.jpg)
ព្រះរាជអាជ្ញារង លោក ជា សុវណ្ណថេត ដែលត្រូវផ្អាកតួនាទី។ ហ្វេសប៊ុក
កំពង់ធំៈ រដ្ឋមន្ត្រីក្រសួងយុត្តិធម៌លោក អង្គវង្ស វឌ្ឍានា នៅថ្ងៃទី ២២ ខែ មេសា សម្រេចផ្អាកតួនាទីលោក ជា សុវណ្ណថេត ព្រះរាជអាជ្ញារងខេត្តកំពង់ធំ ជាបណ្តោះអាសន្ន ដោយអះអាងថា ជាប់ពាក់ព័ន្ធករណីឈូសឆាយដីព្រៃលិចទឹក និងព្រៃកោងកាង នៅចំណុចបឹងអាត្រាព្រួល ក្នុងឃុំកំពង់គោ និងឃុំផាត់សណ្តាយ ស្រុកកំពង់ស្វាយ ខេត្តកំពង់ធំ កាលពីថ្ងៃទី ១៣ ដល់ថ្ងៃទី ១៧ ខែ មេសា ដោយឃាត់ត្រាក់ទ័របានចំនួន ១៧ គ្រឿង និងមនុស្សចំនួន ៩ នាក់។
តាមលិខិតរបស់លោក អង្គវង្ស វឌ្ឍានា ដែលផ្ញើជូនព្រះរាជអាជ្ញានៃអយ្យការអមសាលាដំបូងខេត្តកំពង់ធំ នៅថ្ងៃទី ២២ ខែ មេសា បានសរសេរថា ក្រសួងយុត្តិធម៌បានទទួលលិខិតចុះថ្ងៃទី ១៨ ខែ មេសា ឆ្នាំ ២០១៩ និងដីកាសន្និដ្ឋានបញ្ជូនរឿងឲ្យស៊ើបសួរចុះថ្ងៃទី ១៩ មេសា របស់អយ្យការអមសាលាដំបូងខេត្តកំពង់ធំ ជូនដំណឹងស្តីអំពីការចោទប្រកាន់លើឈ្មោះជា សុវណ្ណថេត ព្រះរាជអាជ្ញារងសាលាដំបូងខេត្តកំពង់ធំពីបទ «ផ្តើមគំនិតក្នុងអំពើកាប់ឆ្ការគាស់ ឈូសឆាយព្រៃលិចទឹក និងព្រៃកោងកាង» ប្រពឹត្តនៅចំណុចតំបន់បឹងអាត្រាព្រួល ឃុំកំពង់គោ និងឃុំផាត់សណ្តាយ ស្រុកកំពង់ស្វាយ ខេត្តកំពង់ធំ កាលពីថ្ងៃទី ១៣ ដល់ថ្ងៃទី ១៧ ខែ មេសា ឆ្នាំ ២០១៩។
ការចោទនេះ ផ្អែកលើបទល្មើសព្រហ្មទណ្ឌដែលមានចែងឲ្យផ្តន្ទាទោសតាមបញ្ញត្តិមាត្រា ២៨ នៃក្រមព្រហ្មទណ្ឌ និងមាត្រា ៩៨ នៃច្បាប់ស្តីពីជលផល។
លិខិតលោក អង្គវង្ស វឌ្ឍានា បញ្ជាក់ថា៖ «យោងតាមមាត្រា ៥៨ និងមាត្រា ១០០ នៃច្បាប់ស្ដីពីលក្ខន្ដិកៈនៃចៅក្រម និងព្រះរាជអាជ្ញា ក្រសួងស្នើឲ្យលោកព្រះរាជអាជ្ញា ធ្វើការផ្អាកមុខងាររបស់លោក ជា សុវណ្ណថេត ព្រះរាជអាជ្ញារង ជាបណ្ដោះអាសន្នរហូតដល់មានសេចក្ដីសម្រេចរបស់តុលាការអំពីទោសជាស្ថាពរ»។
លោក ជិន ម៉ាលីន អ្នកនាំពាក្យក្រសួងយុត្តិធម៌ ពីម្សិលមិញប្រាប់ភ្នំពេញប៉ុស្ដិ៍ថា តាមនីតិវិធីច្បាប់ ប្រសិនបើមានមន្ត្រីណាម្នាក់ស្ថិតនៅក្រោមនីតិវិធីរបស់តុលាការ គឺជាគោលការណ៍នឹងត្រូវផ្អាកការងារបណ្ដោះអាសន្ន ព្រោះវាជាបែបបទរដ្ឋបាលដើម្បីរង់ចាំការសម្រេចរបស់តុលាការ។
បន្ទាប់ពីតុលាការស៊ើបអង្កេតរកឃើញទោសកំហុសគាត់ គឺតុលាការនឹងមានវិធានការ និងឈានទៅលុបឈ្មោះចេញពីក្របខ័ណ្ឌ ហើយតាមវិធានការច្បាប់គាត់ត្រូវតែទទួលទោសតាមការសម្រេចរបស់តុលាការ។
លោក ម៉ាលីន បញ្ជាក់ថា៖ «ខណ:នេះយើងត្រូវផ្អាកការងារគាត់សិន ដើម្បីជាប្រយោជន៍ដល់ដំណើរការស៊ើបអង្កេត ដោយសារវាស្ថិតនៅក្នុងនីតិវិធីរបស់តុលាការក្នុងនីតិវិធីនេះ តុលាការស៊ើបអង្កេតឲ្យបានជាក់លាក់សិន ប៉ុន្ដែបើតុលាការរកមិនឃើញកំហុសបុគ្គលរូបនេះទេ គឺអាចនឹងអនុញ្ញាតឲ្យចូលធ្វើការវិញ»។
លោកបន្ថែមថា៖ «នៅមានអ្នកជាប់ពាក់ព័ន្ធជាច្រើននាក់ទៀត ប៉ុន្ដែខ្ញុំមិនអាចបង្ហាញអត្តសញ្ញាណបានទេ ព្រោះវាស្ថិតនៅក្នុងអំឡុងពេលស៊ើបអង្កេតរបស់តុលាការនៅឡើយ។ នៅពេលចប់នីតិវិធីតុលាការនឹងបង្ហាញមុខជនល្មើសទាំងអស់ហ្នឹង»។
លោក អុិត សុធា ព្រះរាជអាជ្ញាអមសាលាដំបូងខេត្តកំពង់ធំ ពីម្សិលមិញ បដិសេធធ្វើអត្ថាធិប្បាយជុំវិញករណីនេះ ដោយអះអាងថា លោកកំពុងជាប់រវល់ប្រជុំមិនអាចនិយាយបានទេ។
ចំណែកលោក ជា សុវណ្ណថេត ព្រះរាជអាជ្ញារងសាលាដំបូងខេត្តកំពង់ធំដែលកំពុងត្រូវបានព្យួរតួនាទីនោះបានបដិសេធធ្វើអត្ថាធិប្បាយជុំវិញករណីនេះដែរ ដោយបង្វែរសំណួរទៅថ្នាក់លើ។
លោកថា៖ «ខ្ញុំអត់មានពាក្យអ្វីចង់និយាយទេ បើលោកចង់ដឹងរឿងនេះ សួរទៅថ្នាក់លើខ្ញុំវិញទៅ ព្រោះខ្ញុំអត់ចង់និយាយអ្វីទាំងអស់»។
លោក ធីវ វណ្ណធី ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពង់ធំ កាលពីម្សិលមិញថ្លែងថា លោកបានទទួលដំណឹងនេះហើយ ដោយមន្ត្រីជំនាញកំពុងស៊ើបអង្កេតបន្ត។
លោកបញ្ជាក់ថា៖ «ឥឡូវនេះ យើងកំពុងធ្វើការងារយ៉ាងសកម្ម គឺស៊ើបអង្កេតបន្តទៀត និងរៀបចំរបាយការណ៍លម្អិតជូនថ្នាក់លើ ព្រោះអ្នកពាក់ព័ន្ធមានខ្នងធំៗណាស់។ ខ្ញុំអត់ទាន់អាចបញ្ជាក់ជូនអ្វីលើសពីនេះទេ»។
លោក ហេង មនោ មេឃុំផាត់សណ្ដាយ ពីម្សិលមិញ បដិសេធធ្វើអត្ថាធិប្បាយជុំវិញករណីនេះ ដោយបង្វែរសំណួរទៅលោក ស្រី ណាល់ មេឃុំកំពង់គោវិញ។
លោក ស្រី ណាល់ បានប្រាប់ភ្នំពេញប៉ុស្ដិ៍ថា ចាប់តាំងពីថ្ងៃទី ១៣ ដល់ថ្ងៃទី ១៧ ខែ មេសា ឆ្នាំ ២០១៩ នេះ សមត្ថកិច្ចបានចុះឃាត់ទាំងមនុស្សចំនួន ១៩ នាក់ និងត្រាក់ទ័រប្រមាណ ១៧ គ្រឿង ជាបន្តបន្ទាប់នៅតំបន់ព្រៃលិចទឹកនោះ ខណៈពួកគេកំពុងនាំគ្នាឈូសឆាយដីព្រៃយ៉ាងគគ្រឹកគគ្រេងបានទំហំប្រមាណជា ១០ ហិកតា ប៉ុន្ដែលោកមិនទាន់ដឹងពីចំនួនមនុស្សដែលត្រូវឃាត់ខ្លួននោះទេ។
លោកបានបញ្ជាក់ថា៖ «ការងារអនាធិបតេយ្យអ៊ីចឹងៗ គេមិនដែលប្រាប់យើងអ្នកតូចតាច ឬអាជ្ញាធរដែនដីអីទេ គេមានខ្នងខ្ពស់ៗអ៊ីចឹងគេមិនដែលចាត់ទុកយើងក្នុងភ្នែកគេទេ។ ដល់ពេលគេថ្នាក់លើមកចាប់ហ្នឹងសួរនាំទៅពាក់ព័ន្ធព្រះរាជអាជ្ញាអ៊ីចឹងទៅ ហើយឃុំយើងមាន លទ្ធភាពឯណាទប់ស្កាត់នោះ ពលរដ្ឋរាយការណ៍មកខ្ញុំច្រើនដងហើយ តែខ្ញុំមិនដឹងធ្វើម៉េច បើពេលខ្ញុំទៅ គេប្រាប់ខ្ញុំវិញថា គេត្រូវគ្នាជាមួយថ្នាក់លើអស់ហើយ»៕
