.jpg)
កុមារី សៀម ស៊ាវថន ចេញទៅព្យាបាលជំងឺនៅចិន។ ហេង ជីវ័ន
ភ្នំពេញៈ មន្ទីរពេទ្យ Fuwai Yunnan Cardiovascula Hospital នៅខេត្តយូណាននៃប្រទេស ចិន នឹងទទួលព្យាបាលកុមារកម្ពុជា ដែលមានជំងឺបេះដូងចំហពីកំណើត ចំនួន ៣៤ នាក់បន្ថែមទៀត នៅក្នុងខែកក្កដានេះ បន្ទាប់ពីកុមារកម្ពុជាដែលមានជំងឺនេះ ៣១ នាក់ ត្រូវបានទទួលការវះកាត់ព្យាបាលដោយជោគជ័យ និងដោយមិនគិតថ្លៃ ពីមន្ទីរពេទ្យនេះចាប់តាំងពីឆ្នាំ ២០១៧ មក។
លោក ម៉ា លីនឃុន (Linkun Ma) អនុប្រធានមន្ទីរពេទ្យ Fuwai Yunnan Cardiovascula Hospital បានប្រាប់ភ្នំពេញប៉ុស្តិ៍នៅថ្ងៃម្សិលមិញថា ដោយផ្អែកលើអនុស្សរណៈនៃការយោគយល់គ្នា រវាងក្រសួងសុខាភិបាលកម្ពុជា និង គណៈកម្មការសុខាភិបាលជាតិ និងផែនការគ្រួសារនៃសាធារណរដ្ឋប្រជាមានិតចិន លើគម្រោង «ដំណើរនៃក្ដីស្រឡាញ់ពីបេះដូង» ដែលត្រូវបានចុះហត្ថលេខាកាលពីដើមឆ្នាំមុននោះ មន្ទីរពេទ្យរបស់លោកបានយល់ព្រមទទួលព្យាបាលកុមារកម្ពុជាចំនួន ១៥០ នាក់ ដែលមានជំងឺបេះដូងពីកំណើត ដោយឥតគិតថ្លៃ ក្នុងរយៈពេល ៣ ឆ្នាំ (២០១៨ ដល់ ២០២០)។
លោកបានបញ្ជាក់ថា៖ «នៅថ្ងៃអង្គារទី ១៦ ខែ កក្កដា កុមារកម្ពុជាចំនួន ៦ នាក់ នឹងត្រូវបញ្ជូនទៅព្យាបាលនៅមន្ទីរពេទ្យរបស់យើង ខណៈ ២៨ នាក់ទៀត កំពុងរៀបចំសំណុំឯកសារមួយចំនួន ដើម្បីបញ្ជូនទៅព្យាបាលនៅចុងខែនេះ»។
លោកបានប្រាប់ឲ្យដឹងផងដែរថា ចាប់តាំងពីឆ្នាំ ២០១៧ ក្រុមគ្រូពេទ្យស្ម័គ្រចិត្តចិនតាមរយៈអង្គការសង្គមស៊ីវិលចិន ឈ្មោះ YUNDI បានចុះពិនិត្យសុខភាពកុមារកម្ពុជា បានចំនួនជាង ៣៦ ០០០ នាក់ និងបានរកឃើញកុមារកម្ពុជា ដែលមានអាយុចាប់ពី ១៦ ឆ្នាំ ចុះក្រោម ចំនួន ៣១៣ នាក់ មានរោគសញ្ញាជំងឺបេះដូងពីកំណើត (បេះដូងចំហ) ក្នុងនោះ ៣១ នាក់ ត្រូវបានសម្របសម្រួលនាំយកទៅព្យាបាល ដោយវះកាត់ នៅឯមន្ទីរពេទ្យរបស់លោក ក្នុងប្រទេស ចិន បានដោយជោគជ័យ និងដោយឥតគិតថ្លៃ។
លោកបានឲ្យដឹងថា៖ «ជំងឺបេះដូងចំហពីកំណើតនេះ មិនមែនសុទ្ធតែត្រូវព្យាបាលដោយវះកាត់នោះទេ សម្រាប់កុមារ ដែលមានសុខភាពរឹងប៉ឹងមាំមួន ជំងឺនេះអាចជាសះស្បើយឬបិទជិតទៅតាមការវិវឌ្ឍនៃលក្ខណៈធម្មជាតិរបស់វា ប៉ុន្តែបើការវិវឌ្ឍរបស់វា ធ្វើឲ្យសុខភាពរបស់កុមារកាន់តែចុះខ្សោយទៅៗនោះ គឺយើងចាំបាច់ត្រូវធ្វើការវះកាត់ជាបន្ទាន់»។
កាលពីម្សិលមិញ កុមារី សៀម ស៊ាវថន អាយុ ១១ ឆ្នាំ ដែលមានជំងឺបេះដូងពីកំណើត តាំងពីអាយុជាង ១ ខួប និងដែលត្រៀមចេញដំណើរទៅព្យាបាលនៅប្រទេស ចិន នៅព្រឹកថ្ងៃអង្គារនេះ បានប្រាប់ភ្នំពេញប៉ុស្តិ៍ថា ជារឿយៗនាង ពិបាកនៅក្នុងការដកដង្ហើម ឈឺក្បាល និងអស់កម្លាំង។
ស៊ាវថន បាននិយាយថា៖ «ខ្ញុំមិនដឹងថាជំងឺរបស់ខ្ញុំវាយ៉ាងម៉េចនោះទេ ប៉ុន្តែពេលខ្ញុំក្ដៅខ្លួនខ្លាំងខ្ញុំតែងតែក្អក ឈឺក្បាល ថប់ដង្ហើម និងអស់កម្លាំង ហើយពុកម៉ែខ្ញុំតែងនាំខ្ញុំទៅព្យាបាលនៅមន្ទីរពេទ្យគន្ធបុប្ផានៅភ្នំពេញ ហើយគ្រូពេទ្យប្រាប់ពុកម៉ែខ្ញុំឲ្យប្រុងប្រយ័ត្នពីជំងឺរបស់ខ្ញុំ»។
ឪពុកកុមារី ស៊ាវថន គឺ លោក សៀម ផន អាយុ ៤០ ឆ្នាំ បានប្រាប់ភ្នំពេញប៉ុស្តិ៍ថា គ្រូពេទ្យនៅមន្ទីរពេទ្យគន្ធបុប្ផាក្នុងរាជធានីភ្នំពេញ បានប្រាប់គាត់ថា ស៊ាវថន មានជំងឺបេះដូងចំហ ប៉ុន្តែខាងមន្ទីរពេទ្យមិនអាចធ្វើការវះកាត់បានទេ។
លោកថ្លែងថា៖ «ខ្ញុំចង់ព្យាបាលកូនខ្ញុំឲ្យជាពីជំងឺនេះខ្លាំងណាស់ ប៉ុន្តែខ្ញុំក្រីក្រពេកគ្មាន លុយព្យាបាលជំងឺរបស់កូននោះទេ។ សំណាងណាស់ដែលក្រុមគ្រូពេទ្យស្ម័គ្រចិត្តនៃអង្គការ YUNDI ចុះជួយពិនិត្យព្យាបាលហើយបានប្រាប់ថាគេអាចជួយព្យាបាលកូនខ្ញុំឲ្យជា ដោយមិនគិតប្រាក់ ហើយថាគេនឹងជួយអន្តរាគមន៍ធ្វើប៉ាស្ព័រ វីសា និងថ្លៃសោហ៊ុយធ្វើដំណើរ អាហារហូបចុកទាំងអស់ ដើម្បីនាំកូនខ្ញុំទៅព្យាបាលនៅប្រទេស ចិន។ នៅព្រឹកថ្ងៃទី ១៦ ខែ កក្កដានេះពួកយើងនឹងចេញទៅប្រទេសចិនជាមួយនឹងអង្គការនេះ»។
លោក Luo Zhi ប្រធានអង្គការ YUNDI បានឲ្យដឹងថា កុមារកម្ពុជាដែលមានជំងឺបេះដូងពីកំណើត ត្រូវបានអង្គការរបស់លោកជួយសម្របសម្រួលបង់ថ្លៃសេវាកម្មគ្រប់យ៉ាងទាំងមុន និងក្នុងអំឡុងពេលនៃការសម្រាកព្យាបាលជំងឺ ចំនួន ២ ថ្ងៃ នៅក្នុងមន្ទីរពេទ្យ Fuwai Yunnan Cardiovascula Hospital នៃខេត្តយូណាន ប្រទេសចិន។
លោក Luo Zhi បានបញ្ជាក់ថា៖ «យើងបានជួយសម្របសម្រួល ដល់ក្រុមគ្រួសារកុមារកម្ពុជា ដែលមានជំងឺបេះដូងពីកំណើតនេះ ចំនួន ៣១ គ្រួសារ ដើម្បីនាំកូនៗរបស់ពួកគេទៅព្យាបាលជំងឺនៅខេត្តយូណានប្រទេស ចិន ដែលឥឡូវនេះ កូនៗរបស់ពួកគេបានជាសះស្បើយពីជំងឺនោះហើយ។ អង្គការយើងនៅតែបន្តបេសកកម្មជួយដល់កុមារកម្ពុជា ដែលមានជំងឺនេះជាបន្តទៀត ដើម្បីឲ្យពួកគេទទួលបានសុខភាពល្អ»។
កុមារី រិទ្ធ កញ្ញា អាយុ ១២ ឆ្នាំ រស់នៅខេត្តបាត់ដំបង ដែលទទួលបានការជួយអន្តរាគមន៍ទៅព្យាបាលជំងឺបេះដូងចំហ កាលពីឆ្នាំ ២០១៧ នោះ បាននិយាយថា ក្រោយការវះកាត់រួច អាការជំងឺរបស់នាងមានភាពល្អប្រសើរឡើងវិញ ប៉ុន្តែខាងអង្គការនៅតែបន្តចុះសាកសួរសុខទុក្ខគ្រួសារនាង និងតាមដានពីអាការជំងឺរបស់នាងដដែល។
កញ្ញាបាននិយាយថា៖ «ខ្ញុំខ្លួនឯង គិតថាខ្ញុំជាសះស្បើយពីជំងឺនោះហើយ ព្រោះខ្ញុំលែងមានអារម្មណ៍ថប់ដង្ហើម ចុកឆ្អល់ក្នុងទ្រូង ឈឺក្បាល ស្រវាំងភ្នែក ដូចមុនទៀតហើយ»។
យោងតាមរបាយការណ៍របស់អង្គការ YUNDI ដែលភ្នំពេញប៉ុស្តិ៍ទទួលបាន ក្នុងចំណោមកុមារកម្ពុជា ៣១ នាក់ ដែលមានជំងឺបេះដូងចំហ និងដែលទទួលបានការព្យាបាលពីមន្ទីរពេទ្យនេះ នាពេលកន្លងមករួមមានមកពីខេត្តបាត់ដំបង ២៩ នាក់ ខេត្តតាកែវ ២ នាក់។ ចំណែកកុមារ ៦ នាក់ដែលនឹងត្រូវបញ្ជូនទៅព្យាបាល បន្ថែមទៀតនៅមន្ទីរពេទ្យនេះគឺមកពីខេត្តរតនគិរី ២ នាក់ កំពង់ឆ្នាំង ១ នាក់ និងពីកំពង់ស្ពឺ ៣ នាក់។
លោក ប៊ុន រ៉េត ប្រធានមន្ទីរសុខាភិបាលខេត្តបាត់ដំបងបាននិយាយថា ឪពុកម្ដាយក្មេងដែលកើតជំងឺនេះ មុនដំបូងពួកគាត់មានអារម្មណ៍អរផងភ័យផង ដោយសារតែមានពាក្យចចាមអារ៉ាមថា ការនាំកូនទៅព្យាបាលនៅប្រទេស ចិន អាចប្រឈមការវះកាត់ដូរយកសរីរាង្គកាយរបស់កុមារ។ ប៉ុន្តែក្រោយពីមានការពន្យល់ណែនាំ ដោយធានាខុសត្រូវគ្រប់បែបយ៉ាងតាមផ្លូវច្បាប់ ពីភ្នាក់ងារមន្ទីរសុខាភិបាលខេត្តបាត់ដំបង រួមសហការជាមួយអាជ្ញាធរមូលដ្ឋាន និងក្រោមកិច្ចសម្របសម្រួលពីសហភាពសហព័ន្ធយុវជនកម្ពុជាខេត្តបាត់ដំបង រួមជាមួយភ្នាក់ងារសុខាភិបាលនៃអង្គការ Yundi ផ្ទាល់នោះ ទើបពួកគាត់មានភាពកក់ក្ដៅក្នុងការសម្រេចចិត្តបញ្ជូនកូនៗពួកគេទៅព្យាបាលនៅប្រទេស ចិន។
លោកថ្លែងថា៖ «ជាលទ្ធផលនៃកិច្ចខិតខំប្រឹងប្រែង និង ទទួលខុសត្រូវរបស់ភ្នាក់ងារសុខាភិបាល និងអង្គការជាដៃគូរបស់ប្រទេសយើងទាំង ២ [កម្ពុជាចិន] កុមារកម្ពុជា ៣១ នាក់ បានទទួលការព្យាបាលជំងឺបេះដូងចំហបានដោយជោគជ័យ។ យើងពិតជារីករាយខ្លាំងណាស់ នៅពេលកុមារយើងបានជាពីជំងឺនេះ ពិសេសឪពុកម្ដាយរបស់ពួកគេមានការជឿជាក់»៕
