.jpg)
សមត្ថកិច្ចពិនិត្យមើលពស់ដែលរឹបអូសបាន។ សហការី
ពោធិ៍សាត់ៈ មន្ត្រីជំនាញខេត្តពោធិ៍សាត់រឹបអូសបានពស់ប្រភេទផ្សេងៗគ្នាចំនួនប្រមាណជិត ៩០ គីឡូក្រាម ក្រោយពីបានឆែករកឃើញក្នុងរថយន្តដឹកអ្នកដំណើររបស់ប្ដីប្រពន្ធ ២ នាក់ ដែលធ្វើដំណើរនៅលើផ្លូវជាតិលេខ ៥ ចេញពីខេត្តបាត់ដំបងទៅរាជធានីភ្នំពេញកាលពីថ្ងៃអាទិត្យកន្លងមកនេះតែប្រភេទពស់ទាំងនោះមិនមែនជាអម្បូរជិតផុតពូជនោះទេ។
លោក ជា ប៊ុនឌី នាយសង្កាត់រដ្ឋបាលព្រៃឈើសំពៅមាស ក្រុងខេត្តពោធិ៍សាត់បានឲ្យដឹងកាលពីម្សិលមិញថា អ្នកបើកបររថយន្តដឹកអ្នកដំណើរម្នាក់ ឈ្មោះ តាន់ កុសល អាយុ ៤៧ ឆ្នាំ និងប្រពន្ធរបស់គាត់ ឈ្មោះ ខៀវ កញ្ញារី អាយុ ៤៣ ឆ្នាំ ព្រមទាំងកូនស្រីអាយុ ៦ ឆ្នាំម្នាក់ រស់នៅឃុំព្រៃស្វាយ ស្រុកមោងឫស្សី ខេត្តបាត់ដំបង ត្រូវបានកម្លាំងសមត្ថកិច្ចរដ្ឋបាលព្រៃឈើឃាត់ខ្លួនធ្វើការសាកសួរ និងអប់រំឲ្យធ្វើកិច្ចសន្យាបញ្ឈប់ការដឹកជញ្ជូនបទល្មើសសត្វព្រៃ។ សត្វពស់ ៣ ប្រភេទ រួមមានពស់សង់សឿ ពស់ប្រេង និងពស់ស្នាទន្សោង។ សរុបទម្ងន់ ៨៨ គីឡូក្រាម ដាក់ក្នុងប្រអប់ស្នោបិទជិតចំនួន ៥ នៅរថយន្តរបស់ពួកគេ។
លោក ប៊ុនឌី ថ្លែងថា៖ «សមត្ថកិច្ចយើងបានធ្វើការរឹបអូសសត្វពស់ទាំងនោះ ដើម្បីនាំយកទៅលែងក្នុងព្រៃធម្មជាតិវិញ និងបានដោះលែងពួកគេ (អ្នកបើកបរ) ឲ្យត្រឡប់ទៅវិញ បន្ទាប់ពីបានធ្វើការអប់រំណែនាំឲ្យបញ្ឈប់ការស៊ីឈ្នួលដឹកជញ្ជូនបទល្មើសសត្វព្រៃតទៅទៀត»។
លោកថ្លែងថា៖ «ការដោះលែងមនុស្សនេះ ដោយសារសត្វពស់ទាំងនោះជាប្រភេទសត្វសម្បូរដោយបង្គួរ និងដោយសារតែពួកគេបានផ្ដល់ព័ត៌មានលម្អិតអំពីម្ចាស់ទំនិញដល់សមត្ថកិច្ចយើងដើម្បីធ្វើការស្រាវជ្រាវនិងចាត់វិធានការបន្តតាមនីតិវិធីច្បាប់»៕
