.jpg)
ជនសង្ស័យចិនដែលសមត្ថកិច្ចចាប់បានកាលពីថ្ងៃទី ១៤ មករា ពាក់ព័ន្ធចាប់ជំរិតនៅខេត្តព្រះសីហនុ។ រូបថត ហ្វេសប៊ុក
ព្រះសីហនុៈ ស្ត្រីជនជាតិចិនម្នាក់ត្រូវបានកម្លាំងកងរាជអាវុធហត្ថខេត្តព្រះសីហនុជួយរំដោះចេញពីបន្ទប់ផ្ទះជួល ១ កន្លែងស្ថិតក្នុងសង្កាត់ ៣ ក្រុងព្រះសីហនុកាលពីល្ងាចថ្ងៃទី ១៤ ខែមករា បន្ទាប់ពីនាងត្រូវបានក្រុមជនជាតិចិនដូចគ្នា ៥ នាក់ទៀតចាប់បង្ខាំងទុកជាច្រើនថ្ងៃ ដើម្បីជំរិតទារប្រាក់ពីក្រុមគ្រួសាររបស់នាងនៅប្រទេសចិន ឯជនសង្ស័យដែលចាប់នាងបង្ខាំងនោះ ក៏ត្រូវបានចាប់ខ្លួនផងដែរ។
អ្នកនាំពាក្យកងរាជអាវុធហត្ថ្តលើផ្ទៃប្រទេសលោក អេង ហ៊ី ប្រាប់ភ្នំពេញប៉ុស្តិ៍ពីម្សិលមិញ ថាស្ត្រីរងគ្រោះជនជាតិចិនក្នុងករណីចាប់ជំរិតទារប្រាក់ដែលប្រព្រឹត្តដោយជនជាតិចិនខាងលើឈ្មោះ CHEN GUIQONG អាយុ ៣៤ ឆ្នាំ ជាអ្នកបម្រើការងារនៅក្នុងក្លិបកម្សាន្តនៃក្រុមហ៊ុនកាស៊ីណូ ១ ក្នុងក្រុងព្រះសីហនុ។
ចំណែកក្រុមជនសង្ស័យ ៥ នាក់ ដែលរួមគំនិតគ្នាក្នុងអំពើចាប់ជំរិតទារប្រាក់ពីស្ត្រីរងគ្រោះខាងលើនេះលោកនៅមិនទាន់ដឹងអំពីអត្តសញ្ញាណនោះទេ ព្រោះលោកនៅមិនទាន់ទទួលបានរបាយការណ៍លម្អិតពីមន្ត្រីជំនាញនៃកងរាជអាវុធហត្ថខេត្តព្រះសីហនុនៅឡើយ។
លោក ហ៊ី បញ្ជាក់ថា៖ «យោងតាមសេចក្ដីរាយការណ៍ផ្ទាល់មាត់ពីខាងខេត្តព្រះសីហនុនៅព្រឹកថ្ងៃពុធ [ម្សិលមិញ]នេះ ជនសង្ស័យ និងជនរងគ្រោះកំពុងត្រូវបានមន្ត្រីជំនាញនៃមន្ទីរយុត្តិធម៌កងរាជអាវុធហត្ថខេត្តព្រះសីហនុធ្វើការសាកសួរចម្លើយដើម្បីកសាងសំណុំរឿងបញ្ជូនទៅតុលាការ ចាត់ការបន្តតាមនីតិវិធីច្បាប់»។
បើតាមការអះអាងរបស់លោក កែវ សុផល មេបញ្ជាការរងកងរាជអាវុធហត្ថខេត្តព្រះសីហនុ ប្រតិបត្តិការរំដោះជនរងគ្រោះពីអំពើចាប់បង្ខាំង និងធ្វើទារុណកម្មដើម្បីជំរិតទារប្រាក់ ដែលប្រព្រឹត្តដោយក្រុមជនជាតិចិនដូចគ្នានេះ ធ្វើឡើងតាមបណ្ដឹងរបស់ស្ត្រីជនជាតិចិនម្នាក់កាលពីព្រឹកថ្ងៃទី ១៤ ខែមករា។ ស្ត្រីជនជាតិចិននោះ អះអាងថាមិត្តរួមការងាររបស់គាត់ម្នាក់ [ស្ត្រីរងគ្រោះ] បានបាត់ខ្លួនកាលពីយប់ថ្ងៃទី ១១ មករា បន្ទាប់ពីនាងបានចេញទៅក្រៅជាមួយភ្ញៀវជនជាតិចិន ១ ក្រុមមានគ្នា ៤-៥ នាក់។
លោក សុផល និយាយថា៖ «ក្រោយទទួលបានបណ្ដឹងនោះ កម្លាំងរបស់យើងបានចាប់ផ្ដើមធ្វើការស្រាវជ្រាវភ្លាមៗលើករណីនេះ ហើយបានឈានដល់ការចាប់ឃាត់ខ្លួនក្រុមជនសង្ស័យជនជាតិចិនចំនួន ៥ នាក់ និងបានរំដោះស្ត្រីជនជាតិចិនម្នាក់ដែលជាជនរងគ្រោះផងដែរ»។
លោកបញ្ជាក់ថា៖ «ស្ត្រីរងគ្រោះត្រូវបានក្រុមជនសង្ស័យវាយខ្នោះដៃជាប់នឹងតុ បង្ខាំងនៅក្នុងបន្ទប់ផ្ទះជួល និងមានស្នាមជាំដោយការវាយធ្វើទារុណកម្មលើរាងកាយរបស់នាងដែរ»។
បើតាមលោក សុផល ក្នុងប្រតិបត្តិការនោះ កម្លាំងសមត្ថកិច្ចបានដកហូតវត្ថុតាងមួយចំនួនរួមមាន លុយយន់ ១៥០ យន់ លុយខ្មែរ ៦៩ ០០០ រៀល លិខិតឆ្លងដែន ៤ ក្បាល រថយន្តស្តារិច ពាក់ស្លាកលេខព្រះសីហនុ 2C-8756 ១ គ្រឿង ទូរស័ព្ទ ២ គ្រឿង អត្តសញ្ញាណប័ណ្ណចិន ៧ សន្លឹក កាបូបស្ពាយចំហៀង ១ ស្រោមបិទមុខ ៨ ម៉ាស់បិទមុខ ១ ម៉ាស៊ីនវេរលុយ ១ គ្រឿង។
លោកបានបន្ថែមថា បច្ចុប្បន្នទាំងជនរងគ្រោះ និងជនសង្ស័យកំពុងស្ថិតក្រោមនីតិវិធីនៃការស៊ើបសួរចម្លើយដោយក្រុមមន្ត្រីជំនាញនៃមន្ទីរកងរាជអាវុធហត្ថខេត្តព្រះសីហនុ៕
