.jpg)
លោក សុខ ទូច ប្រធានរាជបណ្ឌិត្យសភាកម្ពុជា។ រូបថត ភ្នំពេញ ប៉ុស្តិ៍
ភ្នំពេញៈ មន្ត្រីរាជរដ្ឋាភិបាលកម្ពុជា និងរាជបណ្ឌិត្យសភាបានថ្លែងថា របាយការណ៍ដែលបានចោទប្រកាន់មកលើកម្ពុជាថាមានការកសាងមូលដ្ឋានទ័ពជើងទឹកចិននៅក្នុងខេត្តកោះកុងគឺគ្រាន់តែជា «សង្គ្រាមចិត្តសាស្ត្រ» តែប៉ុណ្ណោះ ហើយក៏មិនចាំបាច់មានការត្រួតពិនិត្យនៅក្នុងតំបន់នោះដែរ។
កាលពីថ្ងៃសៅរ៍រាជបណ្ឌិត្យសភាកម្ពុជាបានរៀបចំកិច្ចពិភាក្សាតុមូលស្តីអំពី «តើកម្ពុជាត្រូវការវត្តមានកងទ័ពបរទេសដែរឬទេ?»។
មន្ត្រីមកពីក្រសួងការពារជាតិ ក្រសួងយុត្តិធម៌ និងអ្នកនាំពាក្យរាជរដ្ឋាភិបាលត្រូវបានអញ្ជើញឱ្យផ្តល់ការយល់ឃើញរបស់ពួកគេ។
ប្រធានបទនេះត្រូវបានលើកយកមកពិភាក្សា បន្ទាប់ពីអនុប្រធានាធិបតីអាមេរិកលោក Mike Pence បានសរសេរលិខិត ១ ច្បាប់មកកាន់លោកនាយករដ្ឋមន្ត្រី ហ៊ុន សែន ដោយបានបង្ហាញអំពីកង្វល់ជុំវិញព័ត៌មានលេចឮថាមានការសាងសង់មូលដ្ឋានទ័ពជើងទឹករបស់ចិននៅក្នុងខេត្តកោះកុងរបស់ប្រទេសកម្ពុជា។ ការសម្តែងក្តីបារម្ភនេះត្រូវបានរាយការណ៍ដោយសារព័ត៌មាន Asia Times ដែលមានមូលដ្ឋាននៅក្នុងទីក្រុងហុងកុង។
លោក សុខ ទូច ប្រធានរាជបណ្ឌិត្យសភាកម្ពុជាបានអះអាងថា លោកបានទៅកាន់តំបន់នោះកាលពីពេលថ្មីៗនេះហើយលោកមិនបានរកឃើញការសាងសង់មូលដ្ឋានអ្វីនោះទេ។ លោកបន្ថែមថាប្រសិនបើមានការសាងសង់មូលដ្ឋានទ័ពដូចការចោទប្រកាន់មែននោះ សហរដ្ឋអាមេរិកនឹងមើលឃើញតាមរយៈផ្កាយរណប។
លោកបញ្ជាក់ថា៖ «ប៉ុន្តែអ្វីដែលត្រូវបានផ្សព្វផ្សាយគឺគ្រាន់តែជាសង្គ្រាមចិត្តសាស្ត្រតែប៉ុណ្ណោះ។ សហរដ្ឋអាមេរិកដឹងពីអ្វីៗទាំងអស់ដែលលោក គីម ជុងអ៊ុន បានផលិត»។ ការលើកឡើងបែបនេះគឺលោកចង់សំដៅទៅដល់កម្មវិធីនុយក្លេអ៊ែររបស់ប្រទេសកូរ៉េខាងជើង។
លោកបញ្ជាក់ថាការព្រួយបារម្ភអំពីមូលដ្ឋានទ័ពជើងទឹករបស់ចិនបានលេចចេញពីការសង្ស័យរបស់សហរដ្ឋអាមេរិក ខណៈដែលសហរដ្ឋអាមេរិកខ្លួនឯងផ្ទាល់ធ្លាប់មានកម្មវិធីបែបនេះដូចជា Marshall Plan ជាដើម។
លោកថ្លែងថា៖ «អ្នកធ្លាប់ធ្វើអ្វីមួយបែបនេះ។ នៅពេលដែលចិនមកវិនិយោគនៅក្នុងកម្រិតមួយខ្ពស់ [ក្នុងប្រទេសកម្ពុជា] អ្នកគិតថា ពួកគេមកដាក់ [មូលដ្ឋាន]។ សូមមើលថា តើពួកគេនឹងដាក់មូលដ្ឋាននៅទីនេះក៏អត់?»។
ប្រធានរាជបណ្ឌិត្យសភាកម្ពុជារូបនេះបន្ថែមថាកម្ពុជាមិនត្រូវការមូលដ្ឋានយោធាបរទេសទេ ប៉ុន្តែយើងស្វាគមន៍ការវិនិយោគ។
នាយឧត្តមសេនីយ៍ ឈុំ សុជាតិ អ្នកនាំពាក្យក្រសួងការពារជាតិបានថ្លែងថា មិនចាំបាច់ត្រួតពិនិត្យតំបន់នោះទេ ពីព្រោះវាគ្មានអ្វីនៅទីនោះទេ។
លោក សុជាតិ ថ្លែងថា៖ «ខ្ញុំគិតថាទៅពិនិត្យមើលកន្លែងនោះ ឬក៏មិនទៅគឺវាគ្មានអ្វីខុសគ្នាទេ។ អ្វីដែលសំខាន់បំផុតនោះគឺថា តើពួកគេទទួលយកការពិតឬក៏អត់ចំពោះអ្នកដែលនិយាយអំពីរឿងនេះ»។
អ្នកនាំពាក្យរដ្ឋាភិបាលកម្ពុជាលោក ផៃ ស៊ីផាន បានថ្លែងថាប្រធានបទនេះ ត្រូវបានលើកឡើងដោយអ្នកផ្លុំកញ្ចែដើម្បីធ្វើឱ្យសាធារណជនមានការភ្ញាក់ផ្អើលអំពីប្រទេសកម្ពុជា។ លោកថ្លែងថាការត្រួតពិនិត្យនៅតំបន់នោះ គឺមិនចាំបាច់ទេពីព្រោះ «ប្រទេសកម្ពុជាជារដ្ឋឯករាជ្យ។ គ្មាននរណាម្នាក់អាចមកពិនិត្យបានទេ»។
លោក ស៊ីផាន បញ្ជាក់ថា៖ «នេះគ្រាន់តែជាការព្រួយបារម្ភរបស់សហរដ្ឋអាមេរិកប៉ុណ្ណោះ។ យើងនឹងឃើញអ្វីច្រើនទៀតចូលមក ប៉ុន្តែកម្ពុជាត្រូវតែបង្រួបបង្រួមកម្ពុជាត្រូវរក្សាជំហររបស់ខ្លួនលើគោលនយោបាយការបរទេស។ យើងមិននៅតែឯងទេ។ យើងស្ថិតនៅក្នុងប្លុក [អាស៊ាន] ដែលខិតខំថែរក្សាការការពារសន្តិសុខជាតិរួមគ្នា»។
លោក ស៊ីផាន បន្ថែមថាប្រទេសកម្ពុជារក្សាជំហររបស់ខ្លួនលើទំនាក់ទំនងជាមួយប្រទេសចិន និងសហរដ្ឋអាមេរិក។ លោកថ្លែងថា៖ «យើងនៅតែមានទំនាក់ទំនងស្មើគ្នាទាំងជាមួយប្រទេសចិន និងសហរដ្ឋអាមេរិកមិនឱ្យមានជម្លោះជាមួយគ្នានោះទេ»។
កាលពីសប្តាហ៍មុនលោកនាយករដ្ឋមន្ត្រី ហ៊ុន សែន បានថ្លែងថាលោកបានទទួលលិខិតមួយច្បាប់ពីលោក Mike Pence អនុប្រធានាធិបតីសហរដ្ឋអាមេរិកដែលសម្តែងការព្រួយបារម្ភអំពីមូលដ្ឋានទ័ពជើងទឹកនៅក្នុងខេត្តកោះកុង ហើយបញ្ជាក់ថាលោកនឹងបញ្ជាក់អំពីកង្វល់របស់លោក Pence នេះ។
នៅក្នុងជំនួបនៃកិច្ចពិភាក្សាលាគ្នាជាមួយលោក William Heidt ឯកអគ្គរដ្ឋទូតអាមេរិកដែលផុតអាណត្តិកាលពីថ្ងៃអង្គារមុនលោកនាយករដ្ឋមន្ត្រី ហ៊ុន សែន បានថ្លែងថាលោកបានសរសេរលិខិតមួយច្បាប់ផ្ញើទៅកាន់លោក Pence រួចហើយ ដើម្បីបញ្ជាក់ថាគ្មានមូលដ្ឋានយោធាបរទេសនៅក្នុងប្រទេសកម្ពុជាទេ៕ NS
