.jpg)
លោក ចាន់ សាវុឌ្ឍ កាលពីពេលកន្លងទៅ។ រូបថត សហការី
មណ្ឌលគិរី: រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទលោក ចាន់ សាវុឌ្ឍ កាលពីម្សិលមិញបានចូលបំភ្លឺនៅសាលាដំបូងខេត្តមណ្ឌលគិរីជុំវិញការផ្តល់ដីរដ្ឋជិត ១ ម៉ឺនហិកតា ឲ្យក្រុមហ៊ុនឯកជនមួយនៅខេត្តនេះ ប៉ុន្ដែព្រះរាជអាជ្ញាបានអះអាងថាលោក ចាន់ សាវុឌ្ឍ មិនពាក់ព័ន្ធនឹងរឿងនេះទេ ដោយសារចូលកាន់តំណែងក្រោយការផ្ដល់ដីនេះ។
លោក ហៀង សុភក្ត្រ ព្រះរាជអាជ្ញានៃអយ្យការអមសាលាដំបូងខេត្តមណ្ឌលគិរីបានប្រាប់ភ្នំពេញប៉ុស្ដិ៍ពីម្សិលមិញថា លោក ចាន់ សាវុឌ្ឍ បានចូលបំភ្លឺរួចរាល់ហើយដោយមិនមានការឃាត់ខ្លួនទេ។
លោកបន្តថា ក្រោយពីសាកសួរជិត ៥ ម៉ោង លោកបានអនុញ្ញាតឲ្យលោក ចាន់ សាវុឌ្ឍ ត្រឡប់ទៅវិញ។ តាមចម្លើយរបស់លោក ចាន់ សាវុឌ្ឍ ថាគាត់ទើបតែចូលកាន់តំណែងកាលពីឆ្នាំ ២០១៨។ ដូច្នេះការងារកន្លងមកនេះត្រូវបានគេអនុវត្តមុនពេលលោកមកដល់ពោលគឺពីឆ្នាំ ២០១១ និងឆ្នាំ ២០១៣។
លោកថា៖ «សាលាដំបូងខេត្តមណ្ឌលគិរីគ្រោងនឹងកោះហៅអ្នកផ្សេងទៀត ដោយខ្ញុំកំពុងរៀបចំលិខិតស្នើសុំមួយទៀតទៅក្រសួងកសិកម្ម រុក្ខាប្រមាញ់ និងនេសាទដើម្បីឲ្យក្រសួងចាត់មន្ត្រីរូបណាម្នាក់ដែលបានដឹងពីរឿងនេះច្បាស់ ប៉ុន្ដែខ្ញុំមិនទាន់ដឹងថា មន្ត្រីរូបណាដែលត្រូវចូលមកបំភ្លឺបន្តទៀតទេ»។
លោក ចាន់ សាវុឌ្ឍ កាលពីម្សិលមិញមិនអាចទាក់ទងសុំការបញ្ជាក់ជុំវិញការចូលបំភ្លឺនេះបានទេ ដោយសារទូរស័ព្ទលោកមិនមានអ្នកទទួល។
ប៉ុន្ដែលោក ចាន់ ហេង នាយករងខុទ្ទកាល័យក្រសួងកសិកម្មបានថ្លែងថា លោក ចាន់ សាវុឌ្ឍ ពិតជាបានចូលទៅបំភ្លឺនៅសាលាដំបូងខេត្តមណ្ឌលគិរីរួចរាល់ហើយ ប៉ុន្ដែលោកមិនបានដឹងពីរឿងអ្វីផ្សេងទៀតទេ «គាត់ចូលទៅបំភ្លឺរួចរាល់ហើយគាត់មកធ្វើការវិញនៅរសៀលនេះទៀត (រសៀលថ្ងៃទី ១២ កញ្ញា) ប៉ុន្ដែខ្ញុំមិនដឹងដំណើររឿងយ៉ាងណាទេ»។
ព្រះរាជអាជ្ញាអមសាលាដំបូងខេត្តមណ្ឌលគិរីលោក ហៀង សុភក្ត្រ កាលពីថ្ងៃទី ២៧ សីហាបានកោះហៅលោក ចាន់ សាវុឌ្ឍ ឲ្យចូលបំភ្លឺនៅថ្ងៃទី ១២ ខែ កញ្ញា វេលាម៉ោង ៩ ព្រឹក បន្ទាប់ពីលោក ឡោ រស្មី អនុរដ្ឋលេខាធិការក្រសួងនេះបានចូលបំភ្លឺនៅថ្ងៃទី ២១ ខែ សីហា កន្លងមកពាក់ព័ន្ធករណីតែមួយ។
បើតាមដីកា លោក សាវុឌ្ឍ ត្រូវចូលបំភ្លឺពីរឿងការអនុញ្ញាតជំហានទី ១ ក្នុងអនុតំបន់ I ចំនួន ១ ០០០ ហិកតា អនុតំបន់ II ចំនួន ២ ០០០ ហិកតា អនុតំបន់ III ចំនួន ២ ០០០ ហិកតា អនុតំបន់ IV ចំនួន ២ ០០០ ហិកតា អនុតំបន់ V ចំនួន ២ ៧៤១ ហិកតា ឲ្យទៅក្រុមហ៊ុនផេស៊ីហ្វិក ហ្គ្រេន យ៉ញស្តុក ខមភេនី លីមីធីត ក្នុងខេត្តមណ្ឌលគិរី។
លោក អ៊ាង ម៉េងលី មន្ត្រីសម្របសម្រួលផ្នែកសិទ្ធិមនុស្សនៃសមាគមអាដហុក ប្រចាំខេត្តមណ្ឌលគិរីបានថ្លែងថា នេះបង្ហាញឲ្យឃើញថា តុលាការខេត្តមណ្ឌលគិរីបាននិងកំពុងធ្វើការទៅតាមនីតិវិធីច្បាប់ ប៉ុន្ដែតុលាការគួរកោះហៅអ្នកពាក់ព័ន្ធផ្សេងៗទៀត បើទោះបីមានបុណ្យស័ក្ដិខ្ពស់យ៉ាងណាក៏ដោយ។
លោកបន្តថា ទោះអ្នកផ្ដល់សិទ្ធិនៅឆ្នាំ ២០១១ ឬ ២០១៨ ក៏ដោយ ប្រសិនបើរកឃើញថា ពួកគាត់មានជាប់ពាក់ព័ន្ធការចេញច្បាប់អនុញ្ញាតមិនប្រក្រតីឲ្យទៅបុគ្គល ឬក្រុមហ៊ុនណាមួយនោះ ត្រូវតែចូលបំភ្លឺ និងទទួលខុសត្រូវនៅចំពោះមុខច្បាប់។
លោកបានបញ្ជាក់ថា៖ «ក្នុងនាមខ្ញុំជាសង្គមស៊ីវិលសូមអំពាវនាវឲ្យតុលាការអនុវត្តច្បាប់កុំឲ្យមានការរើសអើង ទោះបីជាអ្នកមានឋានៈ ឬតួនាទីខ្ពស់ក៏ដោយ។ ខ្ញុំក៏រំពឹងថាតុលាការនឹងអនុវត្តច្បាប់ឯករាជ្យប្រសិនបើគាត់រកឃើញភ័ស្ដុតាងជាក់លាក់ពីជនសង្ស័យ»៕
