.jpg)
លោក គង់ គាំ លើកម្រាមដៃបង្ហាញក្រោយការបោះឆ្នោតកាលពីពេលកន្លងមក។ ហុង មិនា
ភ្នំពេញៈ អតីតទីប្រឹក្សាជាន់ខ្ពស់នៃអតីតគណបក្សសង្គ្រោះជាតិលោក គង់ គាំ កាលពីម្សិលមិញបានប្រកាសត្រៀមខ្លួនចូលធ្វើនយោបាយសាជាថ្មី បន្ទាប់ពីរដ្ឋសភាបានអនុម័តដោយសំឡេងឯកច្ឆន្ទវិសោធនកម្មច្បាប់ស្ដីពីគណបក្សនយោបាយ ហើយបដិសេធចូលរួមឡើងវិញជាមួយអតីតគណបក្សសង្គ្រោះជាតិ។
លោក គង់ គាំ អ្នកនយោបាយជើងចាស់ដែលមានប្រវត្តិជាមន្ត្រីជាន់ខ្ពស់ក្នុងជួរគណបក្សប្រជាជនកម្ពុជា និងបានចូលរួមនយោបាយជាមួយលោក សម រង្ស៊ី ក្នុងទសវត្សរ៍ទី ៩០ និងក្រោយមកបានក្លាយជាប្រធានគណបក្ស សម រង្ស៊ី (បច្ចុប្បន្នគណបក្សភ្លើងទៀន) បានប្រកាសថា លោកគ្មានបំណងចូលនិវត្តន៍ពីកិច្ចការនយោបាយទេ ក្រោយសេចក្ដីស្នើវិសោធនកម្មច្បាប់មាត្រា ៤៥ ថ្មី (ស្ទួន) នៃច្បាប់ស្ដីពីគណបក្សនយោបាយចូលជាធរមាននោះ។
ក្នុងបទសម្ភាសជាមួយភ្នំពេញប៉ុស្តិ៍កាលពីម្សិលមិញលោក គង់ គាំ ដែលស្ថិតក្នុងចំណោមអ្នកនយោបាយទាំង ១១៨ រូបនៃអតីតបក្សប្រឆាំងដែលត្រូវហាមឃាត់ការធ្វើនយោបាយរយៈពេល ៥ ឆ្នាំបានប្រកាសស្វាគមន៍ការអនុម័តវិសោធនកម្មច្បាប់ស្ដីពីគណបក្សនយោបាយ និងអះអាងថាលោក «នឹងធ្វើលិខិត» ទៅលោក ស ខេង រដ្ឋមន្ត្រីក្រសួងមហាផ្ទៃដើម្បីស្នើសុំឲ្យលោកអាចមានលទ្ធភាពចូលធ្វើនយោបាយឡើងវិញ។
លោកថ្លែងថា៖ «ខ្ញុំមិនមានគំនិតថានឹងបញ្ចប់ជីវភាពនយោបាយទេ ដូច្នេះទោះបីជាខ្ញុំត្រូវបម្រាមតុលាការកំពូល ក៏ខ្ញុំអន្ទះអន្ទែងដែរ ដូច្នេះខ្ញុំទន្ទឹងថានឹងបាននីតិសម្បទាដើម្បីធ្វើនយោបាយឡើងវិញ។ ឥឡូវនេះមានវិសោធនកម្មហើយ ដូច្នេះខ្ញុំតាំងចិត្ត និងត្រៀមខ្លួនថានឹងធ្វើនីតិវិធីដែលអាចទទួលបាននីតិសម្បទាធ្វើនយោបាយបានវិញ»។
លោកអះអាងថាលោកគ្មានបំណងវិលទៅរកអតីតគណបក្សសង្គ្រោះជាតិដែលមានលោក សម រង្ស៊ី ជាប្រធានស្ដីទីគណបក្សនោះទេ គឺលោកមានបំណងទៅធ្វើជា «ទីប្រឹក្សា» គណបក្សឆន្ទៈខ្មែររបស់លោក គង់ មុនីកា ដែលត្រូវជាកូនប្រុសរបស់លោកជំនួសវិញ។
លោកបន្ថែមថា៖ «បំណងខ្ញុំគឺជាទីប្រឹក្សានៃគណបក្សឆន្ទៈខ្មែរដែលគេថាជា ប៉ូលថ្មីមួយ។ ខ្ញុំនៅតែមិនរារាំង...គណបក្សសង្គ្រោះជាតិទេ សង្គ្រោះជាតិគេតស៊ូសម្រេចតាមគោលការណ៍គេយ៉ាងណាស្រេចតែគេចុះ។ ខ្ញុំអាចត្រឹមតែជាទីប្រឹក្សារបស់គណបក្សឆន្ទៈខ្មែរដែលកូនប្រុសខ្ញុំគឺជាប្រធាន និងជាប៉ូលថ្មី និងឱកាសថ្មីដល់អតីតសមាជិកគណបក្សសង្គ្រោះជាតិខ្លះដែលគេមិននៅចាំ (CNRP)។ ជាឱកាសថ្មី និងជាជម្រើសថ្មីសម្រាប់ប្រជាពលរដ្ឋដែលធ្លាប់គាំទ្រគណបក្សសង្គ្រោះជាតិ ដើម្បីនឹងប្រកួតប្រជែងឲ្យមានការផ្លាស់ប្ដូរជាវិជ្ជមាននៅកម្ពុជានាថ្ងៃអនាគត»។
លោកបន្តថា៖ «ខ្ញុំផ្តោតតែទៅលើឆន្ទៈប្រជាពលរដ្ឋទេ ដូច្នេះខ្ញុំមានឱកាសដើម្បីចូលរួមកសាង អភិវឌ្ឍ និងបម្រើប្រជាពលរដ្ឋខ្មែរនៅថ្ងៃអនាគតនេះដោយប្រែក្លាយការជ្រុលនិយម ប្រឆាំងផ្តេកផ្តួលអីនោះមកជាការប្រជែង ចូលរួមការពារ កសាង ហើយប្រជែងគ្នាដើម្បីផ្លាស់ប្ដូរជាវិជ្ជមាននៅកម្ពុជា»។
លោក សម រង្ស៊ី ប្រធានចលនាសង្គ្រោះជាតិដែលទើបក្លាយជាប្រធានស្ដីទីនៃអតីតគណបក្សសង្គ្រោះជាតិអះអាងកាលពីថ្ងៃអង្គារថា ក្នុងចំណោមអ្នកដែលជាប់បម្រាមធ្វើនយោបាយរយៈពេល ៥ ឆ្នាំដែលចង់ទទួលបានសិទ្ធិធ្វើសកម្មភាពនយោបាយវិញគឺជាជន «ក្បត់» អតីតគណបក្សសង្គ្រោះជាតិទៅវិញទេ។
ទោះយ៉ាងណាលោក គង់ គាំ ដែលធ្លាប់ជាមនុស្សជំនិតរបស់លោក សម រង្ស៊ី បានប្រតិកម្មជំទាស់នឹងការតែងតាំងលោក សម រង្ស៊ី ជា «ប្រធានស្ដីទី» នៃអតីតគណបក្សសង្គ្រោះជាតិថាធ្វើឲ្យ «បែកបាក់ផ្ទៃក្នុង» និង បាត់បង់សាមគ្គីភាពគ្នា។
លោកសង្កត់ធ្ងន់ថា៖ «ការដែលធ្វើសន្និសីទកម្រិតពិភពលោកលើកទី ១ នៅអាត្លង់តា សហរដ្ឋអាមេរិក បានន័យថាគិតតែក្រុមបក្ខពួកខ្លួន អ៊ីចឹងគណបក្សគេដែលចូលរួមគ្នាគឺគណបក្សសិទ្ធិមនុស្ស ហើយនឹងគណបក្ស សម រង្ស៊ី បែកគ្នាអ៊ីចឹងមិនខុសពីអ្នកកាន់អំណាចសព្វថ្ងៃដែលត្រូវចោទថាឯកបក្ស តែខ្លួនឯងក្នុងបក្ស ២ ក៏មិនយកមតិរួមដែរ យកមតិតែម្ខាង គឺតែអតីតបក្ស សម រង្ស៊ី តែម្ខាង។ ដូច្នេះមិនអាចមកដឹកនាំប្រទេសជានីតិរដ្ឋបានទេ មិនអាចធ្វើឲ្យកម្ពុជាប្រែប្រួលជាវិជ្ជមានបានទេ»។
លោក គង់ គាំ បានថ្លែងទៀតបន្តថា៖ «គាត់ជាប្រធានចលនាសង្គ្រោះជាតិក្ដី ជាប្រធានស្ដីទីគណបក្សសង្គ្រោះជាតិក្ដី មើលទៅអត្តនោម័ត លោកប្រធាន សម រង្ស៊ី ក្រុមនិន្នាការ សម រង្ស៊ី មួយចំនួនធ្វើឲ្យផ្ទៃក្នុងគណបក្សសង្គ្រោះជាតិបែកបាក់ ហើយមានវិវាទគ្នាច្បាស់លាស់រវាងលោកប្រធាន សម រង្ស៊ី និងលោកប្រធាន កឹម សុខា។ ខ្ញុំឃើញច្បាស់ដែរដូច្នេះខ្ញុំជឿថាគណបក្សសង្គ្រោះជាតិប្រាកដជាមិនមានអត្តសញ្ញាណឡើងវិញ ហើយមិនបានសាមគ្គីគ្នាដូចការរំពឹងទុករបស់សកម្មជន ឬប្រជាពលរដ្ឋទេ»។
លោក សម រង្ស៊ី កាលពីម្សិលមិញបានថ្លែងទៅកាន់អតីតមន្ត្រីអតីតគណបក្សសង្គ្រោះជាតិទាំង ១១៨ រូប កុំទៅសុំសិទ្ធិធ្វើនយោបាយព្រោះសិទ្ធិធ្វើនយោបាយនេះគឺជាសិទ្ធិដែលមានស្រាប់ក្នុងឋានៈជាពលរដ្ឋ៕
