.jpg)
ពលរដ្ឋតវ៉ានៅមុខសាលាខេត្តព្រះសីហនុ សុំជួយដោះស្រាយរឿងដីធ្លី ម្សិលមិញ។ សហការី
ព្រះសីហនុៈ ប្រជាពលរដ្ឋចំនួន ១០ សហគមន៍ តំណាងឲ្យពលរដ្ឋប្រមាណជាង ៣០០ នាក់ ដែលមានទំនាស់ដីធ្លីនៅខេត្តព្រះសីហនុ នៅថ្ងៃទី ២១ ខែ ឧសភា បានប្រមូលផ្ដុំគ្នានៅមុខបរិវេណសាលាខេត្ត ដើម្បីជំរុញឲ្យលោក យន្ត មីន អភិបាលខេត្តជួយពន្លឿនការ ដោះស្រាយវិវាទដីធ្លី និងស្នើសុំចេញបណ្ណកម្មសិទ្ធិដីធ្លីឲ្យបានឆាប់ ហើយសំណើនោះត្រូវបានទទួលយកទៅពិនិត្យ។
លោក យូ វាសនា តំណាងប្រជាពលរដ្ឋសហគមន៍មានទំនាស់ដីធ្លីនៅខេត្តព្រះសីហនុទាំង ១០ សហគមន៍ ពីម្សិលមិញថ្លែងថា គោលបំណងនៃការប្រមូលផ្តុំរបស់ប្រជាពលរដ្ឋទាំង ១០ សហគមន៍នេះ ដើម្បីធ្វើការតស៊ូមតិ និងសំណូមពរឲ្យលោក យន្ត មីន អភិបាលខេត្តព្រះសីហនុជួយពន្លឿនការដោះស្រាយវិវាទដីធ្លី ជាពិសេសស្នើឲ្យជួយពន្លឿនចេញបណ្ណកម្មសិទិ្ធដីធ្លីជូនប្រជាពលរដ្ឋទាំង ១០ សហគមន៍ បានប្រើប្រាស់ ឬឲ្យមានសុវត្ថិភាពដីធ្លីបានឆាប់។
លោក វាសនា បញ្ជាក់ថា៖ «ប្រជាពលរដ្ឋមានទំនាស់ដីធ្លីទាំង ១០ សហគមន៍យើងខ្ញុំគឺបានរអ៊ូរទាំអំពីសកម្មភាពចុះអនុវត្តការងាររបស់មន្ត្រីជំនាញរដ្ឋបាលខេត្តព្រះសីហនុគឺពួកគាត់ធ្វើការយឺតយ៉ាវខ្លាំងណាស់ចំពោះការចេញប័ណ្ណកាន់កាប់ដីធ្លីជូនប្រជាពលរដ្ឋពួកខ្ញុំ ដោយអូសបន្លាយពេលយូរឆ្នាំមកហើយ។ ពួកខ្ញុំភ័យខ្លាំងណាស់ ខ្លាចតែគេមកប្លន់ដីខ្ញុំ ព្រោះវាស់វែងយូរហើយ មិនទាន់ចេញបណ្ណកម្មសិទ្ធិឲ្យទេ»។
លោក ម៉ន ស៊ីណា តំណាងពលរដ្ឋសហគមន៍មកពីស្រុកស្ទឹងហាវ និងស្រុកព្រៃនប់ថ្លែងថា បញ្ហាដីធ្លី និងតម្លៃដីកំពុងតែឡើងថ្លៃនៅក្នុងខេត្តជាប់មាត់សមុទ្រមួយនេះ គឺជាក្តីបារម្ភមួយ ដែលពលរដ្ឋទាំងនោះខ្លាចមានការរំលោភយកពីភាគីដទៃ ទើបពួកគេស្នើឲ្យអាជ្ញាធរ ចេញប័ណ្ណកាន់កាប់ដីធ្លីដល់ពួកគេឲ្យបានលឿន។
លោកបន្តថា ខណៈកំពុងឈរតវ៉ានៅខាងមុខសាលាខេត្តព្រះសីហនុ លោក ម៉ាង ស៊ីណេត អភិបាលរងខេត្តព្រះសីហនុ បានមកអញ្ជើញតំណាងពលរដ្ឋចំនួន ១២ នាក់ ឲ្យចូលប្រជុំ និងរាយការណ៍ពីក្ដីកង្វល់ ក៏ដូចជារៀបរាប់បញ្ហាលំបាកសព្វថ្ងៃ ដើម្បីងាយស្រួលដល់អាជ្ញាធរចុះដោះស្រាយ។
ពលរដ្ឋតវ៉ានៅខេត្តព្រះសីហនុពីម្សិលមិញ សុំជួយដោះស្រាយរឿងដីធ្លី។ សហការី
លោកបានបញ្ជាក់ថា៖ «ពួកខ្ញុំសូមអំពាវនាវឲ្យមន្ត្រីជាប់ពាក់ព័ន្ធជួយពន្លឿនការដោះស្រាយបញ្ហាដីធ្លី និងចេញប័ណ្ណកម្មសិទ្ធិជូនពលរដ្ឋឲ្យបានឆាប់ផង ព្រោះចាប់តាំងពីដីឡើងថ្លៃមក ពួកខ្ញុំដេកមិនលក់ បក់ក៏មិនល្ហើយដែរ ព្រោះខ្លាចបាត់ដី និងផ្ទះ»។
លោក យន្ត មីន អភិបាលខេត្តព្រះសីហនុ កាលពីម្សិលមិញ មិនទាន់អាចទាក់ទងសុំការបញ្ជាក់ជុំវិញករណីនេះបានទេ ដោយលោកមិនបានលើកទូរស័ព្ទ។
ប៉ុន្ដែលោក ឃាង ភារម្យ អ្នកនាំពាក្យសាលាខេត្តព្រះសីហនុ បានថ្លែងពីម្សិលមិញថា ខណៈដែលពលរដ្ឋកំពុងឈរនៅខាងមុខសាលាខេត្ត ហើយលោក ម៉ាង ស៊ីណេត អភិបាលរងខេត្តព្រះសីហនុ ដែលបានកោះហៅតំណាងពួកគាត់ចំនួន ១២ នាក់ ឲ្យចូលជួបក្នុងអង្គប្រជុំនោះ គឺលោកអភិបាលខេត្តបានទទួលសំណើពួកគាត់យកទៅពិនិត្យជាមុនសិន។
លោកបានបន្តថា អាជ្ញាធរយល់ព្រមជួយដោះស្រាយចំពោះទំនាស់ទាំងឡាយណាដែលមិនជាប់ពាក់ព័ន្ធជាមួយតុលាការ ព្រោះបើមានសំណុំ រឿងនៅក្នុងតុលាការនោះ អាជ្ញាធរនឹងមិនអាចទទួលយកមកដោះស្រាយឲ្យបានទេ ដោយទុកលទ្ធភាពលើនីតិវិធីតុលាការ។
លោកបញ្ជាក់ថា៖ «អ៊ីចឹងយើងបានណែនាំពួកគាត់ថា ដីកន្លែងខ្លះយើងបានវាស់វែងរួចហើយមែន ប៉ុន្ដែមិនអាចចេញប័ណ្ណកម្មសិទ្ធិឲ្យបានទេ ព្រោះអភិរក្ស ឬដីរដ្ឋបម្រុងទុក។ ដីកំពុងមានទំនាស់ក៏មិនអាចចេញប័ណ្ណឲ្យបានដែរ ដោយរង់ចាំដោះស្រាយទំនាស់ចប់សិន ទើបចេញប័ណ្ណឲ្យ ហើយដីដែលបញ្ជាក់ច្បាស់ថាជារបស់ពលរដ្ឋពិតប្រាកដមែន អាជ្ញាធរនឹងចេញប័ណ្ណជូន ប៉ុន្ដែសុំឲ្យរង់ចាំបន្ដិច ដើម្បីធ្វើការងារនេះ»។
លោកស្រី ជៀប សុធារី មន្ត្រីសម្របសម្រួលផ្នែកសិទ្ធិមនុស្សនៃសមាគមការពារសិទ្ធិមនុស្ស (ADHOC) ប្រចាំខេត្តព្រះសីហនុ ថ្លែងថា បញ្ហាទំនាស់ដីធ្លីរបស់ពលរដ្ឋជាមួយក្រុមហ៊ុន និងបុគ្គលមានអំណាចនៅខេត្តព្រះសីហនុនៅតែបន្តរ៉ាំរ៉ៃរហូតមកដល់ពេលនេះ។
លោកស្រីបន្តថា ទាំងអ្នកកំពុងមានទំនាស់ និងអ្នកមិនទាន់មានបញ្ហាក៏នាំគ្នាមកស្នើឲ្យពន្លឿនការចេញប័ណ្ណកម្មសិទ្ធិក៏ដូចជាជំរុញឲ្យពន្លឿនការដោះស្រាយលើដីទំនាស់។
លោកស្រីថា៖ «ខ្ញុំក៏សូមជំរុញអាជ្ញាធរជំរុញការដោះស្រាយឲ្យបានឆាប់ដែរ ព្រោះពួកគាត់ខាតបង់ពេលវេលារកស៊ីចិញ្ចឹមជីវិត ដែលត្រូវតវ៉ាយកដីរបស់ខ្លួនមកវិញនេះ»៕
