.jpg)
ការដឹកជញ្ជូន និងឈួសឆាយនៅបាតអាងទំនប់វារីអគ្គិសនីសេសានក្រោម ២ កាលពីឆ្នាំ ២០១៤។ ហេង ជីវ័ន
ស្ទឹងត្រែងៈ ក្រុមការងារខេត្តស្ទឹងត្រែងបានចុះស្រាវជ្រាវបទល្មើសព្រៃឈើ និងការប្រមូលឈើនៅបាតអាងទំនប់វារីអគ្គិសនីសេសានក្រោម ២ បន្ទាប់ពីក្រសួងមហាផ្ទៃបានបញ្ជាឲ្យខេត្តចាត់វិធានការទប់ស្កាត់ និងបង្ក្រាបបទល្មើសព្រៃឈើឲ្យបានទាន់ពេល។ នេះបើតាមមន្ត្រីអ្នកនាំពាក្យសាលាខេត្តស្ទឹងត្រែងកាលពីម្សិលមិញ។
កាលពីថ្ងៃ ២៣ កញ្ញា លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃបានបញ្ជាឲ្យខេត្តរតនគិរី ខេត្តមណ្ឌលគិរី និងស្ទឹងត្រែងចាត់វិធានការទប់ស្កាត់ និងបង្ក្រាបបទល្មើសព្រៃឈើឲ្យបានទាន់ពេល បន្ទាប់ពីក្រសួងទទួលបានព័ត៌មានពីប្រតិភូសហភាពអឺរ៉ុប ស្ដីពី «បទល្មើសជាប្រព័ន្ធ៖ ប្រទេសវៀតណាមបានបន្តនាំចូលឈើហុបខុសច្បាប់ពីកម្ពុជា» ដែលទីភ្នាក់ងារស៊ើបអង្កេតបរិស្ថានចេញផ្សាយកាលពីថ្ងៃទី ៣១ ឧសភា ឆ្នាំនេះទាក់ទងនឹងការកាប់ឈើខុសច្បាប់ទ្រង់ទ្រាយធំនៅខេត្តទាំង ៣ ខាងលើជាពិសេសនៅចំណុចឧទ្យានជាតិវរជ័យ និងដែនជម្រកសត្វព្រៃភ្នំព្រិច ព្រមទាំងនៅម្តុំព្រៃធម្មជាតិខាងជើងទំនប់វារីអគ្គិសនីសេសានក្រោម ២។
លោក ម៉ែន គង់ អ្នកនាំពាក្យខេត្តស្ទឹងត្រែងបានបញ្ជាក់ថា៖ «យើងអាចនឹងបញ្ជូនរបាយការណ៍លទ្ធផលនៃការអនុវត្តរបស់ក្រសួងផងក៏ដូចជាផែនការរបស់គណៈបញ្ជាការឯកភាពអភិបាលខេត្តផង។ យើងនឹងបញ្ជូនតាមដំណាក់កាលនីមួយៗទៅរហូត»។
លោកថា៖ «ក្រុមការងារបានចុះទៅហើយយើងរង់ចាំគាត់ធ្វើរបាយការណ៍ជូនគណៈបញ្ជាការឯកភាពត្រួតពិនិត្យ»។
បើតាមលោក ម៉ែន គង់ ក្រុមការងារថ្នាក់ខេត្តបានចាត់វិធានការជាបន្តបន្ទាប់តាមលិខិតរបស់ក្រសួងមហាផ្ទៃ ហើយអាជ្ញាធរខេត្តបានបង្ក្រាបបទល្មើសព្រៃឈើបានមួយចំនួនធំ។
លោក ស ខេង បានរិះគន់ច្បាប់ព្រៃឈើ និងស្តីបន្ទោសមន្ត្រីចំពោះការបណ្តោយឲ្យមានបទល្មើសព្រៃឈើ និងការប្រើលេសសម្អាតបាតអាងទំនប់វារីអគ្គិសនីសេសានក្រោម ២ ទៅបំផ្លាញព្រៃឈើ បន្ទាប់ពីរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន បញ្ជាឲ្យមន្ត្រីរដ្ឋបាលព្រៃឈើចុះពិនិត្យករណីដឹកឈើក្នុងតំបន់ទំនប់វារីអគ្គិសនីសេសានក្រោម ២ ខណៈមានការដឹកជញ្ជូនឈើមិនចេះឈប់។
កាលពីម្សិលម្ង៉ៃ លោក អ៊ូច ឡេង សកម្មជនការពារបរិស្ថានថ្លែងថា មន្ត្រីខ្លះបានប្រយោជន៍ពីអ្នករកស៊ីឈើធំៗដោយបានបើកភ្លើងខៀវឱ្យមានបទល្មើស ខណៈអ្នករកស៊ីភាគច្រើនគឺជាអ្នកមានអំណាច និងមានលុយ ឬមានអ្នកធំនៅពីក្រោយធ្វើឲ្យការបង្ក្រាបពុំមានប្រសិទ្ធភាព៕
