.jpg)
កំពង់ចម្លង អរិយក្សត្រ-ភ្នំពេញ របស់លោកឧត្តមេសនីយ៍ត្រី វ៉ាន់ រ៉ាម៉ុន អនុប្រធាននាយកដ្ឋានអន្តោប្រវេសន៍ និងជាម្ចាស់ភាគហ៊ុន ដែលបានបាញ់សម្លាប់ខ្លួនឯង។ ផា លីណា
ភ្នំពេញ: លោកឧត្តមេសនីយ៍ត្រី វ៉ាន់ រ៉ាម៉ុន អនុប្រធាននាយកដ្ឋានអន្តោប្រវេសន៍ និងជាម្ចាស់ភាគហ៊ុនកំពង់ចម្លងទូកដរ អរិយក្សត្រ-ភ្នំពេញ បាន «ធ្វើអត្តឃាត» បាញ់សម្លាប់ខ្លួនឯង ដោយប្រើប្រាស់កាំភ្លើងខ្លីប្រភេទ K59 ដោយសារតែមានវិបត្តិផ្ទៃក្នុងគ្រួសារ។ នេះបើយោងតាមការអះអាងរបស់មន្ត្រីនគរបាលជំនាញ។
លោក ផន ស្រេង អធិការរងស្រុកល្វាឯម ទទួលបន្ទុកផ្នែកព្រហ្មទណ្ឌ បានឲ្យដឹងថា យោងតាមការធ្វើកោសល្យវិច្ច័យទៅលើអាវុធ និងសាកសពជនរងគ្រោះ ព្រមទាំងការពិនិត្យអង្កេតយ៉ាងយកចិត្តទុកដាក់ នៅកន្លែងកើតហេតុរួចមក ក្រុមមន្ត្រីនគរបាលជំនាញ ដែលមួយចំនួន មកពីថ្នាក់ខេត្តផងដែរនោះ បានធ្វើការសន្និដ្ឋានរួមគ្នាថា ការស្លាប់របស់លោកឧត្តមសេនីយ៍ត្រី វ៉ាន់ រ៉ាម៉ុន អនុប្រធាននាយកដ្ឋានអន្តោប្រវេសន៍ និងជាម្ចាស់ភាគហ៊ុនកំពង់ចម្លង ទូកដរ អរិយក្សត្រ-ភ្នំពេញ កាលពីល្ងាចថ្ងៃអង្គារនោះ គឺជាករណី «ធ្វើអត្តឃាតបាញ់សម្លាប់ខ្លួនឯង» ដោយនៅកន្លែងកើតហេតុ សមត្ថកិច្ចជំនាញបានរកឃើញក្បាលគ្រាប់កាំភ្លើងខ្លីមួយគ្រាប់ សំបកកាទូសមួយ កាំភ្លើងខ្លីមួយដើមប្រភេទ K-59 លេខ ៣១១៧ ដែលក្នុង លិខិតអនុញ្ញាតប្រើប្រាស់អាវុធនោះ បញ្ជាក់ថា ជាកម្មសិទ្ធិរបស់ជនរងគ្រោះ បង់កាំភ្លើងខ្លីចំនួន ៣ និងគ្រាប់សរុប ១៧ គ្រាប់។
លោកបានបញ្ជាក់ថា៖ «ជនរងគ្រោះ បានស្លាប់នៅលើគ្រែដែកតូចមួយ ដែលមានក្រាលពូក ដោយជើងម្ខាងគងទៅលើកៅអីបង្អែក មានពាក់ស្បែងជើង និងស្រោមជើងយ៉ាងត្រឹមត្រូវ និងមានស្នាមបាញ់ដោយគ្រប់កាំភ្លើងខ្លីប្រភេទ K59 នៅលើសៀតថ្កា ផ្នែកខាងស្ដាំ ធ្លាយទៅម្ខាង ត្រង់ចំណុចគុម្ពត្រចៀកខាងឆ្វេង។ យោងតាមស្ថានភាពនេះ ក្រុមមន្ត្រីជំនាញយើងសន្និដ្ឋានថា ជនរងគ្រោះពិតជាធ្វើអត្តឃាតបាញ់សម្លាប់ដោយខ្លួនឯង» ។
ប៉ុន្តែនៅពេលដែលសួរថា តើមូលហេតុអ្វី ដែលនាំឲ្យជនរងគ្រោះ សម្រេចចិត្តធ្វើអត្តឃាតបាញ់សម្លាប់ខ្លួនឯងយ៉ាងដូច្នោះ? លោក ស្រេង បានបដិសេធធ្វើការពន្យល់ អំពីបញ្ហានេះ ដោយលោកអះអាងថា ក្រុមមន្ត្រីជំនាញ បានព្យាយាមសាកសួរក្រុមគ្រួសារ និងសាច់ញាតិជនរងគ្រោះ ដើម្បីប្រមូលព័ត៌មានលម្អិត អំពីបញ្ហានេះដែរ តែក្រុមគ្រួសារសាច់ញាតិជនរងគ្រោះ ដែលនៅពេលនេះ កំពុងតែមានទុក្ខក្រៀមក្រំ ចំពោះមរណៈភាពរបស់ជនរងគ្រោះ ដូច្នេះពួកគាត់ មិនបានសហការផ្ដល់ព័ត៌មានលម្អិតដល់សមត្ថកិច្ចនោះទេ ដោយពួកគាត់ខ្លះបានប្រាប់ថា «ជនរងគ្រោះមានជំងឺនិងវិបត្តិផ្ទៃក្នុងគ្រួសារតិចតួច»។
យោងតាមរបាយការណ៍របស់នគរបាលស្រុកល្វាឯម ដែលភ្នំពេញប៉ុស្តិ៍ទទួលបាននៅព្រឹកថ្ងៃទី ៥ ខែ ធ្នូ បានបញ្ជាក់ថា ករណីធ្វើអត្តឃាតបាញ់សម្លាប់ខ្លួន ដ៏គួរឲ្យភ្ញាក់ផ្អើលខាងលើនេះ កើតឡើងនៅវេលាម៉ោង ៥ និង ១៥ នាទីល្ងាចថ្ងៃទី ៤ខែ ធ្នូ។
បុរសម្នាក់ឈ្មោះ វ៉េង ដារិទ្ធ ជាអ្នកមើលការខុសត្រូវកំពង់ចម្លង តំណាងឲ្យជនរងគ្រោះឈ្មោះ វ៉ាន់ រ៉ាម៉ុន បានចូលក្នុងផ្ទះរបស់ជនរងគ្រោះ ដើម្បីបូមប្រេង ដោយឃើញទ្វាររបង បិទខ្ទាស់គន្លឹះក្នុងជាប់ ឈ្មោះវ៉េង ដារិទ្ធ ក៏ ផ្លោះរបងចូល រៀបទុយយោប្រេង ហើយក៏បានដើរទៅគោះទ្វារបន្ទប់ជនរងគ្រោះ តែមិនឮសំឡេងឆ្លើយតបនោះទេ។
បន្ទាប់មក ដារិទ្ធ ក៏បានច្រានទ្វារចូលទៅក៏ឃើញជនរងគ្រោះ ដេកស្លាប់លើគ្រែដែក ក្រាលពូក និងហូរឈាមពេញ លើឥដ្ឋការ៉ូ បន្ទាប់មក ក៏រាយការណ៍ជូនសមត្ថកិច្ច ហើយករណីនេះ កម្លាំងជំនាញបច្ចេកស្រុក សហការ ជាមួយកម្លាំងជំនាញបច្ចេកទេសខេត្ត និង ពេទ្យ មណ្ឌលសុខភាពអរិយក្សត្រ មេឃុំ ភូមិ បានចូលរួម ពិនិត្យសាកសព ៕
