ភ្នំពេញៈ រដ្ឋមន្ត្រីក្រសួងការពារជាតិលោក ទៀ បាញ់ បានថ្លែងថា វិមានឈ្នះ-ឈ្នះដែលបង្ហាញពីស្នាដៃនៃការតស៊ូ និង កសាងជាតិរបស់លោក ហ៊ុន សែន នាយករដ្ឋមន្ត្រីកម្ពុជានឹងបើកសម្ពោធទ្រង់ទ្រាយធំរយៈពេល ៣ ថ្ងៃនាចុងខែធ្នូ ឆ្នាំនេះដើម្បីអបអរសាទរខួបអនុស្សាវរីយ៍លើកទី ២០ នៃការបញ្ចប់សង្គ្រាមស៊ីវិលនៅកម្ពុជាដែលនឹងមានអ្នកចូលរួមប្រមាណ ជាង ៣០ ០០០ នាក់។
ការថ្លែងរបស់លោក ទៀ បាញ់ រដ្ឋមន្ត្រីក្រសួងការពារជាតិធ្វើឡើងកាលពីថ្ងៃចន្ទម្សិលមិញនៅក្នុងសន្និសីទសារព័ត៌មាននៅវិមានឈ្នះ-ឈ្នះស្ថិតនៅសង្កាត់ព្រែកតាសេក ខណ្ឌជ្រោយចង្វារ រាជធានីភ្នំពេញដែលមានមន្ត្រីក្រសួងការពារជាតិ មន្ត្រីនគរបាលជាតិ ស្ថាប័នពាក់ព័ន្ធអាជ្ញាធរមូលដ្ឋាន និងអ្នកសារព័ត៌មានចូលរួម។
លោក ទៀ បាញ់ បានថ្លែថាវិមានឈ្នះ-ឈ្នះជាកន្លែងប្រមូលនូវប្រវត្តិសាស្ត្រកម្ពុជាពិតដែលប្រទេសកម្ពុជាបានឆ្លងកាត់នាពេលកន្លងមក និងជានិម្មិតរូបនៃសុខសន្តិភាពកម្ពុជាដែលកើតចេញពីនយោបាយ ឈ្នះ-ឈ្នះក្រោមការតស៊ូ និងដឹកនាំរបស់លោក ហ៊ុន សែន នាយករដ្ឋមន្ត្រីកម្ពុជាហើយថាវិមាន ឈ្នះ-ឈ្នះ នឹងសម្ពោធជាផ្លូវការនៅថ្ងៃទី ២៩ ខែធ្នូ ឆ្នាំ ២០១៨ រហូតដល់ថ្ងៃទី ៣១ ដើម្បីប្រារព្ធពិធីខួប ២០ ឆ្នាំនៃគោលនយោបាយ ឈ្នះ-ឈ្នះ (ឆ្នាំ ១៩៩៨ ឆ្នាំ ២០១៨)។
លោក ទៀ បាញ់ បញ្ជាក់ថា៖ «យើងត្រូវទទួលស្គាល់សច្ចភាព និងការពិតតាមដំណាក់ៗរហូតដល់នយោបាយ ឈ្នះ-ឈ្នះដែលយើងនឹងរំលេចនៅទីនេះ។ ដូច្នេះរឿងនេះគឺជារឿងពិត ហើយវិមានឈ្នះ-ឈ្នះនេះនឹងប្រមូលទាំងអស់នូវសច្ចភាពទាំងឡាយជាប្រវត្តិសាស្ត្ររបស់ព្រះរាជាណាចក្រកម្ពុជាយើង ប្រមូលតម្កល់នៅទីនេះធ្វើជាភ័ស្តុតាងកុំឲ្យមានអ្នកមួយចំនួនបកស្រាយខុសប្រវត្តិសាស្ត្រពិត។ វិមាន ឈ្នះ-ឈ្នះជាកន្លែងតម្កល់តឹកតាងជាក់លាក់ពិតប្រាកដទាំងអស់ ទោះបីជាមិនបាន ១០០ ភាគរយក៏វាកៀកនឹង ១០០ ភាគរយដែរ»។
លោកបន្ថែមថា៖ «កន្លែងនេះវាមិនធំប៉ុន្មានទេតែវាមានអត្ថន័យខ្លឹមសារប្រវត្តិសាស្ត្រធំធេងណាស់ហើយវាគឺជាទ្រព្យសម្បត្តិដ៏ធំមហាសាលសម្រាប់យើងជំនាន់ក្រោយ...មានតាំងពីសៀវភៅ ឯកសារ ហើយសំខាន់បំផុតយើងឆ្លាក់នៅលើថ្មតែម្តងដូច្នេះវាមិនបាត់បង់ទៅណាទេ»។
លោក ទៀ បាញ់ បានបន្ថែមថានៅពេលសម្ពោធជាផ្លូវការនូវវិមានឈ្នះ-ឈ្នះ និងការប្រារព្ធពិធីខួប ២០ ឆ្នាំនៃគោលនយោបាយ ឈ្នះ-ឈ្នះ (ឆ្នាំ ១៩៩៨-ឆ្នាំ ២០១៨) នឹងមានការសម្តែងការធ្វើបទបង្ហាញការតាំងពិព័រណ៍របស់ក្រសួង និងស្ថាប័នពាក់ព័ន្ធផ្សេងៗ ការបាញ់កាំជ្រួចទ្រង់ទ្រាយធំ ការប្រកួតកីឡា និងការសម្តែងសិល្បៈ។ លោកថា ពិធីនេះនឹងមានការចូលរួមពីទាហាន នគរបាល កងរាជអាវុធហត្ថ និង ប្រជាពលរដ្ឋប្រមាណជាង ៣០ ០០០ នាក់។
លោក សំបូរ ម៉ាណារ៉ា សាស្ត្រាចារ្យផ្នែកប្រវត្តិសាស្ត្រ ស្វាគមន៍ការសាងសង់វិមានឈ្នះ-ឈ្នះដែលគ្រោងនឹងដាក់សម្ពោធនាពេលខាងមុខដោយសារតែប្រជាជនកម្ពុជាបានទទួលសន្តិភាពពីការតស៊ូ និងកសាងប្រទេសរបស់រាជរដ្ឋាភិបាលបច្ចុប្បន្នហើយថា ប្រជាពលរដ្ឋទាំងអស់ត្រូវយកចិត្តទុកដាក់សិក្សារៀនសូត្រស្វែងយល់ពីប្រវត្តិសាស្ត្រដើម្បីទប់ការជាន់ដានប្រវត្តិសាស្ត្រ។
លោក ម៉ាណារ៉ា បញ្ជាក់ថា៖ «វាគឺជាចំណុចមួយសំខាន់បង្កើតបានទៅជានិន្នាការស្វែងយល់អំពីប្រវត្តិសាស្ត្រខ្មែរ។ អ្វីទាំងអស់ដែលកើតឡើងក្នុងអតីតកាលហើយមនុស្សបានទទួលផលពីអតីតកាលនោះហើយគេកំពុងសិក្សា តម្កល់ទុក ចារទុក កំណត់ទុក គេសរសេរទុកមានន័យថាវាជាប្រវត្តិសាស្ត្រមួយមានតម្លៃ»។
លោកនាយករដ្ឋមន្ត្រី ហ៊ុន សែន បានបន្តដាក់ចេញនូវនយោបាយឈ្នះ-ឈ្នះនៅដើមឆ្នាំ ១៩៩៦ រហូតដល់ឆ្នាំ ១៩៩៨ ដោយបានរំលាយចោលរចនាសម្ព័ន្ធយោធាខ្មែរ-ក្រហម និងធ្វើសមាហរណកម្មពួកគេមកក្នុងសង្គមជាតិ។
កាលពីខែវិច្ឆិកាឆ្នាំ ២០១៧ លោក ទៀ បាញ់ បានថ្លែងថាការអនុវត្តនយោបាយឈ្នះ-ឈ្នះត្រូវធ្វើឡើងបានយ៉ាងជោគជ័យរហូតមកដល់បច្ចុប្បន្ននេះហើយថាវិមានឈ្នះ-ឈ្នះនេះនឹងដាក់បញ្ចូលគ្រប់សមិទ្ធផលដែលបានសម្រេចតាមរយៈគោលនយោបាយឈ្នះ-ឈ្នះ៕