ភ្នំពេញៈ ព្រះមហាក្សត្រកម្ពុជាព្រះបាទព្រះបរមនាថ នរោត្តម សីហមុនី បានត្រាស់បង្គាប់តែងតាំងមន្ត្រី ២ រូបឲ្យធ្វើជាសមាជិកព្រឹទ្ធសភាសម្រាប់អាណត្តិទី ៤ ខណៈការបោះឆ្នោតអសកលជ្រើសរើសសមាជិកព្រឹទ្ធសភានឹងឈានមកដល់នៅចុងខែនេះ ។ នេះបើតាមព្រះរាជក្រឹត្យចុះថ្ងៃទី ១៩ ខែកុម្ភៈ។
បើតាមព្រះរាជក្រឹត្យនេះសមាជិកព្រឹទ្ធសភាដែលត្រូវបានត្រាស់បង្គាប់តែងតាំងថ្មីនោះមាន សម្ដេចរាជបុត្រីព្រះអនុជ នរោត្តម អរុណរស្មី អតីតប្រធានគណបក្សហ៊្វុនស៊ីប៉ិច និង លោក ជំទាវ អ៊ុំ សូម៉ានីន ។
គូរបញ្ជាក់ថា តាមច្បាប់កម្ពុជា ការជ្រើសសមាជិកព្រឹទ្ធសភាត្រូវធ្វើឡើងតាមរយៈការតែងតាំងពីព្រះមហាក្សត្រចំនួន ២ រូប តែងតាំងពីរដ្ឋសភាចំនួន ២ រូប និងតាមរយៈការបោះឆ្នោតអសកលដោយមានអង្គបោះឆ្នោតចាប់ពីសមាជិកក្រុមប្រឹក្សាឃុំ-សង្កាត ស្រុក -ខណ្ឌនិងរាជធានី-ខេត្តក្រុង។
បើតាមកាលបរិច្ឆេទរបស់ គ.ជ.ប ការបោះឆ្នោតជ្រើសតាំងសមាជិកព្រឹទ្ធសភាអាណត្តិទី៤ នឹងប្រព្រឹត្ដទៅនៅថ្ងៃទី ២៥ ខែកុម្ភៈ ឆ្នាំ ២០១៨ ខណៈសមាជិកព្រឹទ្ធសភាថ្មីទាំងអស់នឹងឡើងដល់ ៦២ រូប៕