.jpg)
រដ្ឋបាលព្រៃឈើ បានអះអាងថា ក្រុមហ៊ុន Think Biotech មិនជាប់ពាក់ព័ន្ធនឹងការកាប់ឈើ និងឈើច្បោះជ័រក្នុងតំបន់ព្រៃឡង់ និងព្រៃសហគមន៍មួយចំនួនទេ។ ក្រសួងបរិស្ថាន
ក្រចេះ/ស្ទឹងត្រែងៈ រដ្ឋបាលព្រៃឈើ បានអះអាងថា ក្រុមហ៊ុន Think Biotech មិនជាប់ពាក់ព័ន្ធនឹងការកាប់ឈើ និងឈើច្បោះជ័រក្នុងតំបន់ព្រៃឡង់ និងព្រៃសហគមន៍មួយចំនួន ដូចការចោទប្រកាន់របស់ក្រុមសកម្មជនព្រៃឈើ និងបរិស្ថានមួយចំនួនថា មានកាប់ឈើ និងឈើច្បោះជ័រក្នុងតំបន់ព្រៃឡង់ និងព្រៃសហគមន៍ប្រាសាទទឹកខ្មៅនោះទេ។
យោងតាមសេចក្ដីប្រកាសព័ត៌មានចុះថ្ងៃទី ១១ ខែធ្នូ ឆ្នាំ ២០១៩ ដែលភ្នំពេញប៉ុស្តិ៍ទទួលបានកាលពីព្រឹកថ្ងៃព្រហស្បតិ៍បានឲ្យដឹងថា ទន្ទឹមនឹងនេះរដ្ឋបាលព្រៃឈើបានចាត់ក្រុមការងាររដ្ឋបាលព្រៃឈើថ្នាក់កណ្ដាល សហការជាមួយខណ្ឌរដ្ឋបាលព្រៃឈើនៃមន្ទីរកសិកម្ម រុក្ខាប្រមាញ់ និងនេសាទខេត្តក្រចេះ ចុះពិនិត្យស្រាវជ្រាវព័ត៌មានដល់ទីវាលដោយប្រើវិធីសាស្ត្រមួយចំនួន រួមមាន ការស្រាវជ្រាវឯកសារ រូបភាពផ្កាយរណប ប្រើប្រាស់ Drone ដើម្បីត្រួតពិនិត្យលើទីវាល ការពិនិត្យទីវាលជាក់ស្ដែងដោយ Radom Checks និងការជួបសម្ភាសជាមួយអាជ្ញាធរភូមិ ឃុំ តំណាងសហគមន៍ព្រៃឈើ និងសហគមន៍តំបន់ការពារធម្មជាតិដែលស្ថិតនៅក្នុង និងខាងក្រៅក្រុមហ៊ុន Think Biotech។
រដ្ឋបាលព្រៃឈើបានឲ្យដឹងថា «ជាលទ្ធផល ក្រុមការងារបានរកឃើញថា ក្រុមហ៊ុន Think Biotech មិនជាប់ពាក់ព័ន្ធនឹងការកាប់ឈើ និងឈើច្បោះជ័រក្នុងតំបន់ព្រៃឡង់ និង ព្រៃសហគមន៍ខាងលើនោះទេ។
ក្រុមការងារមានការសោកស្ដាយចំពោះការមិនសហការជាមួយក្រុមការងារពីសំណាក់សកម្មជនបរិស្ថានក្នុងការចុះពិនិត្យ និងផ្ទៀងផ្ទាត់ព័ត៌មាន បទល្មើសព្រៃឈើ នៅទីវាលជាក់ស្ដែងដែលខ្លួនបានផ្ដល់ព័ត៌មានដល់បណ្ដាញសារព័ត៌មានថា ក្រុមហ៊ុន Think Biotech មានជាប់ពាក់ព័ន្ធនឹងការកាប់ឈើ និងឈើច្បោះជ័រនៅក្នុងតំបន់ព្រៃឡង់ និងព្រៃសហគមន៍៕
