បន្ទាយមានជ័យៈ មន្ទីរសុខាភិបាលខេត្តបន្ទាយមានជ័យបានឲ្យដឹងកាលពីម្សិលមិញថា យ៉ាងហោចណាស់ប្រជាពលរដ្ឋប្រមាណ ៣០០ នាក់ ត្រូវបានពស់ប្រភេទផ្សេងៗគ្នាចឹកនៅពេលដែលចូលទៅក្នុងចម្ការ ប៉ុន្តែត្រូវបានជួយសង្គ្រោះឲ្យផុតពីគ្រោះថ្នាក់បាត់បង់ជីវិត ដោយសារតែពួកគេស្វែងរកសេវាព្យាបាលទាន់ពេលនៅមន្ទីរសុខាភិបាលខេត្ត។
លោក កែវ សុភក្ត្រា ប្រធានមន្ទីរសុខាភិបាលខេត្តបន្ទាយមានជ័យបានថ្លែងថា៖ «ថ្នាំយើងមានគ្រប់គ្រាន់ក្នុងការផ្តល់ និងការសង្គ្រោះគឺក្រសួងសុខាភិបាល បានឧបត្ថម្ភគ្រប់គ្រាន់ ព្រោះមានតែក្រសួងទេ ដែលមានថ្នាំប្រភេទនេះ។ សម្រាប់ខេត្តយើងគឺមានស្តុកថ្នាំនេះ ១០០ ដបរហូតចៀសវាងមានការស្លាប់ ដោយសារតែការអស់ថ្នាំ»។
លោក សុភក្ត្រា បានអះអាងថា យោងតាមរបាយការណ៍ដែលបានផ្ដល់សេវាព្យាបាលដល់ជនរងគ្រោះបង្ហាញថា ចំនួនពលរដ្ឋដែលត្រូវពស់ចឹកមានចំនួនខ្ពស់ដោយហេតុព្រៃឈើត្រូវបានបំផ្លាញចោលកាន់តែមានទំហំធំ បានធ្វើឲ្យប្រភេទពស់ផ្សេងៗគ្នាចេញមកសម្ងំលាក់ខ្លួននៅក្នុងចម្ការ និងនៅក្បែរផ្ទះ ដែលងាយរងគ្រោះពេលពលរដ្ឋចេញប្រកបមុខរបរប្រចាំថ្ងៃនៅក្បែរផ្ទះ ឬក្នុងចម្ការរបស់ពួកគេ។
លោកថ្លែងថា៖ «ដោយសារអស់ព្រៃទៅ ហើយពស់ហ្នឹងតែងតែសម្ងំនៅតាមចម្ការ និងកន្លែងដាំដុះ ហើយនៅពេលដែលប្រជាជនគាត់ចូលទៅក៏ត្រូវពស់ចឹកទៅ។ មួយទៀតនៅពេលអស់ព្រៃទៅ ពស់នេះ វាតែងតែនៅក្បែរៗផ្ទះរបស់ប្រជាជនយើង»។
មន្ត្រីរូបនេះក៏បានអំពាវនាវផងដែរទៅដល់ប្រជាពលរដ្ឋទាំងអស់ដែលត្រូវពស់ចឹក គួរស្វែងរកសេវាព្យាបាលតាមមន្ទីរពេទ្យរដ្ឋ ជាជាងទៅព្យាបាលនៅតាមមន្ទីរពេទ្យឯកជន និងការស្វែងរកគ្រូខ្មែរស្តោះផ្លុំតាមបែបប្រពៃណី ដែលធ្វើឲ្យជាតិពិសរីករាលដាល ពិបាកក្នុងការជួយសង្គ្រោះឲ្យទាន់ពេលវេលា។ ក្នុងករណីពស់ចឹកត្រូវស្វែងរកសេវាព្យាបាលតាមមន្ទីរសុខាភិបាលរដ្ឋក្នុងអំឡុងពេល ៣ ម៉ោង។
លោកបញ្ជាក់ថា៖ «ក្នុងករណីដែលមានពស់ចឹក កុំឲ្យប្រជាជនយកទៅឲ្យគ្រូស្តោះផ្លុំឲ្យសោះ ធ្វើយ៉ាងណាឲ្យគាត់ដឹកមកដល់មន្ទីរពេទ្យនៅក្នុងអំឡុងមុន ៣ ម៉ោងទើបយើងអាចជួយសង្គ្រោះបាន។ បើលើសពីហ្នឹង គឺយើងពិបាកក្នុងការជួយសង្គ្រោះណាស់»។
ប្រធានមន្ទីរសុខាភិបាលរូបនេះបានអះអាងថាក្នុង ១ ឆ្នាំៗ ខេត្តបន្ទាយមានជ័យបានប្រើប្រាស់ថ្នាំប្រភេទនេះអស់ប្រមាណជាង ៤០០ ដប ដែលក្នុង ១ ដបៗមានតម្លៃជាង ៥០០ ដុល្លារ ហើយក្នុងជនរងគ្រោះដោយសារពស់ចឹកម្នាក់ត្រូវប្រើប្រាស់ថ្នាំនេះចន្លោះពី ៣ ទៅ ៥ ដប ទើបជាសះស្បើយ។
លោក ចន្ទ វិឌ្ឍីណាវុឌ្ឍ ប្រធានមន្ទីរពេទ្យមិត្តភាពកម្ពុជា ជប៉ុននៅស្រុកមង្គលបុរីបានប្រាប់ភ្នំពេញប៉ុស្តិ៍ពីម្សិលមិញថា មន្ទីរពេទ្យមិត្តភាពកម្ពុជា-ជប៉ុន បានទទួលព្យាបាលអ្នកពស់ពិសចឹកឲ្យជាសះស្បើយចំនួន ១៥២ នាក់ ដោយក្នុងនោះ ស្រី ៤៤ នាក់ បន្ទាប់ពីបានមកទទួលសេវាសង្គ្រោះពិនិត្យព្យាបាលទាន់ពេលវេលា។
លោក ចន្ទ វិឌ្ឍីណាវុឌ្ឍ ថ្លែងថា៖ «ករណីពស់ចឹកនេះមានស្ទើររាល់ថ្ងៃ ដោយសារតែការធ្វេសប្រហែសរបស់ប្រជាពលរដ្ឋ»។
លោក ចន្ទ វិឌ្ឍីណាវុឌ្ឍ ឲ្យដឹងថា ពស់ដែលតែងតែចឹកប្រជាពលរដ្ឋនៅក្នុងខេត្តនេះច្រើនជាងគេគឺពស់ស្រកាចាស់ ពស់វែកដំបូក ពស់វែកក្របី ពស់ហនុមាន និងក្រៅពីនោះមានពស់ខៀវ ពស់ក្រាយ ឬថ្នាំងអំពៅជាដើម។
លោក កែវ សុភក្ត្រា បានអះអាងថា វិធីដែលអាចបង្ការពីករណីពស់ចឹកនេះបានល្អប្រសើរនោះគឺប្រជាពលរដ្ឋគ្រប់រូបត្រូវមានការប្រុងប្រយ័ត្នខ្ពស់ និងត្រូវពាក់ស្បែកជើងជ័រកវែងជានិច្ច នៅពេលចូលទៅចម្ការនានា៕