ភ្នំពេញៈ មន្ត្រីជាន់ខ្ពស់រដ្ឋាភិបាលបានជំរុញឲ្យក្រុមអ្នកដែលចូលរួមគាំទ្រផែនការវិលត្រឡប់របស់លោក សម រង្ស៊ី ចូលសារភាព ឬត្រូវប្រកាសបដិសេធចូលរួមផែនការ «រដ្ឋប្រហារ» ខណៈដែលមន្ត្រីទាំងនេះបានចង្អុលបង្ហាញថា អ្នកដែលស្ថិតក្នុងរចនាសម្ព័ន្ធនៃអតីតគណបក្សសង្គ្រោះជាតិគ្រប់លំដាប់ថ្នាក់ គឺជាអ្នកដែលជាប់ពាក់ព័ន្ធក្នុងផែនការ «រដ្ឋប្រហារផ្តួលរំលំរាជរដ្ឋាភិបាលស្របច្បាប់»។
លោក ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃបានថ្លែងនៅក្នុងកម្មវិធី វោហារឆ្នើម ប្រកួតប្រជែង និយាយភាសាអង់គ្លេស វគ្គផ្ដាច់ព្រ័ត្រកាលពីថ្ងៃទី ១២ ខែតុលាឆ្នាំ ២០១៩ នៅខេត្តព្រៃវែងថា ជម្រើសដែលល្អសម្រាប់ក្រុមអ្នកគាំទ្រការវិលត្រឡប់របស់លោក សម រង្ស៊ី គឺមានតែចេញមកប្រកាសអំពីការមិនចូលរួមក្នុងផែនការរបស់លោក សម រង្ស៊ី នៅថ្ងៃទី ៩ ខែវិច្ឆិកា។
លោកបញ្ជាក់ថា៖ «ក្នុងឋានៈយើងការពារសុខសន្ដិភាព ស្ថិរភាព ការពាររដ្ឋាភិបាល កើតចេញពីការបោះឆ្នោត តែពួកអស់លោកនាំគ្នាទៅគាំទ្រ បំផ្លាញសុខសន្ដិភាព ផ្ដួលរំលំរដ្ឋាភិបាលកើតចេញពីការបោះឆ្នោត បង្កអស្ថិរភាព រាំងស្ទះដល់ការអភិវឌ្ឍឲ្យធ្វើយ៉ាងម៉េចឥឡូវនេះ? វាអត់មានជម្រើសក្រៅពីហ្នឹងទេ ហើយជម្រើសដែលល្អគឺពួកគាត់មិនចូលរួម បដិសេធមិនចូលរួម អាហ្នឹងគឺជាការល្អបំផុត ពីព្រោះនៅក្នុងគ្នាគាត់ហ្នឹងក៏មានអ្នកដែលបានបដិសេធជាច្រើននាក់រួចមកហើយ»។
បើតាមលោក ស ខេង ការអំពាវនាវរបស់លោក សម រង្ស៊ី ឲ្យប្រជាជនប្រមូលផ្តុំងើបតស៊ូដើម្បី «ផ្ដួលរំលំរដ្ឋាភិបាល និងឲ្យកងទ័ពប្រឆាំងរដ្ឋាភិបាល ការប្រមាថព្រះមហាក្រត្យ និងទាមទារឲ្យព្រះមហាក្សត្រដាក់រាជ្យ»ថាជាទង្វើបំបែកបំបាក់ជាតិធ្វើឲ្យមានអស្ថិរភាព និងអសន្តិសុខដែលដើរហួសពីបន្ទាត់ក្រហមដែលរាជរដ្ឋាភិបាល និងសមត្ថកិច្ចត្រូវតែចាត់វិធានការតាមផ្លូវច្បាប់ចំពោះអ្នកដែលពាក់ព័ន្ធ។
លោកបន្តថា៖ «បានជាគាត់ (សម រង្ស៊ី) ចាំបាច់ត្រូវប្រកាសដោយសារតែគាត់មានផែនការហើយផែនការរបស់គាត់ស្អី? ផែនការរបស់គាត់ គឺគាត់ចង់យកឱកាសដែលគាត់ចូលស្រុកនេះដើម្បីនឹងប្រមូលកម្លាំងដែលគាំទ្រគាត់ តស៊ូដើម្បីផ្ដួលរំលំរដ្ឋាភិបាលដែលកើតចេញពីការបោះឆ្នោត។ សម រង្ស៊ី មកនេះមិនមែនមកល្អទេ គឺនាំសង្គ្រាមមកដែលឥឡូវយើងកំពុងនឹងអបអរបុណ្យអុំទូក បុណ្យឯករាជ្យ គាត់មកបំបែកបំបាក់ បង្កបញ្ហាមិនឱ្យប្រជាជនសប្បាយទៅវិញតើមានន័យថាយ៉ាងម៉េច? អាហ្នឹងយើងមិនចេះតែនិយាយអត់ហេតុអត់ផលទេ»។
លោក ស ខេង ក៏បានអំពាវនាវដល់សមត្ថកិច្ច និងប្រជាពលរដ្ឋជួយធ្វើការទប់ស្កាត់ ការប៉ុនប៉ងណាមួយដែលចង់ផ្តួលរំលំ បំផ្លាញសុខសន្តិភាពស្ថិរភាព និងការអភិវឌ្ឍ ហើយកុំឲ្យធ្វើការគំរាមកំហែងចោទប្រកាន់ បំភ័យ ឬលាបពណ៌ចំពោះអ្នកដែលមិនបានពាក់ព័ន្ធនឹងផែនការរបស់លោក សម រង្ស៊ី ហើយត្រូវព្យាយាមអប់រំ និងពន្យល់ពួកគេឲ្យយល់អំពីផែនការរដ្ឋប្រហាររបស់លោក សម រង្ស៊ី។
ជាមួយគ្នានេះលោក គឹម សន្ដិភាព អ្នកនាំពាក្យក្រសួងយុត្តិធម៌បានថ្លែងកាលពីម្សិលមិញថា អ្នកដែលទទួលផែនការរដ្ឋប្រហារ ដោយសារតែសេចក្ដីប្រកាសព័ត៌មានរបស់គណៈកម្មាធិការអចិន្រៃ្តយ៍នៃអតីតគណបក្សសង្គ្រោះជាតិកាលពីថ្ងៃទី ១៥ ខែកញ្ញាកន្លងទៅហើយថាអ្នកដែលចង់រួចផុតពីការទទួលខុសត្រូវផ្លូវច្បាប់ចំពោះបទឧក្រិដ្ឋមួយនេះត្រូវមកសារភាពពីទោសកំហុសរបស់ខ្លួននៅចំពោះមុខសមត្ថកិច្ច។
លោកបញ្ជាក់ថា៖ «ហេតុដូចនេះ ចង់ ឬមិនចង់ អ្នកដែលស្ថិតក្នុងរចនាសម្ព័ន្ធនៃអតីតគណបក្សសង្គ្រោះជាតិគ្រប់លំដាប់ថ្នាក់គឺជាអ្នកដែលពាក់ព័ន្ធក្នុងផែនការរដ្ឋប្រហាររំលំ រាជរដ្ឋាភិបាលស្របច្បាប់ និងរបបរាជានិយមដែលអាជ្ញាធរមានសមត្ថកិច្ចគ្រប់លំដាប់ថ្នាក់ មានតួនាទីអនុវត្តរាល់វិធានការច្បាប់លើជនទាំងនេះ»។
លោកបន្តថា៖ «ហេតុនេះដើម្បីបានរួចផុតពីការទទួលខុសត្រូវផ្លូវច្បាប់លើបទឧក្រិដ្ឋនេះ សូមភ្ញាក់ខ្លួនចេញមកសារភាពជាមួយសមត្ថកិច្ចជាបន្ទាន់ នោះអ្នកនឹងបានរួចផុតពីទោសទណ្ឌនេះ»។
ស្ដ្រីឈ្មោះ ប៉ែន មុំ អ្នកគាំទ្រការវិលត្រឡប់របស់លោក សម រង្ស៊ី នៅខេត្តកំពតត្រូវបានកម្លាំងនគរបាលឃាត់ខ្លួនកាលពីព្រឹកថ្ងៃទី ១២ ខែតុលានៅរាជធានីភ្នំពេញពាក់ព័ន្ធការរួមគំនិតក្បត់ជាតិតាមផែនការរបស់លោក សម រង្ស៊ី។
បើយោងតាមដីកាបញ្ជាឲ្យចូលខ្លួនរបស់តំណាងអយ្យការសាលាដំបូងខេត្តកំពតកាលពីថ្ងៃទី ៩ ខែតុលាបានបញ្ជាក់ថា៖ «ពាក់ព័ន្ធលើករណីរួមគំនិតក្បត់ដែលបានប្រើគណនី Facebook ឈ្មោះ សំបូរ មុំ សរសេរស្ទើររាល់ថ្ងៃ ចាប់តាំងពីក្រោយគណបក្សសង្គ្រោះជាតិត្រូវបានតុលាការកំពូលសម្រេចរំលាយតាំងពីខែវិច្ឆិកាឆ្នាំ ២០១៧ រហូតដល់បច្ចុប្បន្នប្រឆាំងគោលនយោបាយស្របច្បាប់កៀរគរបំផុសឲ្យមហាជនចូលរួមក្នុងផែនការផ្តួលរំលំរាជរដ្ឋាភិបាល»។
កាលពីថ្ងៃទី ១១ ខែតុលាចៅក្រមស៊ើបសួរសាលាដំបូងរាជធានីភ្នំពេញ បានចេញដីកាបង្គាប់ឲ្យចាប់ខ្លួនលោក ម៉ន ផល្លា ប្រធានប្រតិបត្តិ អតីតគណបក្សសង្គ្រោះជាតិ រាជធានីភ្នំពេញពីបទ «រួមគំនិតក្បត់» ក្នុងផែនការប៉ុនប៉ងធ្វើរដ្ឋប្រហារផ្ដួលរំលំរាជរដ្ឋាភិបាលស្របច្បាប់តាមគំនិតរបស់ «ឧក្រិដ្ឋជន សម រង្ស៊ី»។
បើតាមសេចក្ដីប្រកាសព័ត៌មានរបស់អ្នកនាំពាក្យសាលាដំបូងរាជធានីភ្នំពេញ បានឲ្យដឹងថា៖ «ដោយយោងតាមចម្លើយសារភាពរបស់ជនត្រូវចោទឈ្មោះ ទិត្យ សុផាត ភេទស្រី និងជនត្រូវចោទឈ្មោះ សេង សុខន ភេទស្រីនៅចំពោះមុខចៅក្រមស៊ើបសួរ ជនត្រូវចោទទាំង ២ បានសារភាពថាឈ្មោះ ម៉ន ផល្លា ភេទប្រុស អាយុ ៤៤ ឆ្នាំ គឺជាមេខ្លោងនៅពីក្រោយការឃោសនា ញុះញង់ និងបញ្ចុះបញ្ចូលឲ្យជនត្រូវចោទទាំង ២ នាក់ដើរបំផុសបំផុលប្រជាពលរដ្ឋឲ្យងើបបះបោរ ប៉ុនប៉ងធ្វើរដ្ឋប្រហារផ្ដួលរំលំរាជរដ្ឋាភិបាលដែលជាអំពើខុសច្បាប់ធ្ងន់ធ្ងរ ក្រោមឧបាយកលជាផែនការនៃការវិលត្រឡប់មកកម្ពុជាវិញរបស់ឧក្រិដ្ឋជន សម រង្ស៊ី»។
លោក រស់ គឹមសៀង ដែលជាអ្នកគាំទ្រការវិលត្រឡប់របស់លោក សម រង្ស៊ី ម្នាក់ត្រូវតុលាការសម្រេចដោះលែងឱ្យនៅក្រៅឃុំបណ្តោះអាសន្នកាលពីថ្ងៃទី ១១ ខែតុលាបន្ទាប់ពីលោកបានសារភាពកំហុសនៅស្នងការដ្ឋាននគរបាលខេត្តកំពង់ធំអំពីផែនការធ្វើរដ្ឋប្រហាររបស់លោក សម រង្ស៊ី។
លោក គឹមសៀង បានថ្លែងថា៖ «ខ្ញុំសូមអំពាវនាវដល់បងប្អូនប្រជាពលរដ្ឋ សកម្មជន និងអ្នកគាំទ្រអតីតគណបក្សសង្គ្រោះជាតិទាំងអស់ទូទាំងប្រទេសកម្ពុជា ជាពិសេសមិត្តដែលធ្លាប់ធ្វើការជាមួយខ្ញុំកន្លងមក ហើយស្គាល់ ជាពិសេសកម្លាំងយុវជនសូមបងប្អូនទាំងអស់ កុំស្តាប់តាមការបំផុសបំផុល អំពាវនាវរបស់លោក សម រង្ស៊ី កាលណាសមត្ថកិច្ចចាប់ខ្លួនដូចជា រូបខ្ញុំ អស់លោកប្រាកដជាមានសេចក្តីវេទនាជាក់ជាមិនខាន»។
លោក នី សុខា ប្រធានផ្នែកស៊ើបអង្កេត សមាគមការពារសិទ្ធិមនុស្សអាដហុក បានថ្លែងកាលពីម្សិលមិញថា រាជរដ្ឋាភិបាល មិនគួរប្រើប្រាស់ប្រព័ន្ធច្បាប់កម្ពុជា ដើម្បីគាបសង្កត់ទៅលើអ្នកគាំទ្រ ការវិលត្រឡប់របស់លោក សម រង្ស៊ី នោះទេពីព្រោះការធ្វើដូច្នេះមិនអាចដោះស្រាយបញ្ហាបានឡើយ។
លោកបញ្ជាក់ថា៖ «រឿងនេះ គឺជារឿងនយោបាយជាជាងការអនុវត្តច្បាប់ ដោយសារតែការចាប់ខ្លួនជាបន្តបន្ទាប់នេះកើតមានឡើងចាប់តាំងពីរាជរដ្ឋាភិបាលបានរំលាយ គណបក្សសង្គ្រោះជាតិ និងបានចាប់មេដឹកនាំ ព្យួរសិទ្ធិធ្វើនយោបាយរបស់សមាជិកគណបក្សសង្គ្រោះជាតិ... ដូច្នេះអ្នកដែលមិនសុខចិត្តមានការតវ៉ា។ អ្នកនយោបាយគួរតែកុំប្រើប្រាស់ប្រព័ន្ធច្បាប់ដោះស្រាយបញ្ហានយោបាយដែលធ្វើឲ្យវាកាន់តែលំបាកក្នុងការដោះស្រាយ»។
យ៉ាងណាក្តីលោក ឧត្តមសេនីយ៍ឯក ឆាយ គឹមខឿន អ្នកនាំពាក្យអគ្គស្នងការនគរបាលជាតិបានថ្លែងកាលពីម្សិលមិញថា អង្គការសង្គមស៊ីវិលមួយចំនួន តែងតែធ្វើការរិះគន់ទៅលើរាជរដ្ឋាភិបាល ដោយគ្មានមូលដ្ឋានច្បាស់លាស់។
លោកបានបញ្ជាក់ថា៖ «សង្គមស៊ីវិលមួយចំនួនសុទ្ធតែមាននិន្នាការប្រឆាំង ហើយសុទ្ធតែមានចិត្តលម្អៀង និងកេងចំណេញ។ សំខាន់ យើងមើលស្ថានភាពជាក់ស្តែងទាំងអស់។ សង្គមស៊ីវិលតែមួយក្តាប់តូចទេ»។
លោកក៏បានឲ្យដឹងផងដែរថាចាប់តាំងពីមានការប្រកាសធ្វើរដ្ឋប្រហាររបស់លោក សម រង្ស៊ី សមត្ថកិច្ចបានឃាត់ខ្លួនអ្នកគាំទ្រផែនការរដ្ឋប្រហាររបស់លោក សម រង្ស៊ី ចំនួន ៤០ នាក់ និងមានអ្នកគាំទ្រផែនការរដ្ឋប្រហាររបស់លោក សម រង្ស៊ី ៣ នាក់បានចូលសារភាព៕