ភ្នំពេញៈ អគ្គិភ័យដែលបានឆាបឆេះធ្វើឲ្យខូចខាតទាំងស្រុងអគារចំនួន ២ កម្ពស់ ៦ ជាន់ និង ៤ ជាន់នៃសិប្បកម្មផលិតពូកដ៏ធំមួយស្ថិតនៅសង្កាត់បឹងទំពុនទី ១ ខណ្ឌមានជ័យកាលពីរសៀលថ្ងៃទី ២៣ ខែសីហា ដែលទំហំនៃការខូចខាតអាចមានទឹកប្រាក់ដល់ជាង ៣ លានដុល្លារគឺបណ្តាលមកពីការទុស្សេខ្សែភ្លើង។ នេះបើតាមក្រុមមន្ត្រីបានថ្លែងកាលពីម្សិលមិញ។
លោក គន់ គីម ទេសរដ្ឋមន្ដ្រី និងជាអនុប្រធានទី ១ នៃគណៈកម្មាធិការជាតិគ្រប់គ្រងគ្រោះមហន្ដរាយដែលបានដឹកនាំបញ្ជាផ្ទាល់ក្នុងការពន្លត់អគ្គិភ័យ និងវាយកម្ទេចសំណង់អគារសិប្បកម្មផលិតពូកនេះកាលពីថ្ងៃអាទិត្យម្សិលមិញបានថ្លែងប្រាប់ភ្នំពេញប៉ុស្ដិ៍ថា សមត្ថកិច្ចបានគ្រប់គ្រងអគ្គិភ័យបានទាំងស្រុង និងមិនបណ្ដាលឲ្យមានការឆាបឆេះរាលដាលដល់ផ្ទះប្រជាពលរដ្ឋរស់នៅក្បែរនោះឡើយ និងកំពុងបន្ដវាយកម្ទេចអគារដែលរងការខូចខាតទាំងស្រុងដោយអគ្គិភ័យដើម្បីបញ្ចៀសការបាក់រលំ។
លោកថ្លែងថា៖ «ថ្ងៃនេះ (ថ្ងៃអាទិត្យ) យើងបញ្ចប់ការវាយកម្ទេច និងប្រមូលសំណង់អគារដែលភ្លើងឆេះរលំ (អគារកម្ពស់ ៤ ជាន់ និងរោងផលិត) រួចហើយយើងនឹងឲ្យវាយកម្ទេចអគារកម្ពស់ ៦ ជាន់។ អគ្គិភ័យនេះមិនបានបណ្ដាលបង្កគ្រោះថ្នាក់ ឬឲ្យប៉ះពាល់ដល់ប្រជាពលរដ្ឋរស់នៅក្បែរនេះទេ។ យើងអាចគ្រប់គ្រងបានគ្រាន់តែសំណង់អគារសិប្បកម្មនេះគឺត្រូវភ្លើងឆេះបណ្ដាលខូចខាតទាំងស្រុង»។
លោក ឃួង ស្រេង អភិបាលរាជធានីភ្នំពេញក៏បានថ្លែងកាលពីម្សិលមិញដែរថាអាជ្ញាធរមានការសោកស្ដាយដោយមិនបានជួយសង្គ្រោះមិនឲ្យមានការខាតបង់ពីការឆាបឆេះទ្រព្យសម្បត្ដិពលរដ្ឋរងគ្រោះដោយអគ្គិភ័យនេះ។ ប៉ុន្ដែលទ្ធផលល្អដែលមិនបង្កឲ្យប៉ះពាល់ដល់អាយុជីវិត និងផ្ទះពលរដ្ឋជិតខាងនៅក្បែរកន្លែងដែលឆាបឆេះនេះ។
លោកថ្លែងថា៖ «លទ្ធផលផ្លូវការចំពោះផលប៉ះបាល់យើងមិនទាន់ដឹងទេ។ ប៉ុន្ដែចំនួនផលប៉ះពាល់ប្រហាក់ប្រហែលខ្ទង់ជាង ៣ លានដុល្លារនេះឯង។ ប៉ុន្ដែលទ្ធផលដែលយើងធ្វើបានគឺបង្ការមិនឲ្យឆេះរាលដាលដល់ផ្ទះពលរដ្ឋដទៃ និងមិនឲ្យមានគ្រោះថ្នាក់ដល់ជីវិតប្រជាពលរដ្ឋ»។
លោក ស៊ុយ សេរិទ្ធ អភិបាលរងរាជធានីភ្នំពេញដែលកំពុងប្រតិបត្ដិការនៅកន្លែងអគ្គិភ័យនេះកាលពីម្សិលមិញបានថ្លែងថា រហូតមកដល់ថ្ងៃអាទិត្យម្សិលមិញសមត្ថកិច្ចកំពុងបន្ដប្រើគ្រឿងចក្រធំៗក្នុងការកាយ និងវាយកម្ទេចសំណង់ដែលបានរលំចេញ និងបន្ដរំលំអគារកម្ពស់ ៦ ជាន់ចប់រួចរាល់ទើបផុតការបារម្ភ។
លោកថ្លែងថា៖ «យើងប្រើគ្រឿងចក្រធំចំនួន ៤ ឲ្យបន្តធ្វើការងារបច្ចេកទេស ដើម្បីធ្វើយ៉ាងម៉េចកាយអគារដែលបានឆេះឲ្យស្រុតដល់ដីបានយើងអស់ការព្រួយបារម្ភ។ ល្ងាចនេះ (ថ្ងៃអាទិត្យម្សិលមិញ) យើងប្រើគ្រឿងចក្រនេះ ដើម្បីកាយសំណង់នេះចេញឲ្យអស់ ដើម្បីយកផ្លូវចូលទៅវាយកម្ទេចអគារកម្ពស់ ៦ ជាន់ដែលបានប្រេះស្រាំខូចខាតដោយកាត់ម្ដង ១ ជាន់ៗក្នុងការបញ្ចៀសការប៉ះពាល់ដល់ផ្ទះប្រជាពលរដ្ឋដែលនៅក្បែរនោះ»។
លោកបន្ថែមថាក្នុងប្រតិបត្ដិការពន្លត់អគ្គិភ័យនេះកម្លាំងចម្រុះរបស់រដ្ឋបាលរាជធានីភ្នំពេញ និងគណៈកម្មាធិការជាតិគ្រប់គ្រងគ្រោះមហន្ដរាយសរុបប្រមាណជាង ២០០ នាក់រួមនឹងរថយន្ដពន្លត់អគ្គិភ័យចំនួន ៤៥ គ្រឿង ប្រើប្រាស់ទឹកអស់ចំនួន ២៦១ ឡាន។
លោក សេរិទ្ធ បានថ្លែងថា៖ «យើងរំពឹងថាក្រោយការពន្លត់បានជោគជ័យការងារវាយកម្ទេចសំណង់ និងយកកាកសំណល់ដែលឆេះនេះចេញរហូតដល់ថ្ងៃចន្ទទើបអាចចប់រួចរាល់»។
គួរបញ្ជាក់ថារហូតមកដល់ថ្ងៃទី ២៥ ខែសីហា ម្សិលមិញអាជ្ញាធរ និងសមត្ថកិច្ចបាននិងកំពុងបន្ដប្រតិបត្តិការឈូសឆាយសម្អាត គំនរអគាររោងចក្រដែលរងការខូចខាតដោយសារភ្លើងឆេះ ដើម្បីត្រៀមកម្ទេចអគារកម្ពស់ ៦ ជាន់បន្ដទៀតនៅល្ងាចថ្ងៃដដែលនេះ ដែលអគារនេះមានសភាពប្រេះស្រាំយ៉ាងដំណំអាចឈានដល់ការបាក់រលំបើមិនវាយកម្ទេចចោលទេនោះ។
របាយការណ៍របស់អគ្គស្នងការដ្ឋាននគរបាលជាតិបានឲ្យដឹងថា អគារដែលត្រូវភ្លើងឆេះនេះមានម្ចាស់ឈ្មោះ កាន់ ចន្ថា ភេទប្រុសអាយុ ៦៣ ឆ្នាំហើយការឆាបឆេះនេះគឺបណ្តាលមកពីឆ្លងចរន្តអគ្គិសនី។
ភ្នំពេញប៉ុស្ដិ៍មិនអាចសុំការបកស្រាយបន្ថែមពីម្ចាស់សិប្បកម្មផលិតពូកនេះ ឈ្មោះ កាន់ ចន្ថា បានទេកាលពីម្សិលមិញ ខណៈចុះទៅដល់ទីតាំងជាក់ស្ដែង ដោយលោកប្រាប់យ៉ាងខ្លីថាគ្មានអ្វីត្រូវនិយាយទេ៕
វីដេអូ៖