ភ្នំពេញៈ ក្រសួងអប់រំ យុវជន និងកីឡា គ្រោងប្រកាសលទ្ធផលប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) ជាថ្មីម្ដងទៀតនៅថ្ងៃនេះដែលមានអ្នកជាប់រហូតដល់ ៦៧,០៧ ភាគរយស្មើនឹង ៧៦ ០៣៤ នាក់ជាចំនួនខុសពីប្រកាសលើកមុនដែលមានតែ ៦៦,២១ ភាគរយ។ នេះបើតាមសេចក្ដីប្រកាសរបស់ក្រសួងកាលពីម្សិលមិញ។
ការសម្រេចប្រកាសលទ្ធផលប្រឡងជាថ្មីនេះបានកើតឡើង បន្ទាប់ពីគណៈកម្មការកោសល្យវិច័យរបស់ក្រសួងអប់រំទើបបានរកឃើញដំណើរការបូកស្រង់ពិន្ទុតាមប្រព័ន្ធកុំព្យូទ័រមានបញ្ហាបច្ចេកទេសដែលបណ្ដាលឲ្យប៉ះពាល់ដល់ពិន្ទុមុខវិជ្ជាគណិតវិទ្យារបស់បេក្ខជនចំនួន ៧៤០ បន្ទប់ដែលជាការរកឃើញក្រោយពីមានបេក្ខជនចំនួនជាង ១០០០ នាក់បានដាក់បណ្ដឹងខណៈពិន្ទុរបស់ពួកគេមានភាពខុសប្រក្រតី។
បើតាមសេចក្ដីប្រកាសព័ត៌មានលទ្ធផលអ្នកជាប់ពិតប្រាកដមានដល់ ៧៦ ០៣៤ នាក់ក្នុងនោះនិទ្ទេស A មាន ៤០៨ នាក់,និទ្ទេស B មាន ២ ២២២ នាក់,និទ្ទេស C ចំនួន ៦០៤១ នាក់ និទ្ទេស D ចំនួន ១៥១៨០ នាក់ និងនិទ្ទេស E មានចំនួន ៥២ ១៨៣ នាក់។
យ៉ាងណាក្ដីការរកឃើញនេះមានការទាក់ទងតែផ្នែកវិទ្យាសាស្ត្ររីឯថ្នាក់វិទ្យាសាស្ដ្រសង្គមមិនមានផលប៉ះពាល់ទេ។
បើតាមក្រសួងអប់រំថា ការចេញលទ្ធផលថ្មីសម្រាប់ថ្នាក់វិទ្យាសាស្ដ្រត្រូវធ្វើនៅថ្ងៃទី ១៤ ខែកញ្ញា ឆ្នាំ ២០១៨ នេះលើទំព័រហ្វេសប៊ុកនៃក្រសួង និងនៅថ្ងៃ ទី១៥ ខែកញ្ញា ឆ្នាំ ២០១៨ នៅតាមមន្ទីរអប់រំ យុវជន និងកីឡា។
នៅមុនពេលរកឃើញភាពមិនប្រក្រតីនេះក្រសួងបានប្រកាសលទ្ធផលឃើញមានអ្នកប្រឡងជាប់ ៦៦,២១ ភាគរយស្មើនឹង ៧៥០៥៩ នាក់ចាប់ពីនិទ្ទេស A ដល់ E ក្នុងនោះអ្នកជាប់និទ្ទេស A មាន ២៩០ នាក់,និទ្ទេស B មាន ១៥៣២ នាក់,និទ្ទេស C មាន ៤៦៣១ នាក់,និទ្ទេស D មាន ១៣- ៩៩៩ នាក់ និងនិទ្ទេស E មាន ៥៤ ៦០៧ នាក់ ខណៈអ្នកធ្លាក់ដោយស្វ័យប្រវត្តិមាន ១៧ នាក់។
យ៉ាងណាក៏ដោយបន្ទាប់ពីចេញលទ្ធផលលើកមុនមកមានអ្នកដាក់ពាក្យបណ្ដឹងមកក្រសួងអប់រំ យុវជន និងកីឡាជាង ១០០០ នាក់ដោយភាគច្រើនមិនអស់ចិត្តលើពិន្ទុដែលពួកគេទទួលបានជាពិសេសមុខវិជ្ជាគណិតវិទ្យា។
ទាក់ទងនឹងភាពមិនប្រក្រតីនៃលទ្ធផលពិន្ទុនេះដែរសមាគមគ្រូបង្រៀនកម្ពុជាឯករាជ្យកាលពីម្សិលម្ង៉ៃបានស្នើឱ្យក្រសួងអប់រំ យុវជន និងកីឡាពន្យារពេលការប្រឡងជ្រើសរើសអាហារូបករណ៍ ប្រឡងចូលសាកលវិទ្យាល័យ និងគ្រឹះស្ថាននានាដើម្បីឱ្យអ្នកដាក់ពាក្យបណ្ដឹងអស់ចិត្តនឹងលទ្ធផលប្រឡងរបស់ពួកគេ។
លិខិតរបស់សមាគមគ្រូបង្រៀនកម្ពុជាឯករាជ្យដែលបានផ្ញើជូនលោក ហង់ ជួនណារ៉ុន រដ្ឋមន្ដ្រីក្រសួងអប់រំ យុវជន និងកីឡាបានបង្ហាញថាមានបេក្ខជនប្រឡងសញ្ញាបត្រមធ្យមសិក្សាទុតិយភូមិជាច្រើនបានប្ដឹងពីបញ្ហាពិន្ទុគណិត និងលទ្ធផលប្រឡងរបស់ពួកគេ។
លិខិតដដែលនោះបានបញ្ជាក់ថា «ដើម្បីឲ្យបេក្ខជនមកតវ៉ាមានឱកាសបានប្រឡងគ្រូមធ្យម អាហារូបករណ៍ និងចូលរៀនតាមសាកលវិទ្យាល័យ និងគ្រឹះស្ថានសិក្សានានា សមាគមគ្រូបង្រៀនឯករាជ្យសុំឲ្យក្រសួងអប់រំពន្យារពេលការប្រឡងចូលរៀននៅគ្រប់កន្លែងដោយរង់ចាំដំណោះស្រាយអំពីការតវ៉ារបស់បេក្ខជនចប់រួចរាល់សិន»។
លោកស្រី អ៊ុក ឆាយ៉ាវី ប្រធានសមាគមគ្រូបង្រៀនកម្ពុជាឯករាជ្យបានថ្លែងប្រាប់ភ្នំពេញប៉ុស្ដិ៍ថា៖ «យើងមើលឃើញថាមានភាពមិនប្រក្រតីចំពោះលទ្ធផលប្រឡងរបស់សិស្សានុសិស្ស។
លទ្ធផលធ្វើឲ្យពួកគាត់មានការខកចិត្ដពិសេសចំពោះសិស្សដែលរៀនពូកែដូចជាមុខវិជ្ជាគណិតវិទ្យាជាដើម»។
លោកស្រីបន្ថែមថា៖ «ក្រសួងក៏យល់ព្រមបើកវិញ្ញាសាម្ដងទៀតដែរ។ អ៊ីចឹងក្នុងនាមជាសមាគមគ្រូបង្រៀនឯករាជ្យខ្ញុំសុំស្នើទៅក្រសួងពន្យារពេលចំពោះការប្រឡងចូលនានាគឺគួរតែលើកពេលការប្រឡងគ្រូ ឬប្រឡងចូលសាកលវិទ្យាល័យអីហ្នឹងរហូតមានដំណោះស្រាយចាំបើកការប្រឡងចូលឡើងវិញ»។
លោកស្រីបានលើកឡើងថាការសុំពន្យារពេលប្រឡងនេះគឺដើម្បីឲ្យសិស្សបានអស់ចិត្ដចំពោះលទ្ធផលរបស់ពួកគេថា តើពិតជាធ្លាក់បែបនេះឬក៏អត់? ហើយក្រសួងអប់រំក៏អាចបង្ហាញថាបានដឹកនាំការប្រឡងទៅដោយរលូនយ៉ាងណាដែរ ហើយក៏ដើម្បីឲ្យទទួលបានយុត្ដិធម៌ល្អទាំងសងខាងផងដែរ។
លោកស្រីបន្ថែមថា៖ «យើងសប្បាយចិត្ដដែលក្រសួងយល់ព្រមពិនិត្យឡើងវិញនូវសំណៅវិញ្ញាសារបស់សិស្សនេះ។ ប៉ុន្ដែយើងសុំឲ្យពន្យារពេលចំពោះការប្រឡងចូលតាមស្ថាប័នផ្សេងៗនេះដើម្បីឲ្យបេក្ខជនអស់ចិត្ត... »។
លោក ឌី ខាំបូលី អ្នកនាំពាក្យក្រសួងអប់រំ យុវជន និងកីឡាបានប្រាប់ភ្នំពេញប៉ុស្ដិ៍ម្សិលមិញថា ក្រសួងអប់រំបានទទួលលិខិតរបស់សមាគមនោះហើយ ប៉ុន្ដែរាល់ការសម្រេចផ្សេងៗគឺមិនទាន់មានគោលការណ៍ទេ។
លោកបានបញ្ជាក់ថា៖ «មិនទាន់មានគោលការណ៍អ្វីទាំងអស់ទុកពេលឲ្យគណៈកម្មការកោសល្យវិច័យធ្វើការសិន...។ យ៉ាងណាលោក ឌី ខាំបូលី បានបញ្ជាក់បន្ថែមកាលពីយប់មិញថា៖ «ក្រសួងបានកែតម្រូវរួចរាល់ហើយនឹងចេញប្រកាសលទ្ធផលនៅថ្ងៃស្អែក[ ថ្ងៃនេះ] ហើយលទ្ធផលនេះគឺទូទាំងប្រទេស»។
គួររំឭកថាខណៈកំពុងទទួលបានពាក្យបណ្តឹងជាបន្តបន្ទាប់ ក្រសួងអប់រំយុវជន និងកីឡាធ្លាប់បានចេញសេចក្ដីប្រកាសព័ត៌មានមួយដោយបញ្ជាក់ថាក្រសួងកំពុងរៀបចំគណៈកម្មការកោសល្យវិច័យដើម្បីពិនិត្យដោះស្រាយបញ្ហាជូនដល់បេក្ខជន មាតាបិតា អាណាព្យាបាល ឬអ្នកពាក់ព័ន្ធ ប្រកបដោយវិជ្ជាជីវៈ និងស្មារតីទទួលខុសត្រូវខ្ពស់ដូចដែលធ្លាប់បានអនុវត្តតាមនីតិវិធីនាឆ្នាំកន្លងមក៕