.jpg)
ប្រជាពលរដ្ឋមកពី ៤ ឃុំក្នុងខេត្តកណ្ដាល តវ៉ានឹងការកោះហៅតំណាងរបស់ខ្លួនករណីជម្លោះដីធ្លីកាលពីថ្ងៃម្សិលមិញ។ ផា លីណា
កណ្តាលៈ ពលរដ្ឋប្រមាណជិត ២០០ នាក់មកពី ៤ ឃុំនៅខេត្តកណ្តាល ដែលមានជម្លោះដីធ្លីជាមួយក្រុមហ៊ុនហេងអភិវឌ្ឍន៍របស់លោកស្រីឧកញ៉ា សៀង ចាន់ហេង បានលើកគ្នាមកតវ៉ានៅសាលាខេត្តកណ្តាល ដើម្បីស្វែងរកកិច្ចអន្តរាគមន៍ពីលោកអភិបាលខេត្តជួយដោះស្រាយ ក្រោយពីតំណាងរបស់ពួកគេ ៦ នាក់ត្រូវបានកោះហៅ និងចោទប្រកាន់ពីបទញុះញង់។
អ្នកភូមិម្នាក់ក្នុងចំណោមពួកគេគឺអ្នកស្រី សន អាន អាយុ ៥១ ឆ្នាំដែលមកពីឃុំអម្ពិលព្រៃ បានអះអាងថាក្រុមហ៊ុនបានទិញដីពីប្រជាពលរដ្ឋក្នុង ១ ហិកតា តម្លៃ ១ លានទៅ ២ លានរៀលតាំងពីឆ្នាំ ១៩៩០ ប៉ុន្តែក្រុមហ៊ុនឲ្យលុយមិនទាន់គ្រប់។
អ្នកស្រីបានបញ្ជាក់ថា៖ «ទំនាស់យូរហើយ និងយើងបានដាក់ចូលខាងខេត្ត ភូមិបាល តែពុំមានការដោះស្រាយ។ នៅពេលដោះស្រាយ គេទះតុដាក់យើង គំរាមយើងបិទទ្វារហៅកម្លាំងព្រហ្មទណ្ឌ។ លោកមេឃុំ និងអ្នកគួកជេប៉ុន្មាននាក់ជាមួយមេភូមិថា ដីនេះជាដីរបស់ក្រុមហ៊ុន។ អ្នកខ្លះបានទទួលលុយពីក្រុមហ៊ុនតែមិនគ្រប់ចំនួន»។
អ្នកស្រីបន្ថែមថា៖ «យើងកើតទុក្ខមិនសុខចិត្តដោយសារក្រសួង និងមន្ត្រីផ្សេងៗអះអាងថា ដីនេះគឺជាដីរបស់ក្រុមហ៊ុន ដូច្នេះយើងសូមអំពាវនាវដល់សម្តេច ហ៊ុន សែន និងលោកជំទាវមេត្តាជួយរកដំណោះស្រាយជូនប្រជាជនអម្ពិលព្រៃ បឹងខ្យាង ព្រែកស្លែង និងឃុំកណ្តោក ដោយសារប្រជាជនរស់ដោយទឹកភ្នែក»។
អ្នកភូមិម្នាក់ទៀតគឺអ្នកស្រី ថាន ខំ អាយុ ៥៩ ឆ្នាំមកពីឃុំព្រែកស្លែងក៏បានអះអាងដែរថា៖ «គ្រាន់តែប្រជាជនទៅឃាត់គ្រឿងចក្រមិនឲ្យធ្វើនៅលើដីរបស់ប្រជាពលរដ្ឋ បែរទៅដាក់ពាក្យបណ្ដឹង។ យើងខ្លាចចូលព្រហ្មទណ្ឌបានជាយើងមកជម្រាបប្អូនឯង (អ្នកកាសែត)។ ប្រជាជនឈឺចាប់ណាស់ យើងមិនសុខចិត្តទេ។ ធ្វើគុកឲ្យធំដើម្បីដាក់ប្រជាជនទាំង ៣-៤ ឃុំទៅ។ យើងសុខចិត្តចូលគុកទាំងអស់គ្នា ប្រសិនបើគេចាប់តំណាងរបស់យើង យើងនៅបន្តតវ៉ារហូត»។
ទោះជាយ៉ាងណាលោកស្រី សៀង ចាន់ហេង នៅតែបន្តអះអាងថា អ្នកភូមិបានរើចូលលើដីលោកស្រីនៅស្រុកកណ្តាលស្ទឹងជាង ៥ ឆ្នាំមកហើយ បន្ទាប់ពីលោកស្រីបានទិញដីនេះដំបូង។ ប៉ុន្តែលោកស្រីបានបដិសេធចំពោះការអះអាងរបស់អ្នកភូមិដែលថា ពួកគេបានរស់នៅលើដីនេះតាំងពីទសវត្សរ៍ ៨០ និង ៩០ ហើយបានចោទថា មានអ្នកនៅពីក្រោយដែលរៀបចំឲ្យប្រជាជនធ្វើការតវ៉ា។
លោកស្រី ចាន់ហេង បញ្ជាក់ថា៖ «យើងបានឃើញ និងបានដឹងហើយការពិតនៅតែជាការពិត។ អ្នកទាំងអស់នេះសុទ្ធតែមានអ្នករៀបចំនៅពីក្រោយហើយ។ យើងកំពុងធ្វើលិខិតស្នើសុំធ្វើវេទិកាសេរីដើម្បីជួបជុំជាមួយប្រជាពលរដ្ឋទាំងអស់ដែលចោទថាយើងយកដីគាត់»។
ប្រជាពលរដ្ឋតវ៉ានឹងការកោះហៅតំណាង ៦ នាក់របស់ពួកគេនៅសាលាខេត្តកណ្តាលពីម្សិលមិញ។ផា លីណា
នៅពេលទំនាក់ទំនងពីម្សិលមិញលោក ម៉ៅ ភិរុណ អភិបាលខេត្តកណ្ដាល បានបដិសេធក្នុងការធ្វើអត្ថាធិប្បាយ។
កាលពីដើមខែកុម្ភៈ អ្នកភូមិប្រមាណជាង ១០០ នាក់មកពីឃុំព្រែកស្លែង ស្រុកកណ្តាលស្ទឹងបានរារាំងក្រុមហ៊ុនធ្វើការឈូសឆាយ និងជីកទំនប់នៅលើដីដែលមានជម្លោះដែលនៅជិតគម្រោងអភិវឌ្ឍន៍ព្រលានយន្តហោះដ៏ធំមួយ ដែលបានប្រកាសកាលពីខែមករា ហើយជម្លោះដីធ្លីដ៏រ៉ាំរ៉ៃជាច្រើនឆ្នាំនៅក្នុងឃុំមួយចំនួននៃស្រុកកណ្តាលស្ទឹងបានចាប់ផ្តើមកើតមានឡើងវិញ បន្ទាប់ពីរាជរដ្ឋាភិបាលបានប្រកាសពីគម្រោងរបស់ខ្លួនក្នុងការកសាងព្រលានយន្តហោះដ៏ធំនៅក្នុងដែនដីខេត្តកណ្តាលនេះ។
អ្នកស្រី អឿង សារី តំណាងឲ្យប្រជាជនក្នុងឃុំព្រែកស្លែងដែលត្រូវបានកោះហៅដោយកងរាជអាវុធហត្ថបានឲ្យដឹងថា អ្នកស្រី និងតំណាងផ្សេងទៀតមិនទៅបំភ្លឺនៅកងរាជអាវុធហត្ថខេត្តកណ្តាលទេ ដោយសារស្ថាប័នទាំងនោះមិនអាចជួយអន្តរាគមន៍ និងដោះស្រាយជូនពួកគាត់តែថែមទាំងដាក់សម្ពាធលើពួកគាត់។
អ្នកស្រីបានបញ្ជាក់ថា៖ «យើងមិនទៅដោយសារតែពួកយើងរងនូវការដែលគេរំលោភយកដីហើយបែរជាអ្នកយកដីប្តឹងពួកយើងវិញ ដូច្នេះយើងមិនទៅស្រាយបំភ្លឺទេ។ បើគេចាប់ខ្លួនតាមដំណើរទៅ ហើយចាប់ប្រជាជនទាំងអស់ដាក់គុកទៅពីព្រោះប្រជាជនទាំងអស់ក៏ជាម្ចាស់ដីដែរ។ នេះបង្ហាញថា រដ្ឋាភិបាលមិនជួយដោះស្រាយជូនប្រជាជនតែបែរជាចាប់ប្រជាជនដាក់គុក ហើយរដ្ឋាភិបាលលម្អៀងទៅកាន់ក្រុមហ៊ុន ដែលយកដីប្រជាជន»។
ជម្លោះដីធ្លីដ៏ជូរចត់រវាងក្រុមហ៊ុន ហេង អភិវឌ្ឍន៍ របស់លោកស្រី សៀង ចាន់ហេង និងអ្នកភូមិបានវិលត្រឡប់មកវិញសាជាថ្មី ក្រោយមានការប្រកាសគម្រោងព្រលានយន្តហោះដ៏ធំនៅស្រុកកណ្តាលស្ទឹងនៅក្នុងឃុំបឹងស្លែង អម្ពិលព្រៃ បឹងខ្យាង និងឃុំកណ្តោក។
កាលពីឆ្នាំ ២០០៩ ជម្លោះផ្ទុះឡើងទៅជាអំពើហិង្សា បន្ទាប់ពីកម្លាំងកងរាជអាវុធហត្ថខេត្តបានបាញ់ទៅលើក្រុមអ្នកតវ៉ាដែលធ្វើឱ្យរងរបួស ២ នាក់។
លោក អំ សំអាត មន្ត្រីជាន់ខ្ពស់អង្គការសិទ្ធិមនុស្សលីកាដូប្រាប់ភ្នំពេញប៉ុស្តិ៍កាលពីថ្មីៗនេះថា ជម្លោះដីធ្លីមានរយៈពេលយូរឆ្នាំមកហើយ និងនៅឆ្នាំ ២០០៩ មានការបាញ់កាំភ្លើងបណ្តាលឲ្យប្រជាពលរដ្ឋរបួសមួយចំនួន បន្ទាប់ពីពួកគេបានតវ៉ាប្រឆាំងនឹងក្រុមហ៊ុនហើយរហូតមកដល់ពេលនេះអាជ្ញាធរពុំបានដោះស្រាយជូនពលរដ្ឋនៅឡើយ។
លោក សំអាត បានបញ្ជាក់ថា៖ «រឿងនេះអាចនាំឱ្យមានការតវ៉ា និងអំពើហិង្សាប្រសិនបើអាជ្ញាធរមិនដោះស្រាយវាដោយសន្តិវិធី ហើយគួរតែដោះស្រាយជម្លោះដីធ្លីនេះមុនពេលវាកាន់តែធំឡើង»៕
