.jpg)
រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ។ ហេង ជីវ័ន
ភ្នំពេញៈ រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ បានថ្លែងថា កម្ពុជាចង់ឲ្យមានការិយាល័យវិទ្យុសំឡេងសហរដ្ឋអាមេរិក VOA និងការិយាល័យវិទ្យុអាស៊ីសេរី RFA នៅកម្ពុជាដើម្បីងាយស្រួលប្រាស្រ័យទាក់ទង ខណៈវិទ្យុគាំទ្រដោយបរទេសទាំងនេះអវត្តមានពីកម្ពុជាក្រោយនយោបាយប្រែប្រួល។
ការថ្លែងរបស់លោកដូច្នេះធ្វើឡើងក្នុងអំឡុងជំនួបលាគ្នាជាមួយលោក William A. Heidt ឯកអគ្គរដ្ឋទូតអាមេរិកប្រចាំកម្ពុជាកាលពីថ្ងៃអង្គារនៅក្រសួងព័ត៌មាន។ នេះបើតាមប្រព័ន្ធផ្សព្វផ្សាយក្នុងស្រុក។
សារព័ត៌មាន Fresh News ដែលគាំទ្ររដ្ឋាភិបាលបានរាយការណ៍ថា៖ «លោក ខៀវ កាញារីទ្ធ ថែមទាំងបានបញ្ជាក់ប្រាប់ឯកអគ្គរដ្ឋទូតអាមេរិកថា កម្ពុជាចង់ឲ្យស្ថានីយវិទ្យុទាំង ២ នេះមានការិយាល័យនៅកម្ពុជាដើម្បីស្រួលទាក់ទងការងារអ្វីមួយ»។
កាលពីឆ្នាំមុនស្ថានីយវិទ្យុជាង ៣០ ដែលជួលរលកធាតុអាកាស RFA និង VOA ត្រូវបានបិទ។ RFA បានបិទប្រតិបត្តិការនៅកម្ពុជាកាលពីខែកញ្ញាឆ្នាំមុន ដោយអះអាងថា ការបង្ក្រាបលើប្រព័ន្ធផ្សព្វផ្សាយធ្វើឲ្យខ្លួនមិនអាចបន្តប្រតិបត្តិការបាន។
បន្ទាប់ពីការបិទវិទ្យុនេះ អ្នកយកព័ត៌មាន ២ រូបរបស់ RFA ត្រូវបានចាប់ខ្លួន និងចោទពីបទ «ប្រមូលព័ត៌មានខុសច្បាប់សម្រាប់ប្រភពបរទេស» ប៉ុន្តែពួកគេត្រូវបានដោះលែងនៅក្រៅឃុំ បន្ទាប់ពីការបោះឆ្នោតជាតិថ្ងៃទី ២៩ ខែកក្កដាដែលគណបក្សប្រជាជនកម្ពុជាឈ្នះបានអាសនៈសភាទាំងអស់។
សារព័ត៌មាន Fresh News បានដកស្រង់សម្ដីលោក ខៀវ កាញារីទ្ធ ថា VOA និង RFA មិនអាចផ្សាយលើស្ថានីយវិទ្យុក្នុងស្រុកបានដោយសារស្ថានីយវិទ្យុក្នុងស្រុកបំពានវិធាននៃការជួលដោយមិនគោរពតាមនីតិវិធីដែលកំណត់ដោយក្រសួង។
លោក អ៊ុក គឹមសេង អ្នកនាំពាក្យក្រសួងព័ត៌មាន និងមន្ត្រីក្រសួងដទៃៗទៀតមិនអាចទាក់ទងសុំអត្ថាធិប្បាយបានទេកាលពីថ្ងៃអង្គារ។
អ្នកនាំពាក្យស្ថានទូតអាមេរិកប្រចាំកម្ពុជាមិនបានឆ្លើយតបទាន់ម៉ោងចេញកាសែត។ ប៉ុន្តែសារព័ត៌មានក្នុងស្រុករាយការណ៍ថា លោក William A. Heidt បានប្រាប់លោក ខៀវ កាញារីទ្ធ ថា [ស្ថានទូតអាមេរិក] កំពុងដោះស្រាយបញ្ហាពាក់ព័ន្ធនឹងវិទ្យុទាំង ២ ហើយពួកគេនឹងបន្តការផ្សាយលើបណ្តាញក្នុងស្រុកឡើងវិញ បន្ទាប់ពីបញ្ហាត្រូវបានដោះស្រាយរួច ដើម្បីពង្រឹងសេរីភាពសារព័ត៌មានក្នុងប្រទេសកម្ពុជា៕ PS
