ភ្នំពេញៈ មន្ត្រីនគរបាលមូលដ្ឋានបាននិយាយថា មនុស្ស ២ នាក់ ត្រូវបានគេរកឃើញឆេះស្លាប់គរលើគ្នា ក្រោយមានគ្រោះអគ្គិភ័យ ឆាបឆេះបន្ទប់ស្នាក់នៅរបស់បុគ្គលិកសណ្ឋាគារ និងភោជនីយដ្ឋានឈូកទិព្វ ដែលមានទីតាំងស្ថិតនៅតាមបណ្ដោយផ្លូវលេខ ២៣៤ ក្នុងសង្កាត់ផ្សារដើមគ ខណ្ឌទួលគោក រាជធានីភ្នំពេញកាលពីវេលាម៉ោង ៣:២៥ នាទីទៀបភ្លឺនៅថ្ងៃពុធ។
លោក សុខ ហេង អធិការនគរបាលខណ្ឌទួលគោកបានប្រាប់ភ្នំពេញប៉ុស្តិ៍ថា អ្នកស្រី ព្រំ ថា អាយុ ៥៦ ឆ្នាំ និងកូនស្រីរបស់គាត់ឈ្មោះ ព្រំ សុខលី អាយុ ១៨ ឆ្នាំ ជាបុគ្គលិកផ្នែកអនាម័យ និងរៀបចំបន្ទប់នៃសណ្ឋាគារ និងភោជនីយដ្ឋានឈូកទិព្វត្រូវបានកម្លាំងនគរបាលកងពន្លត់អគ្គិភ័យ ប្រទះឃើញស្លាប់នៅក្រោមគំនរភ្នក់ភ្លើង ដោយរាងកាយឆេះខ្លោចគរលើគ្នា។
លោកបានបញ្ជាក់ថា៖ «យោងតាមការសន្និដ្ឋានរបស់មន្ត្រីនគរបាលជំនាញដែលបានចុះពិនិត្យកោសល្យវិច័យនៅកន្លែងកើតហេតុជនរងគ្រោះទាំង ២ នាក់ម្ដាយ និងកូនមានសភាពស្លោស្លន់ហើយស្ទុះឱបគ្នា នៅពេលមានគ្រោះអគ្គិភ័យកើតឡើង បន្ទាប់មកជនរងគ្រោះទាំង ២ បានឈ្លក់ផ្សែងភ្លើងហើយក៏សន្លប់។ បន្ទាប់មកទៀតអ្នកទាំង ២ ក៏ត្រូវភ្លើងឆេះរាងកាយស្លាប់តែម្ដង»។
លោក ហេង បានបន្ថែមថា៖ «គ្រោះអគ្គិភ័យនេះគឺបណ្ដាលមកពីការផ្ទុះឆ្លងចរន្តអគ្គិសនី»។
លោកបានអះអាងថា សពជនរងគ្រោះទាំង ២ នាក់ម្ដាយ និងកូនត្រូវបានមន្ត្រីជំនាញប្រគល់ជូនក្រុមគ្រួសារនាំយកទៅធ្វើបុណ្យនៅឯស្រុកកំណើត ស្ថិតនៅភូមិក្រាំងដូង ឃុំសំរោងក្រោម ស្រុកបន្ទាយមាស ខេត្តកំពត។
លោក ព្រំ យ៉ន ប្រធានការិយាល័យនគរបាលបង្ការ និងពន្លត់អគ្គិភ័យរាជធានីភ្នំពេញបានប្រាប់ភ្នំពេញប៉ុស្តិ៍ថា នៅវេលាម៉ោង ៣:៣០ នាទីព្រឹកថ្ងៃពុធ បន្ទាប់ពីទទួលបានសេចក្ដីរាយការណ៍អាជ្ញាធរមូលដ្ឋាន និងប្រជាពលរដ្ឋអំពីករណីភ្លើងឆេះអគារស្នាក់នៅរបស់បុគ្គលិកសណ្ឋាគារ និងភោជនីយដ្ឋានឈូកទិព្វក្នុងសង្កាត់ផ្សារដើមគ ខណ្ឌទួលគោក កម្លាំងរបស់លោកបានចេញអន្តរាគមន៍ភ្លាមៗដើម្បីការពារការឆេះរាលដាលទៅកាន់ផ្ទះប្រជាពលរដ្ឋផ្សេងទៀត។
លោកបានថ្លែងបន្តថានៅក្នុងប្រតិបត្តិការនោះ កម្លាំងនគរបាលការិយាល័យបង្ការ និងពន្លត់អគ្គិភ័យបានប្រើប្រាស់រថយន្តពន្លត់អគ្គិភ័យចំនួន ១៤ គ្រឿង និងមានរថយន្តអន្តរាគមន៍ពីក្រុមហ៊ុនស្រាបៀរកម្ពុជាចំនួន ១ គ្រឿងទៀត ចូលរួមបាញ់ពន្លត់ក្នុងរយៈពេល ៣០ នាទីប៉ុណ្ណោះ ក្រុមកម្លាំងនគរបាលជំនាញបានពន្លត់អគ្គិភ័យនោះបានទាំងស្រុង។
លោក យ៉ន បានបញ្ជាក់ថា៖ «ប៉ុន្តែក្រោយពីការគ្រប់គ្រងភ្លើងបានហើយ ក្រុមការងាររបស់យើងបានរើកកាយគំនរនៃបន្ទប់ស្នាក់នៅរបស់បុគ្គលិកសណ្ឋាគារនោះក៏ស្រាប់តែឃើញសាកសពជនរងគ្រោះ ២ នាក់គឺម្ដាយ និងកូនស្រីត្រូវភ្លើងឆេះខ្លោចគួរឲ្យអាសូរ»។
លោកបានបន្តថា ទោះយ៉ាងណាក៏ដោយក្រោយការចុះពិនិត្យអង្កេតយ៉ាងល្អិតល្អន់ពីក្រុមគណៈកម្មការបច្ចេកទេសកោសល្យវិច័យវិទ្យាសាស្ត្រ និងមានការចូលរួមពីខាងតំណាងអយ្យការអមសាលាដំបូងរាជធានីភ្នំពេញផងនោះបានរកឃើញ ថាករណីគ្រោះអគ្គិភ័យនេះគឺបណ្ដាលមកពីការ «ផ្ទុះឆ្លងចរន្តអគ្គិសនី» ហើយជនរងគ្រោះស្លាប់ដោយសារ «ឈ្លក់ផ្សែងភ្លើង និងត្រូវភ្លើងឆេះរោលលើរាងកាយ»។
លោក យ៉ន បានឲ្យដឹងផងដែរថា បន្ទប់ស្នាក់នៅនោះស្ថិតនៅជាន់ទី ៧ នៃអគារសណ្ឋាគារ និងភោជនីយដ្ឋានឈូកទិព្វ។
លោក នេត វន្ថា ប្រធាននាយកដ្ឋានបង្ការ និងពន្លត់អគ្គិភ័យនៃក្រសួងមហាផ្ទៃ បានប្រាប់ភ្នំពេញប៉ុស្តិ៍នៅថ្ងៃពុធថា គ្រោះអគ្គិភ័យនៅក្នុងឆ្នាំ ២០១៩ នេះបានកើតឡើងចំនួន ៧១៧ លើក កើនឡើងលើសពីឆ្នាំមុនចំនួន ១៨៣ ករណីដោយបានបង្កឲ្យមនុស្ស ១៧ នាក់ស្លាប់ និង ៩៧ នាក់ទៀតរងរបួស ព្រមទាំងបង្កការឆេះខូចខាតផ្ទះសរុប ៥៧៦ ខ្នង និងតូបលក់ដូរ ៣៧២ តូប។
លោក វន្ថា បានថ្លែងថា៖ «រាជធានី-ខេត្ត ដែលកើតមានគ្រោះអគ្គិភ័យច្រើនជាងគេ គឺរាជធានីភ្នំពេញ បន្ទាប់មកខេត្តកណ្ដាល និងខេត្តសៀមរាប»។
លោកក៏បានឲ្យដឹងបន្តថា យោងតាមការពិនិត្យកោសល្យវិច័យនៅកន្លែងកើតហេតុ គ្រោះអគ្គិភ័យភាគច្រើនបង្កឡើងដោយសារការផ្ទុះឆ្លងចរន្តអគ្គិសនីមានជាង ៤០% បង្កពីភ្លើងគ្រប់ប្រភេទ (ចង្ក្រាន ទៀន ធូប) មានជាង ៣០% និងជិត ៣០% ទៀតកំពុងស្ថិតក្រោមការស៊ើបអង្កេតសមត្ថកិច្ចជំនាញនៅឡើយ៕