.jpg)
ពន្ធនាគារថ្មីដែលនឹងត្រូវដាក់ឱ្យដំណើរការឆាប់ៗនៅខណ្ឌដង្កោ។ រូបថត សហការី
ភ្នំពេញៈ អគារពន្ធនាគារថ្មីដែលនៅជិតពន្ធនាគារព្រៃសត្រូវបានបញ្ចប់ការសាងសង់ និងចាប់ផ្តើមដាក់ឱ្យដំណើរការជាផ្លូវការឆាប់ៗនេះ ដែលនឹងអាចជួយកាត់បន្ថយភាពចង្អៀតណែននៃចំនួនអ្នកទោស ហើយមន្ទីរឃុំឃាំងថ្មីនេះនឹងត្រូវប្រើប្រាស់ជំនួសឱ្យពន្ធគាររាជធានីភ្នំពេញ ឬប៉េហ្ស៊ីជាបណ្តោះអាសន្ន។ នេះបើតាមលោក ចាន់ គីមសេង អគ្គនាយកនៃអគ្គនាយកដ្ឋានពន្ធនាគារនៃក្រសួងមហាផ្ទៃបញ្ជាក់ពីថ្ងៃអាទិត្យ។
ទីតាំងអគារពន្ធនាគារថ្មីនេះស្ថិតនៅក្បែរពន្ធនាគារព្រៃសក្នុងខណ្ឌដង្កោ រាជធានីភ្នំពេញត្រូវបានសាងសង់ឡើងនៅលើផ្ទៃដីទំហំ ១,៥ ហិកតា កាលពីខែឧសភា ឆ្នាំ ២០១៧ ដោយក្រុមហ៊ុនគន្ធ រីខុន ហូលឌីង ក្នុងទំហំទឹកប្រាក់ប្រមាណ ៤ លានដុល្លារអាមេរិក។
លោក ចាន់ គីមសេង បានថ្លែងកាលពីថ្ងៃទី ១៧ វិច្ឆិកា ថានៅព្រឹកថ្ងៃទី ១៥ ខែវិច្ឆិកា ក្រុមហ៊ុន គន្ធ រីខុន ហូលឌីង បានប្រគល់អគារពន្ធនាគារថ្មីទំនើបនេះទៅឲ្យក្រសួងមហាផ្ទៃដើម្បីធ្វើការគ្រប់គ្រង។ អគារពន្ធនាគារថ្មីនេះនឹងត្រូវប្រើប្រាស់ជំនួសឱ្យពន្ធនាគាររាជធានីភ្នំពេញ ឬប៉េហ្ស៊ី (PJ) បណ្តោះអាសន្នសិនរហូតដល់ពន្ធនាគាររាជធានីភ្នំពេញនេះសាងសង់រួចរាល់។
លោកបានបញ្ជាក់ថា៖ «តាមគោលការណ៍របស់សម្តេចក្រឡាហោម (ស ខេង) ផ្តល់ជូនពន្ធនាគារភ្នំពេញប្រើប្រាស់មួយរយៈ ដោយសារពន្ធនាគារភ្នំពេញរាល់ថ្ងៃតូចចង្អៀត។ ជនជាប់ឃុំនៅក្នុងពន្ធនាគារហ្នឹងគឺគ្មានកន្លែងដាក់ទេរាល់ថ្ងៃហ្នឹង ហើយបានយកពួកគេទៅដាក់ក្នុងពន្ធនាគារព្រៃស។ ឥឡូវកន្លែងហ្នឹងយើងផ្តល់ឲ្យពន្ធនាគាររាជធានីភ្នំពេញប្រើប្រាស់មួយរយៈដើម្បីឱ្យ (ពន្ធនាគារ) ភ្នំពេញហ្នឹងបានសាងសង់កន្លែងថ្មី» ។
លោកបន្តថា៖ «យើងត្រូវពិនិត្យ និងបំពេញចំណុចមួយចំនួននៅក្នុងហេដ្ឋារចនាសម្ព័ន្ធ ដោយសារវាមិនទាន់គ្រប់គ្រាន់។ ពេលខ្លីទេ វាមិនយូរទេ ដើម្បីធ្វើឲ្យវាមានរបៀបរៀបរយថែមទៀត។ យើងក៏ត្រូវការឯកសារគតិយុត្តស្តីពីការដូរទីតាំងដើម្បីដាក់ទៅរាជរដ្ឋាភិបាល។ វាមិនដល់ ១ ខែទេ យើងនឹងខិតខំធ្វើឱ្យបានលឿន» ។
ទោះជាយ៉ាងណាពន្ធនាគារថ្មីនេះ មិនមែនជាពន្ធនាគារទំនើប (VIP) សម្រាប់តម្រូវឱ្យអ្នកជាប់ឃុំដែលមានលទ្ធភាពបង់ប្រាក់នោះទេ ។ កាលពីពេលកន្លងទៅក្រសួងមហាផ្ទៃគ្រោងនឹងសាងសង់ពន្ធនាគារទំនើប (VIP) សម្រាប់ជនជាប់ឃុំដែលមានលទ្ធភាពបង់ប្រាក់តម្រូវឱ្យពួកគេបង់ប្រាក់សម្រាប់ការស្នាក់នៅក្នុងពន្ធនាគារនេះ ប៉ុន្តែគម្រោងនេះត្រូវបានលុបវិញ។
អ្នកនាំពាក្យក្រសួងមហាផ្ទៃលោក ខៀវ សុភ័គ ឱ្យដឹងកាលពីថ្ងៃទី ១៧ វិច្ឆិកា ថា ក្រសួងមហាផ្ទៃបានសម្រេចបោះបង់ចោលគម្រោងពន្ធនាគារទំនើប (VIP) នេះវិញ បន្ទាប់ពីបានធ្វើការសិក្សាហើយ រកពុំឃើញមានប្រទេសណាមួយធ្វើពន្ធនាគារទំនើបបែបនេះ សម្រាប់ឃុំខ្លួនអ្នកជាប់ឃុំដែលមានលទ្ធភាពបង់ប្រាក់។ លោក សុភ័គ បន្តថាក្រសួងមហាផ្ទៃនឹងធ្វើលិខិតទៅប្រមុខរាជរដ្ឋាភិបាល ដើម្បីស្នើបោះបង់ចោលគម្រោងពន្ធនាគារទំនើបនេះ។
លោកបានបញ្ជាក់ថា៖ «ដំបូងយើងបានសុំគោលការណ៍ពីរដ្ឋាភិបាលរួចហើយ ដែលថាយើងធ្វើពន្ធនាគារមួយសម្រាប់អ្នកដែលចង់បានកន្លែង ដែលទូលាយហើយបង់ប្រាក់បន្តិចបន្តួច។ ប៉ុន្តែនៅពេលដែលយើងធ្វើទៅ និងពិនិត្យពិចារណាផ្លូវច្បាប់ទៅ វាធ្វើទៅមិនរួច ដោយសារតែអត់មានប្រទេសណាគេធ្វើតាមគំរូហ្នឹងទេ។ ក្នុងបណ្តាប្រទេសក្នុងតំបន់ គេចាំមើលយើងដែរ យើងក៏បោះបង់គម្រោងចោលវិញ។ យើងត្រូវសុំទៅរដ្ឋាភិបាលសិន ទើបសម្រេចបាន ។ ឥឡូវនេះយើងមិនទាន់សុំនៅឡើយ ហើយដរាបណាយើងមិនទាន់សុំរដ្ឋាភិបាល យើងមិនទាន់សម្រេចបានទេ»។
លោក អំ សំអាត ប្រធានផ្នែកបច្ចេកទេស ស៊ើបអង្កេតនៃអង្គការការពារសិទ្ធិមនុស្ស (លីកាដូ) ស្វាគមន៍ចំពោះការសម្រេចចិត្តលុបគម្រោងពន្ធនាគារ VIP របស់រដ្ឋាភិបាលនេះ។ លោកចាត់ទុកការសម្រេចលុបចោលបែបនេះនឹងជួយលុបបំបាត់ការរិះគន់ពាក់ព័ន្ធនឹងការរើសអើងអ្នកមាន និងអ្នកក្រនៅក្នុងពន្ធនាគារ។
លោក សំអាត បញ្ជាក់ថា៖ «ពន្ធនាគារឯកជននេះគឺវាមិនល្អទេសម្រាប់កម្ពុជាយើង ដោយសារតែវាអាចបង្កការរើសអើង និងបង្កលក្ខណៈងាយស្រួលទៅដល់អ្នកដែលមានលុយ។ ពិសេសឧក្រិដ្ឋជនពាក់ព័ន្ធនឹងគ្រឿងញៀន បទល្មើសប្លន់ ពួកគេអាចនឹងអត់ខ្លាចនឹងប្រព្រឹត្តទេ ដោយសារពួកគេអាចទៅនៅក្នុងពន្ធនាគារឯកជនដែលជាកន្លែងល្អ»។
លោក នុត សវនា អគ្គនាយករងពន្ធនាគារ និងជាអ្នកនាំពាក្យអគ្គនាយកដ្ឋានពន្ធនាគារធ្លាប់បានប្រាប់ភ្នំពេញប៉ុស្តិ៍នាពេលកន្លងទៅថា រហូតមកទល់ពេលនេះចំនួនអ្នកជាប់ឃុំក្នុងពន្ធនាគារនៅទូទាំងប្រទេសមានជាង ៣៦ ៦០០ នាក់ ក្នុងនោះស្រីជាង ៣ ០០០ នាក់ ដែលភាគច្រើនជាបទល្មើសគ្រឿងញៀន។ ចំនួនអ្នកជាប់ឃុំក្នុងមណ្ឌលអប់រំកែប្រែទី ១ «ម ១» មានចំនួន ៩ ៤៥០ នាក់ និងមណ្ឌលអប់រំកែប្រែទី ២ «ម ២» (ហៅថា គុកព្រៃស) មានចំនួន ១ ៨៥៥ នាក់៕
វីដេអូ៖
