.jpg)
សមត្ថកិច្ចចុះពិនិត្យឈើក្រុមហ៊ុននៅស្រុកកោះញែក។ នគរបាល
មណ្ឌលគិរីៈ ព្រះរាជអាជ្ញានៃសាលាដំបូងខេត្តមណ្ឌលគិរី លោក ហៀង សុភក្ត្រ ពីម្សិលមិញ បានបញ្ជាឲ្យមន្ត្រីរដ្ឋបាលព្រៃឈើចំនួន ៣ នាក់ ចូលខ្លួនបំភ្លឺនៅបញ្ជាការដ្ឋានកងរាជអាវុធហត្ថខេត្តមណ្ឌលគិរីឲ្យបានមុនថ្ងៃទី ២៤ សីហា ជុំវិញករណីបទល្មើសព្រៃឈើ ខណៈមន្ត្រីចុះស្រាវជ្រាវដល់ទីតាំងក្រុមហ៊ុន វិជ្ជរី និងក្រុមហ៊ុន ណៃណា ផ្ទាល់នៅស្រុកកោះញែក មិនទាន់បង្ហាញលទ្ធផល។
តាមដីកាចំនួន ៣ សន្លឹក ដាច់ដោយឡែកពីគ្នារបស់លោក ហៀង សុភក្ត្រ ព្រះរាជអាជ្ញានៃអយ្យការអមសាលាដំបូងខេត្តមណ្ឌលគិរី ចុះថ្ងៃទី ១៧ កក្កដា ទី១ បានបញ្ជាឲ្យឈ្មោះ ហ៊ុន វណ្ណេ អាយុ ៥០ ឆ្នាំ ជានាយសង្កាត់រដ្ឋបាលព្រៃឈើរយ៉ មានលំនៅក្នុងភូមិស្មៅខ្ចី ឃុំត្រពាំងសាប ស្រុកបាទី ខេត្តតាកែវ។ ទី២ ឈ្មោះ លឿង ភិរុណ អាយុ ៥៥ ឆ្នាំ ជានាយសង្កាត់រដ្ឋបាលព្រៃឈើស្រែសង្គមណងឃីលឹក មានលំនៅក្នុងភូមិដំណាំកិន ឃុំមៀន ស្រុកព្រៃឈរ ខេត្តកំពង់ចាម និងទី៣ ឈ្មោះ គង់ វិរៈ អាយុ ៤៦ ឆ្នាំ ជានាយផ្នែករដ្ឋបាលព្រៃឈើកោះញែក មានលំនៅក្នុងភូមិទ្រា សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ។ មន្ត្រីទាំង ៣ តម្រូវឲ្យចូលបង្ហាញខ្លួនបំភ្លឺនៅបញ្ជាការដ្ឋានកងរាជអាវុធហត្ថខេត្តមណ្ឌលគិរីឲ្យបានមុនថ្ងៃទី ២៤ ខែ សីហា ឆ្នាំ ២០១៩។
ដីកាបញ្ជាក់ថា៖ «ការចូលខ្លួននេះ ដើម្បីសាកសួរជុំវិញករណីមួយចំនួនមានដូចជា ផ្តល់ការអនុញ្ញាតផ្ទុយនឹងបទប្បញ្ញត្តិនៃច្បាប់ អនុគ្រោះចំពោះបទល្មើសព្រៃឈើ មិនរាយការណ៍ ឬមិនបានដាក់ពាក្យបណ្តឹងចំពោះបទល្មើសព្រៃឈើថ្នាក់ទី ១ ដែលបានកើតក្នុងរង្វង់សមត្ថកិច្ចរបស់ខ្លួនទាន់ពេលវេលា។ ធ្វេសប្រហែសដោយចេតនាក្នុងការបំពេញភារកិច្ច ឬផ្តល់ព័ត៌មានក្លែងក្លាយបន្លំជាលាយលក្ខណ៍អក្សរដែលជាមូលហេតុបង្កឲ្យកើតមានបទល្មើសព្រៃឈើថ្នាក់ទី ១»។
លោក អេង ហ៊ី អ្នកនាំពាក្យគណៈកម្មការជាតិ ដើម្បីទប់ស្កាត់ និងបង្ក្រាបបទល្មើសធនធានធម្មជាតិ ប្រាប់ភ្នំពេញប៉ុស្ដិ៍ ពីម្សិលមិញថា កម្លាំងគណៈកម្មការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិ បានចុះទៅដល់ទីតាំងក្រុមហ៊ុនចំនួន ២ ផ្សេងគ្នា គឺក្រុមហ៊ុន វិជ្ជរី និងក្រុមហ៊ុន ណៃណា នៅក្នុងឃុំរយ៉ ស្រុកកោះញែក។
លោក អេង ហ៊ី បញ្ជាក់ថា៖ «ខ្ញុំអត់ទាន់បានទទួលលទ្ធផលយ៉ាងណាទេ ព្រោះពួកគាត់កំពុងនៅក្នុងព្រៃនៅឡើយ ដោយរង់ចាំកម្លាំងជំនាញបញ្ចប់ប្រតិបត្តិការរបស់ខ្លួនជាមុនសិន។ យើងកំពុងធ្វើការងារហ្នឹងនៅតាមបណ្ដាខេត្តផ្សេងៗទៀតជាបន្តបន្ទាប់រហូត»។
លោក ហេង ស្រស់ សកម្មជនការពារព្រៃឈើខេត្តមណ្ឌលគិរី ថ្លែងថា ក្រុមហ៊ុន វិជ្ជរី (ម្ចាស់ជនជាតិចិន) និងក្រុមហ៊ុន ណៃណា (ម្ចាស់ជនជាតិខ្មែរ) ទាំង ២ នេះបានទទួលដីសម្បទានសេដ្ឋកិច្ចពីរដ្ឋាភិបាល ដោយនាំគ្នាកាប់ឈើនៅក្នុងបរិវេណដីសម្បទាន និងក្រៅតំបន់ដែនដីរបស់ខ្លួន។ ក្នុងនោះពួកគេបានប្រមូលទិញឈើពីពលរដ្ឋមូលដ្ឋាន និងកាប់ជញ្ជូនឈើពីដែនជម្រកសត្វព្រៃភ្នំព្រិច និងស្រែពក បន្ទាប់មកពួកគេចាប់ផ្ដើមកាត់ ឬច្រៀកជាបន្ទះក្ដារនិងកែច្នៃតាមតម្រូវការពួកគេ ហើយនាំចេញទៅលក់នៅវៀតណាម។
លោកថា នៅស្រុកកោះញែក មានក្រុមហ៊ុនចំនួន ៦ កំពុងមានសកម្មភាពលើអាជីវកម្មកាប់បំផ្លាញព្រៃឈើយ៉ាងសកម្ម។ ក្នុងនោះ ក្រុមហ៊ុនថាច់វូដ (ខេមបូឌា) ក្រុមហ៊ុនយ៉ានចាវ (ខេមបូឌា) ក្រុមហ៊ុន វិជ្ជរី ក្រុមហ៊ុន ណៃណា និងក្រុមហ៊ុន លឹម រ៉ូយ៉ាល់ ហើយអាចនៅមានក្រុមហ៊ុនផ្សេងៗទៀត ប៉ុន្ដែលោកមិនបានចាំឈ្មោះអស់។
លោកបញ្ជាក់ថា៖ «យើងដឹងស្រាប់ហើយថា មុនពេលគណៈកម្មការជាតិចុះមកនេះ គឺខាងម្ចាស់ក្រុមហ៊ុនទាំងអស់ហ្នឹង គាត់ដឹងខ្លួនមុនរយៈពេល៣ថ្ងៃរួចហើយ ក្នុងអំឡុងពេល ៣ ថ្ងៃហ្នឹង គឺគាត់បានរៀបចំខ្លួនយ៉ាងស្អាតបាតអស់ហើយ គឺបើសមត្ថកិច្ចចុះដល់ក្រុមហ៊ុនគាត់ គឺឃើញឈើតិចតួចទេ ហើយមើលទៅក៏គ្មានអ្វីប្លែកដែរ ព្រោះគេរៀបចំទុកដាក់អស់ហើយ។ អ៊ីចឹងសមត្ថកិច្ចទៅ ក៏សរសេរតែរបាយការណ៍ហើយក៏មកវិញទៅ អត់មានអ្វីចម្លែកទេ»។
លោក សុង ឃាង ប្រធានមន្ទីរកសិកម្ម រុក្ខាប្រមាញ់ និងនេសាទខេត្តមណ្ឌលគិរី ពីម្សិលមិញ មិនអាចទាក់ទងសុំការបញ្ជាក់ជុំវិញរឿងនេះបានទេ។ ឯលោកហាន សុភក្ដិ អនុប្រធានមន្ទីរអះអាងថា៖ «ខ្ញុំដឹងរឿងមិនសូវច្បាស់ទេ ខ្ញុំអត់ហ៊ាននិយាយរឿងហ្នឹងទេ សូមអធ្យាស្រ័យផង»។
លោក កែវ អូម៉ាលីស្ស ប្រតិភូរាជរដ្ឋាភិបាលទទួលបន្ទុកប្រធានរដ្ឋបាលព្រៃឈើនៃក្រសួងកសិកម្ម រុក្ខាប្រមាញ់ និងនេសាទ កាលពីម្សិលមិញ ក៏មិនទាន់អាចទាក់ទងសុំការបញ្ជាក់ជុំវិញករណីនេះបានដែរ។
តាមរបាយការណ៍របស់កងរាជអាវុធហត្ថលើផ្ទៃប្រទេសបង្ហាញលើគេហទំព័រហ្វេសប៊ុករបស់ខ្លួន ម្សិលមិញថា រយៈពេលប៉ុន្មានថ្ងៃនេះ កម្លាំងគណៈកម្មការជាតិដើម្បីទប់ស្កាត់ និងបង្រ្កាបបទល្មើសធនធានធម្មជាតិ បានបញ្ចេញប្រតិបត្តិការជាទ្រង់ទ្រាយធំ បង្ក្រាបនៅតាមខេត្តជាប់ព្រំដែនរួមមាន ខេត្តមណ្ឌលគិរី ខេត្តរតនគិរី ខេត្តក្រចេះ និងខេត្តស្ទឹងត្រែង រហូតមានការចាប់ខ្លួនមនុស្សជាច្រើននាក់ ព្រមទាំងមានដីកាកំពុងតាមចាប់អ្នកពាក់ព័ន្ធ និងរឹបអូសរថយន្តជាច្រើនគ្រឿងដុតបំផ្លាញចោលទៀតផង។
គួររំឭកថា រហូតមកដល់ពេលនេះ មានមនុស្សទាំងជនជាតិខ្មែរ និងចិន ចំនួន ១១ នាក់បន្ថែមទៀត ត្រូវបានសមត្ថកិច្ចតាមចាប់ខ្លួន និងត្រូវតុលាការបញ្ជាឲ្យចូលខ្លួនបំភ្លឺជុំវិញករណីបទល្មើសព្រៃឈើពាក់ព័ន្ធជាមួយឧកញ៉ា ស៊ឹង សំអុល ដែលត្រូវបានតុលាការសម្រេចឃុំខ្លួនរួចហើយ ខណៈដែលជនជាតិវៀតណាម ២ នាក់ និងខ្មែរ ៣ នាក់ ក្នុងបទល្មើសព្រៃឈើមួយផ្សេងទៀត ត្រូវបានតុលាការចោទប្រកាន់ និងបញ្ជូនទៅឃុំខ្លួន កាលពីថ្ងៃទី ១៥ ខែកក្កដា៕
