ភ្នំពេញៈ ក្រុមមន្ត្រីក្រសួងការងារ បណ្ដុះបណ្ដាល និងវិជ្ជាជីវៈ និងក្រុមសហជីព បាននិងកំពុងដឹកនាំប្រតិភូចូលរួមសន្និសីទអន្តរជាតិខាងការងារលើកទី១០៨ ស្តីពី«ការងារសម្រាប់អនាគតភ្លឺស្វាង» ដែលរៀបចំដោយអង្គការពលកម្មអន្តរជាតិ (ILO) នៅទីស្នាក់ការកណ្តាលក្នុងទីក្រុងហ្សឺណែវ ប្រទេស ស្វ៊ីស ដែលប្រព្រឹត្តទៅនាថ្ងៃទី ១០-២១ ខែ មិថុនា នេះ ខណៈក្រុមសហជីពបារម្ភសេរីភាពសហជីពមានហានិភ័យខ្ពស់។
កិច្ចប្រជុំកំពូលនេះ មានអ្នកចូលរួមជាង ៥ ពាន់នាក់ មកពី ១៩២ ប្រទេស ដែលជាសមាជិកនៃអនុសញ្ញាអន្តរជាតិខាងការងារនៃអង្គការពលកម្មអន្តរជាតិ។ ក្នុងកិច្ចប្រជុំ ក៏មានវត្តមានប្រធានាធិបតី និងនាយករដ្ឋមន្ត្រី ជាង ៣៧ ប្រទេស និងរដ្ឋមន្ត្រីទទួលបន្ទុកខាងការងារជាង ១៩២ ប្រទេស និងមានតំណាងកម្មករ និងនិយោជកក៏បានមកចូលរួមដែរ។
ចំពោះក្រុមមន្ត្រីសហជីពពីប្រទេសកម្ពុជា រួមមានសហជីពដែលគាំទ្ររដ្ឋាភិបាល និងសហជីពឯករាជ្យ មានសមាសភាពជិត ១០ រូប ដូចជា លោក រ៉ុង ឈុន លោក វន់ ពៅ លោក អាត់ ធន់ លោក ជួន មុំថុល និងមន្ត្រីសហជីពអមដំណើរមួយចំនួនទៀត។
លោក អាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា និងសហការីផ្សេងទៀតដែលចូលរួមបានថ្លែងថា កិច្ចប្រជុំបានសម្រេចលើកយកបញ្ហាពីគណៈកម្មការចំនួន ៣ សំខាន់ៗ រួមមានគណៈកម្មការស្តង់ដារការងារ (Committee on Application of Standard) គណៈកម្មការអំពើហិង្សា និងការ បៀតបៀនកន្លែងការងារ (Violence and Harassment in the World of Work) និងគណៈកម្មការពិភពលោក(Committee of the World) យកមកពិភាក្សាក្នុងអង្គប្រជុំនោះ។
លោក រ៉ុង ឈុន ប្រធានសហភាពសហជីពកម្ពុជា ដែលបានចូលរួមសន្និសីទនេះដែរ ត្រូវបានក្រុមប្រឹក្សាឃ្លាំមើលកម្ពុជាដកស្រង់សម្ដីលោកថា សម្រាប់ប្រទេស កម្ពុជា ផ្តោតសំខាន់ទៅលើលក្ខខណ្ឌការងារ ដែលក្នុងនោះ មានកិច្ចសន្យាការងាររយៈពេលវែង និងរយៈពេលខ្លី និងបញ្ហាប្រាក់ឈ្នួលរបស់កម្មករនិយោជិត។
លោកបន្តថា កិច្ចសន្យាការងាររយៈពេលខ្លី គឺជាបញ្ហាដ៏ចម្រូងចម្រាសក្នុងការចរចា រវាងក្រុមសហជីពជាមួយពួកនិយោជក ព្រោះច្បាប់ការងាររបស់កម្ពុជាមិនទាន់មានភាពប្រសើរនៅឡើយ។
លោកថា៖ «ចំពោះសេរីភាពសហជីព និងស្ថានភាពការងាររបស់កម្មករនិយោជិត គឺកម្ពុជានៅមានហានិភ័យខ្ពស់ ស្របពេលស្ថានភាពនយោបាយខ្មែរ ស្ថិតក្នុងស្ថានភាពស្រពេចស្រពិល និងការធ្លាក់ចុះនៃលទ្ធិប្រជាធិបតេយ្យ ដែលធ្វើឲ្យរងទណ្ឌកម្មធ្ងន់ធ្ងរពីសហភាពអឺរ៉ុប ក្នុងរឿងប្រព័ន្ធអនុគ្រោះពន្ធ EBA និងពីសហរដ្ឋអាមេរិកក្នុងរឿងប្រព័ន្ធ GSP»។
លោកអុិត សំហេង រដ្ឋមន្ត្រីក្រសួងការងារ បណ្ដុះបណ្ដាល និងវិជ្ជាជីវៈ និងលោកហេង សួរ អ្នកនាំពាក្យក្រសួង ក៏បានដឹកនាំប្រតិភូចូលរួមក្នុងកិច្ចប្រជុំកំពូលនេះដែរ។ តាមហ្វេសប៊ុកក្រសួងការងារបង្ហាញថា លោកអុិត សំហេង រដ្ឋមន្ត្រីក្រសួងការងារ បានពិភាក្សាការងារជាមួយលោកស្រី Tomoko NISHIMOTO ជំនួយការអគ្គនាយក និងជានាយិកាប្រចាំតំបន់អាស៊ីប៉ាស៊ីហ្វិកនៃអង្គការ ILO នៅទីស្នាក់ការកណ្តាលអង្គការ ILO ទីក្រុងហ្សឺណែវ ប្រទេសស្វ៊ីស។
លោកបានលើកឡើងពីស្ថានភាពទូទៅអំពីវឌ្ឍនភាពវិស័យការងារ និងបណ្តុះបណ្តាលវិជ្ជាជីវៈ និងការពង្រឹងសុខដុមនីយកម្មក្នុងទំនាក់ទំនងវិជ្ជាជីវៈ ដែលរដ្ឋាភិបាលកម្ពុជាបានខិតខំកន្លងមក ទទួលបានជោគជ័យ និងការគាំទ្រពីគ្រប់មជ្ឈដ្ឋានជាបន្តបន្ទាប់ ហើយកម្ពុជានឹងបន្តកិច្ចសហការជិតស្និទ្ធជាមួយអង្គការ ILO ក្នុងការបន្តបេសកកម្មរបស់ ILO ក្នុងបរិបទថ្មីបន្ថែមទៀត ដើម្បីសម្រេចបាននូវផែនទីបង្ហាញផ្លូវរបស់ ILO និងផែនការសកម្មភាពរបស់កម្ពុជា ប្រកបដោយប្រសិទ្ធភាព។
លោកស្រី Tomoko NISHIMOTO បានវាយតម្លៃខ្ពស់ចំពោះកិច្ចប្រឹងប្រែងរបស់កម្ពុជា ក្នុងការពង្រឹងសុខដុមនីយកម្មក្នុងទំនាក់ទំនងវិជ្ជាជីវៈ និងកោតសរសើរចំពោះការរៀបចំខួបរបស់ ILO នៅកម្ពុជាបានល្អប្រសើរ។ ILO នឹងបន្តកិច្ចសហការជាមួយកម្ពុជាទៀត ដើម្បីបង្ហាញសាធារណជនបានដឹងពីភាពវិជ្ជមាន៕