កំពង់ស្ពឺៈ មនុស្ស ១០ នាក់បានស្លាប់ និង ៥ នាក់ផ្សេងទៀតបានរងរបួសធ្ងន់ ក្នុងឧបទ្ទវហេតុគ្រោះថ្នាក់ចរាចរណ៍រថយន្ត ៣ គ្រឿង បុកគ្នាកាលពីយប់ថ្ងៃសៅរ៍ នៅលើកំណាត់ផ្លូវជាតិលេខ ៤ ក្នុងចំណុចភូមិសាស្ត្រឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ។
លោក តាប់ លន ស្នងការរង ទទួលបន្ទុកផែនចរាចរណ៍ផ្លូវគោកនៃស្នងការដ្ឋាននគរបាលខេត្តកំពង់ស្ពឺ បានប្រាប់ភ្នំពេញប៉ុស្តិ៍កាលពីម្សិលមិញថា ក្នុងចំណោមជនរងគ្រោះ ១០ នាក់ ដែលបានស្លាប់ក្នុងគ្រោះថ្នាក់ចរាចរណ៍ខាងលើនេះ មាន ៣ នាក់ជាមន្ត្រីបម្រើការនៅអគ្គនាយកដ្ឋានគយ និងរដ្ឋាករ ដែលរួមមាន ឈ្មោះ ជន់ ច័ន្ទរិទ្ធ, គឹម ឆាត និង ឈ្មោះ ហេង មករា។
លោកបានបន្តថា សពជនរងគ្រោះទាំងអស់ត្រូវបានក្រុមគ្រួសារ និងសាច់ញាតិនាំយកទៅធ្វើបុណ្យតាមប្រពៃណី លើកលែងតែសពស្ត្រីម្នាក់ ដែលរហូតមកទល់ពេលនេះ ក្រុមសមត្ថកិច្ចនៅពុំទាន់ដឹងអំពីអត្តសញ្ញាណនៅឡើយ ត្រូវបាននាំយកទៅតម្កល់ទុកជាបណ្ដោះអាសន្ននៅក្នុងមន្ទីរពេទ្យខេត្តកំពង់ស្ពឺ ដើម្បីរង់ចាំសាច់ញាតិមកទទួល។
លោក លន ថ្លែងថា៖ «យោងតាមលទ្ធផលនៃការចុះធ្វើការត្រួតពិនិត្យ ស្រាវជ្រាវប្រមូលភ័ស្តុតាងនៅកន្លែងកើតហេតុដោយក្រុមគណៈកម្មការជំនាញថ្នាក់ជាតិ និងថ្នាក់ខេត្តយើង នាព្រឹកថ្ងៃអាទិត្យ [ម្សិលមិញ] នេះ បានរកឃើញថា គ្រោះថ្នាក់ចរាចរណ៍ដ៏រន្ធត់នេះ គឺបង្កឡើងដោយរថយន្តដឹកអ្នកដំណើរវីរៈប៊ុនថាំ»។
យ៉ាងណាក៏ដោយលោក ឡុង ណាផល ប្រធានរដ្ឋបាលទូទៅនៃក្រុមហ៊ុនដឹកជញ្ជូនអ្នកដំណើរវីរៈប៊ុនថាំ បាននិយាយថា ការវាយតម្លៃរបស់គណៈកម្មការជំនាញនៅពេលនេះ គឺមានលក្ខណៈផ្ទុយគ្នាទាំងស្រុងពីការវាយតម្លៃក្នុងជំហានបឋម របស់ក្រុមមន្ត្រីជំនាញថ្នាក់ខេត្តបានរាយការណ៍កាលពីយប់ថ្ងៃកើតហេតុ ៨ មិថុនា ២០១៩ ហើយត្រូវបានផ្សព្វផ្សាយបន្តនៅតាមបណ្ដាញផ្សព្វផ្សាយមួយចំនួនរួមទាំងប្រព័ន្ធផ្សព្វផ្សាយរបស់អគ្គស្នងការនគរបាលជាតិផងដែរ។
លោក ណាផល បាននិយាយថា៖ «ក្រុមហ៊ុនរបស់យើងពិបាកនឹងទទួលយកខ្លាំងណាស់ចំពោះការវាយតម្លៃរបស់គណៈកម្មការចម្រុះនៅពេលនេះ។ ទោះយ៉ាងណាក្រុមហ៊ុនរបស់យើងមានកិច្ចសហការជាមួយក្រុមហ៊ុនធានារ៉ាប់រងមួយ សម្រាប់ជួយអន្តរាគមន៍ដោះស្រាយ សំណងជាមួយក្រុមគ្រួសារជនរងគ្រោះ ដែលធ្វើដំណើរតាមរថយន្តរបស់ក្រុមហ៊ុនយើងខ្ញុំ»។
លោក ណាផល ឲ្យដឹងថាក្រុមហ៊ុនធានារ៉ាប់រង ដែលបានចុះកិច្ចព្រមព្រៀងជាមួយក្រុមហ៊ុនរបស់លោក បានបញ្ជូនអ្នកតំណាងរបស់ខ្លួន ១ ក្រុម ចុះទៅពិនិត្យនៅកន្លែងកើតហេតុ ហើយបានរកឃើញចំណុចវិជ្ជមានមួយ ដែលបង្ហាញថាគ្រោះថ្នាក់ចរាចរណ៍នោះមិនបង្កឡើងដោយខាងភាគីអ្នកបើកបររថយន្តក្រុមហ៊ុនទេ ប៉ុន្តែចំណុចនោះត្រូវបានក្រុមគណៈកម្មការជំនាញបដិសេធ។
លោកថ្លែងថា៖ «នៅពេលនេះ អ្នកតំណាងរបស់យើងកំពុងធ្វើការតវ៉ាសុំឲ្យមានការវាយតម្លៃជាថ្មីលើករណីនេះ ខណៈអ្នកបើកបររថយន្ត Hyundai នៅមិនទាន់ដឹងពីអត្តសញ្ញាណ ហើយបានគេចខ្លួនតាំងពីយប់ថ្ងៃកើតហេតុ។ រថយន្តរបស់ក្រុមហ៊ុនលោកបានដឹកអ្នកដំណើរ ៩ នាក់ ក្នុងនោះ ៥ នាក់បានស្លាប់។
ចំណែកតៃកុងឡាន និងអ្នកដំណើរ ៤ នាក់ទៀតបានរងរបួស។ យោងតាមរបាយការណ៍របស់សមត្ថកិច្ចជំនាញដែលភ្នំពេញប៉ុស្តិ៍ទទួលបាន រថយន្តដឹកអ្នកដំណើរវីរៈប៊ុនថាំ ជាប្រភេទរថយន្ត Minibus ២៥ កៅអី និងបានធ្វើដំណើរពីក្រុងព្រះសីហនុឆ្ពោះទៅកាន់រាជធានីភ្នំពេញ។
មកដល់ចំណុចកើតហេតុ រថយន្តនេះ បានបើកវ៉ាជែងរថយន្តមួយផ្សេងទៀត ដោយខ្វះការប្រុងប្រយ័ត្ន បានបុកទង្គិចជាមួយរថយន្តកូរ៉េម៉ាក Hyundai ប្រភេទ ២,៥ តោន ១ គ្រឿងដែលធ្វើដំណើរបញ្ច្រាសទិសគ្នា ហើយបានរេទៅបុករថយន្ត ១ គ្រឿងទៀតម៉ាក HIGHLANDER ដែលផ្ទុកមនុស្ស ៥ នាក់ ក្នុងនោះ ៣ នាក់ជាមន្ត្រីគយ។ រថយន្តទាំង ២ បានផ្ទុះឆេះ។ មនុស្ស ៥ នាក់ ក្នុងរថយន្ត HIGHLANDER បានស្លាប់ និងមនុស្ស ៥ នាក់ទៀត នៅក្នុងរថយន្តដឹកអ្នកដំណើរបានស្លាប់ និង ៥ នាក់របួសធ្ងន់៕