.jpg)
លោក សម រង្ស៊ី ដែលអះអាងថាមកចូលរួមប្រជុំសហភាពអន្តរសភា IPU នាទីក្រុងហ្សឺណែវ ប្រទេសស្វ៊ីស ក្នុងសប្តាហ៍នេះ។ រូប ហ្វេសប៊ុក SR
ភ្នំពេញៈ មន្ត្រីជាន់ខ្ពស់នៃសភាជាតិ និងមន្ត្រីគណបក្សកាន់អំណាចកាលពីម្សិលមិញបានប្រតិកម្មខ្លាំងៗចំពោះការអះអាងថា អតីតមេបក្សប្រឆាំងលោក សម រង្ស៊ី ត្រូវបានអញ្ជើញឲ្យចូលរួមក្នុងមហាសន្និបាតសហភាពអន្តរសភា (IPU) នៅក្នុងប្រទេសស្វ៊ីសនាសប្ដាហ៍នេះដោយចាត់ទុកថាគឺជាការ «បំពានលើឯករាជ្យ និងអធិបតេយ្យភាពជាតិកម្ពុជា» ហើយព្រមានថា គណៈប្រតិភូកម្ពុជានឹងធ្វើការតវ៉ាភ្លាមបើលោក រង្ស៊ី បង្ហាញខ្លួន។
សរសេរនៅលើបណ្ដាញសង្គមតេឡេក្រាមពីម្សិលមិញអ្នកនាំពាក្យគណបក្សប្រជាជនកម្ពុជាលោក សុខ ឥសាន បញ្ជាក់ថា៖ «រហូតមកដល់ពេលនេះទណ្ឌិត សម រង្ស៊ី គ្មានតួនាទីអ្វីដ៏តិចតួចក្នុងការមានមុខចូលប្រជុំនៅលើវេទិកានានាជាថ្នាក់អន្តរជាតិទេ ពីព្រោះទណ្ឌិត សម រង្ស៊ី មិនមែនជាតំណាងប្រជាជនកម្ពុជាឡើយ។ ទណ្ឌិត សម រង្ស៊ី គ្រាន់តែជាជនក្បត់ជាតិខ្មែរ និងជាជនពនេចរគ្មានស្រុកទេស និងជាអាយ៉ងដាច់ថ្លៃរបស់ពួកបរទេសចក្រពត្តិភាពនិយមអន្តរជាតិតែប៉ុណ្ណោះ»។
លោកថាបក្សប្រជាជនកម្ពុជាសូមគាំទ្រយ៉ាងពេញទំហឹងចំពោះការតវ៉ាដ៏ម៉ឺងម៉ាត់របស់គណៈប្រតិភូសភាកម្ពុជាដែលបានទៅចូលរួមប្រជុំជាផ្លូវការក្នុងអង្គប្រជុំ IPU ក្នុងនាមជាតំណាងស្របច្បាប់របស់ប្រជាជនកម្ពុជា ហើយសូមថ្កោលទោសយ៉ាងដាច់អហង្ការចំពោះអាកប្បកិរិយាល្មើសច្បាប់របស់ជនលម្អៀងខាងនយោបាយ និងមនោគមន៍វិជ្ជាអន្តរជាតិ។
លោកសង្កត់ធ្ងន់ថា៖ «ដូច្នេះការដែលមានអ្នកអនុញ្ញាតឲ្យទណ្ឌិត សម រង្ស៊ី ចូលប្រជុំនៅក្នុងវេទិកា IPU គឺជាការរំលោភសិទ្ធិប្រជាធិបតេយ្យរបស់ប្រជាជនកម្ពុជា និងគឺជាការបំពានលើឯករាជ្យ និងអធិបតេយ្យភាពជាតិកម្ពុជាយ៉ាងងងើលព្រមទាំងរំលោភច្បាប់អន្តរជាតិដែលប្រធានប្រជុំ IPU ត្រូវទទួលខុសត្រូវទាំងស្រុងលើតួនាទីលម្អៀងនយោបាយរបស់ខ្លួនដោយគ្មានការខ្មាសអៀន»។
ជាមួយគ្នានេះលោក ឡេង ប៉េងឡុង អ្នកនាំពាក្យរដ្ឋសភាកម្ពុជាថ្លែងពីម្សិលមិញថាលោកនៅមិនទាន់ទទួលបានព័ត៌មានពីវត្តមានរបស់លោក សម រង្ស៊ី ដែលត្រូវគេអះអាងថានឹងចូលរួមក្នុងកិច្ចប្រជុំនៅឡើយទេ ប៉ុន្តែលោកថាប្រតិភូកម្ពុជានឹងធ្វើការតវ៉ាភ្លាម បើមានវត្តមានលោក សម រង្ស៊ី នៅក្នុងកិច្ចប្រជុំនោះ។
លោកថា៖ «យើងធ្វើការនៅក្នុង IPU។ IPU មានលក្ខន្តិកៈ ហើយគេធ្វើការទៅតាមលក្ខន្តិកៈនោះ។ បើគេធ្វើខុសលក្ខន្តិកៈ យើងនឹងតវ៉ា។ គណៈប្រតិភូនឹងតវ៉ាត្រង់ៗនៅនឹងកន្លែងតែម្ដង ព្រោះយើងមានគណៈប្រតិភូនៅទីនោះតែម្ដង។ យើងមានសិទ្ធិតវ៉ា»។
លោកបន្ថែមថា៖ «លោក សម រង្ស៊ី ជាប្រធានចលនាសង្គ្រោះជាតិជាចលនាឧទ្ទាមដែលចង់ផ្តួលរំលំរាជរដ្ឋាភិបាលកម្ពុជា បើ IPU ទទួលយកចលនាឧទ្ទាមនេះធ្វើជាចលនាផ្លូវការ យើងមិនអាចទទួលយកបានទេ»។
ប៉ុន្តែលោក សម រង្ស៊ី ដែលបច្ចុប្បន្នជាប្រធានចលនាសង្គ្រោះជាតិផងដែរនោះ បានប្រាប់វិទ្យុអន្តរជាតិមួយថាលោកនឹងប្រាប់ថ្នាក់ដឹកនាំសភារបស់ IPU ពីស្ថានការណ៍ប្រទេសកម្ពុជាដោយសិទ្ធិរបស់តំណាងរាស្ត្រកម្ពុជា «ត្រូវបានរំលោភ» ដោយរដ្ឋអំណាចក្រុងភ្នំពេញដែលតំណាងដោយ «រដ្ឋសភាក្លែងក្លាយ និងរដ្ឋាភិបាលមិនស្របច្បាប់» ខណៈអតីតមន្ត្រីបក្សប្រឆាំងក៏ថ្លែងដែរថា វត្តមានរបស់លោក សម រង្ស៊ី មិនមានអ្វីខុសឆ្គងទេ។
មហាសន្និបាតសហភាពអន្តរសភា IPU លើកទី ១៣៩ ធ្វើឡើងចាប់ពីថ្ងៃទី ១៤-១៨ ខែតុលានាទីក្រុងហ្សឺណែវ ប្រទេសស្វ៊ីស ក្រោមប្រធានបទ «ភាពជាថ្នាក់ដឹកនាំសភាក្នុងការជំរុញសន្តិភាព និងការអភិវឌ្ឍក្នុងយុគសម័យនៃនវានុវត្តន៍ និងការផ្លាស់ប្តូរតាមបែបបច្ចេកវិទ្យា»។
គណៈប្រតិភូកម្ពុជាដឹកនាំដោយអនុប្រធានទី ២ នៃរដ្ឋសភាគឺលោកស្រី ឃួន សុដារី កំពុងមានវត្តមាននៅទីនោះស្រាប់។
លោក ឈាង វុន ដែលជាសមាជិកគណៈប្រតិភូសភាកម្ពុជាបានបង្ហោះវីដេអូមួយពីបន្ទប់ប្រជុំរបស់សហភាពអន្តរសភា IPU អមដោយសារដៀមដាមទំនងសំដៅដល់អតីតបក្សប្រឆាំងដោយអះអាងថា មានតែតំណាងរាស្ត្រអាណត្តិទី ៦ ទេដែលត្រូវបានទទួលការអញ្ជើញឲ្យចូលរួមក្នុងកិច្ចប្រជុំសន្និបាតប្រចាំឆ្នាំរបស់ IPU។
លោកសរសេរថា៖ «គ្មានអ្នកដែលមិនមែនជាអ្នកតំណាងរាស្ត្រដែលគ្មានការអញ្ជើញត្រូវបានអនុញ្ញាតឲ្យចូលក្នុងសាលប្រជុំសន្និបាតនេះទេ។ សូមជួយពិនិត្យផង ជួយរកក្នុងវីដេអូនេះផង ក្រែងឃើញអ្នកដែលមិនគួរឃើញ។ អ្នកដែលមិនគួរឃើញ អាចដើរក្រៅសាលប្រជុំ»។
លោក សម រង្ស៊ី មិនបានឆ្លើយនឹងសំណើសុំការធ្វើអត្ថាធិប្បាយទេ ពីម្សិលមិញប៉ុន្តែលោកបានបង្ហោះរូបថតមួយសន្លឹក និងសរសេរនៅលើទំព័រហ្វេសប៊ុករបស់លោកថា លោកកំពុងមានវត្តមាននៅទីក្រុងហ្សឺណែវដើម្បីជួបមេដឹកនាំសភារបស់ IPU ជាសារដូចគ្នានឹងអ្វីដែលលោកថ្លែងប្រាប់វិទ្យុបារាំងអន្តរជាតិថា «ដើម្បីបង្ហាញប្រាប់គេពីស្ថានការណ៍ប្រទេសកម្ពុជា និងប្រាប់គេពីករណីតំណាងរាស្ត្រកម្ពុជាដែលសិទ្ធិរបស់ពួកគេត្រូវបានរំលោភ ដោយរដ្ឋអំណាចក្រុងភ្នំពេញដែលពេលនេះតំណាងដោយរដ្ឋសភាក្លែងក្លាយ និងរដ្ឋាភិបាលមិនស្របច្បាប់»។
លោក អ៊ូ ច័ន្ទរ័ត្ន អតីតតំណាងរាស្ត្រគណបក្សប្រឆាំងថ្លែងពីម្សិលមិញថា ការអនុញ្ញាតឲ្យលោក សម រង្ស៊ី ចូលរួមក្នុងកិច្ចប្រជុំរបស់សហភាពអន្តរសភា IPU មិនមែនជារឿងខុសឆ្គងអ្វីទេ។
លោកលើកឡើងថា៖ «ទី ១ វាជាសិទ្ធិអំណាចរបស់គេទី ២ ដោយសារលោក សម រង្ស៊ី ក្ដី អតីតគណបក្សសង្គ្រោះជាតិក្ដីធ្លាប់បានប្ដឹងទៅ IPU ដើម្បីសុំអន្តរាគមន៍ក្នុងការដែលរដ្ឋាភិបាលប្ដឹងរំលាយគណបក្សសង្គ្រោះជាតិ ហើយ IPU នេះបានស្នើឲ្យរដ្ឋាភិបាលកម្ពុជាតាំងពីខែកុម្ភៈ ឆ្នាំ ២០១៧ ដោយថាធ្វើយ៉ាងម៉េចឲ្យគណបក្សសង្គ្រោះជាតិរស់ឡើងវិញ ដូច្នេះគេអនុញ្ញាតឲ្យចូលរួមមិនខុសទេ គេចង់ឮថាតើភាគីមួយដែលប្ដឹងនោះ គេមិនសុខចិត្តរឿងអីខ្លះ»។
ការព្យាយាមទំនាក់ទំនងទៅកាន់សហភាពអន្តរសភា IPU នៅទីក្រុងហ្សឺណែវតាមរយៈសារអេឡិចត្រូនិក ដើម្បីសុំការបញ្ជាក់មិនទទួលបានការឆ្លើយតបទេកាលពីម្សិលមិញ៕
