.jpg)
លោកនាយករដ្ឋមន្ត្រី ហ៊ុន សែន ថ្លែងក្នុងពិធីមួយកន្លងមក។ SPM
ភ្នំពេញៈ ក្នុងចំណោមថ្ងៃឈប់សម្រាកពីការងារចំនួន ២៨ ថ្ងៃ ត្រូវបានរដ្ឋាភិបាលកាត់បន្ថយចំនួន ៦ ថ្ងៃចេញ មកនៅត្រឹម ២២ ថ្ងៃប៉ុណ្ណោះក្នុងឆ្នាំ ២០២០ ខាងមុខ។ សម្រាប់ថ្ងៃឈប់សម្រាកដែលត្រូវបានលុបចេញនោះ គឺមាន ៣ ថ្ងៃ ដែលត្រូវបានគេទទួលស្គាល់ជាសកល ដូចជាទិវាកុមារអន្តរជាតិ ១ មិថុនា ទិវារំឭកខួបនៃកិច្ចព្រមព្រៀងសន្តិភាពទីក្រុងប៉ារីស ២៣ តុលា សម្រាប់កម្ពុជា និងទិវាសិទ្ធិមនុស្ស ១០ ធ្នូ។
អនុក្រឹត្យស្តីពីប្រតិទិនឈប់ សម្រាកការងាររបស់មន្ត្រីរាជការ និយោជិត កម្មករប្រចាំឆ្នាំ ២០២០ ដែលចុះហត្ថលេខាដោយលោកនាយករដ្ឋមន្ត្រី ហ៊ុន សែន ចុះថ្ងៃទី ២ ខែ សីហា បានបង្ហាញថា ឆ្នាំ ២០២០ ព្រះរាជពិធីបុណ្យចម្រើនព្រះជន្មព្រះមហាក្សត្រខ្មែរ ព្រះករុណា ព្រះបាទសម្តេច ព្រះបរមនាថ នរោត្តម សីហមុនី ត្រូវបានកាត់បន្ថយចំនួន ២ ថ្ងៃ មកនៅត្រឹម ១ ថ្ងៃ គឺនៅថ្ងៃទី ២៩ ខែតុលា។ ចំណែកថ្ងៃឈប់សម្រាកពេលបុណ្យចូលឆ្នាំថ្មីប្រពៃណីជាតិ ត្រូវបានបង្កើនដល់ ៤ ថ្ងៃ គឺនៅថ្ងៃទី ១៣-១៤-១៥-១៦ ខែមេសា។
ក្រៅពីកំណត់យ៉ាងដូច្នេះ រាជរដ្ឋាភិបាលកម្ពុជា បានសម្រេចលុបពិធីបុណ្យជាតិចំនួន ២ ផ្សេងទៀត ដូចជា ពិធីបុណ្យមាឃបូជា ទិវាជាតិនៃការចងចាំ ។
អនុក្រឹត្យនោះបញ្ជាក់ថា៖ «ចំពោះក្រសួង ស្ថាប័នមានភារកិច្ចទំនាក់ទំនងអន្តរជាតិត្រូវរក្សាមន្ត្រីប្រចាំការជាអចិន្រៃ្តយ៍ សម្រាប់ដោះស្រាយការងារ។បទប្បញ្ញត្តិទាំងឡាយណាដែលមានខ្លឹមសារផ្ទុយពីអនុក្រឹត្យនេះ ត្រូវចាត់ទុកជានិរាករណ៍»។
លោក ផៃ ស៊ីផាន អ្នកនាំពាក្យរាជរដ្ឋាភិបាល មិនអាចទាក់ទងសុំការអត្ថាធិប្បាយបន្ថែមបានទេ ពីម្សិលមិញ។ ប៉ុន្តែលោកឯក ថា អ្នកនាំពាក្យទីស្តីការគណៈរដ្ឋមន្ត្រីប្រាប់ភ្នំពេញប៉ុស្តិ៍ថា កន្លងមកអ្នកវិនិយោគ តែងតែលើកឡើង ពីការឈប់សម្រាករបស់កម្ពុជា ដែលមានចំនួនច្រើនជាងប្រទេសមួយចំនួន។ ដូច្នេះការសម្រេចកាត់បន្ថយថ្ងៃឈប់សម្រាកនេះ គឺមានចេតនាតែមួយគត់ គឺដើម្បីទាក់ទាញអ្នកវិយោគ ។
លោកបញ្ជាក់ថា៖ «កុំឲ្យមានការបកស្រាយខុសពីនេះ គឺយើង ត្រូវការកាត់បន្ថយ ជារឿងសាមញ្ញបំផុត ដោយយើងត្រូវការកាត់បន្ថយថ្ងៃសម្រាក ព្រោះយើងត្រូវការធ្វើឲ្យប្រទេស កម្ពុជា កាន់តែមានភាពទាក់ទាញសម្រាប់អ្នកវិនិយោគិនជាតិ និងអន្តរជាតិ»។
ទោះយ៉ាងណា លោកមិនបានឆ្លើយតបនោះទេ ចំពោះសំណួរដែលសួរថា ហេតុអ្វីបានរដ្ឋាភិបាលជ្រើសរើសការលុបចោលថ្ងៃបុណ្យសំខាន់ទាំងនេះ ស្របពេលមានមតិរិះគន់ជាច្រើន ជុំវិញបញ្ហានេះ។
កាលពីខែមីនាកន្លងទៅ លោកនាយករដ្ឋមន្ត្រី ហ៊ុន សែន ធ្លាប់បានប្រកាសថា ចាប់ពីឆ្នាំ ២០២០ ទៅ ថ្ងៃឈប់សម្រាកសម្រាប់មន្ត្រីរាជការ និងកម្មករនឹងត្រូវកាត់បន្ថយឲ្យមកនៅតិចជាង ២៨ ថ្ងៃ ដើម្បីលើកទឹកចិត្តដល់អ្នកវិនិយោគ និងជំរុញកំណើនសេដ្ឋកិច្ច។ លោកលើកឡើងថា កម្ពុជា ជាប្រទេសក្រីក្រ ប៉ុន្តែមានថ្ងៃឈប់សម្រាកច្រើនជាងប្រទេសអ្នកមានទៅទៀត។
ទោះយ៉ាងណា ចំពោះប្រតិទិនឈប់សម្រាកការងារប្រចាំឆ្នាំ ២០២០ ខាងមុខនេះ ក៏ត្រូវបានរងការរិះគន់ពីសំណាក់ប្រជាពលរដ្ឋ អ្នកវិភាគ និងសង្គមស៊ីវិលមួយចំនួនផងដែរ។ អ្នកខ្លះបានលើកឡើងថា ថ្ងៃសំខាន់ៗ ទាំងនេះ មិនគួរត្រូវបានលុបចោលនោះទេ។
លោកស្រី ចក់ សុភាព នាយិកាមជ្ឈមណ្ឌលសិទ្ធិមនុស្សកម្ពុជា បានបង្ហោះនៅលើទំព័រហ្វេសប៊ុករបស់លោកស្រីដោយបង្ហាញការយល់ស្របចំពោះភាពចាំបាច់នៃការកាត់បន្ថយថ្ងៃឈប់សម្រាកការងារ ដើម្បីឧត្តមភាពសេដ្ឋកិច្ចនៃការប្រកួតប្រជែងលើទីផ្សារ។ ប៉ុន្តែលោកស្រីបានថ្លែងថាការសម្រេច លុបចេញនូវថ្ងៃសម្រាកមួយចំនួនដូចជា ទិវាសិទ្ធិកុមារ និងសិទ្ធិមនុស្សហាក់ប្រាសចាកពីការឲ្យតម្លៃទៅលើគោលការណ៍សិទ្ធិមនុស្សដែលកម្ពុជាបានប្តេជ្ញាអនុវត្ត។
លោកស្រីបន្តថា ព្រោះការអនុញ្ញាតឲ្យពលរដ្ឋអាចសម្រាកថ្ងៃទាំងនេះនឹងពាំនាំ នូវបរិយាកាសមួយដែលពលរដ្ឋអាចឈ្វេងយល់បន្ថែមពីគុណតម្លៃនៃសិទ្ធិ ព្រមទាំងផ្តល់នូវភាពងាយស្រួលសម្រាប់ពួកគាត់អាចចូលរួមពេញលេញក្នុងការប្រារព្ធទិវាទាំងនោះខណៈសូម្បីតែបច្ចុប្បន្ន ពួកគាត់តែងរងគំនាបមួយចំនួនពីសហគ្រាស មិនឲ្យពួកគាត់អាចចូលរួម បើទោះបីជាថ្ងៃឈប់សម្រាករបស់ពួកគាត់ក្តី។
អ្នកការពាសិទ្ធិមនុស្សរូបនេះបញ្ជាក់ថា៖ «ខ្ញុំយល់ថា នេះជាឱកាសនៃការធ្វើកំណែទម្រង់ដ៏ប្រសើរលើថ្ងៃសម្រាក និងដើម្បីបញ្ចប់នូវការខ្វែងមតិនានាលើទិវាមួយចំនួនកន្លងមក។ ដូចជាទិវារំដោះជាតិ ៧ មករា ទិវារំឭកខួបនៃកិច្ចព្រមព្រៀងសន្តិភាពទីក្រុងប៉ារីស ទិវាឯករាជ្យជាតិ និងទិវាប្រកាសរដ្ឋធម្មនុញ្ញជាដើម»។
លោកស្រីបន្ថែមថា កំណែទម្រង់ខាងលើអាចច្របាច់បញ្ចូល គ្នាជាថ្ងៃតែមួយហើយអាចហៅ ថាទិវាឯករាជ្យ និងឯកភាពជាតិដែលជាទិវាមួយសម្រាប់ជាតិទាំងមូលអាចប្រារព្ធដោយរីករាយទាំងអស់គ្នាមិនមែនសម្រាប់ បក្សក្រុមឬកម្រិតតែរាជការនោះទេ។ ប្រទេសជាច្រើនបានកំណត់ទិវាជាតិរបស់គេហើយការប្រារព្ធនោះ មានកម្មវិធីជាច្រើនដែលពលរដ្ឋចូលរួមកុះករ។
លោកស្រី ចក់ សុភាព បានបន្តថា៖ «ជារួមមិនថាការកំណត់យ៉ាងណានោះទេ សូមឲ្យស្មារតីនៃការគោរព និងការពារសិទ្ធិមនុស្ស ព្រមទាំងភាពចាំបាច់សម្រាប់ការផ្សះផ្សាជាតិ ឯករាជ្យជាតិ ជារបៀបវារៈចាំបាច់សម្រាប់យើង ទាំងអស់គ្នា ដើម្បីការអភិវឌ្ឍប្រទេសប្រកបដោយចីរភាពនិងសន្តិភាពពេញលេញ»។
លោក ឡៅ ម៉ុងហៃ អ្នកវិភាគនយោបាយ បានលើកឡើងដែរថា ការលុបចោលថ្ងៃឈប់សម្រាក ៦ ថ្ងៃ នៅឆ្នាំ ២០២០ គឺជារឿងអយុត្តិធម៌ សម្រាប់និយោជិត និងកម្មករដែលត្រូវធ្វើការនៅថ្ងៃទាំងនេះ ដើម្បីជួយកាត់បន្ថយតម្លៃទំនិញផលិតក្នុងស្រុក សម្រាប់ប៉ះប៉ូវទៅនឹងពន្ធបន្ថែម បើអស់ប្រព័ន្ធអនុគ្រោះពន្ធ EBA ។
លោកបន្តថា៖ «ដើម្បីឲ្យយុត្តិធម៌គេត្រូវបញ្ចូលថ្ងៃឈប់សម្រាក ដែលទៅជាថ្ងៃធ្វើការទាំងនោះ ជាថ្ងៃឈប់សម្រាកប្រចាំឆ្នាំរបស់និយោជិតនិងកម្មករម្នាក់ៗទៅវិញ គឺគេអាចយកថ្ងៃណាមួយក៏បាន ដើម្បីឈប់សម្រាកតាមការជ្រើសរើសរបស់គេ»៕
