ភ្នំពេញៈ រដ្ឋសភាគ្រោងនឹងបើកកិច្ចប្រជុំពេញអង្គនៅថ្ងៃសុក្រនេះ ដើម្បីពិភាក្សា និងអនុម័តសេចក្ដីព្រាងច្បាប់ស្ដីពីការគ្រប់គ្រងប្រទេសជាតិក្នុងភាពអាសន្នស្របពេលដែលច្បាប់នេះកំពុងត្រូវការជាប្រញាប់ពីរាជរដ្ឋាភិបាល។
កាលពីថ្ងៃម្សិលមិញលោក ហេង សំរិន ប្រធានរដ្ឋសភាបានដឹកនាំកិច្ចប្រជុំគណៈកម្មាធិការអចិន្រៃ្តយ៍រដ្ឋសភា ដើម្បីសម្រេចបញ្ជូនសេចក្ដីព្រាងច្បាប់ស្ដីពីការគ្រប់គ្រងប្រទេសជាតិក្នុងភាពអាសន្នមកពិភាក្សាអនុម័តនៅក្នុងកិច្ចប្រជុំពេញអង្គរដ្ឋសភានៅថ្ងៃនេះរួមទាំងការបោះឆ្នោតជ្រើសតាំង ផ្លាស់ប្ដូរសមាជិកគណៈកម្មការជំនាញរដ្ឋសភាមួយចំនួន។
លោក ឡេង ប៉េងឡុង អ្នកនាំពាក្យរដ្ឋសភាបានប្រាប់ភ្នំពេញប៉ុស្ដិ៍ម្សិលមិញថា ច្បាប់នេះត្រូវបានគណៈកម្មការនីតិកម្ម និងយុត្តិធម៌ និងគណៈកម្មការមហាផ្ទៃ ការពារជាតិ និងមុខងារសាធារណៈនៃរដ្ឋសភាបានពិនិត្យ ហើយឯកភាព ដើម្បីបញ្ជូនមកឱ្យរដ្ឋសភាបើកកិច្ចប្រជុំពេញអង្គ ពិភាក្សា និងអនុម័ត។
លោក ប៉េងឡុង ថា៖ «ខាងគណៈកម្មការជំនាញបានពិនិត្យ និងពិចារណា ហើយបានស្រាវជ្រាវ និងសិក្សារួចហើយ ហើយបានស្នើសុំឱ្យយកច្បាប់ហ្នឹងឱ្យរដ្ឋសភាបើកកិច្ចប្រជុំពេញអង្គដើម្បីអនុម័ត។ គេបានដាក់ឱ្យរដ្ឋសភាបើកកិច្ចប្រជុំពេញអង្គអនុម័ត បានសេចក្ដីថា ច្បាប់ហ្នឹងសមរម្យ និងសមស្របតាមខ្លឹមសារដែលគួរតែដាក់ឱ្យសភាអនុម័តដែលគេមិនទាត់ចោលច្បាប់ហ្នឹងទេ»។
លោក ប៉េងឡុង បានឲ្យដឹងទៀតថា មូលហេតុដែលរដ្ឋសភាបើកកិច្ចប្រជុំពេញអង្គអនុម័តច្បាប់ឱ្យបានឆាប់ ដោយសារធ្វើឡើងតាមសំណូមពររបស់រាជរដ្ឋាភិបាលដែលត្រូវការច្បាប់នេះជាប្រញាប់។
លោក ហ៊ុន សែន បានប្រកាសនៅថ្ងៃទី ៧ មេសាថា លទ្ធភាពនៃការប្រើច្បាប់នេះមានតែ ០,១ ភាគរយប៉ុណ្ណោះ ពីព្រោះលោកមានជំនឿរហូតដល់ជាង ៩៩ ភាគរយថា កម្ពុជាអាចគ្រប់គ្រងសភាពការណ៍ពាក់ព័ន្ធនឹងជំងឺកូវីដ១៩ បានហើយបានអះអាងដែរថា សភាពការណ៍របស់កម្ពុជាមិនទាន់ដល់អាសន្នដែលត្រូវដាក់ច្បាប់ស្ដីពីការគ្រប់គ្រងប្រទេសជាតិស្ថិតក្នុងភាពអាសន្នប្រញាប់ប្រញាល់នោះទេ។
តែកម្ពុជាមានតម្រូវការចាំបាច់ឲ្យមានច្បាប់នេះក្នុងដៃតែប៉ុណ្ណោះ។ លោកបញ្ជាក់ដែរថា លោកមិនចង់ប្រើច្បាប់នេះទេ ព្រោះការប្រកាសដាក់ប្រទេសនៅក្នុងគ្រាអាសន្នធ្វើឲ្យប៉ះពាល់ដល់សិទ្ធិពលរដ្ឋ និងប៉ះទង្គិចដល់បញ្ហាសេដ្ឋកិច្ច និងបញ្ហាជាច្រើនទៀត៕