ព្រះសីហនុៈ ពលរដ្ឋចំនួន ៥០ គ្រួសារ ដែលអះអាងថា ជាម្ចាស់កម្មសិទ្ធិដីទំហំ ៥ ហិកតា ស្ថិតនៅភូមិគគីរ ឃុំបិតត្រាំង ស្រុកព្រៃនប់ ខេត្តព្រះសីហនុបានតវ៉ាពីម្សិលមិញនៅលើទីតាំងដីនេះ និងបានដាក់លិខិតស្នើសុំជួយអន្តរាគមន៍ទៅលោក គួច ចំរើន អភិបាលខេត្ដដោយអះអាងថា បុគ្គលឈ្មោះ អ៊ុក ស៊ីណេត និងបក្ខពួកបានរំលោភយកដីរបស់ពួកគាត់ដោយយកគ្រឿងចក្រទៅឈូសឆាយផ្ទះ និងដំណាំនៅពេលយប់។
អ្នកស្រី កែវ ចន្ថា តំណាងពលរដ្ឋទាំង ៥០ គ្រួសារ ប្រាប់ភ្នំពេញប៉ុស្ដិ៍ពីម្សិលមិញ ខណៈពេលកំពុងនាំគ្នាតវ៉ានៅទីតាំងដីខាងលើថា ពលរដ្ឋទាមទារឲ្យបុគ្គលឈ្មោះ អ៊ុក ស៊ីណេត និងបក្ខពួកចេញមុខមកដោះស្រាយលើវិវាទដីធ្លីនេះ។ ប៉ុន្ដែគ្មានអ្នកណាចេញមុខមកដោះស្រាយឲ្យពលរដ្ឋឡើយទើបធ្វើការស្នើសុំកិច្ចអន្តរាគមន៍ទៅលោក គួច ចំរើន អភិបាលខេត្ដព្រះសីហនុជួយដោះស្រាយលើរឿងនេះ។
អ្នកស្រីថ្លែងថា៖ «ពួកគេមិនចេញមកដោះស្រាយទេ បែរជាប្រើប្រជាពលរដ្ឋដែលពួកគាត់ជួលមកស្នាក់នៅលើដីរបស់ពួកខ្ញុំនេះមកតទល់ជាមួយពួកខ្ញុំទៅវិញ។ ឥឡូវកំពុងមានការប៉ះទង្គិចគ្នា រុញចុះ រុញឡើង ហើយអ្នកខ្លះគំរាមកាប់ពួកខ្ញុំទៀតផង។ បើពួកខ្ញុំប៉ះទង្គិចវិញនោះអាចមានគ្រោះថ្នាក់ខ្លាំងហើយក្នុងពេលតវ៉ាព្រឹកមិញនេះ [ព្រឹកថ្ងៃចន្ទម្សិលមិញ]»។
អ្នកស្រី ចន្ថា ឲ្យដឹងថា ពួកអ្នកស្រីទាំង ៥០ គ្រួសារ បានដាក់លិខិតស្នើសុំអន្តរាគមន៍ទៅលោក គួច ចំរើន នៅរដ្ឋបាលខេត្ដព្រះសីហនុកាលពីថ្ងៃទី ១៦ ខែកុម្ភៈ។ ប៉ុន្ដែមិនទាន់ឃើញមានកិច្ចអន្តរាគមន៍ណាមួយពីអាជ្ញាធរខេត្ដនៅឡើយទេត្រឹមថ្ងៃចន្ទម្សិលមិញ។
តាមពាក្យស្នើសុំឲ្យជួយពលរដ្ឋស្នើលោក គួច ចំរើន ជួយឲ្យពួកគេបានចូលទៅកាន់កាប់ដីជាកម្មសិទ្ធិរបស់ពួកគេវិញ។ ពលរដ្ឋទាំងនោះបានបញ្ជាក់ថា ពួកគេដែលជាពលរដ្ឋទាំង ៥០ គ្រួសារបានមករស់នៅទីតាំងដីខាងលើតាំងពីឆ្នាំ ២០០២ រហូតមក។
តាមរយៈពាក្យស្នើសុំកិច្ចអន្តរាគមន៍ដដែលបញ្ជាក់ថា៖ «ក្នុងរយៈពេល ១ សប្ដាហ៍ ដើមខែកុម្ភៈ ឆ្នាំ ២០២០ ក្រុមរបស់លោក អ៊ុក ស៊ីណេត និងបក្ខពួកបានយកគ្រឿងចក្រមកឈូសឆាយលើដីនោះនៅពេលយប់ និងពេលថ្ងៃយកគ្រឿងចក្រចេញវិញ ដើម្បីបំភាន់ភ្នែកប្រជាពលរដ្ឋ និងធ្វើឲ្យខូចខាតដំណាំ អាស្រ័យផល និងផ្ទះចំនួន ៥០ ខ្នង ហើយបានបង្កើតក្រុមយាមការពារនៅទីតាំងដី ៥ ហិកតានេះគ្រប់ទិស ដើម្បីពិនិត្យការចេញចូលអ្នកដទៃ»។
ពួកគេបញ្ជាក់ក្នុងពាក្យសុំអន្តរាគមន៍ថា៖ «យើងខ្ញុំទាំងអស់គ្នាសូមអនុញ្ញាតជម្រាបស្នើសុំអន្តរាគមន៍ពីឯកឧត្ដមអភិបាលខេត្ដព្រះសីហនុ មេត្ដាជួយរកយុត្ដិធម៌ឲ្យយើងខ្ញុំទាំងអស់គ្នាបានចូលទៅរស់នៅដាំដំណាំ អាស្រ័យផល ដូចពីមុនដោយអនុគ្រោះ។ កូនចៅទាំងអស់គ្នាកំពុងតែរងគ្រោះ ឥឡូវនេះអ្នកមានអំណាចមកឈូសឆាយដំណាំ និងផ្ទះចោលអស់ចំនួន ៥០ ខ្នង។ ដូច្នេះសូមឯកឧត្ដមអភិបាលមេត្តាជួយរកយុត្ដិធម៌ឲ្យយើងខ្ញុំទាំង ៥០ គ្រួសារ ដោយក្ដីអនុគ្រោះ»។
លោក ឃាង ភារម្យ អ្នកនាំពាក្យរដ្ឋបាលសាលាខេត្ដព្រះសីហនុថ្លែងពីម្សិលមិញថា មិនទាន់ទទួលបានលិខិតស្នើសុំជួយអន្តរាគមន៍របស់ពលរដ្ឋទាំង ៥០ គ្រួសារនេះនៅឡើយទេ។ ប៉ុន្ដែលោកថានឹងតាមរកមើលលិខិតស្នើសុំនេះថា បានទៅដល់ណាហើយ។ ឯ លោក សរ កក្កដា អភិបាលស្រុកព្រៃនប់មិនអាចសុំបញ្ជាក់បានទេកាលពីម្សិលមិញដោយលោកចុចបិទទូរស័ព្ទ ។
លោក សុខ ចាន់ដារ៉ា មេភូមិគគីរ អះអាងពីម្សិលមិញថា ដីនៅតំបន់មានវិវាទខាងលើនេះភាគច្រើនជាដីគម្របព្រៃឈើខេត្ដព្រះសីហនុ ហើយពលរដ្ឋមានវិវាទទាំង ៥០ គ្រួសារ ក៏មិនទាន់បានដាក់ស្នើសុំអន្តរាគមន៍មកភូមិ-ឃុំដែរ។
លោកបន្ដថា៖ «ពួកគាត់ជាពលរដ្ឋដែលមិនទាន់មានទិន្នន័យក្នុងបញ្ជីឃុំនៅឡើយទេ។ ពួកគាត់មិនដឹងមកពីខេត្ដណាខ្លះទេមកពីក្រៅគ្រប់ខេត្ដ។ ពួកគាត់មកចាប់ដីយកនៅអំឡុងឆ្នាំ ២០១៧-២០១៨ រហូតមកទល់សព្វថ្ងៃមានពលរដ្ឋខ្លះបានធ្វើផ្ទះធ្វើអីរស់នៅតំបន់នោះហើយមិនទាន់មានចំណាត់ការពីថ្នាក់លើទេ»។
ភ្នំពេញប៉ុស្តិ៍នៅមិនទាន់អាចស្វែងរកប្រភពណាមួយ ដើម្បីទាក់ទងសុំការបំភ្លឺពីលោក អ៊ុក ស៊ីណេត និងអ្នកពាក់ព័ន្ធជុំវិញការចោទប្រកាន់នេះបាននៅឡើយទេកាលពីម្សិលមិញ៕