.jpg)
មាន់ ទា ត្រូវបានដាក់លក់នៅផ្សារអូរឬស្សី កាលពីឆ្នាំមុន។ ហុង មិនា
ព្រៃវែងៈ មន្ទីរកសិកម្ម រុក្ខាប្រមាញ់ និងនេសាទខេត្តព្រៃវែងបានចេញបម្រាមមិនឲ្យធ្វើចរាចរណ៍សត្វមាន់ឆ្លងកាត់ភូមិព្រៃផ្តៅ ឃុំស្ដៅកោង ស្រុកបាភ្នំទេ ភ្លាមៗបន្ទាប់ពីរកឃើញវត្តមាននៃមេរោគជំងឺផ្តាសាយបក្សី ១ សំណាកក្នុងចំណោមសំណាកជាច្រើនដែលយកទៅពិសោធកាលពីថ្ងៃទី ១៤ ខែកុម្ភៈជាអ្វីដែលមន្ទីរថា ដើម្បីចៀសវាងឆ្លងទៅតំបន់ផ្សេង។
លោក អ៊ុក សំណាង ប្រធានមន្ទីរកសិកម្ម ខេត្តព្រៃវែងបានឲ្យដឹងថា៖ «ក្រោយពីមន្ទីរកសិកម្មទទួលបាននូវព័ត៌មានក៏ដូចសេចក្តីណែនាំពីក្រសួង មន្ទីរកសិកម្មបានចាត់វិធានការទប់ស្កាត់នូវបញ្ហានេះ។ ទី ១ គឺតំបន់ដែលមានវត្តមានជំងឺសត្វនេះគឺមិនឲ្យចរាចរណ៍សត្វឆ្លងកាត់ក្នុងតំបន់ហ្នឹងទេ។ ទី ២ គឺយើងត្រូវចាត់វិធានការបញ្ជាក់សុវត្ថិភាពគឺមានន័យថា យើងបាញ់ថ្នាំ និងទប់ស្កាត់ជំងឺនេះ។ ការឆ្លង និងចរាចរណ៍ក្នុងតំបន់ហ្នឹងត្រូវទប់ស្កាត់មិនឲ្យឆ្លងពីតំបន់មួយ ទៅតំបន់មួយ»។
ទោះជាយ៉ាងណាលោក សំណាង បានថ្លែងថាការរកឃើញនេះមិនទាន់ប៉ះពាល់ដល់ការរស់នៅរបស់អ្នកនៅទីនោះទេ ប៉ុន្តែក៏មិនបានបញ្ជាក់ពីការបញ្ឈប់បម្រាមនៅពេលណាដែរ ខណៈមិនទាន់បានវិនិច្ឆ័យលម្អិតនៅឡើយនោះ។
អ្នកនាំពាក្យក្រសួងសុខាភិបាល លោក លី សុវណ្ណ កាលពីម្សិលមិញមិនអាចទាក់ទងសុំអត្ថាធិប្បាយបន្ថែមបានទេ។
កាលពីខែមុន សញ្ញានៃជំងឺនេះក៏បានកើតដែរទៅលើសត្វមាន់ក្នុងខណ្ឌសែនសុខរាជធានីភ្នំពេញ ដោយមានសត្វមាន់ជាង ១០០ ក្បាលត្រូវបានសម្លាប់ដើម្បីកុំឲ្យឆ្លងទៅមនុស្ស និងសត្វបន្តទៀត។
ស្រដៀងគ្នានេះកាលពីខែធ្នូ ឆ្នាំមុនជំងឺផ្តាសាយបក្សីនេះបានកើតឡើងក្នុងស្រុកព្រៃឈរ ខេត្តកំពង់ចាមបណ្តាលឲ្យសត្វជាង ២០០ ក្បាលបានងាប់។
នៅលើទំព័រហ្វេសប៊ុកនាយកដ្ឋានប្រយុទ្ធនឹងជំងឺឆ្លងនៃក្រសួងសុខាភិបាលកាលពីថ្ងៃ ១៤ កុម្ភៈបានឲ្យដឹងថា ថ្មីៗនេះមានការផ្ទុះជំងឺផ្ដាសាយបក្សី H5N1 ជាបន្តបន្ទាប់នៅស្រុកព្រៃឈរ និងស្រុកចំការលើ ខេត្តកំពង់ចាម ស្រុកស្ទោង ខេត្តកំពង់ធំ ខណ្ឌសែនសុខ រាជធានីភ្នំពេញ ស្រុកកែវសីមា ខេត្តមណ្ឌលគិរី និងថ្មីៗនេះទៀតនៅស្រុកបាភ្នំ ខេត្តព្រៃវែង។
សូមរំឭកដែរថាចាប់តាំងពីឆ្នាំ ២០០៥ ដល់ ២០១៤ ជំងឺផ្តាសាយបក្សីធ្លាប់បានឆ្លងពីសត្វបក្សីមកមនុស្សចំនួន ៥៦ ករណីក្នុងនោះមាន ៣៧ ករណីបានស្លាប់។ ដោយឡែកគ្រាន់តែនៅក្នុងឆ្នាំ ២០១៣ មានឆ្លងលើមនុស្សចំនួន ២៦ ករណី ក្នុងនោះមាន ១៤ ករណីបានស្លាប់ ខណៈដែលនៅក្នុងឆ្នាំ ២០១៤ មាន ៩ ករណី និងមាន ៤ ករណីបានស្លាប់៕
