ព្រះសីហនុ: នៅថ្ងៃទី ២២ ខែ កក្កដា នេះ មន្ត្រីជំនាញនឹងចាប់ផ្ដើមសាកសួរម្ចាស់ក្រុមហ៊ុន ដែលនាំកាកសំណល់សំរាមប្លាស្ទិកទាំង ៨៣ កុងតឺន័រ មកដាក់នៅកំពង់ផែអន្តរជាតិខេត្តព្រះសីហនុ ដើម្បីឈានទៅរកការដាក់ពិន័យ និងឲ្យជញ្ជូនសំរាមទាំងនេះត្រឡប់ទៅប្រទេសដើមវិញ។
លោក គុណ ញឹម ប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានគយ និងរដ្ឋាករនៃក្រសួងសេដ្ឋកិច្ច និងហិរញ្ញវត្ថុបានថ្លែងកាលពីម្សិលមិញថា មន្ត្រីជំនាញ នឹងសាកសួរម្ចាស់ក្រុមហ៊ុនខ្មែរ ដែលមានបុគ្គលិកជាជនជាតិចិន ដោយផ្ទាល់មាត់អំពីការបានលួចនាំចូលកុងតឺន័រទាំង ៨៣ ទូ ផ្ទុកដោយកាកសំណល់សំរាមប្លាស្ទិកនេះដើម្បីធ្វើការស៊ើបអង្កេតស្រាវជ្រាវដោយលទ្ធផលច្បាស់ការគ្រោងនឹងបង្ហាញនៅសប្តាហ៍ក្រោយ។
លោកបន្តថា៖ «យើងនឹងធ្វើការជាមួយក្រុមហ៊ុន ដើម្បីសាកសួរផ្ទាល់មាត់ ក្នុងការ ស្រាវជ្រាវសួរបន្ថែមថា តើគាត់ពិតជាមានបុគ្គលិកចិនធ្វើការមែនឬគាត់មានភាគហ៊ុនក្នុងហ្នឹងដែរ។ អាហ្នឹងគឺស្ថិតក្នុងដំណាក់ការស្រាវជ្រាវនៅឡើយ»។
លោកបន្ថែមថា ការរកឃើញថា សហរដ្ឋអាមេរិក និងកាណាដា ជាម្ចាស់កាកសំណល់ទាំងនេះ ដោយបានរកឃើញឯកសារដឹកជញ្ជូនតាមរយៈកំពង់ផែអន្តរជាតិព្រះសីហនុ និងផ្ទៀងផ្ទាត់ជាមួយឯកសារដឹកជញ្ជូនរបស់ក្រុមហ៊ុន និងកំពង់ផែដែលផ្ទុកទំនិញនាំចេញមកកម្ពុជា។ «យើងមិនទាន់អាចបង្ហាញឈ្មោះក្រុមហ៊ុននេះបានទេ ព្រោះយើងកំពុងធ្វើការស្រាវជ្រាវឲ្យបានច្បាស់លាស់សិន ហើយសំរាមទាំងនេះ ពួកគេបាននាំចូលមកជាដំណាក់កាលបន្តបន្ទាប់ ចាប់តាំងពីចុងឆ្នាំ ២០១៨ មកម្ល៉េះ»។
លោក គុណ ញឹម បន្ថែមថា ក្រុមការងារលោកបានបើកទូកុងតឺន័រនោះចេញមកក្រៅ ហើយបានយកម៉ាស៊ីនទៅវាស់រកជាតិពុលដោយរកឃើញថា សំរាមនោះ មិនមានជាតិវិទ្យុសកម្មទេ ប៉ុន្ដែមានក្លិនសាយភាយចេញពីគំនរសំរាមនេះ ហើយមន្ត្រីជំនាញក្រសួងបរិស្ថានក៏បានយកសំណាកសំរាមទាំងនេះទៅពិសោធហើយ ប៉ុន្ដែនៅមិនទាន់ដឹងពីលទ្ធផលទេ ហើយនៅសប្ដាហ៍ក្រោយនឹងដឹងហើយ។
លោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថាន បានថ្លែងថា រហូតមកដល់ពេលនេះ លោកនៅមិនទាន់មានអ្វីជាព័ត៌មានបន្ថែមទៀតនៅឡើយទេ ដោយសារតែសមត្ថកិច្ចជំនាញកំពុងបន្តការស្រាវជ្រាវបន្ថែមទៀត។
លោកស្រី ជៀប សុធារី មន្ត្រីសម្របសម្រួលផ្នែកសិទ្ធិមនុស្ស នៃសមាគមការពារសិទ្ធិមនុស្សអាដហុក ប្រចាំខេត្តព្រះសីហនុ បានថ្លែងថា លោកស្រីគាំទ្រចំពោះការស្រាវជ្រាវយ៉ាងយកចិត្តទុកដាក់នេះ ប៉ុន្ដែសមត្ថកិច្ចត្រូវតែបង្ហាញអំពីលទ្ធផល ដើម្បីកុំឲ្យមហាជនមានការបារម្ភពីសុវត្ថិភាព។
លោកស្រីបញ្ជាក់ថា៖ «ពលរដ្ឋចេះតែនាំគ្នាគិតថា ខ្លាចមានការប្រព្រឹត្តអំពើពុករលួយ ដែលដោះស្រាយមិនតម្លាភាពហើយបណ្ដាលឲ្យសំរាមនោះប៉ះពាល់ដល់សុខភាពពលរដ្ឋ»។
លោកស្រី Jenn Gearey អ្នកនាំពាក្យក្រសួងបរិស្ថាន និងប្រែប្រួលអាកាសធាតុនៃប្រទេសកាណាដា បានថ្លែងតាមសារអេឡិចត្រូនិកថា រដ្ឋាភិបាលកាណាដា បានដឹងអំពីក្តីកង្វល់ដែលលើកឡើងដោយរដ្ឋាភិបាលកម្ពុជា ហើយក៏បានជួយតាមរយៈស្ថានទូតកាណាដានៅភ្នំពេញ ដើម្បីស្រាវជ្រាវរកព័ត៌មានលម្អិតជុំវិញបញ្ហាសំរាមប្លាស្ទិកនេះដែរ។
លោកស្រីបញ្ជាក់ថា៖ «រដ្ឋាភិបាលកាណាដាក៏បានចំណាយលុយ ១០០ លានដុល្លារ សម្រាប់ជួយដល់ប្រទេសផ្សេងៗក្នុងការកែច្នៃសំរាម សម្រាប់ប្រើប្រាស់ឡើងវិញ ចៀសវាងការកប់ក្នុងដី ចោលក្នុងសមុទ្រ ទន្លេ ឬបឹងដែលនាំឲ្យប៉ះពាល់ដល់បរិស្ថាន»។
គួរបញ្ជាក់ថា កាលពីរសៀលថ្ងៃទី ១៦ ខែ កក្កដា ឆ្នាំ ២០១៩ ក្រសួងបរិស្ថាន និងអគ្គនាយកដ្ឋានគយ និងរដ្ឋាករនៃក្រសួងសេដ្ឋកិច្ច និងហិរញ្ញវត្ថុ និងស្ថាប័នពាក់ព័ន្ធបានសម្រេចគាស់ទូកុងតឺន័រ ចំនួន ៨៣ ដែលគេដាក់តម្រៀបនៅក្នុងកំពង់ផែក្រុងព្រះសីហនុ ដើម្បីពិនិត្យជាក់ស្ដែងក៏រកឃើញមានផ្ទុកសុទ្ធតែសំរាមប្លាស្ទិកនេះ ដែលមានទម្ងន់ប្រមាណ ១៦០០ តោន៕