ព្រះសីហនុៈ មន្ត្រីគយម្នាក់បានស្លាប់ភ្លាមៗ រីឯ មេបញ្ជាការរងកងរាជអាវុធហត្ថ ស្រុក ព្រៃនប់ ខេត្តព្រះសីហនុ ម្នាក់បានស្លាប់ ពេលបញ្ជូនទៅមន្ទីរពេទ្យដោយសារគ្រោះថ្នាក់ចរាចរណ៍រថយន្តបុកគ្នានៅលើផ្លូវជាតិលេខ ៤ កាលពីថ្ងៃទី ២២ ខែឧសភានេះ នៅភូមិត្រពាំងគោ ឃុំជើងគោ ស្រុកព្រៃនប់ ខេត្តព្រះសីហនុ ខណៈជនរងគ្រោះកំពុងដឹកលុយមកដាក់នៅរតនាគារជាតិ។ នេះបើតាម លោក អ៊ី សុខា ស្នងការរងនគរបាលខេត្តព្រះសីហនុ ទទួលបន្ទុកផ្នែកសណ្ដាប់ធ្នាប់សាធារណៈ។
លោក អ៊ី សុខា បានបញ្ជាក់នៅថ្ងៃទី ២២ ឧសភានេះថា គ្រោះថ្នាក់ចរាចរណ៍នេះ បានកើតឡើងរវាងរថយន្ដម៉ាក់ដេវូ ពណ៌បៃតងស្លាកលេខ 3D-2056 បុកជាមួយរថយន្ដ Camry បាឡែន ស្លាកលេខ 2T-2534 ពណ៌ទឹកប្រាក់ក្នុងទិសដៅបញ្ច្រាសទិសគ្នាបណ្ដាលឲ្យមន្ត្រីគយប្រចាំការនៅកំពង់ផែកែវផុសម្នាក់ស្លាប់និងមន្ត្រីកងរាជអាវុធហត្ថស្រុកព្រៃនប់ម្នាក់ក៏បានស្លាប់ផងដែរ។
លោកបានឱ្យដឹងថា មន្ត្រីគយដែលស្លាប់នោះ ឈ្មោះ ញ៉ោម នៅ រីឯម្នាក់ទៀតគឺលោកអនុសេនីយ៍ឯក ឆេង សុខនី ជាមេបញ្ជាការរងកងរាជអាវុធហត្ថស្រុកព្រៃនប់។
លោកបានបន្តថា នៅមុនកើតហេតុមន្ត្រីអាវុធហត្ថ បានបើករថយន្ត Camry ជូនមន្ត្រីគយយកលុយទៅដាក់ក្នុងរតនាគារជាតិនៅរាជធានីភ្នំពេញ។ ប៉ុន្តែ មិនទាន់ទៅដល់គោលដៅផងក៏ជួបគ្រោះថ្នាក់ចរាចរណ៍បុកជាមួយរថយន្តធុនធំបណ្តាលឲ្យរថយន្ត Camry គាត់ខូចខាតស្ទើរទាំងស្រុង ហើយមន្ត្រីគយបានស្លាប់នៅនឹងកន្លែង ខណៈមន្ត្រីអាវុធហត្ថស្លាប់ពេលបញ្ជូនទៅសង្គ្រោះនៅគ្លីនិក លិ គឹមឌី វាលរេញ។
លោកបញ្ជាក់ថា៖«បើតាមខ្ញុំបានសួរពលរដ្ឋនៅក្បែរហ្នឹង គាត់ថា ឡានមន្ត្រីបើកក្នុងល្បឿនលឿន វ៉ាឡានមួយទៀត តែវ៉ាមិនដាច់ ក៏ជ្រុលទៅបុកឡានធំមួយទៀត ដែលធ្វើដំណើរទៅខេត្តព្រះសីហនុ បណ្ដាលឲ្យធ្លាក់ចេញពីផ្លូវ»។
តាមរបាយការណ៍របស់ស្នងការដ្ឋាននគរបាលខេត្តព្រះសីហនុ បានបង្ហាញថា មេបញ្ជាការរងកងរាជអាវុធហត្ថស្រុក ព្រៃនប់ មានអ្នកបើកបរនិងមានអ្នករួមដំណើរម្នាក់ជាមន្ត្រីគយប្រចាំការនៅកំពង់ផែកែវផុសមានទិសដៅពីខេត្តព្រះសីហនុ ឆ្ពោះទៅភ្នំពេញដោយដឹកលុយ។ លុះដល់ចំណុចខាងលើក៏បានបុកនឹងរថយន្តធុនធំ១គ្រឿង។ ចំណែកអ្នកបើកបររថយន្តធុនធំរត់គេចខ្លួនបាត់។
ក្រោយពេលកើតហេតុសមត្ថកិច្ចបានយកររថយន្តទាំង២គ្រឿងទៅរក្សាទុកនៅអធិការដ្ឋាននគរបាលស្រុកព្រៃនប់ រីឯ ថវិកាត្រូវបានសមត្ថកិច្ចថែរក្សា និងការពារបានគ្រប់ចំនួនទាំងអស់៕