.jpg)
លោក អេង ហីុ អ្នកនាំពាក្យគណៈកម្មការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិ ថ្លែងនៅក្នុងសន្និសីទសារព័ត៌មាន កាលពីថ្ងៃម្សិលមិញ។ ហេង ជីវ័ន
ភ្នំពេញៈ ក្រុមហ៊ុនចំនួន ៥ ដែលបានធ្វើអាជីវកម្មពាក់ព័ន្ធព្រៃឈើនៅស្រុកកោះញែក ខេត្តមណ្ឌលគិរី នឹងត្រូវដកហូតអាជ្ញាប័ណ្ណ និងបញ្ឈប់ឲ្យធ្វើអាជីវកម្មបន្តទៀត បើសិនរកឃើញមានការជាប់ពាក់ព័ន្ធបទល្មើសព្រៃឈើ ខណៈសមត្ថកិច្ចចុះឆែកឆេរក្រុមហ៊ុនទាំងនោះជាបន្ដបន្ទាប់ ក្រោយពីរថយន្ដដឹកឈើចំនួន ៦ គ្រឿងទៀត ត្រូវបានដុតបំផ្លាញចោលនៅស្រុកសេសាន ខេត្តស្ទឹងត្រែង។
ការព្រមានដកហូតអាជ្ញាប័ណ្ណនេះ ធ្វើឡើងក្នុងសន្និសីទសារព័ត៌មានមួយស្តីពី «វិធានការទប់ស្កាត់បទល្មើសព្រៃឈើ» ដែលរៀបចំដោយអង្គភាពអ្នកនាំពាក្យរាជរដ្ឋាភិបាល ដែលមានតំណាងក្រសួងបរិស្ថាន តំណាងរដ្ឋបាលព្រៃឈើ និងតំណាងគណៈកម្មការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិ ដើម្បីបង្ហាញពីវិធានការទប់ស្កាត់ និងបង្ក្រាបបទល្មើសធនធានធម្មជាតិ នៅទីស្តីការគណៈរដ្ឋមន្ត្រី នាថ្ងៃទី ១៨ ខែ កក្កដា នេះ។
លោក អេង ហ៊ី អ្នកនាំពាក្យគណៈកម្មការជាតិ ដើម្បីទប់ស្កាត់ និងបង្ក្រាបបទល្មើសធនធានធម្មជាតិបានថ្លែងថា តាមការស៊ើបអង្កេតករណីជាក់ស្ដែងនៅក្នុងក្រុមហ៊ុនទាំងនេះនឹងចាត់ទុកជាការអង្កេតបឋម ហើយចាប់ផ្ដើមស៊ើបជំហានបន្តដើម្បីប្រមូលយកព័ត៌មានមកស្រាវជ្រាវរកវត្ថុតាងបន្ថែមមកបញ្ជាក់។ ដូច្នេះបុគ្គលណាដែលពាក់ព័ន្ធ សមត្ថកិច្ចនឹងឃាត់ខ្លួន ប៉ុន្ដែបើរកមិនឃើញពាក់ព័ន្ធនឹងមិនមានការឃាត់ខ្លួនទេ។
វីដេអូ
លោកបន្តថា ក្រុមហ៊ុនទាំង ៥ នោះរួមមាន ក្រុមហ៊ុន ម៉ាស្ទ័រខេសិន ក្រុមហ៊ុន យ៉ាន់ចាវ ក្រុមហ៊ុន ថាច់វូដ ក្រុមហ៊ុនវិជ្ជរី និងក្រុមហ៊ុន ណេងណា ខណៈក្រុមហ៊ុន លឹម រ៉ូយ៉ាល់ មិនមានពាក់ព័ន្ធនឹងករណីបទល្មើសព្រៃឈើទេ។
លោកបញ្ជាក់ថា៖ «បើក្រុមហ៊ុននោះធ្វើល្មើសច្បាប់ យើងនឹងដកអាជ្ញាប័ណ្ណ តែរង់ចាំការស៊ើបអង្កេតសិនបើយើងទៅបិទរបស់គេ មិនទាន់ចប់ការស៊ើបអង្កេតនោះ គឺមិនផ្តល់ភាពយុត្តិធម៌ទេ»។
លោក អេង ហ៊ី បន្ថែមថា ខណៈនេះសមត្ថកិច្ចកំពុងតាមស្វែងរកជនសង្ស័យពាក់ព័ន្ធចំនួន ៩ នាក់ទៀត បន្ទាប់ពីសមត្ថកិច្ចបានរឹបអូសឈើប្រណីតខុសច្បាប់ចំនួន ១ ៧០០ ម៉ែត្រគុប នៅខេត្តមណ្ឌលគិរី។ ក្នុងប្រតិបត្តិការនោះ សមត្ថកិច្ចបានឃាត់រថយន្តល្មើស ៤៣ គ្រឿង ដែលពាក់ព័ន្ធនឹងការដឹកឈើ។ ដោយឡែកមានចំនួន ២៩ គ្រឿងទៀត ត្រូវបានបំផ្លាញចោល។
លោកស្រ៊ុន ដារិទ្ធ រដ្ឋលេខាធិការក្រសួងបរិស្ថានថ្លែងថា ក្រុមហ៊ុនទាំង ៦ នេះ ត្រូវបានសមត្ថកិច្ចចុះទៅដល់ទីតាំងក្នុងនោះគេបានរកឃើញមុខសញ្ញាបទល្មើសព្រៃឈើចំនួន ៥ ក្រុមហ៊ុន។
មុនពេលសម្រេចដកហូតអាជ្ញាប័ណ្ណ ឬបិទក្រុមហ៊ុននោះ មន្ត្រីពាក់ព័ន្ធបាននិងកំពុងស៊ើបអង្កេត និងផ្ទៀងផ្ទាត់កិច្ចសន្យាដែលក្រុមហ៊ុនព្រមព្រៀងជាមួយរដ្ឋាភិបាល។
រថយន្តដឹកឈើត្រូវសមត្ថកិច្ចចាប់បានហើយដុតចោល។ សហការី
លោកបញ្ជាក់ថា៖ «ការវាយតម្លៃ ឬស្រាវជ្រាវបទល្មើសលើគម្រោងដីសម្បទានសេដ្ឋកិច្ចនេះ មិនមែនឈរលើរឿងតែមួយទេ ព្រោះយើងមានកិច្ចសន្យាជាមួយរដ្ឋាភិបាល។ អ៊ីចឹងយើងត្រូវយកកិច្ចសន្យាទាំងអស់ហ្នឹងមកផ្ទៀងផ្ទាត់គ្នាធ្វើជាគោល»។
លោកបន្ថែមថា៖ «បើយើងស៊ើបអង្កេតឃើញមានអ្វីដែលពាក់ព័ន្ធរឿងផ្សេង ដែលផ្ទុយពីកិច្ចសន្យានោះ យើងនឹងស្នើទៅរដ្ឋាភិបាលចាត់វិធានការ។ យើងមិនមែនឃើញថា ក្រុមហ៊ុនហ្នឹងខុសច្បាប់ ស្រាប់តែទៅបិទក្រុមហ៊ុនគេភ្លាមៗ គឺអត់ត្រូវទេ ប៉ុន្ដែបើរកឃើញជាក់លាក់ហើយ គឺចាត់វិធានការតែម្ដង»។
លោក គ្រើង តុលា សកម្មជនការពារព្រៃឈើខេត្តមណ្ឌលគិរីថ្លែងថា ចាប់តាំងពីមានការបង្ក្រាបជាទ្រង់ទ្រាយធំរបស់គណៈកម្មការជាតិមក ក្រុមហ៊ុនដែលធ្លាប់តែមានការកាប់ និងដឹកជញ្ជូនឈើចូលក្នុងក្រុមហ៊ុនយ៉ាងសន្ធឹកសន្ធាប់នោះ ក៏មានស្ថានភាពស្ងប់ស្ងាត់ ខណៈម្ចាស់ក្រុមហ៊ុនបានរត់គេចខ្លួនទាំងអស់ រួមទាំងមន្ត្រីរដ្ឋបាលព្រៃឈើក៏កំពុងរត់គេចខ្លួនដែរ។ លោកស្នើឲ្យអាជ្ញាធរបន្តការបោសសម្អាតឈ្មួញទុច្ចរិតទាំងនេះ ព្រោះពួកគេបានធ្វើអាជីវកម្មកាប់បំផ្លាញព្រៃឈើជាច្រើនឆ្នាំកន្លងមកហើយ ដោយមិនមានការទប់ស្កាត់ទេ។
លោកថា៖ «ក្រុមហ៊ុនអាជីវកម្មឈើទាំងនេះ មានមួយចំនួនគាត់កាប់ឈើខ្លួនគាត់ដោយផ្ទាល់ កាប់ក្នុងដីសម្បទានអស់ ងាកមកកាប់តាមតំបន់ផ្សេងទៀត។ ក្រុមហ៊ុនមួយចំនួនទៀត គាត់បានដីសម្បទានពីរដ្ឋាភិបាល គាត់ក៏ជួលឲ្យក្រុមហ៊ុនផ្សេងកាប់ព្រៃ ហើយសម្អាតដីឲ្យគាត់ ពេលសម្អាតដីហើយ គាត់ទុកចោល ហើយរត់ទៅកាប់ឈើនឹងគេដែរ»។
ជាមួយគ្នានេះ កម្លាំងកងរាជអាវុធហត្ថខេត្តស្ទឹងត្រែង សហការជាមួយសមត្ថកិច្ចពាក់ព័ន្ធ បានបន្ដបើកប្រតិបត្តិការបង្ក្រាបរថយន្ដប៉ាកុងដឹកឈើបាន ៦ គ្រឿងទៀត នៅស្រុកសេសាន ហើយរថយន្តទាំងនោះត្រូវបានដុត និងកាត់ជាកំណាត់ៗ ដើម្បីបំផ្លាញចោលនៅនឹងកន្លែង។
លោក អេង ហ៊ី ក៏បានថ្លែងក្នុងសន្និសីទទៀតថា ក្រោមការដឹកនាំអនុវត្តដោយលោក អៀង វ៉ាន់ឌី មេបញ្ជាការកងរាជអាវុធហត្ថខេត្តស្ទឹងត្រែង សហការជាមួយសមត្ថកិច្ចពាក់ព័ន្ធ និងមានការសម្របសម្រួលពីតំណាងអយ្យការអមសាលាដំបូងខេត្ត បានរកឃើញរថយន្ដប៉ាកុងចំនួន ៦ គ្រឿង នៅចំនួន ៥ កន្លែងផ្សេងគ្នា ដែលជាមធ្យោបាយដឹកជញ្ជូនបទល្មើសព្រៃឈើ។
លោកបញ្ជាក់ថា៖ «អាវុធហត្ថខេត្ត បានរុករកឃើញរួចប្រមូលមកដុតបំផ្លាញចោលចំនួន ៣ កន្លែង។ ក្នុងនោះ សមត្ថកិច្ចបានដុតនៅចំណុចភូមិឃុំស្រែគរថ្មី ស្រុកសេសាន ចំនួន ៤ គ្រឿង និងដុតនៅភូមិច្រប់ ឃុំក្បាលរមាស ស្រុកសេសាន ខេត្តស្ទឹងត្រែងចំនួន ២ គ្រឿង។ ដោយឡែកឈើលេខ ១២ ចំនួន ២ គំនរមិនទាន់វាស់វែង បានប្រគល់ជូនរដ្ឋបាលព្រៃឈើយកទៅរក្សាទុក»។
គួររំឭកថា រហូតមកដល់ពេលនេះ មានមនុស្សទាំងជនជាតិខ្មែរ និងចិនចំនួន ៩ នាក់បន្ថែមទៀត ត្រូវបានសមត្ថកិច្ចតាមចាប់ខ្លួន និងត្រូវតុលាការបញ្ជាឲ្យចូលខ្លួនបំភ្លឺជុំវិញករណីបទល្មើសព្រៃឈើពាក់ព័ន្ធជាមួយឧកញ៉ា ស៊ឹង សំអុល ដែលត្រូវបានតុលាការសម្រេចឃុំខ្លួនរួចហើយ ខណៈដែលជនជាតិវៀតណាម ២ នាក់ និងខ្មែរ ចំនួន ៣ នាក់ ក្នុងបទល្មើសព្រៃឈើមួយផ្សេងទៀត ត្រូវបានតុលាការចោទប្រកាន់ និងបញ្ជូនទៅឃុំខ្លួន កាលពីថ្ងៃទី ១៥ ខែកក្កដា៕
