.jpg)
បុរសម្នាក់កំពុងផឹកស្រាបៀរក្នុងហាងផឹកស៊ីមួយនៅភ្នំពេញកន្លងមក។ ភ្នំពេញ ប៉ុសិ៍្ត
ភ្នំពេញៈ ស្ថាប័នមួយចំនួនប្តេជ្ញាជំរុញឲ្យពន្លឿនសេចក្តីព្រាងច្បាប់ស្តីពីការត្រួតពិនិត្យផលិតផលគ្រឿងស្រវឹងឲ្យចេញជារូបរាងឲ្យបានឆាប់បន្ទាប់ពីសេចក្តីព្រាងច្បាប់នេះ ត្រូវបានជាប់គាំងនៅក្រសួងសុខាភិបាលចាប់តាំងពីឆ្នាំ ២០១៥ ខណៈសេចក្តីព្រាងច្បាប់នេះត្រូវបានធ្វើឡើងបន្ទាប់ពីមានការរកឃើញថា ពលរដ្ឋជិត ១០០ ភាគរយ សូមឲ្យរដ្ឋាភិបាលមាន វិធានការបន្ថែមទៅលើការគ្រប់គ្រងគ្រឿងស្រវឹង។
សេចក្តីព្រាងច្បាប់ ស្តីពីការត្រួតពិនិត្យផលិតផលគ្រឿងស្រវឹង ដែលមានប្រមាណ ៣៩ មាត្រា និង ១១ ជំពូក ដោយមានគោលដៅសម្រាប់ចាត់វិធានការក្នុងការគ្រប់គ្រង និងត្រួតពិនិត្យផលិតផលគ្រឿងស្រវឹង ការលើកកម្ពស់ការយល់ដឹង និងការចូលរួមរបស់ភាគីពាក់ព័ន្ធ ជាពិសេសសាធារណជន អំពីគ្រោះថ្នាក់នៃការប្រើប្រាស់ផលិតផលគ្រឿងស្រវឹងដែលនឹងមានវិសាលភាពគ្របដណ្តប់ទូទាំងប្រទេស។
សេចក្តីព្រាងច្បាប់នេះត្រូវបានជាប់គាំងនៅក្រសួងសុខាភិបាល បន្ទាប់ពីបានរៀបចំពិភាក្សា និងឯកភាពពីអន្តរក្រសួងចប់រួចរាល់តាំងពីឆ្នាំ ២០១៥។ នេះបើតាមលោក ពេជ្រ ស្រស់ ប្រធានគណបក្សយុវជនកម្ពុជា។
លោក ពេជ្យ ស្រស់ ប្រាប់ភ្នំពេញប៉ុស្តិ៍ កាលពីថ្ងៃចន្ទថា៖ «ច្បាប់នេះគឺសំខាន់ដូចខ្ញុំបញ្ជាក់អ៊ីចឹង ខ្ញុំធ្វើការងារនេះ ហើយព្យាយាមជំរុញឲ្យអស់លទ្ធភាព និងបំពេញតួនាទីរបស់ខ្ញុំ។ ខ្ញុំនឹងជំរុញឲ្យច្បាប់ទាំងឡាយណា ដែលមានសារៈសំខាន់ឲ្យចេញឲ្យបានឆាប់រហ័ស ដើម្បីបម្រើផលប្រយោជន៍សង្គមជាតិ»។
កាលពីថ្ងៃទី ១១ ខែ មេសា កន្លងទៅ លោក ស្រស់ បានដាក់សំណើទៅកាន់ លោក ប៉ាន សូរស័ក្តិ រដ្ឋមន្ត្រី ក្រសួងពាណិជ្ជកម្មដើម្បីឲ្យមានវិធានការទប់ស្កាត់ការផ្សព្វផ្សាយពាណិជ្ជកម្មគ្រឿងស្រវឹងយ៉ាងអនាធិបតេយ្យ ដែលការផ្សព្វផ្សាយបែបនេះធ្វើឲ្យមនុស្សផឹកគ្រឿងស្រវឹងកាន់តែច្រើនដែលជាដើមហេតុបង្កឲ្យមានគ្រោះថ្នាក់ចរាចរណ៍ បង្កឲ្យមានអំពើខុសច្បាប់ផ្សេងៗក្នុងសង្គម។
បន្ទាប់ពីមានការដាក់សំណើនេះ រដ្ឋមន្ត្រីក្រសួងពាណិជ្ជកម្មលោក ប៉ាន សូរស័ក្តិ បានប្រកាសគាំទ្រ និងថ្កោលទោសចំពោះការផ្សព្វផ្សាយគ្រឿងស្រវឹងដែលមានការផ្ដល់រង្វាន់។ លោកក៏បានប្រកាសពីការតាំងចិត្ត និងដាក់ចេញជាវិធានការចំនួន ២ ដើម្បីឲ្យក្រសួងត្រៀមអនុវត្តផងដែរ ដោយទី១ រៀបចំសេចក្តីព្រាងអនុ ក្រឹត្យស្ដីពីការគ្រប់គ្រងការផ្សាយពាណិជ្ជកម្មលើផលិតផលគ្រឿងស្រវឹង ដើម្បីដាក់ជូននាយករដ្ឋមន្ត្រីពិនិត្យ និងសម្រេច។ ទី២ រៀបចំប្រកាសអន្តរក្រសួង ស្ដីពីការគ្រប់គ្រងការផ្សាយពាណិជ្ជកម្មដោយអនុលោមតាមច្បាប់ស្ដីពីការគ្រប់គ្រងគុណភាព និងសុវត្ថិភាពផលិតផលទំនិញ និងសេវា។
លោកស្រី ឡោក ខេង ប្រធានគណៈកម្មការទី ៨ នៃរដ្ឋសភា ឲ្យដឹងថា គណៈកម្មការក៏មានវិធានការក្នុងការ ជំរុញឲ្យពន្លឿនសេចក្តីព្រាងច្បាប់នេះដែរ ខណ:លោកស្រីអះអាងថា ក្រសួងសុខាភិបាល កំពុងយកចិត្តទុកដាក់លើច្បាប់នេះ។
លោកស្រីបញ្ជាក់ថា៖ «ខ្ញុំកំពុងតែព្រួយបារម្ភខ្លាំងណាស់ពីបញ្ហាគ្រឿងស្រវឹងហ្នឹង ព្រោះវាបណ្តាលឲ្យមានវិបត្តិនៅក្នុងសង្គមច្រើន ជាពិសេសប៉ះពាល់ទៅលើសុខភាពប្រជាពលរដ្ឋ ដែលយើងត្រូវតែខិតខំធ្វើយុទ្ធនាការប្រយុទ្ធប្រឆាំងបញ្ហាទាំងនេះ»។
លោក ម៉ម ប៊ុនហេង រដ្ឋមន្ត្រីក្រសួងសុខាភិបាល ពីម្សិលមិញបានបដិសេធធ្វើអធិប្បាយជុំវិញនីតិវិធីនៃសេចក្តីព្រាងច្បាប់ស្តីពីការគ្រប់គ្រងគ្រឿងស្រវឹងនេះ ដោយបង្វែរសំណួរទៅអ្នកនាំពាក្យ។ ប៉ុន្តែលោកស្រី ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល និងលោកស្រី យក់ សម្បត្តិ អគ្គនាយិការដ្ឋបាលនៃក្រសួងសុខាភិបាលបានបដិសេធធ្វើអធិប្បាយដោយមានប្រសាសន៍ថាជាប់រវល់ប្រជុំ។
លោក មុំ គង់ នាយកប្រតិបត្តិអង្គការចលនាដើម្បីសុខភាពកម្ពុជាថ្លែងថា វាគួរតែដល់ពេលហើយ ដែលរដ្ឋាភិបាល ជាពិសេសក្រសួងសាមីពិភាក្សាពន្លឿនឲ្យច្បាប់នេះឆាប់បានដាក់ប្រើប្រាស់ជាប្រយោជន៍សង្គម។ លោកបន្តថា សេចក្តីព្រាងច្បាប់នេះ គឺធ្វើឡើងស្របទៅនឹងគោលនយោបាយរបស់រដ្ឋាភិបាល និងច្បាប់អន្តរជាតិ ក្នុងការកាត់បន្ថយផលប៉ះពាល់ពីគ្រឿងស្រវឹងហើយវាក៏ជាអ្វីដែលពលរដ្ឋកម្ពុជាចង់បានផងដែរ។
លោកបញ្ជាក់ថា៖ «ខ្ញុំគិតថា ដល់ពេលវេលាស័ក្តិសម និងជាពេលវេលាដែលគួរតែបញ្ចប់សេចក្តីព្រាងច្បាប់នេះឲ្យបានឆាប់ សម្រាប់ការត្រួតពិនិត្យផលិតផលគ្រឿងស្រវឹងហ្នឹងហើយ»។
សេចក្តីព្រាងច្បាប់ស្តីពីការត្រួតពិនិត្យផលិតផលគ្រឿងស្រវឹងត្រូវបានធ្វើឡើងបន្ទាប់ពីមានការស្ទង់មតិរបស់សាកលវិទ្យាល័យភូមិន្ទភ្នំពេញកាលពីចុងឆ្នាំ ២០១៤ បានរកឃើញថា ពលរដ្ឋកម្ពុជារហូតដល់ទៅ ៩៦ ភាគរយ សំណូមពរឲ្យរដ្ឋាភិបាលមានវិធានការបន្ថែមទៅលើការគ្រប់គ្រងផលិតផលគ្រឿងស្រវឹង និងរបាយការណ៍ស្រាវជ្រាវរបស់សម្ព័ន្ធយុវជនដើម្បីឯកភាព និងការអភិវឌ្ឍកាលពីឆ្នាំ ២០១៥ បានរកឃើញថា គ្រឿងស្រវឹង និងគ្រឿងញៀន គឺជាបញ្ហាដ៏ធំរបស់យុវជន។
លើសពីនេះ មូលនិធិអាស៊ី កាលពីឆ្នាំ ២០១៧ ក៏រកឃើញដែរថា គ្រឿងស្រវឹង គឺជាកត្តារួមចំណែកយ៉ាង សំខាន់ក្នុងអំពើហិង្សាប្ដីប្រពន្ធ ឬដៃគូស្និទ្ធស្នាល ហើយស្រដៀងគ្នានេះ អង្គការសុខភាពពិភពលោក (WHO) កាលពីឆ្នាំ ២០១៦ បានចាត់ទុកគ្រឿងស្រវឹង ជាទំនិញដែលបង្កគ្រោះថ្នាក់ដល់សុខភាព និងសង្គម។
តំណាងក្រុមហ៊ុនស្រាបៀរមួយចំនួន ដែលភ្នំពេញប៉ុស្តិ៍បានទាក់ទងកាលពីម្សិលមិញ បានបដិសេធធ្វើអធិប្បាយ៕
