ភ្នំពេញៈ កងសន្តិសុខខណ្ឌដូនពេញកាលពីម្សិលមិញបានដេញបំបែកហ្វូងមនុស្សក្មេង-ចាស់ប្រុស-ស្រីប្រមាណ ៥០ នាក់មកពីមជ្ឈដ្ឋានផ្សេងគ្នា ខណៈដែលពួកគេមកជុំគ្នានៅសួនច្បារជិតភូមិគ្រឹះលោកនាយករដ្ឋមន្ត្រី ហ៊ុន សែន ដើម្បីចាំទទួលអាំងប៉ាវក្នុងថ្ងៃចូលឆ្នាំចិនពីគ្រួសារលោកតាមរយៈការឮតៗគ្នា។
ក្រោយពីការបណ្ដេញដេញដោយក្រុមសន្តិសុខឲ្យចេញឆ្ងាយពីសួនច្បារជិតភូមិគ្រឹះលោកនាយករដ្ឋមន្ត្រី ពួកគេបានមកប្រមូលផ្តុំគ្នាក្បែរភោជនីយដ្ឋាន ១ ឈ្មោះ ង៉ន ដែលនៅមិនឆ្ងាយប៉ុន្មានពីភូមិគ្រឹះនោះ។
ស្ត្រីម្នាក់ឈ្មោះ សម ចាន់ អាយុ ៤៥ ឆ្នាំដែលអះអាងថា គាត់ជាពលរដ្ឋរស់នៅសង្កាត់ច្បារអំពៅទី ១ ខណ្ឌច្បារអំពៅបានប្រាប់ភ្នំពេញប៉ុស្តិ៍ថា គាត់មកភូមិគ្រឹះលោកនាយករដ្ឋមន្ត្រី ហ៊ុន សែន នេះគឺក្នុងបំណងមកទទួលយកអាំងប៉ាវពីលោក ព្រោះអ្នកស្រីត្រូវបានមនុស្សប្រុសម្នាក់នៅក្បែរភូមិអ្នកស្រីប្រាប់អ្នកភូមិថា ជារៀងរាល់រដូវបុណ្យចូលឆ្នាំចិន-វៀតណាម គាត់តែងតែមកទទួលយកអាំងប៉ាវនៅផ្ទះលោកនាយករដ្ឋមន្ត្រី។
អ្នកស្ត្រីបញ្ជាក់ថា៖ «ខ្ញុំអត់ហើយលក់ដូរនំចំណីបន្តិចបន្តួចឆ្នាំនេះរកអ្វីមិនបានទេ ហើយរាល់ឆ្នាំក៏ខ្ញុំមិនធ្លាប់មកទីនេះដែរ តែឆ្នាំនេះទើបខ្ញុំនឹកឃើញថាគេបានលុយទើបពួកខ្ញុំមកនឹងគេទៅ។ គេប្រាប់ថាលោកតា ហ៊ុន សែន បើកអំណោយនៅថ្ងៃសែនចិនហ្នឹងទើបពួកខ្ញុំមកបងអើយ។ ខ្ញុំមកនេះព្រោះឮសូរគេប្រាប់ថា គេធ្លាប់បានម្នាក់ ៥ ម៉ឺនរៀល។ គេថាឆ្នាំមុនម្នាក់ៗបានសុទ្ធតែក្រដាស ៥ ម៉ឺនរៀលតែម្តង»។
អ្នកស្រី សំ ចាន់ បន្តថាពួកគាត់បាននាំគ្នាជួលរ៉ឺម៉កកង់បីដែលមានគ្នា ១០ នាក់ជិះមកផ្ទះលោកនាយករដ្ឋមន្ត្រី ហ៊ុន សែន តាំងពីព្រឹកដោយចំណាយក្នុងម្នាក់ ២ ពាន់រៀល ប៉ុន្តែពេលមកដល់មិនទាន់ទាំងបានឈរស្រួលបួលផងក៏ត្រូវកម្លាំងសន្តិសុខដេញតែម្តង។
ស្ត្រីម្នាក់ទៀតដែលមិនប្រាប់ឈ្មោះ និងអះអាងថាមកពីសង្កាត់និរោធ ខណ្ឌច្បារអំពៅដែរនោះបានប្រាប់ថា៖ «ពួកខ្ញុំមានបញ្ហាជីវភាពក្រីក្រ ដូច្នេះពេលឮគេប្រាប់ក៏មកក្រែងបានលុយ ប៉ុន្តែត្រូវកងសន្តិសុខដេញមិនឲ្យឈរប្រមូលម្តុំគ្នាហើយគេថា បើមិនស្តាប់គេនឹងចាប់ដាក់ឡាន»។
ពាក់ព័ន្ធបញ្ហានេះលោក ពៅ ហួត ចៅសង្កាត់ច្បារអំពៅទី ១ បានថ្លែងកាលពីម្សិលមិញថា ករណីនេះគឺមានមែន តែមិនមែនប្រជាពលរដ្ឋនៅក្នុងសង្កាត់របស់លោកទេ តែជាអ្នករស់នៅសង្កាត់ច្បារអំពៅទី ២ ហើយពួកគាត់រស់នៅក្នុងសហគមន៍ក្រីក្រ។
លោកបន្តថា៖ «ខ្ញុំបានសួរពួកគាត់ ហើយប្រាប់ខ្ញុំថានៅថ្ងៃទី ១៥ កុម្ភៈ ពួកគាត់ទៅផ្ទះសម្តេច ហ៊ុន សែន បានអំណោយ ព្រោះសម្តេចចែកជូនអ្នកក្រ។ តែដល់ពេលពួកគាត់ទៅដល់វាអត់មានគោលការណ៍ហ្នឹង។ ក្រោយមកលោកអភិបាលខណ្ឌដឹងក៏ឲ្យមន្ត្រីយកពួកគាត់មកសាលាខណ្ឌវិញ»។
លោក សំ ផុន ចៅសង្កាត់ច្បារអំពៅទី ២ ប្រាប់ថា បញ្ហានេះដំបូងលោកមិនបានដឹងទេ ប៉ុន្តែក្រោយមកបានដឹងថាខាងសាលាខណ្ឌច្បារអំពៅ យកមនុស្សពីរបីនាក់មកដាក់នៅសាលាខណ្ឌ បន្ទាប់មកឲ្យពួកគេត្រឡប់ទៅផ្ទះវិញរៀងៗខ្លួន អ្នកណានៅសង្កាត់ណា ទៅសង្កាត់នោះវិញទៅ។
លោកថា៖ «ខ្ញុំដឹងបានតែប៉ុណ្ណឹងព្រោះខ្ញុំរវល់ចុះល្បាតក្នុងមូលដ្ឋានហើយពួកគាត់ដើរសេរីជាសិទ្ធិរបស់ពួកគាត់»។
ជុំវិញបញ្ហានេះលោក ហួត ហ៊ុយ នាយករដ្ឋបាលសាលាខណ្ឌច្បារអំពៅប្រាប់ថា៖ «ខ្ញុំឮតែតាមព័ត៌មានគេប្រាប់ខ្ញុំអ៊ីចឹងដែរ ប៉ុន្តែបន្ទាប់មកពួកគាត់បានទៅសាលាខណ្ឌហើយក៏ត្រឡប់ទៅផ្ទះវិញទៅ។ ពួកគាត់នៅក្នុងសង្កាត់ច្បារអំពៅទី ២ មែន តែពួកគាត់រស់នៅមិនរៀបរយទេ»៕