ភ្នំពេញៈ អ្នកនាំពាក្យក្រសួងសុខាភិបាលបានបញ្ជាក់កាលពីម្សិលមិញថា រហូតមកទល់ពេលនេះនៅកម្ពុជាមិនទាន់មានករណីសង្ស័យណាមួយទាក់ទងនឹងជំងឺរលាកសួតប្រភេទថ្មីដូចដែលកំពុងផ្ទុះឡើងនៅក្រុងវូហានប្រទេសចិនទេ ប៉ុន្តែក្រសួងជំរុញឲ្យពលរដ្ឋ និងក្រុមអ្នកជំនាញប្រុងប្រយ័ត្ន និងពង្រឹងការតាមដានបន្ថែមទៀតជុំវិញករណីនេះ។
កាលពីថ្មីៗនេះអង្គការសុខភាពពិភពលោក និងអង្គការធ្វើការបញ្ហាសុខភាពមួយចំនួនបានបង្ហាញក្តីបារម្ភជុំវិញការរកឃើញវីរុសប្រភេទថ្មីដែលកំពុងកើតលើជនជាតិចិនជិត ៦០ នាក់ ក្នុងនោះមាន ៧ នាក់ មានជំងឺធ្ងន់ធ្ងរស្ថិតក្នុងទីក្រុងវូហាន ខេត្តហ៊ុយបេសាធារណរដ្ឋប្រជាមានិតចិនដែលត្រូវបានរកឃើញតាំងពីខែធ្នូ ឆ្នាំមុន ។
វីរុសប្រភេទថ្មីនេះមានឈ្មោះ novel coronaviruses ដោយអ្នកជំនាញមិនទាន់ប្រាកដទេថា វីរុសនេះមានប្រភពពីណាទេ តែពីលទ្ធផលនៅមន្ទីរពិសោធន៍បានបញ្ជាក់ថា ជំងឺនេះមិនមែនជាជំងឺ SARS ឬជំងឺផ្តាសាយបក្សី ឬជំងឺផ្តាសាយបង្កដោយវីរុសអាដេណូ (adenovirus) ឬជំងឺ MERS ឬក៏ជំងឺផ្លូវដង្ហើមដទៃទៀតនោះឡើយ។ នេះបើតាមសេចក្តីជូនព័ត៌មានរបស់ក្រសួងសុខាភិបាលកាលពីថ្ងៃសុក្រ។
សេចក្តីជូនព័ត៌មានដដែលបានបញ្ជាក់ថា៖ «ការធ្វើអង្កេតអេពីដេមីសាស្ត្របានបង្ហាញថា អ្នកជំងឺខ្លះជាឈ្មួញកណ្តាល ឬជាអ្នកលក់ផ្ទាល់ (ម្ចាស់ផ្ទាល់) ឬអ្នកបម្រើសេវាផ្ទាល់នៅផ្សារលក់គ្រឿងសមុទ្រហូណានដែលជាទីផ្សារលក់គ្រឿងសមុទ្របោះដុំដ៏ធំជាងគេក្នុងខេត្តនេះដែលមានតូបលក់គ្រឿងសមុទ្រជាង ៦០០ តូប និងមានអ្នកបម្រើការងារចំនួន ១ ៥០០ នាក់ មានសត្វព្រៃក៏ត្រូវបានដាក់លក់នៅផ្នែកខ្លះនៃទីផ្សារនេះដែរ»។
លោកស្រី ឱ វណ្ណឌីន អ្នកនាំពាក្យក្រសួងសុខាភិបាលបានប្រាប់ភ្នំពេញប៉ុស្តិ៍ពីម្សិលមិញថា មកទល់ពេលនេះមិនទាន់មានករណីសង្ស័យណាមួយបានកើតឡើងនៅកម្ពុជានោះទេ ហើយក្រសួងកំពុងយកចិត្តទុកដាក់តាមដានករណីនេះជាមួយអង្គការសុខភាពពិភពលោក។ លោកស្រីថ្លែងថា បច្ចុប្បន្នអ្នកជំនាញការក៏នៅតែមិនទាន់រកឃើញប្រភពនៃការឆ្លងក៏ដូចជារបៀបនៃការចម្លងផងដែរ។
លោកស្រីបញ្ជាក់ថា៖ «ប្រភេទជំងឺនេះក៏មិនទាន់រកឃើញអ្វីដែលបញ្ជាក់ថា ឆ្លងពីមនុស្សទៅមនុស្សនោះដែរ ព្រោះតែបុគ្គលិកសុខាភិបាលដែលនៅថែទាំអ្នកជំងឺនៅប្រទេសចិននោះមិនមានការចម្លង។ ពេលនេះកំពុងជំរុញឲ្យក្រុមការងារតាមដានបន្តទៀតដែលមកទល់ពេលនេះមិនទាន់មានករណីអ្វីដែលយើងសង្ស័យ ហើយក៏មិនទាន់មានជំងឺប្រភេទនេះនៅក្នុងប្រទេសកម្ពុជាយើងដែរ។ ខ្ញុំសុំបញ្ជាក់គេមិនទាន់បញ្ជាក់ពីប្រភពនៃការឆ្លង និងចម្លងពីអ្វីទេ?»។
ទោះជាយ៉ាងណាក្រសួងសុខាភិបាលបានអះអាងថា ក្រសួងបានដាក់ម៉ាស៊ីនស្គេនកម្ដៅនៅអាកាសយានដ្ឋានអន្តរជាតិភ្នំពេញ ក្រុងព្រះសីហនុ និងសៀមរាប និងស្រាវជ្រាវរកករណីសង្ស័យដោយក្រុមចត្តាឡីស័កនៅតាមច្រកអាកាសយានដ្ឋានអន្តរជាតិ។
ក្នុងនោះក្រសួងសុខាភិបាលក៏បានត្រៀមបន្ទប់ដាក់អ្នកជំងឺឲ្យនៅដាច់ដោយឡែក និងបានជូនដំណឹងដល់មន្ទីរពេទ្យជាតិ និងមន្ទីរសុខាភិបាលទាំង ២៥ រាជធានី-ខេត្តឲ្យត្រៀមលក្ខណៈជាស្រេចក្នុងការឆ្លើយតប និងផ្តល់អន្តរាគមន៍ជាបន្ទាន់ ប្រសិនបើមានករណីសង្ស័យពីជំងឺផ្លូវដង្ហើមស្រួចស្រាល់ធ្ងន់ធ្ងរ។ នេះបើតាមការអះអាងពីលោកស្រី ឱ វណ្ណឌីន ។
លោក សន សារុំ ប្រធានផ្នែកសេវាកម្មផ្ទៃដីនៃអាកាសយានដ្ឋានអន្តរជាតិខេត្តសៀមរាបបានប្រាប់ភ្នំពេញប៉ុស្តិ៍ពីម្សិលមិញថា ក្រោយទទួលបាននូវព័ត៌មាននេះខាងអាកាសយានដ្ឋានបានបន្តតាមដានដោយប្រុងប្រយ័ត្នជុំវិញការចម្លងនៃជំងឺនេះ។ ប៉ុន្តែលោកថា មកទល់ពេលនេះមិនមានភ្ញៀវទេសចរជាតិសាសន៍ណាមានសញ្ញាណសង្ស័យថាមានជំងឺនេះទេ។
លោកបញ្ជាក់ថា៖ «យើងមិនទាន់មានករណីសង្ស័យអ្វីទេ។ តាមពិតយើងយកចិត្តទុកដាក់យូរហើយ គ្រាន់តែយើងមានវិធានការបន្ថែមទៀត ត្រូវពិនិត្យអ្នកធ្វើដំណើរដែលក្នុង ១ ថ្ងៃៗមានចន្លោះពី ៣០០០ ទៅ ៣៥០០ នាក់ដោយមានការជូនដំណឹង និងផ្សព្វផ្សាយ នៅពេលទទួលបានព័ត៌មានទាំងនេះ»។
កាលពីថ្ងៃទី ៣១ ខែធ្នូ ឆ្នាំមុននៅទីក្រុងវូហាន ខេត្តហ៊ុយបេ ប្រទេសចិនមានអ្នកជំងឺពី ២ ទៅ ៣ នាក់បានលេចចេញរោគសញ្ញាក្តៅខ្លួន និងមានអាការហត់ លុះថតកាំរស្មីអ៊ិចបង្ហាញថា ពួកគេមានដំបៅសួតសងខាង។
ក្រោយរកឃើញនេះអង្គការសុខភាពពិភពលោកបានបញ្ជាក់ក្នុងសេចក្តីប្រកាសព័ត៌មានមួយកាលពីសប្តាហ៍មុនថា «ពេលនេះអ្នកជំនាញកំពុងតែប្រមូលព័ត៌មានអេពីដេមីសាស្ត្រ និងមន្ទីរពិសោធន៍បន្ថែមទៀតដើម្បីកំណត់រកអត្តសញ្ញាណនៃវីរុស»។
លោក ម៉ម ប៊ុនហេង រដ្ឋមន្ត្រីក្រសួងសុខាភិបាលកាលពីថ្ងៃស្រុកបានណែនាំឲ្យពលរដ្ឋប្រុងប្រយ័ត្ននៅពេលធ្វើដំណើរទៅ ឬវិលត្រឡប់មកពីសាធារណរដ្ឋប្រជាមានិតចិនដោយត្រូវចេះថែរក្សាសុខភាពផ្ទាល់ខ្លួនតាមវិធានការសាមញ្ញៗមួយចំនួន។
លោកបានបញ្ជាក់ថា៖ «ចៀសវាងប៉ះពាល់ជិតស្និទ្ធជាមួយអ្នកមានជំងឺផ្លូវដង្ហើមស្រួចស្រាល់ត្រូវលាងដៃឲ្យបានញឹកញាប់ជាមួយសាប៊ូ ចៀសវាងប៉ះពាល់ជិតស្និទ្ធ ឬទៅទីផ្សារលក់គ្រឿងសមុទ្រហូណាន ឬទីផ្សារ ឬកសិដ្ឋានដែលមានសត្វរស់ ឬសត្វព្រៃ ឬកន្លែងដែលគេដឹងថា មានវីរុសកំពុងចរាចរណ៍ និងត្រូវប្រកាន់ខ្ជាប់នូវការអនុវត្តអនាម័យស្អាត និងសុវត្ថិភាពម្ហូបអាហារល្អ ដូចជាពិសាអាហារដែលចម្អិនឆ្អិនល្អជាដើម»៕
វីដេអូ៖