.jpg)
លោក ហង្ស ពុទ្ធា អ្នកនាំពាក្យ គ.ជ.ប។ ហេង ជីវ័ន
ភ្នំពេញ: អ្នកនាំពាក្យគណៈកម្មាធិការជាតិរៀបចំការបោះឆ្នោត (គ.ជ.ប) លោក ហង្ស ពុទ្ធា បានអះអាងកាលពីម្សិលមិញថា ប្រសិនបើអតីតសកម្មជនអតីតគណបក្សសង្គ្រោះជាតិខេត្តបាត់ដំបង ៣ នាក់ មិនព្រមបង់ពិន័យតាមការបង្គាប់របស់ គ.ជ.ប ពាក់ព័ន្ធនឹងយុទ្ធនាការម្រាមដៃស្អាតទ នោះ នឹងត្រូវប្រឈមវិធានការច្បាប់ ប៉ុន្តែពួកគេថានឹងបង់ តែកំពុងនៅខ្វះប្រាក់ត្រូវការអ្នកជួយឧបត្ថម្ភ។
តាមលិខិតបង្គាប់ឲ្យបង់ប្រាក់ពិន័យរបស់ គ.ជ.ប ចុះថ្ងៃទី ១១ ខែធ្នូ ឆ្នាំ ២០១៨ បានបង្ហាញថា៖ «គ.ជ.ប សូមបង្គាប់មកឈ្មោះ ជា ជីវ រស់នៅភូមិជំនីក ឃុំអន្លង់វិល ស្រុកសង្កែ ខេត្តបាត់ដំបង ឲ្យចូលខ្លូនមកបង់ប្រាក់ពិន័យ ដោយស្ម័គ្រចិត្ត ១០ លានរៀលនៅលេខាធិការដ្ឋានរៀបចំការបោះឆ្នោតខេត្តបាត់ដំបងឬនៅទីស្ដីការ គ.ជ.ប (ការិយាល័យទទួលពាក្យបណ្ដឹងនិងស៊ើបអង្កេតជាន់ទី ១)ក្នុងរយៈពេល ៣០ ថ្ងៃយ៉ាងយូរ បន្ទាប់ពីថ្ងៃបានទទួលលិខិតបង្គាប់នេះ។ រីឯ ២ នាក់ទៀត ក៏មានលិខិតបង្គាប់ស្រដៀងគ្នាផងដែរ។
លោក ហង្ស ពុទ្ធា អ្នកនាំពាក្យ គ.ជ.ប បានថ្លែងកាលពីម្សិលមិញថា គ.ជ.ប បានជូនលិខិតបង់ប្រាក់ពិន័យរួចហើយ ដើម្បីឲ្យពួកគាត់អាចបង់ប្រាក់តាមកាលកំណត់និងតាមការសម្រេចរបស់ថ្នាក់លើដែលជាការអនុវត្តច្បាប់។ នេះមិនមែនជាការដាក់គំនាប ឬពាក់ព័ន្ធនឹងនយោបាយទេ។
លោកបញ្ជាក់ថា៖ «វាមិនពាក់ព័ន្ធនឹងនយោបាយអ្វីទេ តែនេះជាការអនុវត្តច្បាប់។ ប្រសិនបើគាត់បានមកបង់ប្រាក់ពិន័យតាមកាលកំណត់នោះ គឺនឹងមិនមានអ្វីកើតឡើងទេ ប៉ុន្ដែបើគាត់មិនអាចគោរពតាមពេលវេលាឬការសម្រេចនេះ គ.ជ.ប នឹងមានវិធានការតាមច្បាប់ហើយ»។
យ៉ាងណាក្ដី លោក ពុទ្ធា មិនបានបញ្ជាក់លម្អិតពីវិធានការច្បាប់ថា យ៉ាងម៉េចនោះទេ។ ប៉ុន្តែបើតាមលិខិត (គ.ជ.ប) ថា ក្នុងករណីមិនបង់ប្រាក់ពិន័យដោយស្ម័គ្រចិត្តតាមកាលកំណត់នេះ គ.ជ.ប នឹងអនុវត្តការទារប្រាក់ពិន័យតាមមាត្រា ១៦៦ នៃច្បាប់ស្ដីពីការបោះឆ្នោតជ្រើសតាំងតំណាងរាស្ដ្រ។
លោក ជា ជីវ អតីតប្រធានប្រតិបត្តិគណបក្សសង្គ្រោះជាតិខេត្តបាត់ដំបងដែលរងការបង្គាប់ឲ្យបង់ប្រាក់ពិន័យចំនួន ១០ លានរៀល បានថ្លែងថា លោក និងសហការី ២ នាក់ផ្សេងទៀតបានទទួលលិខិតពី គ.ជ.ប ហើយ ដោយពួកលោកគ្រោងនឹងបង់តាមការសម្រេចនេះ ប៉ុន្តែលោកថា មិនទាន់មានប្រាក់គ្រប់គ្រាន់សម្រាប់បង់ពិន័យទេ ដោយអំពាវនាវឲ្យជនរួមជាតិដែលស្រឡាញ់សិទ្ធិសេរីភាព និងប្រជាធិបតេយ្យជួយឧបត្ថម្ភតាមលទ្ធភាព។
លោកបន្តថា ការសម្រេចរបស់ គ.ជ.ប នេះ គឺបានផ្អែកទៅលើព្រឹត្តិការណ៍នយោបាយនិងប្រកបដោយអយុត្តិធម៌ ហើយ គ.ជ.ប មិនមានអំណះអំណាងទៅលើផ្លូវច្បាប់ឬភ័ស្ដុតាងជាក់ស្ដែងអ្វីឲ្យប្រាកដទេ ដោយគ្រាន់តែរូបថតមួយសន្លឹកនិយាយពីសិទ្ធិសេរីភាពបញ្ចេញមតិដោយថាបើគ្មានបក្សដែលពួកលោកពេញចិត្តពួកលោកនឹងមិនទៅបោះឆ្នោតទេ។
លោក ជា ជីវ បានបញ្ជាក់ថា៖ «ទោះយ៉ាងណាក៏ដោយ សង្គមយើងពិបាកខ្លាំងណាស់ សម្រាប់អ្នកហ៊ានបញ្ចេញមតិពិតរិះគន់ក្នុងន័យស្ថាបនា...ជាក់ស្ដែងដូចជាពេលនេះ ទោះពួកខ្ញុំគ្មានលទ្ធភាពមានលុយបង់ពិន័យក៏ពួកខ្ញុំត្រូវតែបង្ខំចិត្តទៅរកលុយមកបង់តាមកាលកំណត់ដែរ»។
លោក សម គន្ធាមី នាយកប្រតិបត្តិនៃអង្គការ និចហ្វិក កាលពីម្សិលមិញយល់ឃើញថា បើតាមការពិនិត្យ និងអង្កេតលើអង្គហេតុដូចជាមិនមានអ្វីធ្វើឲ្យប៉ះពាល់ដល់ដំណើរការការបោះឆ្នោតទេ ហើយសកម្មភាពនេះក៏ជាការសម្ដែងមតិ ប៉ុន្ដែគ.ជ.ប បែរជាពិន័យឲ្យពួកគាត់បង់ប្រាក់ ប៉ុន្តែលោកថា គ្រាន់តែហៅមកអប់រំ ណែនាំ និងធ្វើកិច្ចសន្យាបញ្ឈប់សកម្មភាពឬជាការព្រមានជាលាយលក្ខណ៍អក្សរជាការស្រេច។
លោកបញ្ជាក់ថា៖ «បើតាមខ្ញុំមើលទៅ អ្នកដែលជាប់ចោទហ្នឹង ដូចជា មិនសូវជាមានលុយច្រើនអីទេ អ្នកខ្លះឮថា យកប្លង់ផ្ទះទៅដាក់បញ្ចាំនៅធនាគារទៀត ហើយអ្នកខ្លះទៀតហ្នឹងទៅខ្ចីបុលគេ។ ខ្ញុំគិតថា បើគួរលើកលែងទោស លើកលែងឲ្យគ្នាទៅ ព្រោះសុទ្ធតែអ្នកក្រទេ»។
គួររំឭកថា អតីតសកម្មជនអតីតគណបក្សសង្គ្រោះជាតិចំនួន ៥ នាក់ រួមមាន ឈ្មោះ ថោង សារឿន, គ្រុយ គឹមសាំង, ពៅ តាំង, ម៉ាង ឈុន និង ឈ្មោះ ជា ជីវ ត្រូវបាន PEC ខេត្តបាត់ដំបងសម្រេចផាកពិន័យម្នាក់ៗ ១០ លានរៀល ក្នុងរឿងលើកម្រាមដៃស្អាត ហើយ (គ.ជ.ប) តម្កល់ការសម្រេចនេះ ប៉ុន្តែឈ្មោះ ថោង សារឿន និង គ្រុយ គឹមសាំង ត្រូវបានក្រុមប្រឹក្សាធម្មនុញ្ញបន្ថយពិន័យមកនៅ ៥ លានរៀលម្នាក់ រីឯ ឈ្មោះ ពៅ តាំង និង ម៉ាង ឈុន ត្រូវបានលើកលែងការផាក ពិន័យ ខណៈឈ្មោះ ជា ជីវ ដែលស្ថិតក្នុងបញ្ជីបម្រាមធ្វើនយោបាយ ៥ ឆ្នាំក្នុងចំណោម ១១៨ រូបផងនោះ នៅរក្សាការផាកពិន័យចំនួន ១០ លានរៀលដដែល៕
