ភ្នំពេញៈ ដោយបន្ទរតាមលោកនាយករដ្ឋមន្ត្រី ហ៊ុន សែន ដែលថាទស្សនកិច្ចនៅអង្គការសហប្រជាជាតិទទួលបានជោគជ័យ មន្ត្រីជាន់ខ្ពស់បក្សកាន់អំណាចក៏បានវាយប្រហារអតីតបក្សប្រឆាំងវិញដែលបានធ្វើបាតុកម្មប្រឆាំងមេដឹកនាំរបស់ខ្លួនដោយថា ការតវ៉ានេះជាបរាជ័យយ៉ាងអាម៉ាស់ និងចាត់ទុកការតតាំងមតិរបស់បរទេសជាការបង្កើតព័ត៌មាន និងឈ្លានពានអធិបតេយ្យភាពរបស់កម្ពុជា។
ប៉ុន្តែមន្ត្រីជាន់ខ្ពស់នៃអតីតគណបក្សសង្គ្រោះជាតិដែលជាបក្សប្រឆាំងពីម្សិលមិញចាត់ទុកការលើកឡើងរបស់មន្ត្រីរដ្ឋាភិបាល និងគណបក្សកាន់អំណាចដែលនិយាយការពារដំណើរទស្សនកិច្ចរបស់លោក ហ៊ុន សែន ហើយបែរមកវាយប្រហារបក្សប្រឆាំងវិញនោះថាជារឿង «គួរឲ្យអស់សំណើច» និងថា ពលរដ្ឋកម្ពុជា និងប្រទេសជាតិទៅវិញទេដែលទទួលរងបរាជ័យពីវិបត្តិនយោបាយដែលកំពុងកើតមាននៅកម្ពុជា។
ទាំងមន្ត្រីនាំពាក្យគណបក្សប្រជាជនកម្ពុជាដែលជាបក្សកាន់អំណាចលោក សុខ ឥសាន និងមន្ត្រីនាំពាក្យរដ្ឋាភិបាលលោក ផៃ ស៊ីផាន ចាត់ទុកសកម្មភាពពលរដ្ឋខ្មែរ និងបរទេសមួយចំនួនដែលប្រឆាំងនឹងដំណើរទស្សនកិច្ចរបស់លោក ហ៊ុន សែន កាលពីថ្ងៃទី ២៨-៣០ កញ្ញា នៅបុរីញូវយ៉កថាជាពួកប្រតិកិរិយា ចង់បំផ្លាញកម្ពុជា និងជាការឈ្លានពានអធិបតេយ្យភាពរបស់កម្ពុជាដែលមិនអាចទទួលយកបាន។
លោក សុខ ឥសាន ពីម្សិលមិញអះអាងថាការខិតខំប្រឹងប្រែងរបស់អតីតបក្សប្រឆាំង ពិសេសការប្រមូលផ្តុំធ្វើបាតុកម្មលើទឹកដីអាមេរិកនាពេលថ្មីៗនេះ គឺជាការទទួលបរាជ័យយ៉ាងអាម៉ាស់បំផុត។
លោកសរសេរលើបណ្ដាញតេលេក្រាមថា៖ «មិនចង់ឲ្យសម្តេចតេជោទៅជាន់ដីអាមេរិក តែសម្តេចបានដឹកនាំគណៈប្រតិភូរាជរដ្ឋាភិបាលកម្ពុជាទៅជាន់ដីអាមេរិកនៅញូវយ៉កបានដោយជោគជ័យជាធម្មតា។ អាសន:កម្ពុជានៅ អ.ស.ប ត្រូវបានរាជរដ្ឋាភិបាលកម្ពុជាកាន់កាប់ដដែល គ្មានការរារាំង ឬដកដូចពួកអគតិថានោះឡើយ»។
ជាមួយគ្នានេះលោកអះអាងថាបញ្ហាសិទ្ធិមនុស្ស និងលទ្ធិប្រជាធិបតេយ្យមិនត្រូវបានមហាសន្និបាត អ.ស.ប ចាប់អារម្មណ៍ទាល់តែសោះដោយគ្មានប្រទេសណាក្នុងមហាសន្និបាតលើកយកបញ្ហាកម្ពុជាមកពិភាក្សាទេ។
លោកថា៖ «បណ្តាចំណុចខាងលើបញ្ជាក់ពីបរាជ័យដ៏ធ្ងន់ធ្ងរ និងយ៉ាងអាម៉ាស់របស់ពួកប្រឆាំង និងពួកប្រតិកិរិយាទាំងខ្មែរ និងបរទេសដែលតែងតែមានមហិច្ឆតាចង់បំផ្លាញកម្ពុជាតាំងពីយូរមក»។
បន្ថែមលើនេះលោក ផៃ ស៊ីផាន បានធ្វើសេចក្ដីថ្លែងការណ៍មួយឆ្លើយតបទៅនឹងការតតាំងមតិរបស់បរទេសក៏ដូចជាប្រជាពលរដ្ឋមានដើមកំណើតខ្មែរមួយចំនួនរស់នៅឯនាយសមុទ្រ។ លោកថារាជរដ្ឋាភិបាលកម្ពុជាកើតចេញពីជម្រើសនៃឆន្ទៈរបស់ប្រជាពលរដ្ឋខ្មែរតាមរយៈការបោះឆ្នោត។
លោកថ្លែងថា៖ «ក្រៅពីកិច្ចសហការ គោរពផលប្រយោជន៍គ្នាទៅវិញទៅមករវាងប្រជាជាតិ និងអង្គការបរទេសទាំងអស់ក្នុងភាពជាដៃគូកម្ពុជារក្សាសិទ្ធិគ្រប់បែបយ៉ាងដើម្បីរក្សានូវភាពជាម្ចាស់ជោគវាសនារបស់ខ្លួន។ អាស្រ័យហេតុដូចនេះការតតាំងមតិទាំងនោះគ្មានអ្វីក្រៅពីការបង្កើតព្រឹត្តិការណ៍ព័ត៌មាន និងការឈ្លានពានអធិបតេយ្យភាពរបស់កម្ពុជាតែប៉ុណ្ណោះ»។
ប៉ុន្តែលោក អ៊ូ ច័ន្ទរ័ត្ន អតីតតំណាងរាស្ត្រនៃអតីតគណបក្សសង្គ្រោះជាតិ ចាត់ទុកការលើកឡើងរបស់មន្ត្រីរដ្ឋាភិបាលថាជារឿង «គួរឲ្យអស់សំណើច»។
លោកថាទាំងរាជរដ្ឋាភិបាលកម្ពុជា និងអតីតគណបក្សប្រឆាំងសុទ្ធតែទទួលបានជោគជ័យពីការខិតខំរបស់ខ្លួននៅលើឆាកអន្តរជាតិ បន្ទាប់ពីមហាសន្និបាតអង្គការសហប្រជាជាតិក្នុងបុរីញូវយ៉កនាពេលថ្មីៗនេះ។ ប៉ុន្តែលោកថាពលរដ្ឋកម្ពុជា និងប្រទេសកម្ពុជាគឺជាអ្នកបរាជ័យនៃលទ្ធផលនៃជម្លោះនយោបាយកម្ពុជា។
លោកថ្លែងថា៖ «សម្រាប់គណបក្សទាំង ២ គឺហាក់ទទួលជោគជ័យរៀងៗខ្លួន ខ្ញុំបានតាមដានមើល ប៉ុន្តែអ្នកដែលបរាជ័យពិតប្រាកដគឺប្រជាជនខ្មែរ និងប្រទេសកម្ពុជានៅលើឆាកអន្តរជាតិដែលតែងតែមានអ្នកប្រឆាំង អ្នកគាំទ្រនៅទីនោះដែលបានបង្ហាញទៅសហគមន៍អន្តរជាតិថា ទី ១ យើងមិនមានឯកភាពផ្ទៃក្នុងទេ ទី ២ ប្រទេសដទៃនៅតែព្យាយាមលួងលោម ជួយយើងដោយគេដឹងច្បាស់ថាយើងមានបញ្ហា»។
លោកថា៖ «បើប្រទេសយើង នៅតែជួបវិបត្តិនៅតែមានបញ្ហាដោយប្រជាពលរដ្ឋមិនទទួលបានផលប្រយោជន៍ពីជម្លោះនយោបាយនេះទេ មានតែទទួលបានការរងគ្រោះទៅវិញទាំងនយោបាយ ទាំងសេដ្ឋកិច្ច ទាំងការគោរពសិទ្ធិមនុស្ស ដូច្នេះអ្នកបរាជ័យ គឺប្រជាពលរដ្ឋខ្មែរ»។
លោកសង្កត់ធ្ងន់ថា៖ «យើងជាប្រទេសដែលគេបានជ្រោមជ្រែងឲ្យយើងដើរក្នុងគន្លងប្រជាធិបតេយ្យតាំងពីឆ្នាំ ១៩៩១ បន្ទាប់ពីការចុះហត្ថលេខាលើសន្ធិសញ្ញាក្រុងប៉ារីស ហើយឆ្នាំ ១៩៩៣ គេដាក់កងកម្លាំង UN ការពារដើម្បីរៀបចំការបោះឆ្នោតឲ្យយើង»។
អ្នកវិភាគនយោបាយលោក មាស នី ថាទាំងបក្សកាន់អំណាច និងបក្សប្រឆាំងសុទ្ធតែទទួលជោគជ័យពីបេសកកម្មរបស់ខ្លួនដើម្បីការពារផលប្រយោជន៍របស់ពួកគេលើទឹកដីអាមេរិក។
លោកថ្លែងថា៖ «ប៉ុន្តែអ្វីដែលខាតនោះគឺមុខមាត់ប្រទេសជាតិមួយនេះដែលបង្ហាញថាយើងនៅតែបន្តបែកបាក់គ្នា។ មិនត្រឹមតែបែកបាក់នៅក្នុងស្រុកទេគឺបានបង្ហាញដល់អន្តរជាតិ»៕