ព្រះសីហនុៈ បុរសជាកម្មករដឹកធុងខ្យល់អុកស៊ីហ្សែនម្នាក់បានដាច់ក្បាលស្លាប់នៅកន្លែងកើតហេតុ ដោយសារជនរងគ្រោះដឹកធុងខ្យល់អុកស៊ីហ្សែន យកទៅដាក់ឲ្យម៉ូយនៅតាមផ្ទះ ហើយត្រូវធុងខ្យល់នោះផ្ទុះកាលពីថ្ងៃទី ២០ កក្កដា នៅភូមិ ៤ ឃុំទំនប់រលក ស្រុកស្ទឹងហាវ ខេត្តព្រះសីហនុ។
លោក បូ ណាំ នាយនគរបាលប៉ុស្តិ៍ទំនប់រលក ស្រុកស្ទឹងហាវ ប្រាប់ពីម្សិលមិញថា បុរសរងគ្រោះដែលស្លាប់ឈ្មោះ ពត សុផាត់ អាយុ ៣៩ ឆ្នាំ រស់នៅភូមិ ៤ ឃុំទំនប់រលក ស្រុកស្ទឹងហាវ ខេត្តព្រះសីហនុ និងមានស្រុកកំណើត នៅខេត្តកំពត។
លោកប្រាប់ថា កាលពីថ្ងៃទី ២០ កក្កដា ជនរងគ្រោះ និងបុរសជាកម្មករម្នាក់ទៀតបានដឹកធុងខ្យល់អុកស៊ីហ្សែន តាមរថយន្តដាក់ឲ្យម៉ូយនៅតាមផ្ទះ ហើយដែលដែកធុងខ្យល់អុកស៊ីហ្សែន នីមួយៗ មានចំណុះខ្យល់ ៥០ គីឡូក្រាម។ ពេលនោះគេឃើញបុរសម្នាក់បានរំកិលធុងខ្យល់ទម្លាក់មកដី ហើយជនរងគ្រោះបានចាប់ធុងដោយខ្លួនគាត់ ដោយឱនចាប់តួធុងបំណងផ្តេកទៅនឹងដីក៏ស្រាប់តែផ្ទុះតែម្តងទៅ។
លោកបន្តថា បំណែកដែក និងក្បាលជនរងគ្រោះប៉ើងដាច់ចេញពីខ្លួនចម្ងាយប្រហែល ១០០ ម៉ែត្រ រីឯខ្លួនជនរងគ្រោះប៉ើងប្រហែល ១០ ម៉ែត្រទៅប៉ះនឹងជញ្ជាំងរោងស្នាក់នៅរបស់គេ។ ប៉ុន្តែ បុរសម្នាក់ទៀតដែលនៅ លើរថយន្តមិនរងរបួសទេ។
លោកថា៖ «ករណីនេះ ខ្ញុំបានសួរទៅមន្រ្តីជំនាញ គេប្រាប់ថា មិនដែលមានធុងខ្យល់អុកស៊ីហ្សែនផ្ទុះបែបនេះទេ ហើយវាក៏គ្មានហានិភ័យខ្ពស់នាំឲ្យមានគ្រោះថ្នាក់ដែរ។ បើវាផ្ទុះអ៊ីចឹងគេមិនយកវាទៅដាក់តាមមន្ទីរពេទ្យដើម្បីបញ្ចូលខ្យល់ឲ្យអ្នកជំងឺ ហើយបើគិតទៅមិនសមនឹងផ្ទុះបានទេ»។
លោកបន្តថា ក្រោយកើតហេតុសមត្ថកិច្ចនគរបាលជំនាញចុះធ្វើកោសល្យវិច័យនៅកន្លែងកើតហេតុពិនិត្យឃើញថានៅលើខ្លួនរបស់ជនរងគ្រោះបានដាច់ត្រឹមក ហើយនៅដងខ្លួនក៏មានបំណែកត្រូវអំបែងធុងដែកជាច្រើនកន្លែងទៀតដែរ។
ធុងដែកដែលផ្ទុកខ្យល់អុកស៊ីហ្សែននោះមានកម្រាស់ជាង ១ ហ៊ុនមានទម្ងន់ធ្ងន់។ ប្រសិនបើមនុស្ស ២ នាក់ ក៏មិនអាចលើកធុងដែកនោះរួចដែរ។
លោកបញ្ជាក់ថា នៅយប់កើតហេតុបានប៉ុន្មានម៉ោងរួចមក ក្រុមគ្រួសារជនរងគ្រោះនៅខេត្តកំពតបានមកប៉ុស្តិ៍នគរបាល ហើយម្តាយរបស់ជនរងគ្រោះក៏បានស្នើសុំសមត្ថកិច្ចធ្វើការបូជាសពកូននៅវត្តពោធិ៍មានជ័យ ស្ថិតនៅក្នុងភូមិ ៤ ឃុំទំនប់រលក ដើម្បីយកធាតុទៅធ្វើបុណ្យ តាមប្រពៃណី។ ចំណែករឿងសំណងវិញ គឺម្ចាស់សិប្បកម្មបញ្ចូលខ្យល់អុកស៊ីហ្សែននោះ បានជួយចេញថ្លៃបុណ្យសពមួយចំនួនដែរ៕