.jpg)
ប្រជាពលរដ្ឋពេលនាំគ្នាមកតវ៉ារកដំណោះស្រាយនៅរាជធានីភ្នំពេញកាលពីម្សិលមិញ។ រូបថត សហការី
ភ្នំពេញៈ អាជីវករមានតូបលក់ដូរនៅឆ្នេរអូរត្រេះ ១ និងអូរត្រេះ ២ ក្នុងសង្កាត់លេខ ៤ ក្រុងព្រះសីហនុចំនួន ៦២ តូប ដែលត្រូវអាជ្ញាធរខេត្ដព្រះសីហនុរុះរើតូបអស់កាលពីម្សិលមិញបាននាំគ្នាមកតវ៉ាទាមទាររកដំណោះស្រាយ និងសំណងនៅខុទ្ទកាល័យលោកនាយករដ្ឋមន្ដ្រី ហ៊ុន សែន។
តំណាងអាជីវករទាំង ៦២ តូប អ្នកស្រី ស៊ូ ជី ដែលបានដឹកនាំគ្នាប្រមាណជាង ៥០ នាក់ មកតវ៉ានៅមុខខុទ្ទកាល័យលោកនាយករដ្ឋមន្ដ្រីកាលពីព្រឹកម្សិលមិញបានថ្លែងថា ពួកអ្នកស្រីមិនសុខចិត្ដចំពោះការរុះរើតូបរបស់រដ្ឋបាលខេត្ដព្រះសីហនុទេ ហើយការឡើងមកតវ៉ានេះ គឺដើម្បីស្នើសុំឱ្យលោកនាយករដ្ឋមន្ដ្រីជួយស្វែងរកកិច្ចអន្តរាគមន៍ឱ្យរដ្ឋបាលខេត្ដព្រះសីហនុ ផ្ដល់សំណងការខូចខាតពីការឈូសឆាយតូប និងរកដំណោះស្រាយរកទីតាំងលក់ដូរឱ្យពួកគាត់វិញ។
អ្នកស្រីថ្លែងថា៖ «នៅព្រឹកនេះមានតំណាងពីខុទ្ទកាល័យសម្ដេចនាយករដ្ឋមន្ដ្រីគាត់ចុះមកយកព័ត៌មាននឹងទទួលយកឯកសារពីពួកខ្ញុំ ដែលដាក់ទៅហើយ។ ពួកខ្ញុំបានដាក់ញត្តិសុំអន្តរាគមន៍ពីសម្ដេចក្នុងនោះយើងក៏បានដាក់ពាក្យបណ្ដឹងដែលពួកយើងបានខាតបង់ ពេលរដ្ឋបាលខេត្ដឈូសឆាយតូបពួកយើងដែរ»។
អ្នកស្រី ស៊ូ ជី ថ្លែងថា គោលបំណងចម្បងក្នុងការឡើងមកតវ៉ានេះ គឺទាមទារសំណងចំពោះការឈូសឆាយតូបទាំង ៦០ តូប។ ទាមទារឱ្យរដ្ឋបាលខេត្ដចេញប្លង់ស្ដង់ដានៅចំណុចទីតាំងតូបដល់អាជីវករទាំង ៦២ តូប និងបើរដ្ឋបាលខេត្ដមិនអនុញ្ញាតឱ្យប្រកបអាជីវកម្មលក់ដូរបន្តនៅចំណុចឆ្នេរអូត្រេះ រដ្ឋបាលខេត្ដព្រះសីហនុក៏អាចផ្លាស់ប្ដូរទីតាំងណាមួយឱ្យពួកគាត់អាចលក់ដូរបន្តក៏បានដែរ។
អ្នកស្រីបញ្ជាក់ថា៖ «រដ្ឋបាលខេត្ដព្រះសីហនុ គាត់ត្រូវតែមានដំណោះស្រាយណាមួយសម្រាប់ពួកខ្ញុំ។ ពួកយើងជាអាជីវករទាំង ៦២ តូប មានអ្នកខ្លះបានមកប្រកបអាជីវកម្មនៅទីនេះខ្លះ ២០ ខ្លះ ១០ ឆ្នាំមកហើយដោយបើកលក់ដូរជាអាហារដ្ឋាននៅតំបន់ឆ្នេរអូត្រេះនេះ»។
លោក ឃាង ភារម្យ អ្នកនាំពាក្យរដ្ឋបាលខេត្ដព្រះសីហនុថ្លែងពីម្សិលមិញថា តូប និងស្ដង់នៅក្នុងតំបន់ឆ្នេរអូរត្រេះមានចំនួន ១៥៦ តូប/ស្ដង់ក្នុងនោះរដ្ឋបាលខេត្ដបានរៀបចំសណ្ដាប់ធ្នាប់ផ្សេងៗរួចរាល់ជាស្ថាពរហើយ ដោយនៅតែសម្អាតឆ្នេរ កាកសំណល់ លូ បង្គន់ រាប់រយកន្លែង ដែលក្រុមការងាររបស់រដ្ឋបាលខេត្ដកំពុងបន្តធ្វើនៅតំបន់ឆ្នេរអូត្រេះនេះក្រោយការរុះរើកាលពីថ្ងៃទី ១៥ ខែមករាកន្លងទៅ។
លោកថ្លែងថា៖ «ពាក់ព័ន្ធបងប្អូនអាជីវករមួយចំនួនដែលទៅធ្វើការតវ៉ាទាមទារផ្សេងៗនោះគឺជាសិទ្ធិរបស់ពលរដ្ឋ។ ប៉ុន្ដែចំពោះមុខរដ្ឋបាលខេត្ដ និងមន្ដ្រីជំនាញពាក់ព័ន្ធទាំងអស់គឺយើងកំពុងតែសម្អាត និងកែលម្អសោភណភាពឆ្នេររបស់យើងទាំងឆ្នេរអូត្រេះ និងឆ្នេរអូរឈើទាល ២ រៀបចំឱ្យបានស្អាតទាំងបរិស្ថានអនាម័យ ពិសេសទៅលើសោភណភាពដោយធ្វើយ៉ាងណារៀបចំឱ្យឆ្នេររបស់យើងស្អាតឡើងវិញស័កិ្តសមជាឆ្នេរស្អាតទុកជាឆ្នេរសាធារណៈរបស់រដ្ឋដើម្បីបម្រើឱ្យប្រជាពលរដ្ឋទូទាំងប្រទេសក៏ដូចជាភ្ញៀវទេសចរអន្តរជាតិចូលមកកម្សាន្ត ដោយមិនមានការបង់ថ្លៃ»។
រដ្ឋបាលខេត្ដព្រះសីហនុកាលពីថ្ងៃទី ១៥ ខែមករា បានរុះរើតូបនៅតាមបណ្ដោយឆ្នេរអូរត្រេះ ១ និងអូរត្រេះ ២ អស់ទាំងស្រុងចំនួន ១៥៦ តូប។ ក្នុងការរុះរើតូបទាំងអស់ទាំងនៅឆ្នេរអូរត្រេះ ១ អូរត្រេះ ២ និងឆ្នេរអូរឈើទាលបានរុះរើតូបសរុបមានចំនួន ២៨២ តូប។
លោក លី ចាន់តុលា មេធាវី និងជាសាស្ត្រាចារ្យនៃសាកលវិទ្យាល័យនីតិសាស្ត្រ វិទ្យាសាស្ត្រសេដ្ឋកិច្ចបានលើកឡើងថា ជាគោលការណ៍ច្បាប់ នៅពេលពលរដ្ឋទៅរស់នៅលើដីសាធារណៈរបស់រដ្ឋលើសពី ១០ ឆ្នាំឡើងទៅរដ្ឋមិនត្រូវមានសំណងនោះទេ ហើយរដ្ឋអាចមានសិទ្ធិប្ដឹងពលរដ្ឋនោះបានថែមទៀត។
លោកថ្លែងថា៖ «តាមច្បាប់ភូមិបាលយើង គឺដីទាំងអស់ក្រោយច្បាប់ភូមិបាលឆ្នាំ ២០០១ សុទ្ធតែជាដីកំណត់ថា មានម្ចាស់ ហើយបើសិនជាអត់មានកម្មសិទ្ធិឯកជនទេនោះ គេ (ច្បាប់) កំណត់ថាជាកម្មសិទ្ធិរបស់រដ្ឋ។ តាមច្បាប់ភូមិបាលនោះគេបានកំណត់មានទោសទៅទៀតសម្រាប់អ្នកណាដែលមកគ្រប់គ្រងរស់នៅលើដីរបស់រដ្ឋ»។
ទាក់ទងនឹងការឡើងមកតវ៉ាទាមទាររស់នៅ និងធ្វើអាជីវកម្មនៅឆ្នេរអូរត្រេះរបស់ប្រជាពលរដ្ឋនេះលោក ចាន់តុលា បញ្ជាក់ថា ពលរដ្ឋមិនអាចមកទាមទារបែបនេះបានទេ ព្រោះករណីនេះជាករណីដែលពលរដ្ឋទៅរស់នៅរំលោភបំពានលើដីរបស់រដ្ឋ៕
