ភ្នំពេញ/សៀមរាបៈ បុរសម្នាក់ត្រូវបានគេប្រទះឃើញស្លាប់ ដោយដាច់ក្បាលចេញពីដងខ្លួននៅលើកំណាត់ផ្លូវដែកភ្នំពេញ-ក្រុងព្រះសីហនុ នៅសង្កាត់កន្ទោក ខណ្ឌកំបូល រាជធានីភ្នំពេញ កាលពីព្រឹកថ្ងៃចន្ទ ជាគ្រោះថ្នាក់ដែលសមត្ថកិច្ចអះអាងថា មកពីរថភ្លើងបុកហើយកិនពីលើ ខណៈនៅខេត្តសៀមរាបកាលពីថ្ងៃអាទិត្យមានករណីក្រឡាប់រថយន្តនៅចំណោតភ្នំគូលែនស្លាប់ ២ និងរបួស ១១ នាក់។
លោក ហង្ស មុនី អធិការខណ្ឌកំបូលបានប្រាប់ភ្នំពេញប៉ុស្តិ៍ថា ជនរងគ្រោះ ឈ្មោះ លី លាភ អាយុ ៣៧ ឆ្នាំ ជាជាងជួសជុលរថយន្ត ស្នាក់នៅក្នុងភូមិ-សង្កាត់ កើតហេតុខាងលើ។ លោកថា តាមសាក្សីនៅយប់ថ្ងៃអាទិត្យគេឃើញជនរងគ្រោះបានអង្គុយផឹកស៊ីជាមួយមិត្តរួមការងាររហូតដល់ម៉ោង ១១ និង ៣០ នាទីយប់ទើបឈប់បន្ទាប់មកជនរងគ្រោះបានដើរទៅអង្គុយលើផ្លូវរថភ្លើងនិយាយទូរស័ព្ទម្នាក់ឯង។ លុះព្រឹកឡើងក៏ត្រូវបានគេឃើញស្លាប់នៅ លើកំណាត់ផ្លូវដែកនោះដោយក្បាលដាច់ចេញពីដងខ្លួន។
លោក មុនី បានបញ្ជាក់ថា៖ «បើតាមសាក្សីនិងស្នាមឈាមលើផ្លូវដែក សមត្ថកិច្ចជំនាញយើងសន្និដ្ឋានថាការស្លាប់របស់ជនរងគ្រោះ គឺបណ្ដាលមកពីជនរងគ្រោះស្រវឹងស្រា ហើយដេកលើផ្លូវដែក ហើយត្រូវរថភ្លើងបើកមកកិនពីលើតែម្ដង»។
ដោយឡែក នៅឯខេត្តសៀមរាប មានសេចក្ដីរាយការណ៍ពីនគរបាលចរាចរណ៍ថា មានជនជាតិចិន ២ នាក់បានស្លាប់ និង ១១ នាក់ទៀតបានរងរបួសធ្ងន់ និងស្រាល ដោយសារគ្រោះថ្នាក់ក្រឡាប់រថយន្តលើកំណាត់ផ្លូវចំណោតចុះពីភ្នំគូលែន។
លោក ជឹម សុវណ្ណ ប្រធានការិយាល័យនគរបាលចរាចរណ៍ខេត្តសៀមរាប បានប្រាប់ភ្នំពេញប៉ុស្តិ៍កាលពីម្សិលមិញថា ជនជាតិចិនដែលបានស្លាប់ក្នុងឧបទ្ទវហេតុនេះ រួមមាន ឈ្មោះ កៅ ជា ភេទស្រី អាយុ ៥៩ ឆ្នាំ រស់នៅខេត្ត Liaoning ភាគខាងជើងប្រទេសចិន និងម្នាក់ទៀតឈ្មោះ ហ៊ូ យូជា ភេទស្រី អាយុ ១៧ ឆ្នាំ រស់នៅក្នុងខេត្ត Hebei ភាគខាងជើងប្រទេស ចិន។
លោកបានបញ្ជាក់ថា៖ «សពជនរងគ្រោះត្រូវបាននាំយកទៅតម្កល់ទុកក្នុងមន្ទីរពេទ្យរ៉ូយ៉ាល់អង្គរក្រុងសៀមរាបដើម្បីរង់ចាំមន្ត្រីកុងស៊ុលចិនប្រចាំកម្ពុជាមកទទួលនាំយកទៅប្រគល់ជូនក្រុមគ្រួសារ និងសាច់ញាតិ យកទៅធ្វើបុណ្យតាមប្រពៃណីចិន។ ចំណែកអ្នករបួស ១១ នាក់ផ្សេង កំពុងត្រូវបានជួយសង្គ្រោះព្យាបាលពីក្រុមគ្រូពេទ្យជំនាញនៃមន្ទីរពេទ្យរ៉ូយ៉ាល់អង្គរ» ។
លោកបានឲ្យដឹងថា ក្រោយពីកើតហេតុភ្លាមៗ អ្នកបើកបររថយន្ត និងមគ្គុទ្ទេសក៍ទេសចរណ៍បានរត់គេចខ្លួនដែលពេលនេះ សមត្ថកិច្ចកំពុងស្រាវជ្រាវដើម្បីកសាងសំណុំ រឿងបញ្ជូនទៅតុលាការចាត់វិធានការតាមផ្លូវច្បាប់។
តាមរបាយការណ៍របស់នគរបាលស្រុកស្វាយលើដែលភ្នំពេញប៉ុស្តិ៍ទទួលបានពីម្សិលមិញឲ្យដឹងថា គ្រោះថ្នាក់ចរាចរណ៍ក្រឡាប់រថយន្តខាងលើនេះ បានកើតឡើងនៅរសៀលថ្ងៃអាទិត្យ ខណៈពួកគេត្រឡប់ពីទស្សនាតំបន់រមណីយដ្ឋានភ្នំគូលែន។
របាយការណ៍បានបញ្ជាក់ថា៖ «មូលហេតុនៃគ្រោះថ្នាក់ក្រឡាប់រថយន្តនេះគឺបណ្ដាលមកពីអ្នកបើកបរខ្វះការប្រុងប្រយ័ត្ន និងក៏បណ្ដាលមកពីកត្តាផ្លូវមានភាពបត់បែននិងចោតខ្លាំងពេកផងដែរ»។
បើតាមការអះអាងពីលោក ហួ ហុកម៉េង នាយរងផ្នែកចរាចរណ៍ស្រុកស្វាយលើថា កាលពីជាង ១ សប្ដាហ៍មុនក៏មានករណីក្រឡាប់រថយន្តនៅម្ដុំចំណោតចុះពីលើភ្នំគូលែននេះផងដែរដោយបានបង្កឲ្យពលរដ្ឋខ្មែរចំនួន ១១ នាក់ បានរងរបួសធ្ងន់ និងស្រាល។
យ៉ាងណាក៏ដោយ កាលពីព្រឹកថ្ងៃចន្ទ ក្រុមមន្ត្រីជំនាញនៃមន្ទីរសាធារណការ និងដឹកជញ្ជូនខេត្តសៀមរាប បានចុះទៅពិនិត្យស្ថានភាពផ្លូវដើម្បីធ្វើការឈូសឆាយ កែសម្រួលផ្លូវនោះឡើងវិញ៕