.jpg)
អំពើពុករលួយនៅកម្ពុជាស្ថិតនៅលេខរៀងទី ១៦១ លើ ១៨០ ប្រទេសនាឆ្នាំ ២០១៧។ ផា លីណា
ភ្នំពេញៈ ប្រទេសកម្ពុជាបានទទួលពិន្ទុ ២១ លើពិន្ទុខ្ពស់បំផុត ១០០ ក្នុងឆ្នាំ ២០១៧ ដោយឈរនៅលេខរៀងទី ១៦១ ក្នុងចំណោម ១៨០ ប្រទេស ដែលនេះបង្ហាញថាប្រទេសកម្ពុជាមានកម្រិតនៃអំពើពុករលួយក្នុងវិស័យសាធារណៈ ខណៈចំណាត់ថ្នាក់នេះមិនមានភាពប្រែប្រួលនោះទេ ក្នុងរយៈពេល ៤ ឆ្នាំមកនេះ ។ នេះបើយោងតាមសេចក្តីប្រកាសព័ត៌មាននាថ្ងៃនេះរបស់អង្គការតម្លាភាពកម្ពុជា។
ការចេញផ្សាយដែលយោងទៅលើលទ្ធផលសន្ទស្សន៍នៃការយល់ឃើញពីអំពើពុករលួយនៃលេខាធិការដ្ឋាននៃអង្គការតម្លាភាពអន្តរជាតិនៅទីក្រុងប៊ែរឡាំង ប្រទេសអាល្លឺម៉ង់បានផ្តល់ពិន្ទុទៅលើសន្ទស្សន៍ពី ០ (ពុករលួយខ្លាំង) ដល់ ១០០ ពិន្ទុ (ស្អាតស្អំខ្លាំង)។ លទ្ធផលនេះបង្ហាញថា ប្រទេសកម្ពុជានៅតែមិនមែនភាពប្រែប្រួលនូវអំពើពុករលួយក្នុងវិស័យសាធារណៈ ទោះបីជាឆ្នាំនេះមានការកើនឡើងនូវចំនួនប្រទេសចំនួន ៤ នៅក្នុងការផ្តល់ពិន្ទុនេះក្តី។
បើប្រៀបធៀបទៅនឹងប្រទេសដទៃទៀតប្រទេសកម្ពុជាទទួលបានពិន្ទុទាបជាងគេនៅក្នុងតំបន់អាស៊ាន ហើយជាប្រទេសទទួលបានពិន្ទុទាបទី ៣ ក្នុងតំបន់អាស៊ីប៉ាស៊ីហ្វិច ស្របពេលដែលប្រទេសផ្សេងៗក្នុងតំបន់អាស៊ានមានការប្រែប្រួលនូវចំនួនពិន្ទុ។
ជាក់ស្តែងប្រទេសប្រ៊ុយណេកើនឡើងពី ៥៨ ទៅ ៦២ ប្រទេសថៃ ពី ៣៥ ទៅ ៣៧ ប្រទេសវៀតណាមកើនពី ៣៣ ទៅ ៣៥ ប្រទេសមីយ៉ាន់ម៉ាកើនពី ២៨ ទៅ ៣០។ ឯប្រទេសម៉ាឡេស៊ីថយពី ៤៩ មក ៤៧ ប្រទេសហ្វីលីពីនថយពី ៣៥ មក ៣៤ ប្រទេសឡាវថយពី ៣០ មក ២៩ ប្រទេសសឹង្ហបុរីបាន ៨៩ ពិន្ទុ និងប្រទេសឥណ្ឌូនេស៊ីរក្សាពិន្ទុដដែលដូចកម្ពុជាដែរ។
ចំពោះប្រទេសកម្ពុជា ប្រភពទិន្នន័យចំនួន ៨ ដែលត្រូវបានប្រើប្រាស់ដើម្បីគណនាពិន្ទុសន្ទស្សន៍នៃការយល់ឃើញពីអំពើពុករលួយមានដូចជា៖ សន្ទស្សន៍នៃបម្រែបម្រួលរបស់មូលនិធិ Bertelsmann ឆ្នាំ ២០១៧-២០១៨ ចំណាត់ថ្នាក់ហានិភ័យប្រចាំប្រទេសរបស់ទីភ្នាក់ងារសេដ្ឋវិទូ ឆ្នាំ ២០១៧ ចំណាត់ថ្នាក់ហានិភ័យប្រចាំប្រទេសស្តីពីការយល់ដឹងជាសកលឆ្នាំ ២០១៦ ទីភ្នាក់ងារប្រឹក្សាហានិភ័យនយោបាយ និងសេដ្ឋកិច្ចទ្វីបអាស៊ីឆ្នាំ ២០១៧ ការវាយតម្លៃស្ថាប័ន និងគោលនយោបាយប្រចាំប្រទេសរបស់ធនាគារពិភពលោកឆ្នាំ ២០១៧ ការស្ទង់មតិពីធុរៈជនរបស់វេទិកាសេដ្ឋកិច្ចពិភពលោក (EOS) ឆ្នាំ ២០១៧ សន្ទស្សន៍ស្តីពីនីតិរដ្ឋរបស់គម្រោងយុត្តិធម៌ពិភពលោកឆ្នាំ ២០១៧-២០១៨ និងគម្រោងនៃភាពផ្សេងគ្នានៃប្រជាធិបតេយ្យ (V-Dem) ឆ្នាំ ២០១៧។
លោក ព្រាប កុល នាយកប្រតិបត្តិនៃអង្គការតម្លាភាពកម្ពុជាមានប្រសាសន៍ថា៖ «រដ្ឋាភិបាលកម្ពុជាគួរអនុវត្តកិច្ចខិតខំប្រឹងប្រែងនានាដើម្បីលើកកម្ពស់ការចូលរួមយ៉ាងសកម្មរបស់សង្គមស៊ីវិល អង្គការមិនមែនរដ្ឋាភិបាល និងអង្គការសហគមន៍ក្នុងការបង្ការ ប្រយុទ្ធប្រឆាំងអំពើពុករលួយ និងលើកកម្ពស់ការយល់ដឹងរបស់សាធារណជនទៅលើអត្ថិភាពមូលហេតុ ភាពធ្ងន់ធ្ងរ និងការគំរាមកំហែងនានាដែលបង្កឡើងដោយអំពើពុករលួយដូចមានចែងក្នុងមាត្រា ១៣ នៃអនុសញ្ញាអង្គការសហប្រជាជាតិប្រឆាំងអំពើពុករលួយដែលប្រទេសកម្ពុជាបានផ្តល់សច្ចាប័ន»។
លោក សុខ ឥសាន អ្នកនាំពាក្យគណបក្សប្រជាជនកម្ពុជាច្រានចោលរបាយការណ៍ថា រកឃើញមានអំពើពុករលួយខ្លាំង ហើយរដ្ឋាភិបាលមិនយកចិត្តទុកដាក់រឿងចំណាត់ថា្នក់ អំពើពុករលួយនេះឡើយ សំខាន់សង្គមមានការអភិវឌ្ឍន៍។
លោកថ្លែងដូច្នេះថា៖ «មានអ្នកថា ថាបានតើ តែបើគេឲ្យរកអំពើពុករលួយតិចថារកមិនឃើញ។ ខ្ញុំមិនយកចិត្តទុកដាក់រឿងចំណាត់ថ្នាក់ ១,២,៣ ទេ បញ្ហាសំខាន់ឲ្យតែសង្គមកម្ពុជាមានការអភិវឌ្ឍ មានការរីកចម្រើន ហើយជីវភាពរបស់ប្រជាជនមានការកែលម្អជាបន្តបន្ទាប់បណ្ដើរៗប្រចាំថ្ងៃទៅរកការរីកចម្រើន។ អ៊ីចឹងវាឆ្លុះបញ្ចាំងថាវាអត់មានអំពើពុករលួយដូចគាត់ថាទេ។ វាមានបន្តិចបន្តួច តែយើងទៅរកឯណា ពាក្យថាលួចគេមិនឲ្យដឹងឯណា។ អាពាក្យមិនឲ្យដឹងហ្នឹងគេថាលួច»៕
(រាយការណ៍បន្ថែម នៀម ឆេង)
