.jpg)
យុវតីសង្ស័យជួញដូរគ្រឿងញៀន ២ នាក់ និងវត្ថុតាងនឹងត្រូវបញ្ជូនទៅតុលាការថ្ងៃនេះ ខណៈក្មេងប្រុសម្នាក់ត្រូវដោះលែង។ នគរបាល
បន្ទាយមានជ័យ: នគរបាលខេត្តបន្ទាយមានជ័យ គ្រោងបញ្ជូនខ្លួនយុវតី ២ នាក់ ដែលជាប់ពាក់ព័ន្ធករណីជួញដូរគ្រឿងញៀនចំនួន ១ គីឡូក្រាមកន្លះ ទៅតុលាការខេត្ត ខណៈក្មេងប្រុសម្នាក់អាយុ ១៣ ឆ្នាំ ត្រូវបានដោះលែងវិញ ក្រោយពីរកឃើញមិនមានជាប់ពាក់ព័ន្ធ បន្ទាប់ពីសមត្ថកិច្ចបានឃាត់ខ្លួនពួកគេទាំង ៣ នាក់ កាលពីថ្ងៃទី ១៤ ខែ កក្កដា នៅភូមិកំង់ស្វាយ សង្កាត់កំពង់ស្វាយ ក្រុងសិរីសោភ័ណ។
លោក ង៉េង សុជា ស្នងការរងខេត្តបន្ទាយមានជ័យ ទទួលផែនគ្រឿងញៀន បានប្រាប់ភ្នំពេញប៉ុស្ដិ៍ កាលពីម្សិលមិញថា សមត្ថកិច្ចជំនាញ កំពុងសាកសួរជនសង្ស័យជាយុវតីទាំង ២ នាក់នេះ ជុំវិញករណីជួញដូរគ្រឿងញៀនចំនួន ១ គីឡូក្រាមកន្លះ។
លោកបន្តថា ជនសង្ស័យ ២ នាក់ និងវត្ថុតាងគ្រឿងញៀនត្រូវបានកម្លាំងនគរបាលការិយាល័យប្រឆាំងគ្រឿងញៀនខេត្ត និងកម្លាំងនគរបាលក្រុងសិរីសោភ័ណ ដឹកនាំដោយរូបលោកផ្ទាល់ ក្រោមការ សម្រប សម្រួលពីលោក តេង សាម៉ៃ ព្រះរាជអាជ្ញារងអមសាលាដំបូងខេត្ត បង្ក្រាបបាននៅថ្ងៃទី ១៤ ខែ កក្កដា។
លោក សុជា បញ្ជាក់ថា៖ «ឥឡូវនេះ យើងកំពុងសាកសួរនៅការិយាល័យប្រឆាំងគ្រឿងញៀនខេត្តនៅឡើយ ហើយប្រហែលជាថ្ងៃទី ១៧ កក្កដា នេះ យើងនឹងបញ្ជូនទៅតុលាការខេត្តបន្ទាយមានជ័យ ដើម្បីចាត់ការតាមនីតិវីច្បាប់ ហើយពេលខ្ញុំបញ្ជូនទៅដល់តុលាការហើយ គឺតុលាការចាត់ចែងយ៉ាងណា គឺនៅលើគាត់ទៅ ខ្ញុំហួសដែនសមត្ថកិច្ចហើយ»។
តាមរបាយការណ៍របស់ស្នងការដ្ឋាននគរបាលខេត្តបន្ទាយមានជ័យ បានឲ្យដឹងកាលពីម្សិលមិញថា ជាលទ្ធផលរបស់កម្លាំងនគរបាលការិយាល័យប្រឆាំងគ្រឿងញៀនខេត្ត និងកម្លាំងនគរបាលក្រុងសិរីសោភ័ណ បានធ្វើការស៊ើបអង្កេត ស្រាវជ្រាវ តាមវិធានការជំនាញដោយក្នុងប្រតិបត្តិការនេះ សមត្ថកិច្ចបានឃាត់ខ្លួនជនសង្ស័យជាក្មេងប្រុសម្នាក់ និងយុវតីចំនួន ២ នាក់ ដោយទី១ ឈ្មោះ សៀប ម៉ាយ៉ា អាយុ ២០ ឆ្នាំ ខ្មែរអ៊ិស្លាម ស្នាក់នៅភូមិសង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ មុខរបរលក់ខោអាវ ទី២ ឈ្មោះ លាង ឧសភា អាយុ ២៥ ឆ្នាំ ជនជាតិខ្មែរ ស្នាក់នៅអគារកាស៊ីណូ ហូលីដេ ស្ថិតក្នុងភូមិក្បាលស្ពាន សង្កាត់ក្រុងប៉ោយប៉ែត មុខរបរជាបុគ្គលិកកាស៊ីណូ និងក្មេងប្រុសអាយុ ១៣ ឆ្នាំ មានមុខក្នុងកន្លែងប្រតិបតិ្តការបង្ក្រាប ក្រោយពីធ្វើការស្រាវជ្រាវរកឃើញមិនពាក់ព័ន្ធ សមត្ថកិច្ចគ្រាន់តែធ្វើការអប់រំ និងឲ្យវិលត្រឡប់ទៅផ្ទះវិញ។
របាយកាណ៍បញ្ជាក់ថា៖ «សមត្ថកិច្ចបានធ្វើការឆែកឆេររកឃើញវត្ថុតាងនៅនឹងផ្ទះរបស់ជនសង្ស័យរួមមាន ម្សៅក្រាមពណ៌សថ្លាចំនួន ១៩ ថង់តូច និង ១ ថង់ធំ ថ្លឹងសរុបទាំងសម្បកស្មើ ១ គីឡូក្រាមកន្លះ ថ្នាំគ្រាប់ អ៊ិកស្តាស៊ីចំនួន ១៥ គ្រាប់កូនដបដែលមានវត្ថុរាវនៅក្នុងដបចំនួន ៧ ដប (ថ្នាំគ្រវី) សំបកថង់ប្លាស្ទិករួមទាំងឧបករណ៍សម្រាប់ប្រើប្រាស់ថ្នាំញៀនមួយចំនួន»។
លោក ង៉េង សុជា ថ្លែងបន្ថែមថា ដោយអនុវត្តតាមបទបញ្ជារបស់លោក អាត់ ខែម ស្នងការនគរបាលខេត្តបន្ទាយមានជ័យ ដើម្បីអនុវត្តគោលនយោបាយភូមិឃុំមានសុវត្ថិភាពឲ្យមានប្រសិទ្ធភាព និងបម្រើប្រជាពលរដ្ឋ ព្រមទាំងចូលរួមការលុបបំបាត់គ្រឿងញៀននៅតាមក្លិបកម្សាន្ដនានាទូទាំងខេត្តនៅក្នុងឆ្នាំ ២០១៩ នេះ លោកក៏ដូចជាកម្លាំងនគរបាលជំនាញនឹងខិតខំចាត់វិធានការ ស៊ើបអង្កេតស្រាវជ្រាវមុខសញ្ញាជួញដូរនិងប្រើប្រាស់គ្រឿងញៀនឲ្យដូចជាភ្លៀងរលឹមបន្ថែមទៀត៕
