ភ្នំពេញៈ សម្ដេចព្រះវនរ័ត្ន កិត្តិឧសទ្ទេសបណ្ឌិត ណយ ច្រឹក បានទទួលពានរង្វាន់មេដាយឥស្សរជនឆ្នើមលំដាប់ពិភពលោក ផែ្នកចិត្តវិញ្ញាណកំពូលប្រចាំឆ្នាំ ២០១៩ ដោយអង្គការមនុស្សធម៌មួយឈ្មោះថា «យើងយកចិត្តទុកដាក់លើមនុស្សជាតិ»។
ព្រះអង្គគឺជាឥស្សរជនមួយរូប ក្នុងចំណោម ១៤ រូប ដែលត្រូវប្រគល់ពានរង្វាន់ G.O.D ឆ្នាំ ២០១៩ ដោយអង្គការ «យើងយកចិត្តទុកដាក់លើមនុស្សជាតិ» ឬភាសាអង់គ្លេសថា We Care for Humanity ដែលរៀបចំធ្វើឡើងនៅស្នាក់ការអង្គការសហប្រជាជាតិ ក្នុងទីក្រុងហ្សឺណែវ ប្រទេសស្វ៊ីស កាលពីថ្ងៃទី ១១ និង ១២ ខែកក្កដានេះ។
ព្រះសង្ឃ ណយ ច្រឹក គឺជាព្រះសង្ឃនាយករងទី៣ នៃព្រះរាជាណាចក្រកម្ពុជា និងជាចៅអធិការវត្តច័ន្ទបុរីវង្ស ស្ថិតនៅសង្កាត់សំរោង ខណ្ឌព្រែកព្នៅ ក្នុងរាជធានីភ្នំពេញ។ ពានរង្វាន់នេះ ត្រូវបានផ្ដួចផ្ដើមគំនិតឡើងកាលពីឆ្នាំ ២០១១ ដោយម្ចាស់ក្សត្រី Maria Amor Torres នៃប្រទេស ហ្វីលីពីន និងជាសកម្មជនអាមេរិកាំងហ្វីលីពីន មានមូលដ្ឋានក្នុងទីក្រុង Los Angeles សហរដ្ឋអាមេរិក។
លោក សេង សុមុនី អ្នកនាំពាក្យក្រសួងធម្មការ និងសាសនា បានថ្លែងកាលពីថ្ងៃអាទិត្យថា ព្រះសង្ឃនាយករងទី៣ ស័ក្តិសមទទួលបាននូវពានរង្វាន់កិត្តិយសនេះ។
លោកថ្លែងថា៖ «លោកបានទេសនាលើកទឹកចិត្ត ផ្ដោតលើកម្លាំងចិត្ត ការលើកទឹកចិត្តសម្រាប់ឲ្យអ្នកក្រីក្រព្យាយាមរកទទួលទានឲ្យមានបានឡើងវិញ ហើយបានអប់រំផ្លូវចិត្តពួកគេឲ្យចៀសវាងអំពើហិង្សា។ ព្រះអង្គក៏លើកទឹកចិត្តឲ្យមនុស្សមានសន្តិភាពផ្លូវចិត្ត គឺព្រះអង្គមានជំនាញលើបញ្ហាទាំងនេះ»។
លោកបានថ្លែងបន្តថា ព្រះអង្គបានទេសនាផ្សព្វផ្សាយលើកទឹកចិត្តក្នុងឱកាសជាច្រើន មិនត្រឹមតែក្នុងការទេសនាក្នុងពិធីសាធារណៈទេ រួមទាំងការណែនាំពន្យល់ផ្ទាល់។ លោកថា ព្រះអង្គដើរតួជាគំរូ ដោយអនុវត្តបានយ៉ាងប្រសើរទាំងក្នុងសកម្មភាពប្រចាំថ្ងៃ និងអត្តចរិត។ ព្រះអង្គបង្ហាញហេតុ និងផលនៃអំពើល្អនានា។
លោក សុមុនី បានបន្ថែមថា៖ «ព្រះអង្គស័ក្តិសមនឹងទទួលបានរង្វាន់នេះ។ រង្វាន់នេះ កើតចេញពីការវាយតម្លៃរបស់អង្គការពិភពលោក។ វាជាកិត្តិយសរបស់ជាតិដែលយើងមានបុគ្គលឆ្នើម ដែលបានពានរង្វាន់។ យើងកោតសរសើរលោក ដែលបានពាននេះ ព្រោះវាជាសមិទ្ធផលរបស់ជាតិយើង មិនមែនសម្រាប់តែព្រះអង្គម្នាក់ទេ»។
ព្រះសង្ឃ ណយ ច្រឹក ក៏បានចូលរួមកិច្ចប្រជុំ «និរន្តរភាពនៃមនុស្សធម៌ឆ្ពោះទៅកាន់របៀបវារៈឆ្នាំ ២០៣០ របស់អង្គការសហប្រជាជាតិ» នៅអង្គការសហប្រជាជាតិផងដែរ។ ព្រះអង្គត្រូវបានសម្ភាសអំពីតួនាទីនៃអន្តរសាសនា ឆ្ពោះទៅរកសន្តិភាពពិភពលោក ដោយត្រូវបានស្នើឲ្យពន្យល់អំពីកិច្ចសន្ទនាអន្តរសាសនា នៅក្នុងការដោះស្រាយជម្លោះ និងអំពើហិង្សា។
ព្រះអង្គបានលើកឡើងពីបទពិសោធនៅកម្ពុជាថា ចន្លោះពីឆ្នាំ ១៩៧៥ ដល់ ១៩៧៩ ដែលកម្ពុជាស្ថិតក្នុងរបបខ្មែរក្រហម សាសនាត្រូវបានកម្ទេចចោល។ ការគោរពសាសនាកើតមានឡើងវិញ ក្រោយរបបនេះត្រូវបានផ្តួលរំលំ ប៉ុន្តែបានរីកចម្រើនឡើងវិញ បន្ទាប់ពីកម្ពុជាទទួលបានសន្តិភាពពេញលេញ នៅឆ្នាំ ១៩៩៨ ក្រោមនយោបាយឈ្នះឈ្នះ របស់លោកនាយករដ្ឋមន្ត្រី ហ៊ុន សែន។ ព្រះអង្គបន្តថា លោក ហ៊ុន សែន គឺជាគំរូនៃការគោរពសិទ្ធិសេរីភាព នៃជំនឿសាសនា។
ព្រះអង្គបញ្ជាក់ថា៖ «លើសពីនេះទៅទៀត នៅកម្ពុជាមានវិហារគ្រិស្តសាសនា អ៊ិស្លាម ជាច្រើនកន្លែង និងគ្រប់ទិសទី។ អ្នកកាន់សាសនាផ្សេងៗគ្នា មានទំនាក់ទំនងនឹងគ្នាទៅវិញទៅមក។ ជាលទ្ធផលកម្ពុជា មិនដែលមានទំនាស់ ឬជម្លោះសាសនាម្តងណាទេ ក្រោយឆ្នាំ ១៩៧៩ រហូតមកដល់បច្ចុប្បន្ន»។
ព្រះអង្គបញ្ជាក់ថា៖ «ដូច្នេះ ការសន្និដ្ឋានរបស់អាត្មា គឺថាគ្រប់សាសនាទាំងអស់ ត្រូវតែធ្វើការប្រាស្រ័យទាក់ទងគ្នា ឲ្យតម្លៃគ្នាទៅវិញទៅមក និងប្រកាន់នូវធម៌អហិង្សាដើម្បីដោះស្រាយគ្រប់បញ្ហារួមទាំងជម្លោះផងដែរ »៕