ច្រឡំ និងកេងយកចំណេញខាងនយោបាយ។
សេចក្តីបញ្ជាក់ចុះថ្ងៃទី ១៧ កញ្ញា របស់អ្នកនាំពាក្យរដ្ឋបាលខេត្តកំពង់ឆ្នាំងបានលើកឡើងថា ដីរដ្ឋ ដីសាធារណៈរបស់រដ្ឋ ឬដីឯកជនរបស់រដ្ឋ និងអចលនទ្រព្យរបស់រដ្ឋទូទាំងខេត្តកំពង់ឆ្នាំងត្រូវបានចុះបញ្ជីគ្រប់គ្រងត្រឹមត្រូវតាមនីតិវិធី និងបែបបទដែលកំណត់ដោយរាជរដ្ឋាភិបាលហើយគ្រប់គ្រងដោយក្រសួងស្ថាប័នថ្នាក់ជាតិ គណៈកម្មាធិការគ្រប់គ្រងទ្រព្យសម្បត្តិរដ្ឋថ្នាក់ខេត្ត និងមន្ទីរអង្គភាពសាមី។ លិខិតនេះបកស្រាយបន្តថា ក្នុងការគ្រប់គ្រងនេះក៏ត្រូវបានស្ថាប័នពាក់ព័ន្ធក្នុងមួយឆ្នាំចុះធ្វើអធិការកិច្ចផ្ទៀងផ្ទាត់យ៉ាងតិចមួយដងយ៉ាងទៀងទាត់ដោយផ្អែកលើបញ្ជីគ្រប់គ្រងជាគោល។
រដ្ឋបាលខេត្តកំពង់ឆ្នាំងបានបញ្ជាក់ក្នុងលិខិតបន្ថែមថា៖ «ដោយឡែកដីឯកជនរបស់ប្រជាពលរដ្ឋ មន្ត្រីរាជការ និងសាធារណជនទូទៅ រដ្ឋបាលខេត្តបានជំរុញការចុះបញ្ជី និងផ្ដល់កម្មសិទ្ធិតាមកម្មវិធីចុះបញ្ជីដាច់ដោយដុំ និងការចុះបញ្ជីជាលក្ខណៈប្រព័ន្ធតាមយន្តការគណៈកម្មាធិការសុរិយោដីថ្នាក់ខេត្ត គណៈកម្មាធិការគ្រប់គ្រងដីរដ្ឋថ្នាក់ខេត្ត និងក្រុមការងារដោយអនុវត្តតាមនីតិវិធី និងបែបបទដែលណែនាំដោយក្រសួងរៀបចំដែនដី នគរូបនីយកម្ម និងសំណង់។ ប្រជាពលរដ្ឋ និងម្ចាស់ដីទាំងអស់ដែលបានទទួលសិទ្ធិកាន់កាប់ដី មានសិទ្ធិលក់ ឬទិញ ឬដូរ ឬបញ្ចាំស្របតាមច្បាប់ជាធរមាន ដើម្បីចូលរួមអភិវឌ្ឍសេដ្ឋកិច្ចជាតិ និងលើកកម្ពស់ជីវភាពរស់នៅរបស់ខ្លួនម្នាក់ៗ»។
លោក ឈួរ ច័ន្ធឌឿន អភិបាលខេត្តកំពង់ឆ្នាំងបានប្រាប់ភ្នំពេញប៉ុស្តិ៍យ៉ាងខ្លីកាលពីថ្ងៃម្សិលមិញថា៖ «យើងបានបញ្ជាក់តាមរយៈអ្នកនាំពាក្យរួចហើយ តាមរយៈសេចក្តីបញ្ជាក់របស់រដ្ឋបាលខេត្តហ្នឹង។ ដូច្នេះខ្ញុំគ្មានអីត្រូវឆ្លើយទៀតទេ ហើយរឿងគាត់ដាក់ទៅសម្តេចនេះជារឿងរបស់គាត់។ មកសួរខ្ញុំមានអីត្រូវឆ្លើយបានគេធ្វើអីធ្វើទៅ តែរឿងយើងបានបំភ្លឺអស់ហើយ»។
លោក សំ ច័ន្ទគា មន្ត្រីសម្របសម្រួលអង្គការសមាគមអាដហុកប្រចាំខេត្តកំពង់ឆ្នាំងបាននិយាយថា ការរកឃើញនេះ គួរតែត្រូវបានបញ្ជូនរបាយការណ៍ទៅស្ថាប័នរដ្ឋ ជាពិសេសប្រមុខរដ្ឋាភិបាល ដើម្បីឲ្យមានការបង្កើតគណៈកម្មការធ្វើការស៊ើបអង្កេតដោយភាពត្រឹមត្រូវ និងយុត្តិធម៌។ ជាមួយគ្នានេះ លោកក៏ចង់ឲ្យមានការចុះស្រាវជ្រាវជាសកល និងគ្រប់បណ្តាខេត្តទាំងអស់ ដើម្បីការពារទ្រព្យសម្បត្តិរដ្ឋ។
លោកបញ្ជាក់ថា៖ «យើងចង់ឲ្យការធ្វើបែបនេះទៅទាំងព្រម និងធ្វើគ្រប់ស្ថាប័នទាំងអស់ដែលពាក់ព័ន្ធហ្នឹង។ គណបក្សខ្មែរក្រោកដែលមានឆន្ទៈក្នុងការស្វែងរកទ្រព្យសម្បត្តិរបស់រដ្ឋហ្នឹង ខ្ញុំលើកទឹកចិត្តឲ្យបន្តស្វែងរកទៀត និងធ្វើជាសកល កុំឲ្យធ្វើតែលក្ខណៈបុគ្គលបែបនេះ។ យើងគួរតែស្វែងរកជាទូទៅ ដើម្បីជម្រាបទៅកាន់រដ្ឋាភិបាលឲ្យដកយកទ្រព្យដែលគ្រប់គ្រងដោយខុសច្បាប់នេះធ្វើជាសម្បត្តិសាធារណៈ ដើម្បីបម្រើផលប្រយោជន៍ប្រជាពលរដ្ឋវិញ»៕
