.jpg)
ក្រុម «យុវជនសំរាម» ដែលតែងធ្វើសកម្មភាពប្រមូលសំរាមចេញពីលូទឹកស្អុយបឹងត្របែក។ សហការី
ភ្នំពេញ: ក្រុមយុវជនប្រមូលសំរាមនៅប្រឡាយទឹកស្អុយបឹងត្របែក ដែលហៅខ្លួនឯងថាជា «យុវជនសំរាម» នៅតែប្រកាសជំហរបស់ខ្លួន ក្នុងការបន្តប្រមូលសំរាម រហូតដល់ធ្វើឲ្យប្រទេសកម្ពុជាគ្មានសំរាម បើទោះបីជាពួកគេត្រូវបានអាជ្ញាធរខណ្ឌចំការមនរារាំងមិនឲ្យរៀបចំពិធីសង្ក្រាន្ត នៅទីតាំងដែលពួកគេកំពុងប្រមូលសំរាមក៏ដោយ។
បន្ទាប់ពីពួកគេ ទទួលស្គាល់ចំពោះអ្វីដែលពួកគេហៅថា ជាកំហុសដោយសារតែពួកគេមិនបានសុំការអនុញ្ញាត ក្រោយពីអាជ្ញាធរហាមឃាត់ពួកគេមិនឲ្យរៀបចំពិធីសង្ក្រាន្តយុវ័ននៅលើសាឡង់ចាស់មួយនៅលូទឹកស្អុយបឹងត្របែកដើម្បីអបអរពិធីបុណ្យចូលឆ្នាំថ្មី។
កាលពីថ្ងៃសៅរ៍ អាជ្ញាធរខណ្ឌចំការមន បានចុះទៅហាមឃាត់ការរៀបចំពិធីសង្ក្រាន្តយុវ័ន ដែលបង្កើតឡើងដោយក្រុម «យុវជនសំរាម» មានគ្នាប្រមាណ ៣០ នាក់ ក្នុងគោលបំណងរឹតចំណងមិត្តភាពរវាងយុវជន ក្នុងឱកាសបុណ្យចូលឆ្នាំថ្មី និងចង់ផ្ញើសារអប់រំឲ្យពលរដ្ឋនៅក្នុងតំបន់ និងសាធារណជនទូទៅយល់ដឹងពីការ ទុកដាក់សំរាមឲ្យបានត្រឹមត្រូវនិងឲ្យបញ្ឈប់ការបោះចោលសំរាមពាសវាលពាសកាល។
ប៉ុន្តែកម្មវិធីនេះ មិនបានប្រារព្ធធ្វើឡើងពេញលេញនោះទេ ដោយចាប់ផ្តើមបានតែ ១ ម៉ោងកន្លះប៉ុណ្ណោះ ក៏ត្រូវបានអាជ្ញាធរក្នុងខណ្ឌនេះចុះរារាំងក្រោមហេតុផលមិនបានសុំច្បាប់អនុញ្ញាត និងធ្វើឡើងគ្មានលក្ខណៈបច្ចេកទេសដែលអាចបង្កគ្រោះថ្នាក់ជាយថាហេតុ។ យ៉ាងណាក្តីការរារាំងពីអាជ្ញាធរខណ្ឌចំការមននេះបានធ្វើឲ្យមានការរិះគន់ជាច្រើនពីសាធារណជន។
ស្ថាបនិកនៃក្រុម «យុវជនសំរាម» លោក សាន ដារ៉ាវិត បានថ្លែងក្នុងវីដេអូ ដែលមានអ្នកចូលទស្សនាជិត ៥ ម៉ឺននាក់ លើបណ្តាញសង្គមហ្វេសប៊ុក កាលពីថ្ងៃអង្គារ និងក៏បានថ្លែងបញ្ជាក់ប្រាប់ភ្នំពេញប៉ុស្តិ៍ពីថ្ងៃម្សិលមិញថា វាជារឿងដែលនឹកស្មានមិនដល់ ដែលអាជ្ញាធរក្នុងខណ្ឌនេះ មករារាំងការរៀបចំកម្មវិធីសង្ក្រាន្តយុវ័ន របស់ពួកលោកដែលគ្រាន់តែធ្វើឡើងដើម្បីទាក់ទាញឲ្យមានការចាប់អារម្មរណ៍ពីសាធារណជនដើម្បីកុំឲ្យមានការបោះចោលសំរាមពាសវាលពាសកាលដែលបានធ្វើឲ្យប៉ះពាល់យ៉ាងខ្លាំងដល់បរិស្ថាន។
តែយ៉ាងណាលោក ទទួលស្គាល់ចំពោះកំហុសដែលមិនបានជូនដំណឹង ឬក៏សុំច្បាប់ពីអាជ្ញាធរក្នុងការរៀបចំកម្មវិធីនេះ ព្រោះតែគិតថា នេះជាកម្មវិធីកម្សាន្តតូចមួយដើម្បីទាក់ទាញឲ្យមានការចាប់អារម្មរណ៍ហើយក៏គ្មានចេតនាអាក្រក់ដែរ ទើបមិនបានជូនដំណឹងឬសុំច្បាប់។
លោក សាន ដារ៉ាវិត បាននិយាយថា ការហាមមិនឲ្យធ្វើកម្មវិធីសង្ក្រាន្ត គឺជារឿងមួយផ្សេងតែពួកលោកនៅតែប្រកាន់ជំហរក្នុងការបន្តប្រមូលសំរាម នៅក្នុងប្រឡាយទឹកស្អុយនេះ បើទោះជាចំណាយពេលពេញមួយ ជីវិតក៏ដោយគឺរហូតទាល់តែប្រជាពលរដ្ឋ ឈប់ចោលសំរាមហើយធ្វើយ៉ាងណាឲ្យប្រទេស កម្ពុជា លែងមានសំរាមពាលវាលពាសកាល។
លោកថា៖ «ខ្ញុំគិតថា ប្រជាពលរដ្ឋយើងចោលសំរាមពាសវាលពាសកាលយូរឆ្នាំហើយ ដូច្នេះទៅជាទម្លាប់ហើយ ដែលមិនអាចធ្វើឲ្យពលរដ្ឋកែប្រែទម្លាប់នេះភ្លាមៗដែរ»។ ខ្ញុំគិតថា ខ្ញុំត្រូវតែចំណាយពេលបន្តិចទៀត បើទោះជាមួយជីវិតក៏ដោយ ហើយក្រៅពីប្រមូលសំរាមនៅក្នុងប្រឡាយ ផែនការបន្ត គឺនឹងធ្វើនៅលើគោក ក្នុងរាជធានីបន្តទៀត»។
ជាមួយនឹងការប្រកាសនេះ ស្ថាបនិករូបនេះ អំពាវនាវដល់ភាគីពាក់ព័ន្ធជាពិសេសអាជ្ញាធរ សូមចូលរួមគាំទ្រសកម្មភាពរបស់ពួកខ្លួន ដើម្បីឲ្យគោលដៅក្នុងការធ្វើឲ្យប្រទេសកម្ពុជា គ្មានសំរាម ទទួលបានជោគជ័យ ហើយការងារនេះគ្រាន់តែជាការងារស្ម័គ្រចិត្ត និងគ្មានចេតនាអាក្រក់ណាមួយនោះទេ។
លោកបញ្ជាក់ថា៖ «យើងធ្វើនេះ គឺប្រើចិត្តយកមកធ្វើ អត់មានគិតក្នុងបំណងអ្វីទេ ហើយជាទូទៅអ្វីទាំងនេះ គឺជាការ ទទួល ខុសត្រូវរបស់អាជ្ញាធរ តែយើងចង់ចូលរួម ដើម្បីឲ្យសង្គមមួយនេះ មានការទុកដាក់សំរាមឲ្យបានត្រឹមត្រូវប៉ុណ្ណោះ»។
លោក ធឹម សំអាន អភិបាលរងខណ្ឌចំការមន បានថ្លែងកាលពីម្សិលមិញថា កន្លងមកអាជ្ញាធរតែងតែលើកទឹកចិត្តចំពោះសកម្មភាពរបស់យុវជនប្រមូលសំរាមទាំងនោះតែគ្រាន់តែការធ្វើកម្មវិធីសង្ក្រាន្តរបស់ពួកគេ អាជ្ញាធរមើលឃើញពីហានិភ័យដែលអាចនឹងកើតមានទើបអាជ្ញាធរចុះហាមឃាត់។ ប៉ុន្តែទោះយ៉ាងណាក្រៅពីថ្លែងយ៉ាងដូច្នេះ លោកចង់ឲ្យក្រុមយុវជនទាំងនោះងាកមកធ្វើសកម្មភាពចុះអប់រំផ្សព្វផ្សាយពីបញ្ហាទុកដាក់សំរាមវិញ ហើយទុកការងារប្រមូលសំរាមចេញពីក្នុងប្រឡាយនេះឲ្យអាជ្ញាធរជាអ្នកទទួលខុសត្រូវវិញ។
លោកបញ្ជាក់ថា៖ «បើនិយាយរួមប្អូនៗមានអាកប្បកិរិយាឆន្ទៈក្នុងការប្រមូលសំរាមហ្នឹង បងអរគុណ ប៉ុន្តែបងចង់អ៊ីចេះ ក្នុងនាមបងជាអាជ្ញាធរ បងចង់បង្វែរឲ្យប្អូនងាកមកក្លាយជាអ្នកផ្សព្វផ្សាយដល់ប្រជាពលរដ្ឋវិញ ហើយទុកការងារប្រមូលសំរាមហ្នឹងឲ្យបងធ្វើវិញ។ ព្រោះវាអាចគ្រោះថ្នាក់ណាស់ នៅពេលមានអ្នកចូលរួមប្រមូលសំរាម ដែលគ្នានៅតូចៗហើយទឹកប្រឡាយជ្រៅតែមិនមែនរារាំងសកម្មភាពប្អូនទេ»។
រហូតមកដល់ពេលនេះគឺមានរយៈពេល ៣៦ ថ្ងៃហើយ ដែលក្រុម «យុវជនសំរាម» បានចាប់ផ្តើមប្រមូលផ្តុំគ្នាធ្វើសកម្មភាពប្រមូលសំរាមនៅប្រឡាយទឹកស្អុយបឹងត្របែក ដែលធ្វើឲ្យប្រជាពលរដ្ឋ នៅតាមប្រឡាយ ក៏ដូចជាពលរដ្ឋទូទៅ ស្ញើចសរសើរ និងចូលរួមកាត់បន្ថយការបោះសំរាមចូលក្នុងប្រឡាយ ដោយបានកែប្រែប្រឡាយនេះ ឲ្យមានសោភណភាព ខណៈដែលកាលពីមុនប្រឡាយនេះពេញខាប់ទៅដោយសំរាម៕
