.jpg)
លោក ហ៊ុន សែន ថ្លែងក្នុងពិធីសម្ពោធរោងចក្រស៊ីម៉ងត៍នៅខេត្តកំពត ម្សិលមិញ។ រូបថត SPM
ភ្នំពេញៈ រាជរដ្ឋាភិបាលប្រកាសថា ផែនការរដ្ឋប្រហារនៅថ្ងៃទី ៩ វិច្ឆិកា ដែលប៉ុនប៉ងធ្វើដោយលោក សម រង្ស៊ី តាមរយៈការវិលត្រឡប់មកកម្ពុជាវិញនោះបានបរាជ័យទាំងស្រុង ខណៈលោក រង្ស៊ី ក៏អះអាងថាលោកនៅតែរក្សាផែនការដើម្បីវិលចូលកម្ពុជាវិញឱ្យបាន។ ប៉ុន្តែអ្នកវិភាគយល់ឃើញថា អ្នកនយោបាយដែលកំពុងនិរទេសខ្លួនរូបនេះ ប្រហែលមិនមានឱកាសវិលចូលស្រុកវិញបានក្នុងពេលឆាប់ៗនេះឡើយ។
សេចក្ដីថ្លែងការណ៍របស់រដ្ឋាភិបាលកាលពីថ្ងៃទី ១៣ ខែវិច្ឆិកា បានអះអាងថា ការកំណត់យកថ្ងៃទី ៩ វិច្ឆិកា ចំថ្ងៃបុណ្យឯករាជ្យជាតិលើកទី ៦៦ ដើម្បីអនុវត្តផែនការប៉ុនប៉ងធ្វើរដ្ឋប្រហារផ្ដួលរំលំរដ្ឋាភិបាល និងរបបរាជានិយមរបស់លោក សម រង្ស៊ី ប្រធានស្ដីទីអតីតគណបក្សសង្គ្រោះជាតិបានបរាជ័យទាំងស្រុង។ ចំណែកសន្ដិសុខ និងសណ្ដាប់ធ្នាប់សាធារណៈក៏ត្រូវបានធានាយ៉ាងរឹងមាំជាប្រក្រតីនៅទូទាំងប្រទេស។
រដ្ឋាភិបាលបន្តថាពលរដ្ឋបានចូលរួមយ៉ាងសកម្ម និងផុសផុលដើម្បីហូបអំបុកនៅថ្ងៃទី ៩ វិច្ឆិកា និងបានចូលរួមយ៉ាងច្រើនកុះករក្នុងដំណើរកម្សាន្តនៅក្នុងព្រះរាជពិធីបុណ្យអុំទូកទាំង ៣ ថ្ងៃ នៅថ្ងៃទី ១០-១១-១២ វិច្ឆិកា។ ជាមួយគ្នានេះរដ្ឋាភិបាលក៏បានសុំការអធ្យាស្រ័យពីប្រជាពលរដ្ឋដែលជាអាជីវករចំពោះភាពរអាក់រអួលនៃការឆ្លងកាត់ច្រកទ្វារព្រំដែនកម្ពុជា-ថៃដែលបង្កឡើងពីការដាក់កម្លាំងរឹតបន្តឹងការត្រួតពិនិត្យនៅច្រកទ្វារព្រំដែននេះ។
សេចក្ដីថ្លែងការណ៍សរសេរថា៖ «រាជរដ្ឋាភិបាលសូមសម្ដែងការកោតសរសើរ និងថ្លែងអំណរគុណយ៉ាងជ្រាលជ្រៅជាទីបំផុតជូនចំពោះកងកម្លាំងប្រដាប់អាវុធគ្រប់ប្រភេទ និងអាជ្ញាធរមានសមត្ថកិច្ចគ្រប់លំដាប់ថ្នាក់ដែលបានបំពេញតួនាទីរបស់ខ្លួន ប្រកបដោយស្មារតីទទួលខុសត្រូវខ្ពស់ក្នុងការធានារក្សាការពារសុខសន្ដិភាព និងស្ថិរភាពសង្គម។ ពិសេស ការសម្រេចបាននូវជោគជ័យដ៏ត្រចះត្រចង់ក្នុងការបំផ្លាញចោលទាំងស្រុងនូវផែនការរបស់ក្រុមឧទ្ទាមដឹកនាំដោយទណ្ឌិត សម រង្ស៊ី ដែលប៉ុនប៉ងយកថ្ងៃទី ៩ ខែវិច្ឆិកា ដើម្បីប្រមូលកម្លាំងធ្វើរដ្ឋប្រហារ»។
ការចេញសេចក្ដីថ្លែងការណ៍របស់រដ្ឋាភិបាលនេះក្រោយពីលោក សម រង្ស៊ី មិនបានចូលដល់ទឹកដីកម្ពុជាតាមការគ្រោងទុកដូចដែលលោកបានសន្យាជាមួយអ្នកគាំទ្រ និងអន្តរជាតិ។ តាមគម្រោងលោកបានប្រកាសថា នឹងដឹកនាំពលករដែលភាគច្រើនបំផុតជាអ្នកគាំទ្របក្សប្រឆាំង ដើរឆ្លងដែនចេញពីប្រទេស ថៃ ចូលកម្ពុជានៅថ្ងៃទី ៩ វិច្ឆិកា ដើម្បីមកស្ដារលទ្ធិប្រជាធិបតេយ្យ និងសិទ្ធិមនុស្សឡើងវិញ និងដើម្បីផ្លាស់ប្ដូររបបដឹកនាំសព្វថ្ងៃដែលលោកអះអាងថា ជារបបផ្ដាច់ការ។
ប៉ុន្តែរដ្ឋាភិបាលបានចាត់ទុកដំណើរវិលត្រឡប់នោះ ថាជាគម្រោងធ្វើរដ្ឋប្រហារផ្ដួលរំលំរដ្ឋាភិបាលស្របច្បាប់ និងទម្លាក់ព្រះមហាក្សត្រ ហើយបានចេញបញ្ជាឱ្យចល័តកងកម្លាំងនៅទូទាំងប្រទេស ដើម្បីត្រៀមខ្លួនកម្ទេចកម្លាំងធ្វើរដ្ឋប្រហារនោះ។
នៅថ្ងៃទី ១៣ វិច្ឆិកា បន្ទាប់ពីជួបជាមួយសមាជិកសភាមួយចំនួននៅទីក្រុងគូឡាឡាំពួរ ប្រទេស ម៉ាឡេស៊ី លោក សម រង្ស៊ី ប្រាប់ក្រុមអ្នកសារព័ត៌មានថា លោកនៅតែរក្សាជំហរវិលត្រឡប់ចូលកម្ពុជាវិញ ប៉ុន្តែលោកមិនទាន់បានបញ្ជាក់អំពីពេលវេលាជាក់លាក់ជាថ្មីនោះទេ។
លោកបន្តថា ការដោះលែងលោក កឹម សុខា ឱ្យមានសេរីភាពអាចធ្វើដំណើរនៅទូទាំងប្រទេស កម្ពុជា ឡើងវិញ គឺអាចជាការបង្ហាញថា បទចោទប្រកាន់ទាំងឡាយមកលើមន្ត្រីអតីតបក្សប្រឆាំង និងលើរូបលោកនឹងអាចត្រូវបានលើកលែងជាបណ្ដោះអាសន្ន ឬទាំងស្រុង ដោយសារតែសហភាពអឺរ៉ុបកំពុងតែជួបចរចាជាមួយមន្ត្រីរដ្ឋាភិបាលជុំវិញការព្យួរប្រព័ន្ធអនុគ្រោះពន្ធ EBA។
លោកថា៖ «ពួកយើងនឹងស្វែងរកមធ្យោបាយផ្សេងទៀត ដើម្បីត្រឡប់ទៅកម្ពុជា។ ខ្ញុំនឹងស្នាក់នៅក្នុងតំបន់ (អាស៊ាន) ពីព្រោះស្ថានភាព (ក្នុងប្រទេសកម្ពុជា) អាចផ្លាស់ប្ដូរយ៉ាងឆាប់រហ័ស»។
ទោះជាយ៉ាងណានៅថ្ងៃម្សិលមិញលោកនាយករដ្ឋមន្ត្រី ហ៊ុន សែន ក្នុងពិធីសម្ពោធរោងចក្រស៊ីម៉ងត៍មួយនៅខេត្តកំពតបានអះអាងជាថ្មីថា លោកនឹងមិនលើកដៃចុះហត្ថលេខាសុំទៅព្រះមហាក្សត្រដើម្បីឱ្យមានការព្រះរាជទានលើកលែងទោសចំពោះបុគ្គលដែលលោកធ្លាប់ស៊ីញ៉េស្នើសុំឱ្យព្រះមហាក្សត្រព្រះរាជទានលើកលែងទោសនោះឡើយ។
លោក ហ៊ុន សែន បញ្ជាក់ថា៖ «ត្រូវចាំថា ទោសរបស់អ្នកមិនត្រូវបានអត់ឱននោះទេ អ្នកត្រូវតែឆ្លងតាមគន្លងច្បាប់ ហើយអ្នកដែលមានសិទ្ធិតែមួយគត់ដែលលើកសំណើទៅព្រះមហាក្សត្រ គឺដៃស្ដាំរបស់លោក ហ៊ុន សែន។ តែ ហ៊ុន សែន នឹងមិនចុះហត្ថលេខា សុំការលើកលែងទោសឱ្យមនុស្សដដែល (លោក សម រង្ស៊ី) នោះទេ។ ខ្ញុំមិននិយាយចំឈ្មោះទេ តែនេះជាសារនយោបាយជាក់លាក់»។
លោក ហ៊ុន សែន ក៏បានបញ្ជាក់ទៀតថាផ្ទៃក្នុងគណបក្សប្រជាជនកម្ពុជា គឺគ្មានការបែកបាក់ ឬការដណ្ដើមអំណាចគ្នានោះទេ ទោះបីកាលពីពេលកន្លងមកលោក សម រង្ស៊ី ចង់ប្រើប្រាស់លោក ស ខេង អនុប្រធានគណបក្សប្រជាជនកម្ពុជា និងលោកស្រី ម៉ែន សំអន សមាជិកគណៈអចិន្រៃ្តយ៍គណៈកម្មាធិការកណ្ដាលគណបក្សប្រជាជនកម្ពុជា ដើម្បីធ្វើរដ្ឋប្រហារ និងបក្សប្រហារ ដើម្បីទម្លាក់លោកចេញពីតំណែងនាយករដ្ឋមន្ត្រីក៏ដោយ។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា យល់ឃើញថាថ្វីដ្បិតនៅពេលនេះអ្នកនយោបាយបក្សប្រឆាំងស្ថិតនៅក្នុងប្រទេសរួមទាំងលោក កឹម សុខា កំពុងស្ថិតក្នុងស្ថានភាពល្អប្រសើរ ហើយអាចនឹងចូលរួមក្នុងការធ្វើនយោបាយឡើងវិញក្នុងពេលវេលាសមស្របណាមួយដ៏ឆាប់ខាងមុខនេះក្តី ប៉ុន្តែលោកថាសម្រាប់ក្រុមអ្នកនយោបាយបក្សប្រឆាំងនៅក្រៅប្រទេសដែលដឹកនាំដោយលោក សម រង្ស៊ី នឹងនៅតែបន្តស្ថិតនៅក្រៅប្រទេសរយៈពេលយូរបន្ថែមទៀត។
លោកថ្លែងថា៖ «លោក សម រង្ស៊ី ប្រហែលគ្មានឱកាសវិលត្រឡប់មកកម្ពុជាវិញក្នុងពេលឆាប់នេះទេ ប៉ុន្តែរយៈពេលយូរតទៅទៀត អាហ្នឹងជារឿងផ្សេងមួយទៀត ពីព្រោះក្នុងបរិបទ ឬរបបនយោបាយតែងមានការផ្លាស់ប្ដូរ និងប្រែប្រួល ប៉ុន្តែមិនមែនឥឡូវនេះទេ»៕
