.jpg)
មហាជនចូលរួមពិធីដង្ហែរសពលោក កែម ឡី កាលពីខែកក្កដា ឆ្នាំ ២០១៦។ ហេង ជីវ័ន
ភ្នំពេញៈ ក្រសួងមហាផ្ទៃបានសម្រេចចុះចុះបញ្ជីមូលនិធិ កែម ឡី ដែលទើបបង្កើតថ្មីជាផ្លូវការហើយ បន្ទាប់ពីបានពិនិត្យមើលពាក្យស្នើសុំអស់រយៈពេលជាច្រើនខែមកនោះ។
កាលពីម្សិលមិញលោក ឈឹម កាន ប្រធាននាយកដ្ឋានកិច្ចការសមាគម និងគណបក្សនយោបាយនៃក្រសួងមហាផ្ទៃបានថ្លែងអះអាងអំពីការចុះបញ្ជីមូលនិធិនេះថាបានជោគជ័យ។
លោកមានប្រសាសន៍ថា៖«យើងបានអនុញ្ញាតចុះបញ្ជីមូលនិធិកែមឡីរួចហើយ»។ លោក កាន បានបន្ថែមថា លោកមិនបានចាំអំពីកាលបរិច្ឆេទពិតប្រាកដទេ ប៉ុន្តែគឺប្រហែលជាមួយឬពីរសប្តាហ៍មុន។
លិខិតចុះបញ្ជីនោះត្រូវបានចុះហត្ថលេខាដោយរដ្ឋលេខាធិការក្រសួងមហាផ្ទៃលោក ប៉ុល លឹម នៅថ្ងៃទី ៣០ ខែមករា។ លោកកែម ឡីត្រូវបានគេធ្វើឃាតកាលពីខែសីហាឆ្នាំ២០១៦ មិនយូរប៉ុន្មានបន្ទាប់ ពីលោកបាន និយាយ អំពីរបាយការណ៍ ថ្មីមួយរបស់អង្គការ Global Witness ស្តីពីគ្រួសារ របស់ លោកនាយក រដ្ឋមន្ត្រីហ៊ុនសែន។
លោក សៅ កុសល ប្រធានមូលនិធិថ្មីបានថ្លែងថា៖« គោលបំណងនៃមូលនិធិនេះគឺបន្តនូវអ្វីដែលលោកកែមឡីបានធ្វើ..... ពីព្រោះដូចអ្នកបានដឹងស្រាប់ហើយលោកកែមឡីត្រូវបានបាញ់សម្លាប់ដោយសារតែលោក[គាំទ្រ]សេរីភាពបញ្ចេញមតិ»។
លោកបញ្ជាក់ថា មូលនិធិនេះ អាចនឹងចាប់ផ្តើមជាផ្លូវការនៅពាក់កណ្តាលខែមីនា ហើយនឹងធ្វើការស្រាវជ្រាវបញ្ហាសង្គម ឧទាហរណ៍ដូចជាផលប៉ះពាល់នៃដីសម្បទានដីទៅលើសហគមន៍ ហើយ នៅពេលចាប់ផ្តើមនឹងចេញប្រតិបត្តិការ។ ពួកគេក៏នឹងស្វែងរកមេធាវីម្នាក់ដើម្បី«លើកទឹកចិត្តដល់រដ្ឋាភិបាល» ឱ្យធ្វើការស៊ើបអង្កេតលើករណីសម្លាប់លោកកែម ឡី ម្តងទៀត ដោយសាតែឥឡូវនេះ[ការស៊ើបអង្កេតពីមុន]ហាក់មិនសមហេតុផលទេ។
លោកកុសល បានបន្តថា៖«សមាគមន៍មូលនិធិកែមឡី» នៅតែបន្តស្វែងរកមូលនិធិសម្រាប់ សកម្មភាពរបស់ពួកគេ។ យោងតាមលក្ខន្តិកៈរបស់មូលនិធិនេះប្អូនប្រុសរបស់លោក កែម ឡី គឺលោក កែម រិទ្ធិសិទ្ធ គឺជាប្រធានក្រុមប្រឹក្សាភិបាលហើយលេខាធិការ សមាគមគឺលោក សេង សារី៕ NS
